Oseas 11:8 - La'aqtaqa Ñim Lo'onatac 'Enauacna 2013

⁸ 'Am Efraín, ¿ca sheetectaxa da 'am sheca'ai? 'Am Israel, ¿ca sheetectaxa da 'am salat? ¿Isheto' peta'a da 'am selaxachigui da 'eeta'am so huaqta'a't nỹecpi ye Admá, huo'otaq da 'eeta'am da sheetec co'ollaxa so huaqta'a't nỹecpi ye Seboyin? ¡Da iquiyaqteỹaxac ỹataqta Aỹem iraxanapec, souaxat da ichoxonnataxanaxa da qoneta!

Toba del Oeste

⁸ »¿Toqoch'e auetapega am jaĝañi, Efraín? ¿Toqoch'e auetapega ja am 'te yecochiya, Israel? ¿Qo'li jaqanatet ta'le am japalaĝat, ena'am ca'li je'etec di'me noic jo'ne Admá, uotaĝa jen auena'am jodi'me Seboím ca'li 'uo joga'me je'etec? ¡Jana'me yequidiaqate yataqata yoqoch'em jenjo', yataqata am noqopita!

Oseas 11:8 Referans Kwoze

Jeremías 31:20

Na nhuo' le'ecpi maye chegoxoguet so Efraín, namayepi 'eeta'am ca ỹalec ỹauotaxat, ỹalec maye ỹactec da sauotec. Qaq na'aictaxa naxa da ñelaxa qalaxaye saishet da saxanec da seuennatega, da iquiyaqteỹaxac qalaq nỹeetai' qataq ñanomteguet da ichoxonnataxanaxa namayepi. Qaq 'era da ỹa'aqtac Aỹem nataxala'.»

Mateo 23:37

¡Qami' shiỹaxauapi maye qoñiitaña na Jerusalén! ¡Qami' shiỹaxauapi maye qoñiitaña na Jerusalén! Qami' qaualauache co'ollaxa so la'aqtaxanaxanecpi Ñim Lo'onatac 'Enauacna qataq so lamaxashecpi maye qami' namaxalo Ñimaye. Aỹem ỹataqta qalota naxa da sauotaique da qami' ñepaxattaleguete da sheeta'am aca 'olgaxa da ltelaxa ca llalaqpi da nqapaxaatalec, qalaxaye qami' saishet da Aỹem qauaqaita'a.

Oseas 6:4

Qaq Ñim Nataxala', 'eeta': ¿Ca sheeteco', 'am Efraín? Qataq ¿ca sheeteco', 'am Judá? Cha'aye da qarauotaxanaqtaiqui da sheeta, qalaq 'eeta'am na sheue ye nte'eta, qataq na 'aỹa da ña nte'etom nache quiguiñi.

Deuteronómio 32:36

Ñim Nataxala' deloclec qome na lalamaxat nhuo' le'ecpi, da ila'a da mashe qaica ca la'añaxac, nache Ñim Nataxala' choche ichoxoren qome ne'ena lamaxashecpi, qom ila'a da mashe imeuo, cam huo'o da la'añaxac.

Deuteronómio 29:23

Nache ỹauaachigui qome que'eca 'alhua da nda'a't da nlaqtelec na quiquiaxaraic, qataq na toue, qataq ỹataqta ỹavicta, nache saishet da qoỹanaxaalec, cha'aye qaica ca ñaxaalec camaye. Qaq nache 'eeta'am qome som huaqta'a't nỹecpi ye Sodoma, Gomorra, Admá qataq ye Seboim maye ilaxachigui co'ollaxa Ñim Nataxala', irolec da ỹataqta lta'araic layeloxo.

Judas 1:7

Qataq nache 'eeta'am da huaigui co'ollaxa so shiỹaxauapi maye lma' ye Sodoma qataq Gomorra qataq som nỹecpi maye saqaỹapeque yeemaye. Som hueta'a yemaye ỹataqta ỹaguec da lle'etaxaloxo qataq ỹo'ottac na ỹotta'a't lataxac da quisheguetaxac maye sa qaishetapec. Qaq ỹoqo'oye Ñim Lo'onatac 'Enauacna ỹauo'o da nhuaxanaguec, icorelec so norec maye saishet da 'om da yaqto' ỹo'ot da nque'eenaxac somayepi. Qaq damaye nachera da 'enauac qomi' qaivitaqteetegalo.

2 Pedro 2:6

Ñim Lo'onatac 'Enauacna nataqa'en ỹauo'o da nhuaxanaguec so shiỹaxauapi maye lma' ye nỹecpi ye Sodoma qataq ye Gomorra, nache ỹavigaxat, iviraxata'a da ndota't na alo, da yaqto' laloqnaxanaxat, dam huotaique 'eetec maye talec naqa'en nam shiỹaxauapi maye qauemaicpi.

Amós 4:11

Qataq qami' seroleguete so ỹataqta lta'araic lchec da qami' ñelaxaayiñi, 'eeta'am co'ollaq ñelaxaañi ye Sodoma qataq ye Gomorra, nache qoñeeta'am aca poqo maye qanqateeguesop ca norec, qalaxaye ñaqaiyeta saishet da aỹem qañe'eguelaqaỹa. Qaq 'era da la'aqtac Ñim Nataxala'.

Lamentaciones 1:20

¡'Am Nataxala', ña 'aumeten da ỹachetataic! ¡Ñanomteguet da ỹataqta lta'araic lqui'ic ana itogue! Da ñequi'ic qalaq ipataqta'a't añi iquiyaqte, naxa da tachigui iuel da aỹem sa salaq. De'era pa'auec, huaña da qaỹalauat so ỹalaqpi qairolec so ỹeelonec, qaq ne'ena npa'auo nataqa'en hueta'a da nleuaxa.

2 Reyes 13:23

Qalaxaye Ñim Nataxala', huo'o da lauotaxanaqtaic somayepi, nache ichoxoren souaxat da naỹamaxataxac Ñimaye, co'ollaq naỹamaxate' so Abraham, Isaac qataq so Jacob, nache Ñimaye saishet da ilaxachigui somayepi, qataq saishet da ca'ai, nache ivitta'a nagui.

2 Samuel 24:16

Qaq so nale piguem le'ec Ñim Nataxala', co'ollaq mashe huotaique da nlaxaañi ye Jerusalén, nache Ñim Nataxala' ntogottague' de'era qauem maye ỹo'ot, nache 'enapega so lamaxashec piguem le'ec maye ỹalauattac se'eso shiỹaxauapi, 'eeta': «¡A'aye, 'axaañi de'era 'auo'ottac!» Qaq se'eso namaxashec piguem le'ec, hueta'a co'ollaxa ye lchegoxosoxonqa' so Arauna som jebuseo, maye ichegoqtac na trigo.

Jueces 10:16

Huaña, nache so Israel le'ecpi ỹalat so ỹaqa'a atamnaxala'pi da yaqto' qaltaq do'onataxanot Ñim Nataxala'. Nache Ñimaye ỹataqta sa nalo'oguet da 'eeta souaxat da nque'eenaxac so Israel le'ecpi.

Génesis 14:8

Nache so nta'alpi maye ilotague' ye Sodoma qataq Gomorra, Adma, Zeboim qataq Bela, nache nqo'ona ye ca'amegue le'enaxat Sidín, nache deloguito soua nta'al,

Apocalipsis 18:18

Qaq co'ollaq ila'a na lmala'q se'eso lta'araic nỹecpi maye ỹavic, nache ỹa'alaq, 'eeta': «¡Saishet da huo'o ca lỹa lta'araic nỹecpi qataq 'añaxaic da 'eeta'am ye Babilonia!»

Apocalipsis 11:8

Nache da lo'ocỹaxa'c caamaye qaỹachetrangui na laiñi so nqa'aic lta'araic ye nỹecpi maye huaña co'ollaq qaỹalauat So Qarataxala' qaiuaxaneguet so npe'enaxaqui. Qaq na shiỹaxauapi ỹamata'ac yi'iye nỹecpi da naigui naqa'en da Sodoma qataq Egipto.

Sofonías 2:9

Qaq Aỹem maye ñeca'altauec, 'enapec Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi; na Moab le'ecpi 'eeta'am qome ye Sodoma, qaq nam llalaqpi so Amón qalaq 'eeta'am qome ye Gomorra, nache yemaye ñaxaalec qome ana huoue le'enaxat poqo, qataq hualec qome na toue, qataq yemaye nache 'eetai' qome da toolec. Qaq cam no'onañi qome nam ỹalamaxat nhuo' le'ecpi, deuotaxanec qome yemaye, qataq nache nalec qome yi'iye 'alhua.»

Amós 7:6

Huaña nache Ñim Nataxala' huo'o da lchoxonnataxanaxa, nache 'eeta': ¡Nataqa'en de'era, saishet qome da sepaca'a da so'ot!

Amós 7:3

Huaña, nache Ñim Nataxala' huo'o da lchoxonnataxanaxa, nache 'eeta': ¡Aỹem saishet qome da sepaca'a da so'ot de'era!

Lamentaciones 3:33

Qaq cha'aye ỹoqta 'eesa da saỹaỹamaxaren da daquicoqtaxan, qataq da ỹauo'o ca nqui'ic na shiỹaxauapi.

Jeremías 9:7

Qaq ỹoqo'oye Aỹem Nataxala', maye Qaica ca Seqalanapec, shenapec: ¿Negue'to' ca lỹa lataxac da so'otec na ỹalamaxat nhuo' le'ecpi? ¡Qomye nacherata da sasaxangui ca norec da yaqto' seỹo!

Jeremías 3:12

Qojec nagui 'aigue da sheu', nache 'aua'axatec qome de'era ỹa'aqtac, qoneta': ‹Ñim Nataxala', 'enapec: ¡Aỹem 'añe'eguelaxa 'am qauemai Israel! Cha'aye saishet qome da 'am saseyacnapec da 'am saconeguet, qataq saishet da nache queta da 'am senotega, cha'aye Aỹem choxonnataxanaxaic. Qaq 'era da ỹa'aqtac, Aỹem Nataxala'.

Isaías 63:15

'Am Nataxala', maye qoneto'ot na piguem, nam 'arma' maye qui'itta qataq huo'o da llo'oxoyec, ña qomi' 'anamata'alo qome. ¿Ca hueta'ague ca 'arauotaxanaqtaic qataq ca 'ara'añaxac? ¿Ca hueta'ague cam 'arhuennataxac? ¿Peta'a mashe imeuo da 'archoxonnataxanaxa da shenaqta?

Salmos 106:45

nache tachigui naxa ye lauel da naỹamaxataxac co'ollaq naỹamaxate' somayepi, nache naralaxat da lhuennataxac souaxat da lta'araic lauotaxanaqtaic.

1 Reyes 3:26

Nache asom ỹoqta 'eesa late'e se'eso nogotolec, ỹataqta lta'araic da lhuogoxo souaxat so llalec, nache 'enapega so nta'a, 'eeta': ¡Ñaq aỹem 'auchoxoren 'am nta'a! ¡Saishet da 'aualauat de'era nogotolec! ¡'Onaxaictoxo' da 'aỹa'anem ara'ara 'alo! Qalaxaye aso lỹa 'alo 'enapeco': ¡'A'i, qauquesoqoingui na laiñi damaye, nache saishet da aỹem taỹot, qataq aramaye!

Isaías 16:11

Añi iquiyaqte qalaq cholaxan 'eeta'am aca nvique arpa, souaxat ye Moab qataq ye Quir Jaréset.

Jeremías 18:8

Qalaxaye que'eca ỹotta'a't shiỹaxauapi da ca'ai na qauem, nache saishet da ñamaxa ca nhuaxanaguec maye mashe seqataxaatai'.

Jeremías 42:10

‹Da qami' qarhuennataqai da qoviỹa'a ne'ena 'alhua, nache Aỹem qami' sanema da qaica ca qaviñiitaique, qaq saishet qome da qami' selaxachiguilo nacherata da qami' saayiñi nache saishet da qami' ñapogoyeshegue'm, cha'aye huo'o da ñetogotaxac da qami' ñamaxalo co'ollaxa se'eso qauem.

Lamentaciones 3:32

Qaq na'aictoxo' da ỹauo'o da que'enaxac, qalaxaye nataqa'en dechoxonnataxan, cha'aye da lsoxoyec ỹataqta lta'araic.

Ezequiel 6:9

Nache ca lca'alaxaicpi iuennate qome Aỹem da ỹalectaigui que'eca ỹotta'a't shiỹaxauapi, iuennate qome da 'eetec da so'ot da nque'eenaxac souaxat da Aỹem sa ỹalaxaguet qataq souaxat da Aỹem ca'ai da yaqto' ỹo'oxoren na nqolacpi. Namayepi deqaiga qome da maiche lataxac, souaxat nam qauem maye ỹo'otpi, qataq 'enauac nam qaiqaiga maye ỹo'ot co'ollaxa namayepi.

Ezequiel 33:11

Qalaxaye Aỹem Nataxala', maiche ñañan da san da ỹa'aqtac, da saishet da saỹamaxaren da ileu cam qauemaic, nacherata da naralaxat da lataxac yaqto' nca'alec. 'Am Israel, 'aỹa'axanec de'era qauem 'arataxac maye 'auachetac. Cha'aye ¿ta'ainco' taxa da 'aleu?

Oseas 7:1

Qaq co'ollaq ñatareetac na Israel le'ecpi, nache yo'oq da lle'etaxaloxo na Efraín, qataq nam lasouaxashetpi nam Samaria le'ecpi, cha'aye namayepi ỹo'ottac da natenataxanaxac, nache na'aictaxa da yo'oxoñi qalaq inoxotaua'a na nỹecpi, qataq decachiỹot nam quetague' na nqa'aicpi.

Miqueas 5:3

Qaq ỹoqo'oye Ñim Nataxala' ỹaxanec nam lalamaxatpi, nache ivitta'a ca na'a'q da deco'o aca 'alo, maye taỹa'a da ñiguiñi ca llalec. Huaña qome nache na no'onañipi co'ollaxa, ỹe'eguelaxa da ỹaleeguet na lqaỹañecpi Israel le'ecpi maye noxonecpi co'ollaxa.

Deuteronómio 29:22

Nache cam shiỹaxauapi maye ñaq taỹa'a da yo'oq, cam qami' chegoxogueta maye ñaq natauopi, qataq cam chegaqauecpi maye chegaqa'alo naua qaỹoqtalo 'aleu', ỹauaachigui qome da qauem maye talec que'eca 'alhua, qataq ca nalolaxapi maye namaq qome Ñim Nataxala'.

2 Crónicas 36:15

Qaq Ñim Nataxala', maye Natamnaxala' som hua'au lta'alpi, ỹataqta ñe'eguelaxatta'a co'ollaxa da lvitaqtaxanaxac ỹachegoxotchigui som la'aqtaxanaxanecpi, cha'aye huo'o da lchoxonnataxanaxa som lalamaxat nhuo' le'ecpi, qataq som 'alhua maye netalec somayepi.

Jeremías 9:6

naralaxat da lataxac. Ñim Nataxala', 'enapec: «¡Namayepi nlaxagui da natenataxanaxac, qataq qaica ca qairen! Na ỹalamaxat nhuo' le'ecpi aỹem saỹauatton.