Números 18:21 - La'aqtaqa Ñim Lo'onatac 'Enauacna 2013

²¹ Qaq na leviitapi, sanem qome da lalamaqte ana diezmo maye Aỹem ỹanem na Israel le'ecpi, da nsheetenaqte ñaqa'en da lo'onataxanaxac souaxat da huetague' na no'onatacpi maye huaña ñi npe'l maye naỹonqa'.

Números 18:21 Referans Kwoze

Nehemías 12:44

Qaq se'eso na'a'q nache huo'o so qalca'aua'api shiỹaxauapi da ilo'ogue so naỹamaqtaxaqui so qoỹaneuo nachetaqtaxanaxatpi, maye la'auaxanec ala so nañiguishec qataq aso diezmo da yaqto' qaỹachaigui somaye, yaqto' qaipacchigui da lataxac som qoỹaneuo maye chegaqa'a so huaqta'a't nỹecpi da yaqto' qoỹanem so ntaxaỹaxanaxanecpi qataq so leviitapi. Qaq so netaña ye Judá ỹataqta machiguiñi souaxat de'era lo'onataxanaxac so ntaxaỹaxanaxanecpi qataq so leviitapi.

Nehemías 10:37

Nataqa'en ñasataxagui da seroxoua'a so laponqa' so nallec maye naña aso atamnaxaqui maye lalamaqte Ñim Lo'onatac 'Enauacna, so qarachetaqtaxanaxat la'auaxanec 'ayiiña, qataq aso la'auaxana ala aso qo'oipaqpi, lataxa, qataq so aceite, da yaqto' qoỹanem so ntaxaỹaxanaxanecpi. Nataqa'en ñasataxagui da sanaxam so leviitapi aso diezmo maye chegaqaigui na ala so qorañiguishecpi. Cha'aye nacheso somayepi so laỹootega't naxa 'enauac ana qarachetaqtaxnaqte naua souaqta'alo qaro'onataxanaqa'te.

Hebreos 7:5

Qaq naua namaxasoxonaxaco maye chegoqo'oto so Moisés ỹa'axa't da huo'otaq huo'o ca ntaxaỹaxanaxanec da chegaqaigui na llalaqpi so Leví, nache camaye huo'o da na'aqtac da yaqto' talec aca diezmo maye laueque 'enauac na Israel le'ecpi. Na'aictaxa da que'eca ntaxaỹaxanaxanec da maiche nalamaxat nhuo' le'ec, huo'otaq da maiche nqaỹa, qalaxaye nache 'ena'am qoỹami' añi 'oonole nam diez maye laueque namayepi.

Gálatas 6:6

Cha'aye ca mashe ỹaỹateeta da napaxaguenataguec da la'aqtac Ñim Lo'onatac 'Enauacna, qaq camaye no'on da nhuaate' ca napaxaguenaxala' 'enauac nam no'on maye ỹaconeguet.

Nehemías 13:12

Nache 'enauac so Judá le'ecpi ndoua'a so naponaxanaxaqui aso ndiezmo maye chegaqaigui so ala so trigo, lataxa, qataq so aceite.

Nehemías 10:29

qataq huaxaiguet so lauo' le'ecpi, qataq so lataxala'pi somayepi, nache ỹan so la'aqtac da yaqto' ipactelec 'enauac na lqataxacpi Ñim Lo'onatac 'Enauacna, maye ỹachegoxotchigui co'ollaxa so lamaxashec Moisés, qataq da ỹalaxaguet na lamaxasoxonaxacpi, qataq da llec na lqataxacpi Ñim Nataxala' maye Qanatamnaxala'.

2 Crónicas 31:12

nache qaỹachaigui 'enauac som qoỹaneuopi nachetaqtaxanaxatpi, aso diezmopi maye qoỹaneuo co'ollaxa, qataq som maiche lalamaxatpi Ñim Nataxala'. Nache qoỹanem da ilo'ogue 'enauac somayepi som leviita Conanías, qataq so lqaỹa Simey da ltaua somaye.

Números 18:6

Cha'aye Aỹem sachegoxottoigui co'ollaxa na laỹepi Israel le'ecpi, na 'arqaỹañecpi leviitapi da seỹotauga da yaqto' qana'agaxache. Cha'aye namayepi mashe qaiỹotauga da yaqto' do'onataxaatac da hueta'a ñi npe'l maye naỹonqa'.

Génesis 14:20

qataq qaỹo'oxoren qome Ñim Lo'onatac 'Enauacna, maye Nataỹaña 'enauacna ñim 'am ỹanem co'ollaxa da 'oxonec so 'ampa'aguenaxauapi.» Qaq huaña nache so Abram, ỹanem so Melquisedec, añi 'oonole ana diez 'enauac som lhuotaxanaxatpi.

Números 31:28

Qataq 'auỹotauga qome ñi 'oonolec na quinientos nam taỹot na alleppi maye jec co'ollaxa da nalat da yaqto' ỹalamaxat 'anqa'en: shiỹaxauapi, nauegaxanaxala' huacapi, 'ashenapi, qataq ana qaguetapi,

Deuteronómio 18:8

Qataq nache ipacchigui da lataxac da qoỹanem ca aloq 'eeta'am ca laỹe ntaxaỹaxanaxanecpi. Qataq da qaimen ca lalamaxat ca lta'a nache talec aca lasheue camaye.

Nehemías 12:47

Qaq se'esoua na'axa'te maye huetoiguilo so Zorobabel qataq so Nehemías, nache 'enauaque soua na'axa'te da so Israel le'ecpi ỹanem naxa so 'onaxanaxaicpi, qataq lasom lo'opi qataq so leviitapi aso lachetaqtaxanaqte, qaq nache 'eetec naqa'en da huo'o ana ỹanem so chegoxoguetpi so Aarón.

Nehemías 13:5

Ỹoqo'oye ỹanaigui so nanataxaqui lta'araic maye laponaxaqui co'ollaxa so nachetaqtaxanaxatpi, nchenaxanaxat ama na laita, nogoxoshetpi, qataq aso diezmo maye chegaqaigui so ala so trigo, lataxa, qataq so aceite, maye nachetaxat so leviitapi, qataq so no'onaxanaxanecpi, lasom lo'opi qataq so nachetaqtaxanaxat maye talec so ntaxaỹaxanaxanecpi.

Malaquías 2:4

Qaq huaña qome, nache qauaỹacheñi da nache Aỹem maye qami' sanema de'era namaxasoxonaxac da yaqto' de'era ñaỹamaxataxac, co'ollaq ñaỹamaxate' so Leví, nache 'eetai' qome. Qaq 'era da la'aqtac Ñim Nataxala' maye Qaica ca Ỹaqalanapec.

Malaquías 3:10

Qandoiua'a qome ana qandiezmoi añim laỹe' anamaye, maye netaigui añi atamnaxaqui, qaq yaqto' huo'o qome na nallec ñi ima'. Ñaq Aỹem qavi'eguiñic qome de'era, yaqto' qauaỹachiñi da Aỹem seshet da sauatoigui nam lasompi na piguem, da yaqto' qami' secoreleguete da ichoxonnataxanaxa, nache ivita'a da chochaq huañi da qana'achecỹaxaqui.

Génesis 47:24

qalaxaye da ivita da qanqache na ala ca qa'añiguishiqui, nache iuen da qanqacheeua'a ca 'oonolec caua cinco qarapoñiguishequi da qaỹa'añim ñi faraón, qaq caua cuatro maye no'oirañi, qalaq taỹaigui da qaltaq qaỹa'añiilec na 'alhua, qataq yaqto' qolliquiitac, qataq na qaỹa'alquipi qataq 'enauac na qami' neto'oto.»

Génesis 47:26

Qaq so José nache lapaxañi co'ollaxa de'era nqataxac da 'enauac ye 'alhua Egipto, da ivita da qanqat na ala na nañiguishec, nache qanqateua'a ca 'oonolec caua cinco napoñigui'she da qoỹanem so faraón. Qaq de'era lapaxañi nqataxac ivitta'a nagui da ñaq huetalec ye 'alhua Egipto, qalaxaye na ntaxaỹaxanaxanecpi saiuen da huo'o aca isheeten, cha'aye na na'alhuapi saishet co'ollaxa da ivita da lalamaxat so faraón.

Números 3:6

«'Auỹaxaneuga qome na maiche lalamaxat lauo' le'ecpi so Leví, nache qonapega namayepi da ỹalaxaguet qataq do'onataxanot so ntaxaỹaxanaxanec Aarón.

Nehemías 10:38

Qalaxaye 'oonolec ca ntaxaỹaxanaxanec chegoxoguet so Aarón da nnaictague' na leviitapi, qom ỹe'eguenauga aca diezmo maye chegaqaigui na nachetaqtaxanaxatpi nache qoỹanem so leviitapi, nache ỹachaigui so maiche laponqa' somaye maye naña aso atamnaxaqui maye lalamaqte Ñim Qanatamnaxala'.