Nahúm 1:2 - La'aqtaqa Ñim Lo'onatac 'Enauacna 2013

² Ñim Nataxala' maye Lo'onatac 'Enauacna, Ñimaye ca'alaxanaxaic, qataq ishet da ipalaique lvi', qataq ishet da ipalaique lvi' da dataỹa'aguet nam ipa'agueetacpi Ñimaye, nache sa ỹala'ac da dalemataỹa na npa'aguenaxauapi.

Toba del Oeste

² Joñe'me Jaliaĝanec Dios qa'a elaqataĝanaĝaic nataq'aen loiquiaĝaic: ya'uo lovi' jogaa'me jetaque nauteta, nataq'aen dalematayalo jogaa'me laute'u.

Nahúm 1:2 Referans Kwoze

Zacarías 8:2

«'Era da ỹa'aqtac Aỹem Nataxala' maye Qaica ca Seqalanapec: Aỹem ỹataqta lta'araic da ica'alaxanaxac da seca'alaxaalec na Sión, ỹataqta Aỹem inogoqchet da ica'alaxanaxac.

Éxodo 20:5

Qataq saishet da 'aua'atto'oto naua 'arllecte qataq saishet da 'avio'oxoreetac, cha'aye aỹem Nataxala' Nachaỹem 'Anatamnaxala', Aỹem ca'alaxanaxaic ỹoqo'oye sauo'o da nhuaxanaguec ca shiỹaxaua maye aỹem nquiỹatega, qataq ca llalaqpi qataq ca laualpi qataq na llalaqpi ca laualpi.

Salmos 94:1

'Am Nataxala', maye ishet da 'apalaique ca nvi', 'Am Atamnaxala', ñaq 'anachaxan qome.

Éxodo 34:14

Saishet qome da qanatamñiỹot ca camachaqca atamnaxala', cha'aye Ñim Nataxala', Ñimaye ỹataqta ca'alaxanaxaic. Qaq da le'enaxat Ñimaye 'eeta': Ñim Lo'onatac 'Enauacna maye qaica ca ishetapec.

Josué 24:19

Huaña, nache so Josué 'enapego' se'eso nhuo' le'ecpi, 'eeta': «Qami' yo'oqta da saishet qome da qauañoxoche da qauo'onataxañiỹot Ñim Nataxala', cha'aye Ñimaye Atamnaxala' maye ỹataqta qui'itta, qataq ca'alaxanaxaic, qataq sa ishetaxateguet na sa ỹaỹamaxañisat qataq na qarasouaxashichi.

Hebreos 10:30

Nataqa'en 'enauac saỹatenaq da Ñim Lo'onatac 'Enauacna, ỹauo'o ca lvi' da ỹauo'o ca nhuaxanaguec na ipa'agueetacpi Ñimaye, souaxat na ỹo'ottacpi sa ỹaỹamaxañi namayepi. Qalaxaye nataqa'en 'enapec da nmit na lalamaxatpi.

Isaías 42:13

Ñim Nataxala' qom inoxonec nache 'eeta'am ca alaataxaic, qaq qom deloqui nache 'eroigui da layeloxo 'eeta'am ca alaataxaic, qataq nlamaxaren qataq ỹa'alaqtalec da nalaataxac, nache nauec qome na npa'aguenaxauapi.

Deuteronómio 4:24

cha'aye Ñim Nataxala' maye Qanatamnaxala'ai, Ñimaye ỹataqta ca'alaxanaxaic, ỹoqo'oye da huo'o ca ỹavigaxat, nache 'eeta'am ca norec da nlachiguiñi naqa'en ca ỹavigaxat.

2 Pedro 2:9

Qaq de'era qomi' ỹachaxanalo Ñim Lo'onatac 'Enauacna, da Ñimaye ỹaỹaten da ỹaỹamaxaañi nam lqalaiguesat qataq nam ishet da nqanaxat nam ỹalaxaguet Ñimaye, qataq nataqa'en ỹaỹaten da ỹauo'o ca nhuaxanaguec nam ỹo'ottac na qauem. Qaq damaye ỹo'ot que'eca na'a'q qom nmit 'enauacna.

Romanos 12:19

Qami' ỹaqaỹarolqa, saisheto' qome da qavi'enaxachiỹa'aguet ca qauem maye qami' qaỹo'oteque. Nachaqrato' qome da qauaqaita'a da Ñim Lo'onatac 'Enauacna maiche huapegue' da ỹauo'o ca nhuaxanaguec nam qauemaicpi. Cha'aye ana nere maye huetalec na la'aqtacpi Ñimaye nanettalec da la'aqtac, 'eeta': «Aỹem maye Nachaỹem so'ot ca nhuaxanaguec ca shiỹaxaua, Nachaỹem maye sami' cam 'itchiguiñi nhuaxanaguec ñi 'oonolec.»

Miqueas 5:15

Qaq huaña nache yo'oq qome da ỹayeloxo da sepalaique ivi' da she'eguelaxateguet nam shiỹaxauapi maye saishet da aỹem ỹalaxaguet.

Joel 2:18

Huaña nache Ñim Nataxala' ỹachaxan da lauoche ne'ena na'alhua, nache ichoxoren ne'ena lalamaxat nhuo' le'ecpi.

Ezequiel 39:25

Qaq ỹoqo'oye Aỹem Nataxala', shenapec: «Aỹem nagui sechoxoren 'enauac na nhuo' Israel le'ecpi, nam chegoxoguetpi so Jacob. Aỹem ñaralaxat qome da na'achecỹaxac, da yaqto' samaxalec da ỹo'oxoren da qui'itta ỹe'enaxat.

Ezequiel 6:12

Qaq cam qaỹoqta ca hueta'a nache ilem qome na nalolaxapi, qaq cam saqaỹapeque ca hueta'a qalaq ileuaigui qome ca alaataxac, qaq ca lca'alaxaicpi qome qalaq ilem qome na nqouaxa. Qaq 'era da sheetec qom ñashetcheguem da ỹayeloxo da sataỹa'aguet namayepi.

Jeremías 4:4

Qami' shiỹaxauapi maye qoñiitaña na Judá qataq na Jerusalén, qauo'oche qome ca na'anaxat da qaro'ocỹaxaqui, qataq aỹem qauauattoñeeta da Aỹem Nataxala', qauachiỹaiguilo naua qarquiyaqtelli' da la'anaxat da aỹamaxataxac, cha'aye saiuena'a da souaxat cam qauem maye qauo'oche, nache da 'eroigui da inogoxonaxac, 'eeta'am ca norec qataq 'erangui damaye, nache qaica ca ishet da ỹalamat.

Isaías 51:20

Na 'aỹa'alaqpi qalaq decopche co'ollaxa huetaña ana lamaqaipi na nqa'aicpi, qataq 'eeta'am aca chegaxango da noxona da huetaigui ca naleguec. Qaq 'enauac da que'emaq souaxat da layeloxo Ñim Nataxala' qataq da lhuogoqtaxanaxac Ñim 'Anatamnaxala'.

Isaías 51:17

Ñaq 'anlouec, ñaq 'anlouec 'am Jerusalén, ña qoñesheguem. 'Am 'anque'etaxangui co'ollaxa da nnogoxonaxac Ñim Nataxala', qoneta'am ca nỹomgui aca ỹomaxaqui nache ivitta'a da qui'itchigui naqa'en, nache ivitta'a da ỹataqta da taxaic.

Da na'aqtaguec so Job 20:23

Qaq da ivita da nshetaique da icoma', nache Ñim Lo'onatac 'Enauacna, imatalec camaye da lalemataic, nache icorelec da layeloxo, 'eeta'am naqa'en na auot.

Levítico 26:28

nache Aỹem nataqa'en qami' sataỹa'agueta qome, qataq qami' seroleguete da ỹayeloxo da ỹoltaq siete da qami' seuaxa'n souaxat da qaye'etaxalqoi,

Romanos 13:4

Cha'aye namayepi do'onataxaatacot Ñim Lo'onatac 'Enauacna, da yaqto' qami' ỹa'añaqche't da qauo'oche ca ỹaỹamaqchiguiñi. Qaq da huo'otaq sa qaualaqai, ¡nache qami' ishet da huo'o da qarcolanaqai!, cha'aye nam lainecpi maye ỹachetac saishet da choche llo'oxoraxat. Namayepi do'onataxaatacot Ñim Lo'onatac 'Enauacna, qalaxaye nataqa'en ishet da ỹauo'o ca nhuaxanaguec ca qauemaic.

Zacarías 1:14

qaq ime, nache som namaxashec piguem le'ec aỹem 'enapega, 'eeta': «'Era da la'aqtac Ñim Nataxala' maye Qaica ca Ỹaqalanapec: ‹Aỹem ỹataqta sauotec na Jerusalén, qataq añi qaỹoqotcheguemec qasoxonaxa ye Sión.

Miqueas 7:18

Qaq ¿negue't ca Atamnaxala' da 'eeta'am 'am, da 'auapalaxat na lasouaxashetpi qataq sa 'aulogui da saỹalaq nam saq 'amaqtaq maye no'onañi co'ollaxa 'aralamaxat nhuo' le'ecpi? Qataq saishet da nache 'eetai' da 'arayeloxo, cha'aye nache 'eetai' da lta'araic 'arauotaxanaqtaic da shenaqta.

Ezequiel 38:18

Aỹem Nataxala', shenapec: ye Gog qom inoxotaua'a ye Israel, nache da ỹayeloxo ỹataqta huo'o da lchec qom 'eroigui.

Ezequiel 36:6

Qaq ỹoqo'oye 'aua'axata'a dam talec qome ye 'alhua ye Israel, nache qoneta': Da la'aqtac Ñim Nataxala' maye taalec aye qasoxonaxapi, qataq aye lcomaraxalatepi, qataq ye talapi qataq ye ca'ameguepi, 'eeta': Aỹem huo'oi naua ỹa'aqtaqa maye huaiguilo da inogoxonaxac, qataq da ỹayeloxo, souaxat da qansheunaguiqui maye qanque'etaxañiigui, maye qami' ỹo'oteque na ỹotta'a't shiỹaxauapi maye chegaqauecpi.

Ezequiel 8:18

Qalaxaye Aỹem so'onataxana qome da ỹayeloxo, nache saishet da sechoxoreetac qome namayepi. Qaq huaña nache na'aictaxa da ỹa'alaqtagui da Aỹem iỹaxaatacot, qalaxaye saishet qome da sa'axaỹa.»

Ezequiel 5:13

Qaq huaña qome nache ñashetcheguem da ỹayeloxo, qaq qom nmisheguem damaye, nache samaguiñi. Qaq qom nmisheguem da ỹayeloxo souaxat namayepi, nache namayepi ỹaỹaten qome da Aỹem Nataxala', maiche ỹa'aqtac co'ollaxa damaye.

Lamentaciones 4:11

Ñim Nataxala' co'ollaq mashe ivita so laloqo' da layeloxo, nache saishet da ỹañoxot da nllañi nache ỹavigaxat ye Sión, nache ỹataqta ilaxachigui ivira'a so lo'oxonaxala'pi.

Jeremías 36:7

Saiuena'a da ỹanem ca nachoxonnaxac Ñim Nataxala', qataq ỹaxaañi dam qauem lataxac, cha'aye da layeloxo qataq da nnogoxonaxac Ñim Nataxala' maye do'ogoxona da ỹareetalec ne'ena shiỹaxauapi, damaye ỹataqta chaqaic.»

Jeremías 25:15

Ñim Nataxala' maye Natamnaxala' na Israel le'ecpi aỹem 'enapega, 'eeta': «Ña 'aumeten ana'ana ỹomaxaqui maye nlaqchigui na lataxa, maye naigui da inogoxonaxac. 'Auacona, nache 'aỹa'anem da yaqto' nỹomgui 'anqa'en 'enauac na ỹotta'a't shiỹaxauapi maye 'am samaxa qome.

Jeremías 3:5

¿peta'a nache qoqueto'ot da 'aunotac? ¿Peta'a chochaq tatec da 'annogoxonaxac? Qaq co'ollaq ñaq 'autaqtac, nache 'auo'ottac 'enauac nam qauem maye ishet da 'auo'ot.»

Isaías 66:15

Cha'aye Ñim Nataxala' qom anac qalaq nactaigui ca norec, aca nnaigonapi qalaq 'eeta'am qome ana daua'ache, huaña nache icorec na le'eraxa da layeloxo, qataq nalaqaasheguem na le'eraxa da lhuaxanaxanaxac.

Deuteronómio 7:10

qalaxaye sa ỹaỹaloxon da ilaxachigui, qataq da ỹauo'o ca nhuaxanaguec cam nquiỹatega Ñimaye.

Jeremías 28:8

Som hua'au na'aqtaxanaxanecpi co'ollaq saxanaqca 'am qataq aỹem, somayepi ỹa'axatta'aguet co'ollaxa ca alaataxac, nqouaxa qataq ca napiina maye talec na qalota ỹotta'a't shiỹaxauapi, qataq nam nta'alpi maye 'añaxaicpi.

Ezequiel 38:19

Qaq nache huaigui qome ca le'eraxa da ỹayeloxo, da san ca ỹa'aqtac, da que'eca na'a'q huo'o qome ca lta'araic nacholaxanaxa ye Israel.

Éxodo 34:7

Nam ỹataqta qaica ca loga't da lauotaxanaqtaic, qataq ishet da ichoxoren ca huo'o ca npe'enaxac qataq ca sa ỹalaq, qataq ca huo'o ca lasouaxashet. Qalaxaye nataqa'en ishet da ỹauo'o ca nhuaxanaguec ca shiỹaxaua maye qauema naua ỹo'otta'ape, qataq ca llalaqpi, laualpi qataq ca llalaqpi ca laualpi camaye.»

Números 25:11

«Da Finés, maye llalec so Eleazar, qataq laual so Aarón, damaye ỹo'ot da vi'iiguet naqa'en da ỹayeloxo maye talec na Israel le'ecpi, cha'aye damaye 'eeta'am Aỹem da sa sesheteguet da qanatamnot ca ỹaqa'a atamnaxala'. Qaq nachera damaye, da huo'omshe saishet da ỹataqta imeuo ñaqa'en namayepi.

Jeremías 50:15

¡Qauconñiisop yemaye nache qaua'alqaitalec da alaataxac, qoñeeta'! ¡Ye Babilonia mashe nañan! ¡Mashe hua'axañi ana lalloxolatepi qataq qalagoxouec na lpaqtaxanaxatpi! ¡Qaq 'era da so'otec da she'eguelaxateguet yemayepi! ¡Ñaq qavi'eguelaxacheeguet qome, nache qaue'enaxachiichigui dam ỹo'ot co'ollaxa namayepi!