Mateo 3:10 - La'aqtaqa Ñim Lo'onatac 'Enauacna 2013

¹⁰ Aca qachepe mashe lhuotta da iquesoxoñot ana qo'oipaqpi. Qaq 'enauac anam 'epaqpi maye saishet da no'on ana ala, nache anamayepi qaiquesoqot. Ime, qaq qaỹasaxangui ca norec.

Nuevo Testamento Toba Sur

¹⁰ Aca qachipe mashi sogote imetai' da iquesoxoñot ana qo'ipaqpi. Qaq 'enauac anam qo'ipaqpi mayi sa ishit da no'on ana ala, nachi anamayi qaiquesoqot. Ime, qaq qaÿasaxangui ca nodec.

Nuevo Testamento Toba Sombrero Negro

¹⁰ Uoja'eda da'me le'uaĝanaĝanaĝac ñe'me Dios ena'am jaga'me qachipe jo'ne qoyiyamaĝateta't qaedi qoyequejoĝoyelo gaa'me ep'a chayovida'alo gaa'me patadi. Ena'uaque gaa'me ep'a jo'ne ja yauote jala qonejecoĝojeguem qama'le qoyigoue.

Mateo 3:10 Referans Kwoze

Juan 15:6

Qaq cam saishet da Aỹem na'attaua'a, nache camaye 'eeta'am aca lcoue da saishet da huo'o aca ala, nache qaicheguec qataq qaỹasaxauec, qaq da deqaqa, nache qaỹavigaxat.

Lucas 3:9

Aca nañiguishe da qauem da alaỹaxac, nache ca lalamaqte acamaye ichecot nmachitcheguem na lpa'a'pi, ime, nache ỹavigaxat. Qaq Ñim Lo'onatac 'Enauacna mashe lhuotta da yaqto' ilaxachigui nam saishet da ỹo'ot cam ỹaỹamaqchiguiñi.

Mateo 7:19

Aca qo'oipaq maye saishet da ỹan aca no'on ala, acamaye qaiquesoq ime nache qaỹavigaxat.

Juan 15:2

Qaq da huo'o aca 'oonole ana icouepi da saishet da huo'o ana ala, nache Ñi Ita'a iquesoxouec; qalaxaye nqat ana llaxataxa ana lcouepi maye huo'o ana ala, da yaqto' nquictec da alaỹaxac.

Jeremías 17:8

Qaq camaye, 'eeta'am qome aca qo'oipaq maye neto'ot na loigue ca tala, maye naua lpa'aye qalaq iviraugalo ca la'auaxac, qaq saishet da ñe'etac da nvi' naua nta'api, cha'aye ana lcouepi nache 'eetai' da ỹataqta napal. Da ivita da deqaqa ana 'alhua qalaq saishet da leetapigui ye lauel qataq saishet da vi'iiguet da alaỹaxac.

Hebreos 6:8

Qalaxaye nam ỹaxaañi da lpi'iỹaxac, nache namayepi 'eeta'am ca 'alhua maye ndota't ana huoue maye huo'o ana le da ñaxaalec, ỹataqta qaica ca naigui, qaq Ñim Lo'onatac 'Enauacna ỹasaxalec ca qauem. Qaq da pa'atec, nache ỹoqta qaỹavigaxat.

Mateo 21:19

nache ila'a aso higo lcheyec maye netaua'a na laỹe so nqa'aic. Nache nqo'oota asomaye, qalaxaye co'ollaq mashe ivirot, nache ila'a da qaca aca ala, ndotec ana laue. Nache So Jesús ỹauo'o so ỹasaxalec qauem la'aqtac da nlaxa asa'aso higo lcheyec, 'eeta': «¡Nagui nache tachiguiña da saishet qome da huo'o ca alaỹaxac da qoneta!» Huaña, nache asa'aso higo lcheyec deqaqa.

Malaquías 4:1

Ñim Nataxala' maye Qaica ca Ỹaqalanapec da la'aqtac, 'eeta': «Mashe nayeetai' ca na'a'q, maye ỹataqta 'eroigui 'eeta'am aca nqatelaxanaxaqui, cam huaigui qome 'enauac na ño'oxonnaxaicpi qataq nam qauemaicpi da ỹataqta ỹavicta. Que'eca na'a'q maye anac qome, ỹataqta ỹavigaxatta qome namayepi, nache qaica ca no'onañi.

Salmos 1:3

Qaq camaye 'eeta'am aca qo'oipaq maye ñaxattalec na loigue ca tala, da ipacchiguilo naua laloqo'ote da huo'o ana ala, qataq saishet da deqaqa ana laue. ¡Nache 'enauac na ỹo'otpi camaye ỹataqta ỹaỹamaqchiguiñi!

Lucas 23:31

Cha'aye da Aỹem qaica ca so'ot sa ỹaỹamaxañi, nache Aỹem qaỹalauat, qaq ¿chaq qoỹeetec cam ỹo'ottac ca sa ỹaỹamaxañi?

Isaías 61:3

qataq sanem nam daquicotacpi maye hueta'a na Sión aca aro'o nmeneguet ñaqa'en na alo, qataq na coraxat nmeneguet da noinaxac, qataq da no'onaxanaxac nmeneguet da nhuogoxo. Qaq da qaitaxaỹa nache qoỹeeta': «Rooblepi, huegaxanaxaipi», maye lañiguishe Ñim Nataxala' da yaqto' ỹachaxan da llo'oxoyec.

Isaías 27:11

Qaq da deqaqa ana lcoue ana 'epaq nache huacac, huaña nache na 'alpi laỹona't nache dalonaxana da ỹo'ot ca l-le'. Cha'aye ne'ena nhuo' le'ecpi qaica ca laỹaanataxanaxac. Qaq ỹoqo'oye Ñim Lo'onatac namayepi saishet qome da ichoxoren, qataq saishet da ỹasaxalec da lchoxonnataxanaxa.

Hebreos 12:25

Qaq ỹoqo'oye maxatchaxa da qoñiita, saishet da huo'o ca sa iqocha'a Ñim Lo'onatac 'Enauacna da qami' detaxaỹoto. Saishet da sa qauacoñiiguet, cha'aye som hua'au Israel le'ecpi maye sa iqocha'a co'ollaxa Ñimaye qalaq saishet da ỹet so lta'araic nhuaxanaguec. Se'eso na'a'q co'ollaq Ñim Lo'onatac 'Enauacna detaqtacot somayepi, qalaq so lvilỹaxac ỹacholaxan ana 'alhua. Qaq qomi' da sa saconaxaguet Ñim Lo'onatac 'Enauacna maye qomi' iỹaxanalo so lvilỹaxac maye chegoqtot na piguem, nache nataqa'en saishet da qomi' ỹe't ca lta'araic qanhuaxanaguec. Cha'aye nagui da la'aqtac Ñimaye 'eeta': «Qaltaq she'eguelaxalec da sacholaxan ana 'alhua, qalaxaye saishet da ndotec anamaye nataqa'en na piguem.»

2 Samuel 23:7

Qaq da huo'o ca ỹacoosop qalaq ỹauota'a ca lcat, huo'otaq aca lataquiaxai. Nache ỹasaxangui ca norec da yaqto' ỹavic.»

Salmos 92:12

Qaq ca no'on da lataxac qalaq dasovi 'eeta'am ana chaic, qataq nquictasheguem da lañaxataxac 'eeta'am ana cedro ye Líbano.

Salmos 140:10

Ñaq talec qome namayepi aca poqo 'ettaigui, qaỹasaxangui qome ca norec, qataq aca nshere maye qaỹoqchiguingui, yaqto' saishet da qaltaq ñe'eguelaxasheguem.

Daniel 4:14

nache somaye na'axannec da detaqa, 'eeta': Qaua'axasoxoñiiñi ara'ara qo'oipaq qauchiquiiuec qome ana lcouepi qataq qanqache ana lauepi, qataq qalagaxache ana alapi. Qataq datauec qanqa'aiñi na shiguiỹacpi maye hueto'ot na lpaqal, qataq na maỹopi maye netaigui ana lcouepi aramaye.