Mateo 25:1 - La'aqtaqa Ñim Lo'onatac 'Enauacna 2013

¹ De'era lo'onataxanaxac Ñim Lo'onatac 'Enauacna, damaye 'eeta'am da 'eetec se'eso pe co'ollaq huo'o so naronaxac. Nache huo'oi soua diez qa'añole ỹaconalo soua lcoỹaraxanaxaqui' maye lca'atoxo't na aceite. Nache huaqatra'aguet ca auonaxaua.

Nuevo Testamento Toba Sur

¹ Nachi de'eda l'onataxanaxac ñi Dios mayi neta'ague da piguem, damayi 'eeta'am qome caua diez qa'añole mayi ÿaconalo soua lcoÿadaxanaxaqui' mayi lca'atoxo't na aceite. Nachi nqo'ooda so nadonaxac, da yaqto' huaqatra'aguet ca adonaq.

Nuevo Testamento Toba Sombrero Negro

¹ “Chane'eja da'me lejaliaĝa joñe'me Dios jo'ne na'ague di'me piyem ena'ama gaa'me diez q'añolel jo'ne yaconalo gaa'me lecoyadaĝanaqatel qaedi yeviteteda'aguet ñe'me nojaĝaua.

Mateo 25:1 Referans Kwoze

Apocalipsis 19:7

Qaq ỹoqo'oye ỹataqta samaqtapiguiñi qome, qataq qomi' nlaqchiguilo da qantonaxac, qataq sho'oxorenaq Ñimaye, cha'aye mashe ivita ye laloqo' da huaron Ñi Qagueta Llalec. Añi lhua mashe sogote da naỹamaxattai', maye nachena nam 'amqaanataxanaxaicpi;

Apocalipsis 21:9

Ime, nache anac so 'oonolec soua siete namaxa'she piguem lashe' maye lasoqta'alo soua siete ỹomaxaqui' maye nlaqchiguilo soua pa'atre'c chaqaiqa napaxaco, nache aỹem 'enapega, 'eeta': «'Aỹala, 'anquigueuo yaqto' 'am sachaxana añim nauonaxaua maye huotaique da lhua Ñim Qagueta Llalec.»

Apocalipsis 21:2

Nataqa'en sela'a so dalaxaic nỹecpi ỹataqta qui'itta, som dalaxaic Jerusalén anacta chegoqo'ot na piguem maye hueta'a Ñim Lo'onatac 'Enauacna, se'eso nỹecpi sogote da 'enauac imeta, 'eeta'am da no'otaxac aca qa'añole da mashe huotaique da huaroneguet ca nauonaxaua.

Juan 3:29

Da huo'otaq huo'o ca naronaxac, qaq cam ỹataqta huaroneguet aca auonaxaua, nacheca cam nauonaxaua. Qaq cam nauochaxaua que'eca auonaxaua, camaye ỹataqta machiguiñi da choche hua'aqtega da lvilỹaxac. Qaq nache 'eetec nataqa'en nagui aỹem ỹataqta aỹem nlaqchigui da ñetonaxac, cha'aye ca Lca'aguishec Ñim Lo'onatac 'Enauacna mashe hueta'a ne'ena.

Mateo 13:24

So Jesús ỹauo'o da lỹa daloqnaxana, 'eeta': «Da lo'onataxanaxac Ñim Lo'onatac 'Enauacna 'eeta'am ca ỹale maye ỹaañi aca no'on lañiguishe maye ala na trigo da ỹaalec ca na'alhua.

Isaías 54:5

Cha'aye Ñim 'am lo'onata co'ollaxa ñimaye ỹauo'o 'am lhua. Qaq da le'enaxat 'eeta', Nataxala' maye Qaica ca Ỹaqalanapec, Ñim 'arca'alaxaqui nacheñi Ñim Qui'itta Natamnaxala' na Israel le'ecpi, nacheñi Ñim Lo'onata 'enauac ana 'alhua.

Apocalipsis 14:4

Qaq somayepi nacheso som saishet da ỹo'oxoreetac nam qanatameetacotpi maye choche ne'enaqtacpi qataq saq 'en qataq saishet da sa ỹalaxaguet Ñim Lo'onatac 'Enauacna; 'enauac somayepi ca'attague' ñi Qagueta Llalec cam dataigue, qataq qanca'alaxatec somayepi da yaqto' la'auaxanec nachetaqtaxanaxat da qoỹanot Ñim Lo'onatac 'Enauacna qataq ñi Qagueta Llalec,

Tito 2:13

Nataqa'en qomi' ỹapaxagueneque da qolaqtot da qarhuataxanaxac da seuataqta'aguet que'eca na'a'q maye qomi' qaỹachaxanapeguema, da ñe'eguelaq da nactaigui da llo'oxoyec So Qarataxala' Jesucristo maye Qarta'a, qataq Qarca'alaxaqui.

Mateo 22:2

«De'era lo'onataxanaxac Ñim Lo'onatac 'Enauacna, 'eeta'am ca nta'a da ỹauo'o ca lquia'axac da ỹo'oxoren da laronaxac ca llalec.

2 Timoteo 4:8

Saỹaten da Ñimaye maye sa depe'enaxan da nmit 'enauac na shiỹaxauapi. Ñimaye aỹem ỹami' ca nsheetenaguec da ñachaalataxac maye lasheue da ỹalaxayec. Qaq saishet da nachaỹemta da aỹem ỹami', maye nataqa'en 'enauac na shiỹaxauapi maye ỹayeeta'aguet ca lle'eguelaxasoxoc Ñimaye.

Mateo 3:2

Qaq da la'aqtaxanaxac somaye 'eeta': «Qavi'eguelaqaỹot Ñim Lo'onatac 'Enauacna, cha'aye da lo'onataxanaxac Ñimaye da ilo'ogue 'enauacna mashe saqaỹaloq da yo'oq.»

Daniel 2:44

Qaq qom ñaq huetaigui da lo'onataxanaxac que'eca nta'alpi, nache Ñim Lo'onatac 'Enauacna maye neto'ot na piguem, nauaxaỹaxaasheguem qome ca no'onataxanaxac maye saishet qome da nlaguiñi, qataq saishet qome da anac ca laỹepi ỹotta'a't shiỹaxauapi da ilo'ogue, nacherata da camaye nlaxaañi da lo'onataxanaxac na laỹepi nta'alpi, qaq camaye chochaq tatec qome.

1 Corintios 11:2

Qami' ỹaqaỹañicpi, ỹataqta qami' ñetootapegueque, cha'aye ỹataqta aỹem qarhuennataxache, qataq qaualaqailec da ỹapaxaguenataxanaxac maye qami' sanema.

Mateo 20:1

Da lo'onataxanaxac Ñim Lo'onatac 'Enauacna maye imattalecna, damaye 'eeta'am cam lalamaxat ca nanqa' ana uva maye 'ottauec da nte'etom da nmitaique ca lo'onataxanaxanecpi, da yaqto' nqat ana ala aso lañiguishe uva.

Mateo 13:47

Nataqa'en da lo'onataxanaxac Ñim Lo'onatac 'Enauacna, damaye 'eeta'am ca naleguec maye qaỹalliguingui aca auaxai, nache ỹataqta ỹalecta't nam lalliiguishec nỹaqpi.

Salmos 45:14

Qataq na no'on llo'oxoraxat naua alogo da qaỹauegueua'a ñi nta'a, nache ca'attaueegue na qa'ampi maye nauochaxauapi anamaye.

Mateo 13:38

Qaq som nanaxanaqa', qalaq nachena nam shiỹaxauapi maye netalec ana 'alhua. Qaq aso no'on nañiguishe maye ala na trigo, qalaq nachena nam shiỹaxauapi maye huetaigui da lo'onataxanaxac Ñim Lo'onatac 'Enauacna. Qaq aso huoue maye le'enaxat cizaña, qalaq nachena nam ỹalaxaguet so pa'aguenataxanaxaic,

Cantares 5:8

Qami' 'alpi maye qarma'ai na Jerusalén, aỹem qaỹa'añim ca qara'aqtaqui: qom qauloỹalec ca ỹauotaxat, qalaq ỹataqta qoñiỹapega qome da selem da lamaic da ỹoqopitaxanaqtaic.

Apocalipsis 4:5

Qaq asa'aso so'onaxaqui chegoqtapegueua'a na nqashelgaxa, qataq nllimiaxa, qataq datateguet asomaye soua siete ncoỹaraxanaxaqui' 'ettaiguilo, maye nachesoua soua siete saq cha'alo la'añaxaco Ñim Lo'onatac 'Enauacna.

2 Corintios 11:2

Cha'aye aỹem huo'o da 'eco' ica'alaxanaxac da qoñiita. Qalaxaye de'era ica'alaxanaxac, damaye chegoqtot Ñim Lo'onatac 'Enauacna. Cha'aye aỹem sauotaique da qami' saronaxanaxanegueta So Cristo, qataq sauotaique da qami' sachaxaneua'alo Somaye, da 'eeta'am ñaqa'en aca qa'añole maye saxanaxa da huaron, da huaroneguet ca 'oonolec ỹale.

Mateo 9:15

Nache So Jesús 'enapeco': –Cam ncoyeguenatacpi da ỹalegueua'a ca naronaxac camayepi saishet da daquicotac da huo'otaq ñaq qanayeeta'aguet ca auonaxaua. Qalaxaye da ivita que'eca laloqo' da qaỹauec que'eca auonaxaua. Huaña nache que'eca ncoyeguenatacpi ishet da ỹaayiñi naua anogo maye nasouaxaqui' qataq huaña, nache ishet da nqouaqchet.

Mateo 5:16

Qaq nache 'eetec qome nataqa'en da qoñiita, da qarataxaqui iuen da 'eeta'am aca ncoỹaraxanaxaqui da 'eroigui qataq ỹachaxan da 'eetec da qaỹalaxaguet Ñim Lo'onatac 'Enauacna. Qauo'oche ca ỹaỹamaqchiguiñi, yaqto' ila'a na laỹepi shiỹaxauapi. Ime, nache namayepi ỹo'oxoren Ñim Lo'onatac 'Enauacna, Ñim Qarta'ai maye neto'ot na piguem.

Hechos 20:8

Qaq se'eso qaraponaxac huasheguemec so pa'asheguem so nỹec, nache ỹataqta qalota ana ncoỹaraxanaxaquipi 'ettaigui.

Mateo 13:31

So Jesús nataqa'en ỹauo'o da lỹa daloqnaxana, 'eeta': «Da lo'onataxanaxac Ñim Lo'onatac 'Enauacna, damaye 'eeta'am aca ala ana le'enaxat mostaza maye ỹacona ca shiỹaxaua da ỹaalec ca na'alhua.

Cantares 5:16

Ỹataqta huo'o da lamaic na alap, qataq imauec somaye huo'o da lyacỹaxac. Nache 'eetec da lataxac so ỹauotaxat, 'era da 'eetec so ỹoqopitaxat, qami' 'alpi maye qarma'ai na Jerusalén.

Cantares 1:3

Ỹataqta ama da laitaỹaxac na 'ancoraxat, qataq da qanasaxauec da 'are'enaxat nache 'eeta'am na coraxat da huaỹoxon na ama laitaỹaxac. ¡Ỹoqo'oye ỹataqta 'am nqopita na qa'ampiolec!

Mateo 25:7

Nache 'enauaque se'esoua qa'añel ñiyishegue'm, nache ỹaỹamaxaayiñi soua lcoỹaraxanaxaqui'.

Apocalipsis 8:10

Qaq so lỹa namaxashec piguem le'ec can ỹashiiyigui aso lasheere, nache naañi aso huaqaañi late'erai, nalalec so 'oonolec naua tres lpa'axaco na talapi qataq ana npaxaatasheguempi na le'ec. Qaq asa'aso huaqaañi na le'eraxa, 'eeta'am na le'eraxa ana ncoỹaraxanaqte,