Mateo 18:10 - La'aqtaqa Ñim Lo'onatac 'Enauacna 2013

^10-11 Qantooñita'ac qome de'era: saishet qome da qauo'otañi ca 'oonolec nam saqca ca la'amaqchec. Cha'aye Aỹem qami' shenapegalo da na lamaxashecpi maye 'amaqtaqaicpi Ñim Lo'onatac 'Enauacna ilotague' namayepi.

Nuevo Testamento Toba Sur

¹⁰ Sa ishit qome da qau'otañi ca 'oonolec nam saqca ca l'amaqchic. Cha'ayi aÿim qami' shinapegalo da na nhuataxauapi mayi lamaxashicpi ñi Dios, namayipi nachi 'eetai' da datato'ot ñi ita'a mayi neta'ague da piguem.

Nuevo Testamento Toba Sombrero Negro

^10-11 Ena'te a'uotañi ga'me onolec naa'me naajo' 'najodolqa, qa'a ami ja'aĝatema queda'me uo'oe joga'me neuatoqo'tpi jo'ne piyem laje' 'me nach'e eta't dajoeda'aguet na'me latajoĝoc ñe'me Taĝadena'.

Mateo 18:10 Referans Kwoze

Salmos 91:11

cha'aye Ñimaye 'am namaxa qome ca lamaxashecpi piguem le'ecpi, da yaqto' ntela'a 'enauac da 'icỹaxac.

Hebreos 1:14

Cha'aye na namaxashecpi piguem le'ecpi, namayepi choche saqcha'a na'añaxacpi maye do'onataxaatacot Ñim Lo'onatac 'Enauacna. Qataq Ñimaye ỹamaxa namayepi da itauan 'enauac nam shiỹaxauapi maye taỹa'a da nca'alaxatec Ñimaye.

Salmos 34:7

Qaq so lamaxashec piguem le'ec Ñim Nataxala', npaxattalec qataq nca'alaxatec, nam huo'o naq 'enec naqa'en Ñimaye.

Lucas 16:22

Qaq huo'o so na'a'q, nache se'eso ỹale maye choxoraq ileu. Nache anac na lamaxashecpi Ñim Lo'onatac 'Enauacna da ỹauega ca ndaqa' maye ỹataqta ỹo'oxoraq, cam hueta'a nataqa'en so Abraham maye chegoxoguet somaye. Qaq co'ollaq qaỹata'ague, nache nataqa'en ileu so ỹale maye sallaxanec. Nache co'ollaq qailareñi,

Mateo 24:31

Nache samaqteegalo qome na ỹamaxashecpi, namayepi ỹauota'a ana lasheere da yaqto' laỹona't nam Aỹem ca'attague'pi.

Lucas 1:19

Nache so namaxashec ỹasateguet somaye, 'eeta': –Aỹem maye nachaỹem Gabriel, maye so'onataxaatacot Ñim Lo'onatac 'Enauacna. Qaq Ñimaye aỹem namaxa da 'am sa'aqtaxanem de'era no'on 'ara'axaỹaxac.

Mateo 18:14

Qaq 'era da 'eetec nataqa'en ñi Qarta'ai maye neta'ague da piguem, da sa ỹaỹamaxaren da deqat ca 'oonolec ne'ena maye qaica ca la'amaqchecpi qataq da nache 'eetai' da qaỹoqta Ñimaye.

Mateo 18:6

Qalaxaye da huo'o ca ỹo'otec nam saq 'amaqtaqpiolec maye Aỹem ca'attague' da ỹaxanec da lpi'iỹaxac Aỹem, nache camaye no'on taxa da qaicoñera'aguet na lqosot ca coma' lta'araic, ime nache qaỹasaxangui na laiñi aca auaxai.

Mateo 2:19

Qalaxaye co'ollaq mashe ileu so Herodes, nache huaña ye Egipto da qaltaq nachaxana so José so lamaxashec Ñim Lo'onatac 'Enauacna, huaigui naqa'en so lo'ochaxa. Nache 'enapega, 'eeta':

Mateo 2:13

Qaq co'ollaq mashe je'c soua ỹaanaxanaxaiqa, nache so lamaxashec Ñim Lo'onatac 'Enauacna nachaxana so José huaigui so lo'ochaxa. Nache 'enapega, 'eeta': –Qoñisheguem, nache 'eltaxan ye nogotolec, qataq añi late'e 'aigue da Egipto. Nache qoueta'a qome yemaye, nato' qom 'am shenapega. Cha'aye ñi Herodes anac da nmitaique ye nogotolec da huotaique ỹalauat.

Mateo 1:20

Qaq co'ollaq ñaq tatapigui lauel de'era so José, nache anac so lamaxashec Ñim Lo'onatac 'Enauacna, huaigui naqa'en so lo'ochaxa da nachaxana somaye. Nache 'enapega, 'eeta': –José, 'am maye 'auachegoxoguet so nta'a David, saishet qome da 'añi'i da 'apaca'aguet añi María da 'arhua. Cha'aye dam llalec maye huetaigui añimaye, chegoqchigui da la'añaxac So Saqcha'a Na'añaxac Qui'itta.

1 Ts 4:8

Qaq ỹoqo'oye ca no'otane' de'era napaxaguenataxanaxac, camaye saishet da nache qomi' da qomi' ỹo'ota'n, maye nacheñi Ñim Lo'onatac 'Enauacna ỹo'otan, Ñim qami' ỹanema So Saqcha'a Na'añaxac Qui'itta.

1 Corintios 11:22

¿Qaicaua peta'a naua maiche qarma'achilli' da qauqui'i qataq qanỹomi? Qaq da nache qoñiita'ac de'era, nache 'eeta'am da sa qauyacñiỹapec na laỹepi maye ỹa'amaqteetacpi Ñim Lo'onatac 'Enauacna qataq qauauoita'a da la'aloxo nam qaica ca ye. ¿Negue't ca qauacheetaique ỹa'aqtac da qami' sanema? ¿Qami' sho'oxoren peta'a? ¡'A'i, saishet da qami' sho'oxoreeta'ape!

1 Corintios 16:11

Ỹoqo'oye qaica ca 'oonolec da qoñiita da ỹo'otan somaye. Nachaqrata da qautauñic da llecỹaxac, yaqto' qaica ca da. Cha'aye seuattaique somaye nataqa'en caua lỹa't qarqaỹa't da yaqto' ñauaneto.

Romanos 14:10

Qaq ỹoqo'oye saishet da qoquiiteguelec na laỹepi qara'amqaanataxanaxauaipi qataq saishet da qauo'otañi, cha'aye 'enauac da shenaqta qome qomi' nmi't Ñim Lo'onatac 'Enauacna.

Hechos 27:23

Shecpe aỹem nachaxana so chegaqasheguem lamaxashec Ñim Lo'onatac 'Enauacna maye sooto'ot qataq so'onataxaatacot.

Hechos 12:23

Nache saqaỹaloq da anac so lamaxashec Ñim Lo'onatac 'Enauacna, nache ique'emaqchet so Herodes, cha'aye somaye ipi'itaxaatega da 'eeta'am da lataxac Ñim Lo'onatac 'Enauacna. Nache qaỹata'ague, nache ileu. Ilem na qoche'l maye chectac na lauel somaye.

Hechos 12:15

Nache qoỹeetego' asomaye, qoỹeeta': –¡Ỹoqta huo'o da 'oic peta'a! Qalaxaye asomaye ỹoqta 'eesa naqa'en da nacheso. Qalaxaye somayepi 'enapeco': –¡'A'i, saishet da nachera; souaxai' nachera da nhuataxaua namaxashec piguem le'ec!

Hechos 10:3

Qaq huo'o so na'a'q mashe dasheta añi nala', nache somaye huo'o so lauanaqchec: ila'aguet so lamaxashec piguem le'ec Ñim Lo'onatac 'Enauacna da naỹa'a ca hueta'a somaye, nache 'enapego', 'eeta': «¡Cornelio!»

Hechos 5:19

Qalaxaye so lamaxashec Ñim Qarataxala' ỹauatoiguilo soua laso'omi aso ncoñetaxanaxaqui se'eso pe, nache nqatre'c soomaye. Nache 'enapegalo', 'eeta':

Salmos 17:15

Qalaxaye aỹem, qom saỹaten da qaica ca sasouaxat nache samachiguiñi da selogui da 'arashiguiỹaxac, na'aictaxa da choche 'am samato'ot da ñelouec.

Salmos 15:4

qataq cam ỹo'otan ca shiỹaxaua maye 'itchiguiñi da qaỹo'otan, qalaxaye ỹo'oxoren ca huo'o naq 'enec naqa'en Ñim Nataxala', qataq ca ipacchiguilo naua la'aqtaqa Ñimaye, na'aictaxa da huo'otaq qauem ca ivireguet,

1 Reyes 22:19

Nache so Micaía, qaltaq 'enapec: Qaq souaxat de'era 'ara'aqtac, nache nagui 'ana'axaỹaxana da la'aqtac Ñim Nataxala', 'eeta': Aỹem sauaachigui Ñim Nataxala' da nso'ootangui aso nso'onaxaqui, qaq so nalleppi Ñimaye nachattañi, huo'o so pa'ata'ague na aloic qataq na ne'emaq.

1 Timoteo 4:12

Qataq saishet da 'anasheneuo da qaica ca 'am qoỹanaigui souaxat da ñaq 'am nsoqolec. Nachaqrato' da 'am laloqnaxanaxat na laỹepi 'amqaanataxanaxaicpi souaxat naua ỹaỹamaqchiyiñi 'artaxaỹaxaco, qataq da no'on 'arataxac, qataq da 'arsoxoyec, qataq da 'arpi'iỹaxac, qataq da qui'itta na'aqtaguec da 'anachaalataxac.

1 Corintios 9:22

Qataq naxa da sootaigui na saxanaxa da da'añi da lpi'iỹaxac, nache se'enaxat da lataxac. Yaqto' ishet nataqa'en da setauan namayepi. Qataq 'era da sheetec da ỹataqta ñacoola't da se'enaxatchigui da lataxac ñi 'oonolec na ỹotta'a't shiỹaxauapi, yaqto' ishet da qanca'alaxatec namayepi.

Romanos 15:1

Qomi' maye ỹoqta saỹaanaqta da 'eetapeguec Ñim Lo'onatac 'Enauacna, saishet da nda'a't da seuennaqtega cam 'onaxaic maye maiche qomi' taleguete. Nachaqrata da qomi' setauanaq nam saxanaxa da da'añi da lpi'iỹaxac.

Romanos 14:21

Qaq ỹoqo'oye 'onaxaic da saishet da qanallec na lapat qataq saishet da qanỹomgui na lataxa qataq saishet da qaỹo'ot ca camachaqca lỹa cam ishet da huañi naqa'en ca na'amqaanataxanaxaua.

Apocalipsis 8:2

Ime, nache sauaachigui se'esoua siete namaxa'she piguem lashe' da qoỹami' ñi 'oonolec ana nasheere, qaq soomaye nachattrañi datataua'alo Ñim Lo'onatac 'Enauacna.

Gálatas 6:1

Qami' ỹaqaỹa't, qami' ỹauecta'ape So Saqcha'a La'añaxac Ñim Lo'onatac 'Enauacna. Ỹoqo'oye da qoñiita da huo'o ca ilalec lasouaxashet ca lỹa, nache iuen da ỹaỹamaxaañi irolec ca no'on ltaxaỹaxac. Qalaxaye nataqa'en iuen da ỹataqta qanchilỹañi, cha'aye saiuena'a da qami' huetoiguilo da qarhuennataxaqui da qauo'oche ca sa ỹaỹamaxañi.

2 Corintios 10:10

Cha'aye huo'o na 'eetega da naua ỹa'aqtaqa maye huetaleguete ana ỹere ỹataqta sa nsattegueta, qataq huo'o da la'añaxa'c, qaq dam ỹataxac da setaqtac, qalaq qaica ca ỹa'añaxac, qataq sa saỹaten da ỹaỹamaqchiyiñi naua ỹa'aqtaqa qataq ỹataqta qaica ca ỹayego't naua ỹa'aqtaqa, nachaqrata da qaỹo'ota'n.

2 Corintios 10:1

Aỹem qoỹeetegacnaxa da qaica ca ỹa'amaqchec da qami' sootaiguilo, qalaxaye naxa da aỹem qaỹoqta, qalaq ỹataqta saq llivigui ye iuel. Qaq aỹem qami' ñachoxonnoiguilo chegoqchigui da lsoxosoxonaxac qataq da lauotaxanaqtaic So Cristo, da qom qami' sevitalo, qalaq saishet da aỹem qauamaqỹalec, da yaqto' sa sareno'ot da shenapega nam qomi' quetapegueleguete, cha'aye namayepi 'eetega da so'otaqtac damaye, cha'aye huo'o cam yo'oqchigui ñaquitaqtaique, shenaqta'am nam laỹepi shiỹaxauapi maye huetalec ana 'alhua.

Lucas 10:16

Ime, nache So Jesús 'enapegalo soua lapaxaguenataqa, 'eeta': «Camachaqca ca qami' na'axaỹaxanalo, qaq nache Aỹem maye Aỹem na'axaỹaxana. Qaq cam sa qami' ỹaconegueta, qaq nache Aỹem maye saq Aỹem ỹaconeguet; qaq cam saq Aỹem ỹaconeguet, qaq nacheñi Ñim Lo'onatac 'Enauacna maye sa ỹaconeguet Ñim Aỹem namaq.»

Mateo 12:20

Qataq saishet da nquigaxatec da nque'eenaxac cam mashe nache 'eetai' da que'emaxaic, qataq saishet da iviraxata'a da ỹalauat, nam mashe ileetapigui'. Nachaqrata da ỹa'añaqchet nam mashe qaica ca la'añaxac qataq iviraxata'a da dauegaxan da 'eetapeguec Ñim Lo'onatac 'Enauacna.

Zacarías 13:7

Ñim Nataxala' maye Qaica ca Ỹaqalanapec da la'aqtac 'eeta': ¡'Anachaañi 'am ỹeelonec, nache 'auataỹa'aguet ñi ỹamaxashec maye ilotague' ana qagueta, qataq ñim ỹale maye itaua! ¡'Aualauat qome ñim ilotague' ana qaguetapi, yaqto' anam lhuateguishe qaguetapi laga't qome, qaq Aỹem sataỹa'aguet qome da salauat na qagueta llalaqpi!

Zacarías 4:10

«Cha'aye nam qaica ca ỹanapoigui som saq 'amaqtaq maye chegoqchiguiña de'era no'onataxanaxac, namayepi ntonapigui' qom ila'a so Zorobabel da imatta de'era no'onataxanaxac.» Qaq ime, nache so namaxashec piguem le'ec qaltaq, 'eeta': «Ñe'eñeua siete ncoỹaraxanaxaqui', nache la'aitel Ñim Nataxala', maye imeteetrac 'enauac ana 'alhua.»

Ester 1:14

Qaq soua ỹataqta pa'ata'agueta so nta'a, qalaq nachesoua soua Carsena, Setar, Admata, Tarsis, Meres, Marsena qataq so Memucán, qaq se'esoua siete nachesoua soua ỹataqta 'amaqtaqaiqa ye Persia qataq ye Media, som ỹalectraigui so na'atta'a't ltauapi so nta'a, qataq huetalec da 'amaqtaqaic no'onataxanaxac yi'iye 'alhua.

2 Samuel 14:28

Qaq so Absalón dos soua vi'iye da netaña ye Jerusalén, qalaxaye saishet da nauane' so nta'a.

Hebreos 9:24

Cha'aye So Cristo saishet da inoxonoigui so npe'l maye lo'onatac so choche shiỹaxauapi, na'aictaxa da se'eso npe'l da somaye choche lqui'i acam ỹoqta 'eesa no'onaxanaxaqui. Cha'aye So Cristo taigue da piguem da yaqto' nqo'oneua'a Ñim Lo'onatac 'Enauacna, da qomi' detaqleguete da yaqto' qomi' ichoxore'n.