Mateo 13:44 - La'aqtaqa Ñim Lo'onatac 'Enauacna 2013

⁴⁴ Da lo'onataxanaxac Ñim Lo'onatac 'Enauacna, damaye 'eeta'am aca laỹe' ana anom maye qoỹoxotoigui ca 'alhua. Qaq huo'o so shiỹaxaua ilalec asomaye. Nache qaltaq ỹoxooñi, ipagaqchiichiguiña ca lma'. Nache ỹataqta lta'araic da ntonaxac, nache ỹe'eguelaq. Ime, nache imen 'enauac nam logoxoshetpi, nache desheenaxana se'eso 'alhua, da yaqto' lalamaqte aso anom.

Nuevo Testamento Toba Sur

⁴⁴ Da l'onataxanaxac ñi Dios mayi neta'ague da piguem, damayi 'eeta'am aca laÿi' ana plata mayi qoÿoxotoigui ca 'alhua. Qaq huo'o so shiÿaxaua ilalec asa'aso laÿi' ana plata. Nachi qaltaq ÿoxojñi, ipagaqchiichiguiña ca lma'. Nachi ÿataqta lta'adaic da ntonaxac, nachi ÿi'iguelaq. Ime, nachi imen 'enauac nam logoxoshitpi, nachi deshijnaxana se'eso 'alhua.

Nuevo Testamento Toba Sombrero Negro

⁴⁴ “Joda'me lejaliaĝa ñe'me Dios ena'am qom qoyoĝochiñe jaga'me lae't da'me neuoyaĝac. Qama'le 'uo ga'me jiyaĝaua yejomalegue jaga'me neuoyaĝac lae't, qama'le nach'ega yacha'ña da'me yitaĝa yoĝotoue jena'me aleua. Yataqachiñe najaqachigui da'me lamaic ca'li ec qaedi yemen yema ga'me yauana. Yem qama'le ecot ga'me aleua lae.

Mateo 13:44 Referans Kwoze

Colosenses 2:3

Cha'aye Somaye nacheso so imatta't 'enauac na ỹotta'a't naỹaaneguesat qataq na nauattonaxanaxacpi maye chochaq huañi.

Lucas 14:33

Ỹoqo'oye camachaqca ca huotaique da ỹapaxaguenatac, nache 'onaxaic da nataqa'en deuennataxaatelec da huo'otaq ishet da ỹañoxot da ỹaxanec 'enauac nam hueto'ot.

Mateo 6:21

Cha'aye qami' cam hueta'ague ca qarsallaqai, nache nataqa'en hueta'ague da qarhuennataxaqui.

Mateo 19:29

Nache 'enauac nam no'onaxatchigui na lma'pi, huo'otaq ca lqaỹañecpi ỹalleppi qataq 'alpi, huo'otaq lta'a qataq aca late'e, huo'otaq lhua qataq ca llalaqpi huo'otaq na na'alhuapi, souaxat Aỹem, nache camaye ivi' qome ca cien nam qoỹami'pi. Nataqa'en qoỹami' dam nca'alaxa maye chochaq tatec.

Proverbios 16:16

Ỹoqta ỹactec da 'onaxaic da qaỹaconeguet da naỹaanec, qaq saq 'ena'am ca oro, qataq da nauattonaxanaxac, napacalec na lcat plata.

Proverbios 23:23

'Anmitaique qome da 'eesa lataxac, naỹaanec, napaxaguenataxanaxac qataq da nauattonaxanaxac, ¡qalaxaye saishet qome da 'aumen!

Apocalipsis 3:18

Qaq ỹoqo'oye nagui 'am seqata da Aỹem 'auachegoxoto'ot qome da 'ausheenaxana cam ỹoqta 'eesa da 'am sallaxanec naqa'en. Cha'aye ca Aỹem chegoqo'ot ỹataqta 'eesa da lta'araic da lashiichiỹaxac, 'eeta'am ca oro da ime da nqatelaguec. Da saishet da 'auauotaique da huo'o ca 'ara'agaxa da qouetauec, nache 'auaconegueta naua anogo lapagaxaiqa maye 'am sanema da yaqto' 'aayiñi qataq na lata' naua 'ara'ai'te, da yaqto' ỹoqta 'anauaachiguiñi.

Mateo 19:27

Nache so Pedro 'enapeco': –'Am Qarataxala', qomi' ño'onaxataqchigui 'enauac nam qomi' hueto'oto, ime, nache 'am seca'ataxague, qaq ¿chaq negue't qome ca qaraueguec?

Mateo 19:21

Nache So Jesús 'enapeco': –Da 'anshetaique da ỹataqta nalochiguiñi da 'arataxac, qaq no'on da qojec, nache 'aumen 'enauac na 'am hueto'ot, qaq aca lasheue nache 'aỹa'anem na choxoraqpi, yaqto' Ñim Lo'onatac 'Enauacna maye imattalecna 'am ỹami' ca 'araueguec. Qaq da ime, nache 'auanac da Aỹem 'auca'ategue.

Isaías 55:1

'Enauac nam ilem laquip, anac qome da yaqto' nỹomgui na 'etaxat, qataq nam qaca aca alom anac qome da ỹache na trigo maye qoỹaatem da yaqto' aloq, qataq yaqto' ỹanata na lataxa qataq na huaca lche' maye qoỹaatem.

Romanos 15:4

Cha'aye 'enauac nam nanettalec ana nere maye huetalec na la'aqtacpi Ñim Lo'onatac 'Enauacna qoỹiyiñi co'ollaxa da yaqto' qomi' ỹapaxague'n. Da la'aqtaxanaxac anamaye qomi' itaua'n da yaqto' huo'o da qara'añaxac qataq qanhualaxaunaxac, qataq ỹataqta 'itchiguiñi da 'eesa dam qara'amqaanataxanaxac.

Mateo 13:24

So Jesús ỹauo'o da lỹa daloqnaxana, 'eeta': «Da lo'onataxanaxac Ñim Lo'onatac 'Enauacna 'eeta'am ca ỹale maye ỹaañi aca no'on lañiguishe maye ala na trigo da ỹaalec ca na'alhua.

Hebreos 10:34

Nataqa'en ỹataqta huo'o da qarchoxonnataxanaqai nam ncoñeteguishecpi, qataq ỹataqta huo'o da qantonaxaqui souaxat da qauaqaita'a da na nta'alpi deuotaxanec na qaralamaxache, cha'aye qami' qauaỹaañita da qami' taleguete qome cam hueta'ague da piguem maye ỹactec da lyac qataq qaica ca loga't.

Juan 6:35

Nache So Jesús 'enapeco': –Aỹem Nachaỹem nauole maye san da nca'alaxa. Ca Aỹem naua'a, nache sa nauane' na lqouaxa; qataq ca Aỹem ỹa'amaqten, nache sa nauane' na laquip.

Proverbios 17:16

Negue'to' ca naigui ca qaica ca ỹaỹaanapec da huo'o aca alom, ye saishet da desheenaxana da naỹaanec cha'aye qaica ca lauattonaxanaxac.

Colosenses 3:16

Qataq saishet da qaucoviỹa'ai da llo'oxoye'c naua lapaxaguenataxanaxaco So Cristo. Qataq da qauapaxagueñi ca qarỹai huo'otaq da qaua'añaqchichi qalaq ỹataqta qanaỹaanaxanaqchiñi. Qataq qauo'oñi na no'onecpi maye huetalec ana nere maye huetalec na la'aqtacpi Ñim Lo'onatac 'Enauacna, qataq qauo'oñi' naua no'onqa maye chegoqo'oto So Saqcha'a Na'añaxac Qui'itta, qataq qaỹa'añiitacot da qana'achecỹaxaqui Ñim Lo'onatac 'Enauacna ỹataqta imauec da qarquiyaqteỹaxaqui.

Proverbios 18:1

Ca mataxalaic qalaq nmittaique ca maiche 'eetapeguec, qataq dataỹa'aguet 'enauac na no'on nqataxacpi.

Da na'aqtaguec so Job 28:13

Na shiỹaxauapi sa ỹaỹaten da lashiichiỹaxac damaye, qataq damaye saishet da qaỹanata ana 'alhua.

Mateo 13:46

Qaq da huo'otaq ỹanata aca 'oonole maye ỹataqta qalota da lashiichiỹaxac, nache ỹe'eguelaq. Ime, qaq imen 'enauac na logoxoshetpi, nache desheenaxana asomaye.

Mateo 13:47

Nataqa'en da lo'onataxanaxac Ñim Lo'onatac 'Enauacna, damaye 'eeta'am ca naleguec maye qaỹalliguingui aca auaxai, nache ỹataqta ỹalecta't nam lalliiguishec nỹaqpi.