Mateo 1:21 - La'aqtaqa Ñim Lo'onatac 'Enauacna 2013

²¹ Qaq añimaye qom ñiguiñi ca llalec. Qaq 'am nache 'aỹa'anagui da le'enaxat Jesús. Cha'aye nca'alaxateeguesop qome da nhuaxanaguec na lalamaxatpi souaxat na lasouaxashetpi.

Nuevo Testamento Toba Sur

²¹ Qaq añimayi huo'o qome ca llalec. Qaq 'am nachi 'ai'anagui da l'enaxat Jesús. Camayi l'enaxat de'eda, cha'ayi nca'alaxateeguesop qome na lalamaxatpi na lasouaxashitpi.

Nuevo Testamento Toba Sombrero Negro

²¹ María 'uo qomle ga'me c'oĝot, qama'le auen lenaĝat Jesús qomle. Naq'aeta da'me lenaĝat qa'a nec'alaĝatedegue qomle gaa'me jiyaĝadipi chiyoĝotauelo jodaa'me loeco.”

Mateo 1:21 Referans Kwoze

Hechos 13:23

Qaq huo'o so 'oonolec nam llalaqpi se'eso David, somaye nacheso So Jesús som ỹanagui Ñim Lo'onatac 'Enauacna da Lca'alaxaqui naqa'en na Israel le'ecpi, cha'aye Ñimaye ỹachaxanapec co'ollaxa da ỹan.

Hechos 4:12

Qaica ca lỹa ishet da chegoqchigui da nca'alaxa. Cha'aye Ñim Lo'onatac 'Enauacna qaica ca lỹa ne'enaxat da qomi' ỹanema ana 'alhua, da yaqto' ishet da qomi' nca'alaxatre'c, nachaqsota So Jesús.

Juan 1:29

Qaq so lỹa na'a'q, nache so Juan ila'aguet So Jesús da naỹaxaama somaye, nache somaye 'enapega so shiỹaxauapi 'eeta': –Ña qauloỹeeguet, 'ena cha'aguet na Jesús, nachena na 'eeta'am ca nachetaqtaxanaxat Qagueta Llalec maye ỹachegoxotchigui Ñim Lo'onatac 'Enauacna da ỹapalaxat na lasouaxashetpi na shiỹaxauapi.

1 Juan 3:5

Qaq qami' mashe qauaỹachiñi da So Jesucristo naỹa co'ollaxa ana 'alhua, da yaqto' ỹapalaxat 'enauac na lasouaxashetpi na shiỹaxauapi. Qaq Somaye qaica ca lasouaxashet qataq saishet da ishet da huo'o ca lasouaxashet.

Lucas 2:21

Qaq co'ollaq mashe ivi' soua ocho na'axa'te da lañoxoc so nogotolec, nache qaỹauo'o so la'anaxat na lo'oc Somaye. Ime, qaq qoỹanagui da le'enaxat Jesús, dam ne'enaxat maye da'aqtaxanem co'ollaxa so lamaxashec Ñim Lo'onatac 'Enauacna aso María co'ollaq saxanaxa da hualaxai.

Hechos 5:31

Ñim Lo'onatac 'Enauacna ỹo'otec da So Jesús nso'oota'ague da aloic qataq ỹanagui da Nataxala', qataq Nca'alaxaqui, da yaqto' na Israel le'ecpi ỹaxaañi da ỹo'ottac na qauem, nache Ñim Lo'onatac 'Enauacna ỹapalaxa't naua lasouaxashe'ete.

Lucas 1:31

Nagui 'am hualaxai. Ime, qaq huo'o qome ca 'aỹa'alec, nache 'aỹa'anagui qome da le'enaxat Jesús.

Tito 2:14

Somaye nañan co'ollaxa da qomi' ileualeguete, cha'aye nshetaique da qomi' nca'alaxateeguesopa na qauemsat, qataq qomi' iqui'itaxa't da ỹauo'oi qomi' lalamaqa'ate, qataq da yaqto' so'otaq ca ỹaỹamaqchiguiñi.

Lucas 2:11

¡Ye Qarca'alaxaqui mashe ñiguiñi hueta'a ye Belén! ¡Nacheye ye Lca'aguishec Ñim Lo'onatac 'Enauacna qataq Nataxala'!

1 Juan 1:7

Qalaxaye da ñachaataqtaigui na yo'oqchiguiñi, da shenaqta'am Ñim Lo'onatac 'Enauacna maye huetaigui da yo'oqchiguiñi, nache ỹataqta ña'araqta't da qomi' nqaỹañecpi, qaq Ñim Lo'onatac 'Enauacna ỹapalaxa't naua qarasouaxashe'ete, chegoqchiguilo naua ltago'q So Llalec Jesús.

Zacarías 9:9

¡Ñaq 'antonapigui' qome, 'am nỹecpi maye qonetalec ana qasoxonaxa Sión! ¡'Auo'onaxaatac souaxat da 'antonaxac 'am Jerusalén! Mashe 'am nata'a na 'arta'a, maye no'on da lataxac, qataq deca'alaqtaxan, namaye qaica ca la'amaqchec, netalec na 'ashena llalec.

Hechos 3:26

Qaq ỹoqo'oye Ñim Lo'onatac 'Enauacna co'ollaq qaltaq nca'alec naqa'en So Llalec Jesús, nache ỹa'auaxaachiyiñi da qami' namaxalo, da yaqto' qami' ỹanema ca no'on qoyecỹaxaqui, yaqto' ñi 'oonolec da qoñiita ishet da ỹaxanec ca sa ỹaỹamaxañi.

Apocalipsis 7:14

Nache aỹem sasateguet somaye sheeta': –'Am ỹataxala', 'am maye 'auaỹaten. Nache somaye 'eeta': –«Qomye ne'ena, nachena nam saishet da ileu co'ollaq huaigui so lta'araic que'eenaxac ana 'alhua. Namayepi ỹataqta huo'o da lpi'iỹaxac Ñim Lo'onatac 'Enauacna. Qaq Ñimaye nache ỹapalaxat na lasouaxashetpi, chegoqchigui da l-leuaxa Ñi Qagueta Llalec.

Hebreos 7:25

So Jesús ishet da chochaq tatec naqa'en da lca'alaxa nam huotaique da ivira'a da nauochaxaua Ñim Lo'onatac 'Enauacna chegoqchigui Somaye. Cha'aye Somaye, nache 'eetai' da nca'altauec, qataq nache queto'ot da iỹaxaatacot Ñim Lo'onatac 'Enauacna da iỹaxaateguelec namayepi.

Daniel 9:24

Iuen qome da inoxonaqchetrec caua Setenta semanas nam 'arhuo' le'ecpi, qataq na qui'itta huaqta'a't nỹecpi maye 'aralamaxat, da yaqto' nache tachiguiña naqa'en da lle'etaxaloxo qataq da lasouaxashet, qataq yaqto' ỹaconeguet ca nchoxonnataguec souaxat nam qauempi, nache chochaq tatec qome naqa'en da na'ayiñi da nalochiguiñi lataxac, yaqto' ipacchigui qome som 'arauanaqchec qataq som 'ara'aqtaxanaxac, qataq da qaiqui'itaxat yem saqaishetapec.

Jeremías 23:6

Qaq qom ñaq do'onataxaatac camaye, nache nca'alec qome na Judá, nataqa'en na Israel qaica qome ca ndaqtaique. Qaq 'era da le'enaxat da qaiỹaxana qome camaye: ‹Ñim Nataxala' nacheñi ñim qarca'alaxaqui.›

Génesis 18:10

Nache so 'oonolec soomaye 'enapeco': «Na lỹa vi'i, nache qaltaq ñe'eguelaq qome da 'am ñamaqtega, qalaq nache huetoigui qome da añi 'arhua Sara huo'o ca llalec.» Qaq aso Sara na'axaỹaxaatega 'enauac na ntaxaỹaxacpi, hueta'ague na l-laq so Abraham, asomaye huetaigui so lasom so npe'l.

Lucas 1:13

Qalaxaye so namaxashec 'enapeco': –Zacarías, saishet da 'añi'i, cha'aye Ñim Lo'onatac 'Enauacna hua'aqtega da 'anqouagaxaunaxac. Qaq nagui añi 'arhua Elisabet huo'o qome ca llalec. Qaq camaye 'anagui qome da le'enaxat Juan.

Jeremías 33:16

Qaq que'eca na'a'q, na Judá nca'alec qome, qaq na Jerusalén qalaq qaica qome ca iraxaatapigui'. Qaq 'era qome da le'enaxat da qaiỹaxana: ‹Ñim Nataxala' nacheñi Ñim qarauegaxanaxac.›

Génesis 17:19

Nache Ñim Lo'onatac 'Enauacna ỹasateguet somaye, 'eeta': «Qalaxaye aỹem mashe shenapec da añi 'arhua Sara huo'o qome ca llalec, qaq camaye 'aỹa'anagui qome da le'enaxat Isaac. Qaq camaye, qataq cam chegoxoguetpi, nache chegoqchigui qome dam llapaxañi ñaỹamaxataxac maye chochaq tatec.

Génesis 17:21

Qalaxaye dam ñaỹamaxataxac nache 'eetai' qome da huetalec ca Isaac, cam llalec añi Sara maye ñiguiñi qom inoxonec na 'oonolec vi'i.

Jueces 13:3

Qalaxaye so nale piguem le'ec Ñim Nataxala', nachaxana co'ollaxa asomaye, nache 'enapego', 'eeta': 'Am sa ỹauanega da huo'o ca 'aỹa'alaqpi, qalaxaye nagui 'am hualaxai, nache huo'o qome ca 'aỹa'alec.

1 Samuel 1:20

Huaña, nache aso Ana hualaxai, qaq co'ollaq ivita so laloqo' da deco'o, nache ỹale so llalec, nache ỹanagui da le'enaxat Samuel, cha'aye asomaye 'enapeco': «Seỹaxanot co'ollaxa Ñim Nataxala'.»

Juan 4:42

Nache somayepi 'eetega aso 'alo, 'eeta': –Nagui saishet da nachaqrata da 'ara'aqtaxanaxac da sa'amaqtenaq, cha'aye qomi' nataqa'en maiche ña'axaỹaxanaqtega damaye qataq saỹaanaqta da ỹoqta 'eesa da nachera da Nta'a Lca'alaxaqui nam shiỹaxauapi maye huetalec ana 'alhua.