Levítico 4:34 - La'aqtaqa Ñim Lo'onatac 'Enauacna 201334 Ime, nache ca ntaxaỹaxanaxanec ỹa'ayingui ana llaxaata ca ltago'q aca qagueta maye nachetaqtaxanaqte maye sa imauaq da qaỹavigaxat, nache ỹa'ame'n naua lsheeneqa ñeua lcoue añi nca'atoxonaxalate da huo'o na qaỹavigaxat. Qaq que'eca no'onañi ntago'q, nache icorot na pa'aguiñi añi nca'atoxonaxalate. Gade chapit la |
Cha'aye So Cristo 'oonolec co'ollaxa da ileu, nache sa lỹa da ỹe'eguelaxalec da ileu, da yaqto' ỹapalaxat na qarasouaxashetpi. Somaye ỹataqta soxoraic qataq qaica ca lasouaxashet qataq huo'o da nque'eenaxac, souaxat na 'etaxaloxoicpi da yaqto' qami' qaviyeeta'a da qanauochaxauai Ñim Lo'onatac 'Enauacna. Som ỹalauatpi So Cristo, somayepi ilaxachigui da lo'ocỹaxac, qalaxaye Somaye nca'alec yaqto' taigui da lca'alaxa saqcha'a.
Qaq da ỹataqta qauennataxañiilec de'era, nache ¡ỹactec qone' da lchec ca nhuaxanaguec maye ỹaconeguet cam ỹo'otan som Llalec Ñim Lo'onatac 'Enauacna qataq da 'eetega qaica ca naigui da l-leuaxa Somaye! Qaq da nache 'eetec de'era, nache isheueetac som Saqcha'a La'añaxac Ñim Lo'onatac 'Enauacna maye lauotaxat camaye. Nataqa'en da ỹo'otan da l-leuaxa So Cristo qamaq nachera dam chegoqchigui da ipacchigui da naỹamaxataxac Ñim Lo'onatac 'Enauacna qataq chegoqchigui da qaỹapalaxat na lasouaxashetpi.
Ñim Lo'onatac 'Enauacna ỹo'ot 'enauac nam huetalecna da yaqto' maiche lalamaxat, qataq huotaique da nhuanaua'a 'enauac da llo'oxoyec nam ỹauotec qataq ỹalaxaguet Ñimaye. Qaq nachera da huo'omshe Ñim Lo'onatac 'Enauacna ỹa'auaxaañi da naloqchiichiguiñi da lataxac So Jesucristo, nache ỹaneguet da l-leuaxa, cha'aye Somaye, nacheso Som Lca'alaxaqui namayepi.
Qaq Ñim Lo'onatac 'Enauacna ỹo'ot co'ollaxa dam saishet da ỹañoxot da ỹo'ot nam namaxasoxonaxacpi maye chegoqo'ot so Moisés, cha'aye qaica ca ilo'ogue da lqopitaxanaqtaic da ỹo'ot nam qauem. Nache Ñim Lo'onatac 'Enauacna namaxalec co'ollaxa ana 'alhua so lalamaxat Llalec, qaq Somaye ỹataqta 'ena'ama qomi' da qarqalviaxa, qataq da qañe'eguenataguec. Qaq Ñim Lo'onatac 'Enauacna namaxalec ana 'alhua Somaye da yaqto' qomi' ileualeguete souaxat na qaye'etaxaloxo. Qaq nache chegoqchigui Somaye da Ñim Lo'onatac 'Enauacna, nlaxaañi da la'añaxac da ñe'etaxaloxo.