Biblia Todo Logo
Bib sou entènèt

- Piblisite -




Levítico 23:2 - La'aqtaqa Ñim Lo'onatac 'Enauacna 2013

2 «Qonapega qome na Israel le'ecpi da 'ena na laloxoquipi na naponaxacpi maye ỹalamaxat, qaq qami' qauo'oche qome ne'ena naponaxacpi da yaqto' Aỹem qavio'oxoyiñi. Aỹem Nataxala' maye llapaxañi damaye.

Gade chapit la Kopi




Levítico 23:2
28 Referans Kwoze  

Qaq 'ena na laloxoquipi na naponaxacpi da ivita da qaỹo'oxoren Ñim Nataxala'. Ỹoqo'oye qami', nache qauo'oche qome ne'ena naponaxacpi, qataq nache huetoigui da qami' qaỹa'añiiua'a Ñim Nataxala' aca qarachetaqtaxanaqchepi qaỹavigaxatta, qataq aca nachetaqtaxanaqte nañiguishe ala, qataq aca laỹe nachetaqtaxanaqtepi qataq ca nachetaqtaxanaxat lataxa, nache ỹataqtac ye laloxoqui camaye da qaỹo'ot.


Qaq 'ena na laloxoquipi qome da qauo'oche na naponaxacpi da yaqto' Aỹem qavio'oxoyiñi, Aỹem Nataxala'. Ỹoqo'oye qauo'oche qome ne'ena naponaxacpi.


¡Ña qauashiiyigui qome ana nasheerepi da huaña na Sión, ña qauauo'oi ca qaraponaxaqui qataq qanqouaqchichi qome,


Huaña qome nache tachiguiña ñaqa'en da lamaicỹaxac, qataq da ỹo'ottac na lquia'axac da dalaxaic ñi ca'agoxoic, qataq ye na'a'q mataxaqui, qataq 'enauac na laỹe la'ashaxacpi.


Qataq qauashiiyigui ana peenaq lcoue da ivita da dalaxaic so ca'agoxoic, qataq da ivita da nlaqchigui so ca'agoxoic, maye huetoigui naxa da so'otaq da qarquia'axac.


Qaq 'eca cam nachetaqtaxanaxatpi maye ishet da qaỹa'añiỹot Ñim Nataxala', da ivita ca laloxoqui ca ỹo'oxoraic qaraponaxaqui, qataq ca nachetaqtaxanaxat da qaipacchigui ca qoỹan na'aqtac, huo'otaq ca nachetaqtaxanaxat maye maiche qoỹaneuopi, huo'otaq ca qaỹavigaxatta maye huaqtalec ca 'ayiiña, qataq ca lataxa, huo'otaq ca nachetaqtaxanaxat maye qanhuaachigui.


Nataqa'en caua na'axa'te da qauamaichiguiñi, nache qaỹashiiyiguilo qome caua nasheerel, qataq da dalaxaic ñi ca'agoxoic huo'otaq da qoỹaneuo na nachetaqtaxanaxat qaỹavigaxatta, qataq na qanhuaachigui. Yaqto' qami' seuennata'alo qome. Aỹem Nataxala', maye Aỹem Qanatamnaxala'ai.»


Qaq co'ollaq qaỹata'ague de'era, nache So Jesús ỹe'eguelaxa ye Jerusalén, da yaqto' ỹalegueua'a so laponaxac na judiopi.


¡Ña qanloisheguem! ¡Mashe anactalec ana qasoxonaxapi, nam namaxashec maye ndoi' cam no'on na'axaỹaxac, nam ỹa'axata'aguet cam nlagaxayec! Qaq ỹoqo'oye 'am Judá, 'auo'ot qome cam 'arquia'axac, qataq 'aupacchigui qome cam 'aỹa'an 'ara'aqtac. Cha'aye nache saishet qome da qaltaq 'am nnoxotaua'a nam qauemaicpi, cha'aye mashe imauec da nlachiguiñi.


Qalaỹoñiỹa't qome na Israel le'ecpi nache qauo'oche ca qanqouaqchetaxaqui, qataq qalaỹoñiỹa't na nqueroxonecpi qataq 'enauac nam netalec ne'ena 'alhua, huaña añi atamnaxaqui maye lalamaqte Ñim Qanatamnaxala'ai, nache qauỹaxañiỹot Ñim Nataxala'.


¡Na nqa'aicpi maye naỹa'a ye Sión qalaq huetangui da naquicoxo! ¡Nache qaica ca naỹa na naponaxacpi maye huaña naxa yemaye! Naua laso'omi yem huaqta'a't nỹecpi qalaq tooleguete, na ntaxaỹaxanaxanecpi qalaq nỹeetac souaxat da nqui'ic, na qa'ampiolec qalaq daquicota, nache imauec ye Jerusalén da nlaqchigui da naquicoxo.


Ña qauloỹa ye Sión, yem huaqta'a't nỹecpi maye huaña naxa na qara'ashaxacpi, ña qauamachiỹa'a ye Jerusalén yem huaqta'a't nỹecpi maye ỹataqta na'atchiguiñi, yemaye 'eeta'am qome ca npe'l maye saishet da qanlaxaañi, qataq saishet da qanapogoyishegue'm naua lashel qataq saishet da dachepi' naua lque'ete.


nache somayepi nasachigui da ỹa'axatem 'enauac so lma' ye Israel, chegoqchiguiña naqa'en ye Berseba, nache ivitta'a ye Dan, dam ncoyeguenataxanaxac da yaqto' qanqo'ona ye Jerusalén da qaỹo'ot so Lapascua, maye lapaxañi Ñim Nataxala' maye Natamnaxala' so Israel le'ecpi. Cha'aye mashe qaỹoqtegue co'ollaxa da saishet da qaỹo'oxoren se'eso na'a'q, da qaipagaqchiichigui som nache 'eetai' nanettañi.


ỹoqo'oye somaye damaxasoxoolec da qaỹo'ot so naponaxac da qaỹo'oxoren so Baal, qaq nache qaỹo'ot somaye.


Qaq 'era da 'eetec so Moisés, da da'aqtaxanem so Israel le'ecpi na laloxoquipi so naponaxacpi maye lapaxañi Ñim Nataxala'.


Qataq nacheca que'eca na'a'q da huetoigui nataqa'en da qauo'oche ca naponaxac da yaqto' Aỹem qavio'oxoyiñi, qataq saishet da qauo'oche ca camachaqca nam qapa'atta no'onatacpi. Qaq 'era qome da nache 'eetai' lataxac da qoyecỹaxaqui, qataq cam qami' chegoxogueta, na'aictaxa ca pa'aigue ca qoñiitaña ana 'alhua.


Qaq so Aarón co'ollaq ila'a de'era, nache ỹo'ot aso nca'atoxonaxalate. Ime, nache ỹa'alaxalec somayepi, 'eeta': «¡Qonte' so'otaq ca qayo'oxonnataxanaxac da sho'oxorenaq Ñim Nataxala'!»


Qaq aỹem ñeshetaique da qami' qauaỹaañita da ỹataqta lta'araic da ñeloquiaxac souaxat da qoñiita, qataq nam netaña ye nỹecpi ye Laodicea, qataq 'enauac nam saxanaxa da aỹem ỹauatton.


Qaq ỹoqo'oye qami' saishet qome da qauqocheetega ca qami' quetapegueleguete souaxat cam yo'oqchigui qolliqui, huo'otaq cam qanỹomiigui, huo'otaq souaxat da qaica ca 'enec qanqa'eñi naua naponaxaqui', huo'otaq da dalaxaic so ca'agoxoic, huo'otaq ye na'a'q mataxaqui.


Ñim Nataxala' 'enapega so Moisés, 'eeta':


Nataqa'en nachesopi som ỹanot Ñim Nataxala' 'enauac so nachetaqtaxanaxat qaỹavigaxatta, qataq ye na'a'q mataxaqui, qataq da dalaxaic so ca'agoxoic, qataq nam laỹepi maye laloxoquipi da ño'oxonnataxanaxac, nache queto'ot da huetague' na lalamaxatpi Ñim Nataxala'.


Qaq da huo'o ca cotaxac, qaq namayepi nachena qome nam huapegue' da ỹaỹamaxaañi, qataq da nmit nache ipagaqchiichigui da lataxac na iqataxacpi. Ipaqueelec qome nam iqataxacpi, qataq na ỹapaxaguenataxanaxacpi da qaỹo'ot nam ỹalamaxat naponaxacpi, qataq huo'o naq 'enec naqa'en yem na'a'q mataxaqui maye seỹotauga co'ollaxa.


Ime nache so Salomón ỹamaxa da la'aqtac so Jirán, maye nta'a ye Tiro, 'eeta': «Aỹem 'auo'otec qome dam 'auo'otec co'ollaxa so ita'a David, da 'auamaqtega co'ollaxa na qo'oipaqpi cedro da yaqto' ỹo'ot so lma' lta'araic.


nataqa'en aso lachetaqtaxanaqtepi ye na'a'q, qataq da ivita da dalaxaic so ca'agoxoic, qataq so laỹepi lachetaqtaxanaxatpi da ỹo'oxoren Ñim Nataxala', qataq da huo'o ca maiche chegoqchigui da ỹauo'o ca lachetaqtaxanaxat da ỹanot Ñimaye.


Swiv nou:

Piblisite


Piblisite