Jueces 9:15 - La'aqtaqa Ñim Lo'onatac 'Enauacna 2013

¹⁵ Qalaxaye asa'aso ỹaxat 'enapego' aso qo'oipaqpi, 'eeta': Da ỹoqta 'eesa da qauauoitaique da aỹem qarta'ai, nache qauanaqui da qoviỹo'ot na ipaqal. Qalaxaye da saishet da aỹem qaualaqaiguet, huaña qome nache aỹem chegaqaigui ca norec, maye ỹavigaxat 'enauac aye cedropi maye huaña ye Líbano.

Jueces 9:15 Referans Kwoze

Isaías 30:2

Qataq namayepi saishet da aỹem inattac, nacherata da sanaỹaloxon da taỹa ye Egipto, da dequiguiỹo'ot ñi Faraón da npaxaalec namayepi, qataq nache deuaqtacot na lpaqal ye Egipto.

Oseas 14:7

Nache na Israel le'ecpi qaltaq huetalec qome da itelaqtaxanaxac, huaña nache ỹataqta nca'altec, 'eeta'am na trigo, qataq huo'o ana lauoxo 'eeta'am ana nañiguishe uva, qataq da laitaỹaxac 'eeta'am na ỹataqta no'on lataxa maye huaña ye Líbano.

Isaías 2:13

qataq dataỹa'aguet 'enauac nam 'eetega 'eeta'am ana 'epaqpi cedro maye huaña ye Líbano, nam 'eetega 'amaqtaqaicpi qataq qaỹoqotcheguemecpi, qataq nataỹaña 'enauac ana robles maye huaña ye Basán,

Jueces 9:20

Qalaxaye qom saishet da nache 'eetec de'era, nache da layeloxo ñi Abimelec, nmichiguiñi naqa'en qome na lma' na Siquén qataq ye Miló, qaq da layeloxo na Siquén qataq ye Miló nache chegaqaigui qome da imeuo naqa'en so Abimelec.»

Daniel 4:12

Qaq ana lauepi asomaye qalaq ỹataqta 'onaxai, qataq aso ala ỹataqta qalota, nache ishet da iquia'axan 'enauacna. Na shiguiỹacpi maye huauec qalaq hueto'ot na lpaqal asomaye, qaq na qoỹopi qalaq ỹanagui na lpata'cpi ana lcouepi asomaye, qaq da lca'alaxa na shiỹaxauapi qalaq chegoqtapoigui asomaye.

Ezequiel 19:14

Qaq ana lcouepi qalaq chegaqaigui so norec, maye ỹavigaxat ana llaxataxapi qataq ana alapi. Nache qaca aca no'onañi aso qaramta lcouepi da yaqto' ivira'a da lashelte na nta'alpi.» (Qaq 'era da no'onec maye qaỹo'on da huo'o ca ileu.)

Isaías 37:24

Cha'aye 'auachegoxotchigui co'ollaxa so 'aramaxashec da 'ausheueetac Ñim Nataxala', qoneta': ‹Sauota'a ana ỹataqta qalota ñenaigonapi ñalaataxaquipi, da senotsheguemec na ỹataqta pa'asheguem ana qasoxonaxapi, qataq naua loiguiye ye Líbano, nache sechec ana ỹataqta logorai cedropi, qataq ana ỹataqta no'on piinopi. Qataq sevirasheguema yem ỹataqta qaỹoqotcheguema, yem aviaq maye 'eeta'am ca nanaxanaqa'.

Salmos 104:16

Qataq huecottalec ana qo'oipaqpi maye lañiguishe Ñim Nataxala', qataq ana cedro ye Líbano maye ỹaañi co'ollaxa Ñimaye.

2 Reyes 14:9

Qalaxaye so Joás, maye nta'a ye Israel, ỹasateguet so Amasías, nache ỹamaxa da la'aqtac, 'eeta': «Aso cotaque maye naña ye Líbano, ỹamaxa da la'aqtac aso cedro, 'eeta': ‹Ñaq 'aỹa'anem taxa so ỹalec aso 'aỹa'ale da yaqto' lhua.›» Qalaxaye nateuga co'ollaxa yi'iye so shiguiỹacpi maye chegaqa'a ye Líbano, nache pigui asa'aso cotaque.

Números 21:28

Cha'aye ye Jesbón nache chegoqchiguiña so norec, qataq ye nỹecpi ye Sijón, nache chegoqchiguiña so le'eraxa da nlaxaañi so nỹecpi ye Ar, yem 'alhua Moab, qataq so nataxala'pi ye qaỹoqotcheguemec 'alhua ye Arnón.

Mateo 13:32

Qaq 'eesa da acamaye ỹataqta saq 'amaqtaq, saq 'ena'am ana laỹe nañiguishe ala. Qalaxaye da ivita da ñaxat, nache ỹataqta napacalec 'enauac ana laỹe nañiguishepi, ivira'a da 'eeta'am ana qo'oipaq maye ỹataqta late'erai. Ỹoqo'oye ana qoỹopi maye huaỹotac ishet da anac, nache ỹauo'o na lpata'c ỹanaigui ana lcouepi.»

Ezequiel 31:3

'Am qoneta'am ana ciprés huo'otaq ana cedro maye naña ye Líbano, maye no'on ana lcouepi maye ipelteetalec ye aviaq qataq ỹataqta logorai nache iviro'ot na lo'oc na piguem.

Isaías 1:31

Qaq cam ỹale 'añaxaic qalaq 'eeta'am ca 'auaqpi, qataq nam lo'onatacpi 'eeta'am aca lto'o, qaq caamaye 'enauaque da ỹavi'c, nache qaica ca anac da ỹalama't.»

Jueces 9:49

Nache 'enauac somayepi iquesoxouec aso lcouepi aso qo'oipaq nache ca'ategue so Abimelec, nache ivitta'a aso qanqañoxottaigui maye pa'aỹaigui aso atamnaxaqui, huaña nache qaỹacho'oto naua loiguiye asomaye aso qo'oipaq lcouepi, nache qoỹegueua'a, nache asa'aso nalloxolate ỹavic, qataq som huetaiguipi aso nalloxolate ye Siquén, nache ivi' mil se'eso ileupi.

Jueces 9:14

Ime, nache 'enauac aso qo'oipaqpi, iỹaxanot aso ỹaxat da yaqto' lta'a asomayepi.

Jueces 9:16

Qaq nagui qami' sena't: ¿Peta'a 'eesa da ỹaỹamaqchiguiñi qataq da ỹoqta lataxac qanqa'eñi da qaỹa'añiỹagui da qarta'ai so Abimelec? ¿Peta'a ỹataqta qaupaquiichigui da qauo'ochec dam nchoxonnataxanaxa so Yerubaal qataq na llalaqpi, 'eeta'am da 'eetec co'ollaq qami' ichoxore'n somaye?

Salmos 29:5

Da lavilỹaxac Ñim Nataxala' huacaguec naqa'en ana lcouepi ana qo'oipaq pino. Ñim Nataxala' ỹataqta huacaguec naqa'en ana lcouepi ana qo'oipaq pino ye Líbano.

Jueces 9:44

Nache so Abimelec qataq so nnaictague'pi alleppi, nqo'ona so lasom so lpaqtaxat se'eso huaqta'a't nỹecpi da nauan, qaq som laỹepi maye dos soua lpa'axaco iloquiaxan, nache ỹalauat se'eso shiỹaxauapi maye huetauga so no'onaxa.

Lamentaciones 4:20

Qaq nataqa'en som lca'aguishec Ñim Nataxala' noxonec, som ỹa'añaqchettac co'ollaxa da qanachaalataxac, som nta'a maye setaxasoqtega naxa shenaqta': «Souaqto'ot qome na lpaqal da salegaqtaigui na ỹotta'a't shiỹaxauapi».