Jueces 15:14 - La'aqtaqa Ñim Lo'onatac 'Enauacna 2013

¹⁴ Qaq co'ollaq ivireua'a ye Lehí, nache so filisteopi ca'atta'aguet somaye, nache ỹa'alaqtai' da ntonaxac. Qalaxaye so Saqcha'a La'añaxac Ñim Nataxala' ỹanem da la'añaxac so Sansón, nache soua nañeqa maye qaicoñettaguilo naua lapique, qataq naua lhua'q, huesochiguilo naqa'en 'eeta'am ca hualoq laỹe da mashe ỹavic.

Jueces 15:14 Referans Kwoze

Jueces 14:19

Nache so Saqcha'a La'añaxac Ñim Nataxala' ỹanem da la'añaxac so Sansón, nache somaye nqo'ona ye Ascalón, huaña nache ỹalauat so treinta ỹalleppi. Nache ỹacona so logoxoshetpi qataq so 'onaxaic logoxotpi maye ỹaatañi somayepi, nache desheetenaxana da isheeten som ỹaqatchigui se'eso ỹapogoñi la'aqtac somaye. Ime, nache ỹe'eguelaxa so lma' so lta'a, qalaxaye ỹataqta dalemata.

Salmos 118:11

Namayepi imauec co'ollaxa da aỹem coleesop, qalaxaye serolec da le'enaxat Ñim Nataxala' nache 'enauac da ỹoxonec.

1 Samuel 17:35

nache aỹem secaalec naxa, nache seque'emachet qataq seuotaxanec ana qagueta, qaq da huo'otaq ñe'eguelqot da aỹem iloquiaxan, nache saconguilo naua lanoqo, nache seuaxaatalec, choche ivitta'a da salauat.

1 Samuel 11:6

Qaq co'ollaq choche hua'axaỹa de'era na'aqtaxanaxac so Saúl, nache so Saqcha'a La'añaxac Ñim Lo'onatac 'Enauacna ỹataqta ỹa'añaqchet somaye, nache so Saúl ỹataqta dalemata.

Jueces 14:6

Huaña nache so Saqcha'a La'añaxac Ñim Nataxala' ỹanem da la'añaxac so Sansón, nache somaye ỹauota'aisalo naua lhua'q da icolaxattac so sauaxaic llalec, 'ena'am naqa'en ca quetaq llalec. Qalaxaye saishet da da'aqtaxanema soua lta'al de'era ỹo'ot somaye.

Jueces 3:10

Nache so Saqcha'a La'añaxac Ñim Nataxala', anac da ỹo'ot da la'añaxac so Otoniel, da yaqto' lataxala' so Israel le'ecpi. Ỹoqo'oye co'ollaq jec da deloqui, nache Ñim Nataxala' ỹanem da loxonec so Cusán Risatayin.

Filipenses 4:3

Qataq 'am ỹo'onataxanaxaua maye saishet da aỹem 'aỹotec, 'am shenapega da 'autaua'n qome que'ecaua qarqaỹa't, cha'aye caamaye ỹataqta qalota da ltaunaxanaxa'c aỹem, da sa'axattac da nca'alaxa, nataqa'en ca Clemente qataq cam laỹepi ỹo'onataxanaxauapi de'era qaro'onataxanaxac. Qaq Ñim Lo'onatac 'Enauacna mashe ỹerelec aca naneraxalate na chochaq tatec da lca'alaxa, nam le'enaxatpi namayepi.

Zacarías 4:6

Nache somaye qaltaq 'enapec: «'Era da la'aqtac Ñim Nataxala' maye taỹa'a ñi Zorobabel, ‹Ñimaye saiuen qome ca qalota alleppi, qataq ca yo'oqchigui na'añaxac, maye nachesota so Saqcha'a Ỹa'añaxac.› 'era da la'aqtac Ñim Nataxala' maye Qaica ca Ỹaqalanapec.

Miqueas 7:8

Qaq 'am ñepa'aguenaxaua, saishet qome da aỹem 'antootalec, cha'aye na'aictaxa da souañe co'ollaxa qalaxaye qaltaq ñachaañi qome, qataq na'aictaxa da sootaigui ca napalaxa, qalaxaye Ñim Nataxala' nacheñi ñim aỹem icoỹattalec.

Salmos 18:34

qataq aỹem ỹapaxaguenec da iloquiaxac, qataq ỹauo'o da ỹa'añaxac da sauec na checnec maye lcat bronce.

Da na'aqtaguec so Job 20:5

cha'aye da lamaicỹaxac na 'etaxaloxoic saqaỹauec, qataq da ntonaxac na qauemaic pasa'a da imeuo.

1 Samuel 4:5

Qaq co'ollaq nvita so lanataqa' somayepi asa'aso laỹe' da naỹamaxataxac Ñim Nataxala', nache so Israel le'ecpi ỹa'alaqtagui, nache ỹataqta dellimigui naqa'en ana 'alhua.

Jueces 16:24

Nache so shiỹaxauapi co'ollaq ila'a de'era, nache nataqa'en do'onaxaatac qataq ỹo'oxoreetac so natamnaxala', 'eeta': «Ñi qanatamnaxala' qomi' ỹanema da qoroxonec ñi Sansón maye qampa'aguenaxaua, maye nlaxaañi co'ollaxa so qoranaxanaqa'pi, qataq ỹalauat so qalota qaralamaxatpi.»

Jueces 16:12

Qaq aso Dalila huo'oi soua ỹale't, da nqañoxottrañi naqa'en, huetraigui so lma', nache asomaye ỹacona so dalaxaicolec nañecpi, nache icoñerai'salo naua lapique somaye. Ime, nache ỹa'alaxalec, 'eeta': ¡Sansón, na filisteopi anac da 'am iloquiaxan! Qalaxaye so Sansón ỹachipiaxatañi co'ollaxa so nañecpi, 'eeta'am naqa'en ca ntetaxanaxat 'iilo.

Jueces 16:9

Qaq asomaye huo'oi soua ỹale't, da nqañoxottrañi naqa'en, huetraigui so lma', nache co'ollaq mashe icoñettai' so Sansón nache asomaye ỹa'alaxalec, 'eeta': ¡Sansón, na filisteopi anac da 'am iloquiaxan! Nache so Sansón ỹachepiaxatrañi soua ncoñetaxanaqa'ate, 'eeta'am naqa'en ca nañec vigaxaic. Nache ñaq 'eetalec da saishet da qaỹaỹaten ca chegaqa'ague de'era lta'araic la'añaxac somaye.

Jueces 5:30

‹Souaxai' ncolaxattapigui ca lhuotaxanaxatpi maye laueguec huaigui se'eso alaataxac. Nache ñi 'oonolec cam alaataxaicpi ỹacona aca 'oonole huo'otaq dos ca qa'ampi maye nlatapi, qaq ca Sísara qalaq souaxai' taỹot cam no'on da lo'oxoỹaxa'c npotoyec: qataq 'oonolec huo'otaq dos caua no'oxonqa maye ỹotta'a't da lo'oxoỹaxac, da yaqto' llo'oxoraxat na lqosot ca huegaxanaxaic.›

Éxodo 14:5

Qaq so nta'a ye Egipto co'ollaq ỹaỹaten da so Israel le'ecpi no'otauec, nache somaye qataq so nalleppi huo'o da ntogotaxac souaxat somayepi, nache 'enapeco': «¿Chaq ta'ainco' da sashenaqtec da jec so Israel le'ecpi, da yaqto' ỹaxaañi da qomi' do'onataxaatacoto?»

Éxodo 14:3

Yaqto' ñi faraón 'eeta' qome da lhuennataxa: ‹So Israel le'ecpi sa ỹaỹaten ca dataigue. Choche nsomaxaatapigui' ye toolec 'alhua›.

Jueces 15:13

Nache somayepi 'enapeco': ¡'A'i, saishet da 'am salauataq! Nachaqrata da sauoqtaique da 'am saconaxaua'a, nache 'am sanaxam na filisteopi. Huaña, nache qaỹauota'a soua dos nañeqa maye ñaq dalaxaiqolqa da qaicoñerai' somaye, nache qanqateeguesop som nqañoxotaqa' auac.

Jueces 15:9

Nache so filisteopi inoxoneua'a co'ollaxa so na'alhua so chegoxoguetpi so Judá, huaña, nache hua'a da lanataqa' so saqaỹapeque ye Lehí.

1 Samuel 10:6

Qaq huaña qome nache so Saqcha'a La'añaxac Ñim Nataxala' 'am nvita, nache nataqa'en 'aua'aqtaxaatac qoneta'am camayepi, nache 'am naralaxat qataq dalaxaic naqa'en qome da 'arataxac.

1 Samuel 10:10

Nache so Saúl qataq so lamaxashec co'ollaq ivitra ye Gabaa, nache so na'aqtaxanaxanecpi dasottac, nache ca'atta'agueta soomaye. Huaña nache so Saqcha'a La'añaxac Ñim Lo'onatac 'Enauacna nvita so Saúl, nache somaye ỹalectaigui somayepi da da'aqtaxaatac, nache 'eeta'am somayepi.