Jueces 14:17 - La'aqtaqa Ñim Lo'onatac 'Enauacna 2013

¹⁷ Qalaxaye asomaye nache quetot da nỹeetac se'esoua na'axa'te maye huaiguilo so nquia'axac. Qaq souaxato' da saq ñaxaasheguem da dequicto'ot somaye, nache so ivita so pa'atec na'a'q se'esoua siete na'axa'te, nache asomaye ỹañoxot so lhua da da'aqtaxanem da naigui se'eso ỹapogoñi na'aqtac. Nache asomaye da'aqtaxanem so lauo' le'ecpi.

Jueces 14:17 Referans Kwoze

Jueces 16:16

Qaq souaxato' da 'enauaque soua na'axa'te da sa ỹalemaxat, qataq saq ỹaxaañi da inatto'ot somaye aso Dalila, nache so Sansón ỹataqta qaica ca lama', nache naconapeguela't da huotaique da ileu.

Lucas 11:8

Qaq da que'eca lỹa da sa nañaxaañi da lỹaxanaxac, nache que'eca pa'atauo ỹami' ca iueetaique camaye. Qalaxaye damaye saishet da naigui da souaxat da auochaxaua, nachaqrata da yaqto' saishet da huo'o ca la'aloxo da ỹauaachigui na shiỹaxauapi.

Proverbios 7:21

Qaq naua amai' la'aqtaqa maye ñe'eguelaxattrasheguem, nachenaua naua ỹañoxo't da ỹasat se'eso nsoqolec,

Da na'aqtaguec so Job 2:9

Nache aso lhua somaye 'enapego', 'eeta': «¿Qalaq ñaq qoqueto'oto' da 'anshetaique da no'on da 'arataxac? ¡Ta'ainco' ye sa 'aularapiguiño' Ñim Lo'onatac 'Enauacna, yaqto' 'aleu!»

Jueces 16:13

Nache aso Dalila qataq 'enapega so Sansón, 'eeta': ¡Ñaq 'eetalec da aỹem 'auatenachet! ¡Qache nda'a't da choche aỹem 'auatenachettaco'! ¡Qalaxaye nagui sauotaique da ỹoqta aỹem 'aua'aqtaxaatem ca 'eetec ca lataxac da ishet da 'am qaicoñerai'! Nache so Sansón 'enapeco': 'Auo'oxona'agueta qome ca no'oxonec que'eca no'oxonaxanaxala' ne'enaua siete ñamogue, nache 'atoqooñi aca lashe ỹataqta 'aua'añaxatchiguiñi que'eca no'oxonaxanaxala'. Huaña qome, nache qaica de'era ỹa'añaxac, nache sheeta'am ca camachaqca shiỹaxauatto. Nache aso Dalila ỹo'ochaqchet co'ollaxa so Sansón, nache ỹaconeua'alo soua siete namoguel somaye, nache ỹo'oxona'agueta so no'oxonec se'eso no'oxonaxanaxala'.

Jueces 16:6

Qaq ime co'ollaxa, nache aso Dalila 'enapega so Sansón, 'eeta': Ñaq aỹem 'aua'aqtaxanem taxa cam chegaqa'ague de'era lta'araic 'ara'añaxac maye qaica ca 'ena'am. Qataq ¿peta'a huo'o ca lataxac da sa 'aushet da maiche 'ansouec da 'am qaicoñerai'?

Génesis 3:6

Nache aso 'alo ila'a co'ollaxa da ana ala asa'aso qo'oipaq ỹataqta 'onaxai, nache huo'o da lyaxa da chec, qataq da lyaxa da huo'o da lauattonaxanaxac. Nache nqat aso 'oonole ala asomaye nache chec, qaq ime nache ỹanem so lhua, nache somaye nataqa'en chec.

Jueces 14:16

Nache asomaye nqo'ona so Sansón nache nỹeetac, nache 'enapega, 'eeta': ¡'Am saishet da aỹem 'anqopita! ¡Nda'a't da aỹem 'anquiỹa! Cha'aye 'am 'aua'aqtaxanem so ỹapogoñi 'ara'aqtac so ihuo' le'ecpi, qalaxaye saishet da aỹem 'aua'aqtaxanem ca naigui. Nache so Sansón 'enapeco': Aja', qalaxaye nataqa'en so ita'a qataq aso ỹate'e saishet da sa'aqtaxanema ca naigui de'era, ¿qaq ta'ainco' taxa da 'am sa'axatem?

Jueces 14:18

Qaq co'ollaq yaqta'a da inoxooñi aso nala' se'eso pa'atec na'a'q se'eso nquia'axac, nache so filisteopi nqo'oneua'a da ỹasateguet so Sansón, 'eeta': «¿Negue't ca napacalec da lamaic na te'esaq lta'a lli'i? ¿Negue't ca napacalec da la'añaxac so sauaxaic?» Nache so Sansón 'enapeco': «Da saishettaxa da qauauegaxañiilec aso ilo huaca llale, nache saishettaxa da qauaỹachiñi ca naigui som ỹapogoñi ỹa'aqtac.»

Jeremías 9:3

Namayepi ỹataqta lhuotta naxa da ỹa'axat da natenataxanaxac, 'eeta'am da ỹauota'a ca lchecnec da ỹaỹenec aca lchecna. Ne'ena 'alhua huetalec da natenataxanaxac, qaq qaica dam 'eesa lataxac, namayepi ỹataqta nquigaxattauec da qauem, qaq Ñim Nataxala', 'enapec: «Namayepi saishet da Aỹem ỹauatton.»

Miqueas 7:5

Saishet qome da 'aua'amaqten ca la'aqtaxanaxac ca 'arỹa, qataq saishet qome da 'ape'etega ca 'anauochaxaua, qataq 'antela'alo qome naua 'ara'aqtaqa da 'ana'aqtaxaatague' aca 'arhua.