Juan 9:39 - La'aqtaqa Ñim Lo'onatac 'Enauacna 2013

³⁹ Ime, nache So Jesús 'enapeco': –Aỹem ñanaỹa ana 'alhua, da sami' da nauaañi nam saq nauaañipi, qaq nam 'eetega da nauaachiguiñipi qalaq sanauaañi ñaqa'en. Qaq 'era da sheetec da ñimit 'enauacna.

Nuevo Testamento Toba Sur

³⁹ Ime, nachi so Jesús 'enapeco': –Aÿim ñanaÿa ana 'alhua, da yaqto' ishit da qaÿauo'o ca lasouaxashit ca shiÿaxaua, yaqto' cam sa nauaañi, qalaq ishit da nauaañi, qataq cam nauaachiguiñi, qalaq sa nauaañi qanqoÿin.

Nuevo Testamento Toba Sombrero Negro

³⁹ Qama'le yitaĝa enaac ñe'me Jesús: —Da'me jayem ñec'ata jenjo' aleua qaedi ja'uo da'me yec'atenaĝanaĝac qaedi jogaa'me qana'mi male nelodegue, nach'e ena'ama jogaa'me jo'ne te'me nelotedaye qaedi 'uo da'me laqanamaĝa'j.

Juan 9:39 Referans Kwoze

Juan 3:19

Qaq dam 'eetec da Ñim Lo'onatac 'Enauacna nmit 'enauacna: qaq nache 'eetec da Aỹem ñanaỹa ana 'alhua, qaq Aỹem maye Aỹem lcoỹaraqte na napalaxa. Qalaxaye na shiỹaxauapi ye ỹo'otta'ape naua qauema, nache ỹaỹamaxareeta da netaigui na napalaxa saq 'ena'am da yo'oqchiguiñi.

Juan 12:46

Aỹem maye Aỹem lcoỹaraqte ana 'alhua. Ñanaỹa anamaye, da yaqto' ca Aỹem ỹa'amaqten, nache camaye saishet da huetaigui na napalaxa.

Hechos 26:18

Aỹem 'am samaxa namayepi, da yaqto' ishet da nauaañi 'anqa'en, yaqto' saishet da quetaigui na napalaxa, nachaqrata da quetaigui na yo'oqchiguiñi; qataq yaqto' namayepi saishet da hueto'ot da la'añaxac so pa'aguenataxanaxaic, nachaqrata da quegue Ñim Lo'onatac 'Enauacna; qataq ỹa'amaqten, nache ishet da qaỹapalaxat na lasouaxashetpi, qataq yaqto' qaỹalecneua'a da qoỹanem qome cam ỹachaxanapec Ñim Lo'onatac 'Enauacna da ỹami' nam lalamaxatpi Ñimaye.»

Juan 8:12

Nache So Jesús qaltaq 'enapega so shiỹaxauapi, 'eeta': –Aỹem Nachaỹem lcoỹaraxanaqte 'enauac na huetalec ana 'alhua. Aỹem qauca'acheegue, yaqto' saishet da qoquiitaigui na napalaxa, nachaqrata da qoviitaigui na yo'oqchiguiñi maye nachera da nca'alaxa.

1 Juan 2:11

Qalaxaye ca nquiỹa ca lqaỹa maye nataqa'en ỹa'amaqteetac So Cristo, nache camaye huetaigui na napalaxa, qataq sa ỹaỹaten ca tata'ague, cha'aye nam napalaxa saishet da nauaañi naqa'en camaye.

Lucas 4:18

«So Saqcha'a La'añaxac Ñim Lo'onatac 'Enauacna Aỹem netanguit, cha'aye Aỹem Lca'aguishec qataq Aỹem namaq da sa'axatem da no'on la'axaỹaxac nam choxoraqpi, qataq da sa'axatem da qaisouec na ncoñeteguishecpi, qataq she'eguelaxatem da nauaañi na sa nauaañipi, qataq da yaqto' ñeca'alaxatec nam sa qaiyacnapec,

Lucas 1:79

Camaye nca'alaxatec nam huotaique da lo'oxonec da nleuaxa. 'Eeta'am aca ncoỹaraxanaxaqui da icoỹarelec ca napalaxa, yaqto' qomi' ỹachaxaneguelo ca nqa'aic maye hueta'ague da nlagaxayec.»

1 Pedro 2:9

Qalaxaye qami' qaualliquiitaigui na llalaqpi Ñim Lo'onatac 'Enauacna; qami' ltaxaỹaxanaxanaqa na shiỹaxauapi da qauo'onataxañiitacot Ñim Nta'a; qataq qami' lalamaqa'ate. Qaq de'era chegoqchigui Ñim Lo'onatac 'Enauacna co'ollaq qami' nqateeguesopa na napalaxa maye nachera da ñe'etaxaloxo, nache qami' inoxonaqcheteua'alo da yo'oqchiguiñi maye qaica ca 'ena'am da lyac. Qaq ỹoqo'oye qaua'axache da llo'oxoyec Ñim Lo'onatac 'Enauacna maye qami' ỹo'oteque.

Efesios 5:14

Qaq ỹoqo'oye huo'o so deraxan co'ollaxa 'eeta': «'Am maye 'auo'ocheta, ña 'anlouec; qoñisheguem, qoca'ai nam leuaxaicpi, cha'aye So Cristo 'am icoỹarelec.»

2 Corintios 2:16

Qalaxaye nam taỹa'a da deqat, ne'ena nchenaxanaxat, da alaitaỹaxac 'eeta'am ca dalaataxanapec. Qalaxaye nam taỹa'a da nca'alec, damaye 'eeta'am naqa'en cam ama na laita maye chegaqaigui da achaalataxac. Qaq ¿chaq negue'to' ca ishet da nalotaua'a de'era no'onataxanaxac?

Juan 9:25

Nache somaye 'enapeco': –Aỹem saishet da saỹaten da Somaye 'etaxaloxoic. Nachaqrata da aỹem saỹaten da sa ñauaañi co'ollaxa, qalaxaye nagui nache ñauaachiguiñi.

Juan 8:15

Qami' da qanmichi ca nasouaxashet, qalaq qaupaquiichigui ca maiche lhuennataxac na yo'oqchigui shiỹaxauapi. Aỹem, qalaxaye saishet da sauo'o ca lasouaxashet ca shiỹaxaua.

Juan 3:17

Ñim Lo'onatac 'Enauacna saishet da namaxa na Llalec ana 'alhua, da yaqto' ỹauo'o ca nhuaxanaguec na shiỹaxauapi. Nachaqrata da nca'alaxatec, chegoqchigui Namaye.

Lucas 13:30

Huaña qome, nache huo'o nam nagui nca'ataxaatauo, qaq nachena qome na la'auaxanec, qataq huo'o qome nam nagui la'auaxanec, qaq nachena nam qaipa'axaatec.

Lucas 7:21

Nache huetoigui se'eso na'a'q da So Jesús nataren so qalota shiỹaxauapi maye sa no'on qataq ỹaguec da nque'eenaxac. Qataq nataqa'en nataren nam huo'o na netaigui saqcha'a na'añaxac leguemaxaicpi, nataqa'en qalota so qanamaicpi ỹe'eguelaxatem da nauaañi.

Lucas 2:34

Nache so Simeón ỹan da no'on la'aqtac. Ime, nache 'enapega aso María asom late'e So Jesús, 'eeta': –Ñim Lo'onatac 'Enauacna namaq ne'ena nogotolec da yaqto' qalota na nca'alec na Israel le'ecpi, qaq ca laỹepi na Israel le'ecpi qalaq huo'o ca nhuaxanaguec. Ñim Lo'onatac 'Enauacna namaq namaye da yaqto' qaỹaỹateeteguet da 'eetapeguec Ñimaye, qalaxaye qalota qome na dataỹa'aguet.

Mateo 11:5

Nagui nam sanauaañi, qalaq nauaachiguiñi, qataq nam ñe'eerauo naua lchel, qalaq queuoỹapigui', qataq nam nchega na lo'oc, qalaq no'oita, qataq nam sa hua'aqa, qalaq ishet da hua'aqa, qataq na mashe ileu, qalaq nca'alec qanqa'en, qataq nam choxoraqpi, qalaq qaỹa'axatem da no'on na'axaỹaxac maye chegaqaigui da nca'alaxa.

Isaías 44:18

Ne'ena shiỹaxauapi qaica ca ỹaỹaten, huo'oi naua la'ai'te qalaxaye sa nauaañi, qataq napotagui da ntoonaxac, nache qaica ca lauattonaxanaxac.

Isaías 6:9

Qaq huaña nache Ñim Lo'onatac 'Enauacna aỹem 'enapega, 'eeta': «'Aue, 'anqo'ona qome na shiỹaxauapi nache qoneta': ‹Na'aictaxa da hua'aqtac qalaxaye saishet qome da ỹaỹaten, qataq na'aictaxa da demeenaxatac qalaxaye sa ỹaỹaaneguet qome de'era.›

2 Ts 2:10

Do'onataxana 'enauac na ỹotta'a't sa ỹaỹamaxañisat da choche ỹatenachet na shiỹaxauapi maye taỹa'a da nhuaxanaguec choche tatec, cha'aye mashe saishet da ỹaconeguet da 'eesa lataxac maye chegaqaigui da nca'alaxa.

Isaías 29:10

Cha'aye Ñim Nataxala' qami' taleguete naqa'en ca sansatta no'ochaxa. Qataq ỹapoguilo naua la'ai'te na na'aqtaxanaxanecpi, qataq ỹauo'o ca lapoxot na lqaic nam huo'oi naua l-loxoco.

Ezequiel 12:2

«'Am shiỹaxaua, 'am qonetangui na nhuo' le'ecpi maye ỹataqta qauemaicpi. Huo'oi naua la'ai'te, qalaxaye sanauaañi, qataq huo'oi naua ltela lauaco qalaxaye sa hua'aqa, cha'aye ne'ena nhuo' le'ecpi ỹataqta qauemaicpi.

Mateo 15:14

Qaq ỹoqo'oye saishet qome da qauqocheetega na fariseopi: cha'aye namayepi 'eeta'am ca sanauaañi da ỹauecta'aguet ca lỹa sanauaañi, qaq cam sanauaañi da huo'otaq ỹauecta'aguet cam 'eeta'am sanauaañi, nache caamaye ishet da 'enauaque da tayingui aca nshere.

Juan 12:31

Nagui mashe ivita ye laloqo' da Ñim Lo'onatac 'Enauacna nmit na huetalec ana 'alhua, qataq da ỹamaqauec som damaxasoxonapec ana 'alhua.