Juan 5:19 - La'aqtaqa Ñim Lo'onatac 'Enauacna 2013

¹⁹ Nache So Jesús 'enapega somayepi, 'eeta': –Ỹataqta 'eesa de'era qami' sa'axatema, da ne'ena Llalec Ñim Lo'onatac 'Enauacna, namaye saishet da huo'o ca ỹo'ot da huo'otaq maiche ndotelec, cha'aye namaye ỹo'ot cam ỹauaachigui da ỹo'ot Ñim Lta'a. Qaq ỹoqo'oye 'enauac nam ỹo'otpi Ñim Ita'a, qaq nataqa'en Aỹem so'ot.

Nuevo Testamento Toba Sur

¹⁹ Nachi so Jesús 'enapega somayipi, 'eeta': –Ÿataqta 'eesa de'eda qami' sa'axatema, da ne'ena llalec ñi Dios, namayi sa ishit da huo'o ca i'ot da huo'otaq maichi ndojlec, cha'ayi namayi i'ot cam ÿauaachigui da i'ot ñi lta'a. Qaq ÿoqo'oyi 'enauac nam i'otpi ñi lta'a, qaq nataq'en i'ot nam llalec.

Nuevo Testamento Toba Sombrero Negro

¹⁹ Jesús male enaac: “Eja da'me ami ja'aĝatema: jayem jo'ne Lec'oĝot joñe'me Dios, jayem ja jaqanatet ta'le ja'uo ga'me mach'e yelnataĝac; onolec da'me ja'uo da'me jo'ne jauana 'me ye'et ñe'me Taĝadena'. Qama'le yema ga'me jo'ne ye'et joñe'me Taĝadena', nach'e ena'am jayem je'et.

Juan 5:19 Referans Kwoze

Juan 12:49

Cha'aye Aỹem nam ỹa'aqtaqa saishet da maiche ñallegoxottela't; cha'aye Ñim Ita'a maye Aỹem namaq, Ñimaye chegoqtot cam ỹa'aqtac qataq cam sapaxaguenataxanec.

Juan 8:28

Ỹoqo'oye So Jesús 'enapego' somayepi, 'eeta': –Qami' qom ivita da qanauaxaỹaxañiisheguem na Shiỹaxaua Llalec, nache huaña, qaq ishet da qauaỹaañi chaq negue't Aỹem, qataq saishet da maiche ñallegoxottela't ca so'ot, nachaqrata da Aỹem sa'axat cam Aỹem ỹapaxaguenec Ñim Ita'a.

Juan 14:10

Qataq ¿saisheto' peta'a da 'aua'amaqten da Ñim Ita'a qataq Aỹem da 'oonolec da qarataxac? Naua ỹa'aqtaqa maye ñasaxarec, naamaye saishet da maiche ñallegoxottela't. Aỹem nachaqrata da so'ot ca Aỹem ỹamaxalec Ñim Ita'a, qaq Ñimaye ỹo'ot ca maiche 'eetapeguec ỹachegoxotchigui Aỹem.

Juan 10:18

Qaica ca ishet da deuotaxanec de'era ñachaalataxac, qalaxaye maiche Aỹem chegoqchigui da san damaye. Qaq Aỹem huo'o da shenec da san damaye, qataq da ñe'eguelaxaala't. Qaq 'era dam Aỹem ỹamaxalec Ñim Ita'a.

Romanos 8:11

Ñim Lo'onatac 'Enauacna nca'alaxateeguesop da l-leuaxa So Jesús, qaq Ñimaye nataqa'en nca'alaxatec da qaro'ocỹaxaqui maye mashe ileu, da yaqto' ỹe'eguelaxalec da nca'alec, da So Saqcha'a La'añaxac Ñim Lo'onatac 'Enauacna qami' hueta'agueta. 'Era dam ỹo'ot Ñim Lo'onatac 'Enauacna ỹachegoxotchigui So Saqcha'a La'añaxac maye qami' hueta'agueta.

Juan 9:4

Cha'aye nagui da ñaq qami' soota'agueta, nache iuen da so'otaq da lo'onataxanaxac maye Aỹem ỹamaxalec Ñim Lo'onatac 'Enauacna maye Ita'a; qalaxaye anata ca na'a'q maye qaica ca ishet da do'onataxan.

Lucas 21:15

Cha'aye Aỹem qome qami' sanema caua qara'aqtaqalli' qataq ca qaraỹaañiqui, da yaqto' saishet da huo'o ca qami' dataỹa'agueta da qami' ncotaỹapegueto.

Juan 5:21

Cha'aye de'era 'eetec da Ñi Ita'a da ishet da qaltaq nca'alaxatec ca leuaxaic, qaq nache 'eetec nataqa'en nam Llalec, da ishet da ỹanem da lca'alaxa cam taalec da ỹanem.

2 Corintios 5:10

Cha'aye 'enauac qome qomi' ñachaataxaua'a So Cristo, cha'aye nacheso so nmit cam qaro'onataxanaxac co'ollaxa da ña ñachaataqtaigui da qaro'ocỹaxac, qataq nacheso som chegoqtot ca la'aqtac da qomi' qoỹanema ca no'on qaraueguec, huo'otaq ca qanhuaxanaguec.

Jeremías 17:10

Aỹem Nataxala', maye ñimit aca nquiyaqte qaq saỹaten yem ỹataqta pa'auo lhuennataxac, nache sanem cam taiguet da ỹaconeguet, ipacchigui cam naigui nam ỹo'otpi.»

Génesis 1:26

Ime, nache Ñimaye 'enapeco': Nagui so'otaq ca shiỹaxaua, 'eeta'ama qomi'. Qataq huo'o da 'enec da ilo'ogue na nỹaq, maỹo, shiguiỹacpi, nlopi qataq na huauecpi, qataq nam hualectapigui'pi.

Juan 3:3

Nache So Jesús 'enapega somaye, 'eeta': –Aja', ỹataqta 'eesa de'era 'am sa'axatem, da ca shiỹaxaua da saishet da ỹe'eguelaxalec da qaltaq ñiguiñi, qaq camaye saishet da ila'a da lo'onataxanaxac Ñim Lo'onatac 'Enauacna.

Proverbios 2:6

Cha'aye Ñim Nataxala', nacheñi ñi ỹan da naỹaanec, cha'aye naua la'aqtaqa nache chegaqaiguilo da nauattonaxanaxac qataq da naỹaanataxanaxac.

Salmos 138:3

Co'ollaq 'am seỹaxanot qalaq aỹem 'auasateguet, aỹem 'aua'añaqchet qataq dalaxaic 'anqa'en da ỹa'añaxac.

Salmos 50:6

Nache na piguem ỹa'axat qome da Ñim Lo'onatac 'Enauacna, nacheñi ñi nmit 'enauacna.

Génesis 1:1

Ñim Lo'onatac 'Enauacna, co'ollaq cheta'ague da ỹo'otna, nache ỹo'ot na piguem qataq ana 'alhua.

1 Pedro 3:18

Cha'aye So Cristo 'oonolec co'ollaxa da ileu, nache sa lỹa da ỹe'eguelaxalec da ileu, da yaqto' ỹapalaxat na qarasouaxashetpi. Somaye ỹataqta soxoraic qataq qaica ca lasouaxashet qataq huo'o da nque'eenaxac, souaxat na 'etaxaloxoicpi da yaqto' qami' qaviyeeta'a da qanauochaxauai Ñim Lo'onatac 'Enauacna. Som ỹalauatpi So Cristo, somayepi ilaxachigui da lo'ocỹaxac, qalaxaye Somaye nca'alec yaqto' taigui da lca'alaxa saqcha'a.

Colosenses 1:16

Qataq chegoqchigui Somaye co'ollaq Ñim Lo'onatac 'Enauacna ỹo'ot 'enauac nam hueto'ot na piguem qataq nam huetalec ana 'alhua, 'enauac nam ishet da qaila'a, qataq nam saishet da qaila'a, qataq na saqcha'a na'añaxacpi maye damaxasoxonapec qataq nam huo'o da la'añaxac. Ñim Lo'onatac 'Enauacna chegoqchigui naqa'en So Cristo 'enauac nam ỹo'ot. Qaq So Cristo, nache 'enauac maiche lalamaxatpi.

Filipenses 4:13

So Cristo aỹem ỹami' da ỹa'añaxac da yaqto' ñala'aguet da sataỹa'aguet 'enauac nam sevireguet.

Filipenses 3:21

Qaq Somaye naralaxat qome da qaro'ocỹaxac maye qaica ca la'añaxac, da yaqto' 'eeta'am naqa'en dam lo'ocỹaxac maye ỹo'oxoraq. Qaq damaye ỹachegoxotchigui da la'añaxac maye nachera da do'onataxana qome da ilo'ogue 'enauacna.

Efesios 3:16

Souaxat dam lta'araic lsallaxa qataq da llo'oxoyec, nache seỹaxaatacot Ñim Lo'onatac 'Enauacna da ỹachegoxotchigui So Saqcha'a La'añaxac da qami' ỹanema ca la'añaxac da qarvilỹaxaqui.

Efesios 2:5

Qaq ỹoqo'oye na'aictaxa da souaqtaigui co'ollaxa da 'eeta'am da qomi' leuaxaiqa souaxat na qarasouaxashetpi, qalaxaye Ñimaye qomi' ỹanema da qarca'alaxa co'ollaq nca'alaxatec So Cristo. Qomi' ñeca'alaxauec, chegoqchigui da lsoxoyec Ñim Lo'onatac 'Enauacna, na'aictaxa da saishet da saxaguet damaye.

2 Corintios 4:14

Cha'aye saỹaanaqta Ñimaye da qom seleuaq, nache ỹoltaq qomi' nca'alaxatre'c, 'eeta'am naqa'en da 'eetec co'ollaxa So Jesús da qaltaq nca'alec naqa'en. Ime, qaq qomi' lỹatreuo naqa'en da senoxonaxaua'a ca netaña Ñimaye.

1 Corintios 15:12

Qaq 'era da no'on na'axaỹaxac maye sa'axataqtac 'eeta': Ñim Lo'onatac 'Enauacna nca'alaxatec co'ollaxa So Cristo. Qaq ¿Ta'ainco' ye huo'o da qoñiita na 'eetega da saishet da qaltaq ỹe'eguelaxalec da nca'alec na leuaxaicpi?

Romanos 6:4

Co'ollaq qomi' qanachelaxa'n, nache seleuaq qataq qarỹachiguiñi' Somaye da qomi' qailalyiñi. Qalaxaye seleuaq da yaqto' qomi' qanca'alaxatre'c. Qaq 'eeta'am co'ollaq Ñim Lo'onatac 'Enauacna maye Qarta'a da irolec da lta'araic la'añaxac da nca'alaxatec So Jesús, nache nataqa'en 'eetec de'era da qomi' ỹanema da achaalataxac maye dalaxaic maye ishet da qolaqto'ot.

Hechos 2:24

Qalaxaye Ñim Lo'onatac 'Enauacna qaltaq nca'alaxatec Somaye, nca'alaxateeguesop da la'añaxac da nleuaxa, cha'aye da nleuaxa qaica ca la'añaxac da nllañi Somaye.

Juan 2:19

Nache So Jesús 'enapeco': –Qomye qanlaxachiiñi ana no'onaxanaxaqui late'erai, nache Aỹem qaltaq ño'oxoosheguem qome; tres na'axa'te, nache qaltaq semat.

Isaías 44:24

Qaq 'era da la'aqtac Ñim Nataxala' maye 'arca'alaxaqui, Ñim 'am ỹo'ot co'ollaq saxanaxa da 'auañiguiñi: «Aỹem nachaỹem Nataxala' maye so'ot co'ollaxa 'enauac nam huo'o. Aỹem selagaxaañi co'ollaxa na piguem qataq so'ot ana 'alhua, qalaq saishet co'ollaxa da seuen da huo'o ca aỹem itauan.

Éxodo 4:11

Nache Ñim Nataxala' 'enapega, 'eeta': «¿Chaq negue't ca ỹauo'o na alap ca shiỹaxaua? ¿Qataq chaq negue't ca chegoqchigui da qaicaua naua la'aqtaqa ca shiỹaxaua, huo'otaq da da'añaigui na lqaic, huo'otaq da sa nauaañi, huo'otaq da nauaachiguiñi? ¿Peta'a sa nachaỹemo'?

1 Ts 4:14

Qomi' sa'amaqtenaq So Jesús da ileu co'ollaxa, qalaxaye qaltaq nca'alec, qaq nache 'eetec nataqa'en da Ñim Lo'onatac 'Enauacna nca'alaxateeguesop da nleuaxa nam ỹa'amaqteetac Somaye.

Isaías 45:24

nache, 'eeta': ‹Nacheñita Ñim Nataxala' hueto'ot da nauegaxanaxac qataq da na'añaxac. Qaq 'enauac nam Aỹem nquiỹatega, qane'eetapigui qome.

Colosenses 1:11

Qataq ỹachegoxotchigui da lta'araic la'añaxac Ñimaye da qami' 'añaxaiqa naqa'en, da yaqto' huo'o da qanhualaxaunaxaqui qataq ishet da qanaloỹa'aguet 'enauac na lqalaiguesat. Huaña, nache ỹataqta lta'araic da qantonaxaqui,

Salmos 27:14

¡Qaq ỹoqo'oye ỹataqta 'aupi'iỹa'a qome Ñim Nataxala'! ¡Qataq ỹataqta 'ana'añaxat, saishet da 'auqalvi! ¡Aja', ỹataqta 'aupi'iỹa'a qome Ñim Nataxala'!

Mateo 26:39

Nache So Jesús taỹa ca qaỹata'a soomaye, nache ỹa'alyiñi naua l-llectel qataq iviraxata'aguet na latap na 'alhua, nache nqouagaxaunot Ñim Lo'onatac 'Enauacna, 'eeta': «'Am Ita'a, ¡ỹataqta huo'o da iyaxa da Aỹem 'antelaqna'aguet de'era que'eenaxac! Qalaxaye saishet da ipacchigui qome da maiche sheetapeguec, nachaqrata dam maiche qonetapeguec.»

Juan 6:38

Cha'aye Aỹem saishet da sachegoqtot na piguem da ñanac da so'ot ca maiche sheetapeguec, chaqrata da ñanac da so'ot ca 'eetapeguec Ñim Lo'onatac 'Enauacna, cha'aye nacheñi Ñim Aỹem namaq.

Juan 12:50

Qaq Aỹem saỹaten da lamaxasoxonaxac Ñim Ita'a, damaye chegaqaigui da nca'alaxa maye chochaq tatec. Qaq 'era da 'eetec da cam ñasaxauec qalaq nacheca ca Aỹem ỹamaxalec Ñim Ita'a.