Josué 8:1 - La'aqtaqa Ñim Lo'onatac 'Enauacna 2013

¹ Ñim Nataxala' 'enapego' co'ollaxa so Josué, 'eeta': «Saishet qome da 'añi'i, qataq da 'auqalvi. 'Alaỹona't qome na 'analleppi, nache qojec da 'auotaxanec ye huaqta'a't nỹecpi ye Ai, cha'aye aỹem 'am sanem da 'oxonec qome ñi lta'a na netaña ye Ai, nataqa'en 'enauac na nalleppi, qataq ye huaqta'a't nỹecpi qataq ye na'alhuapi, nache imauec qome da 'aralamaxat.

Josué 8:1 Referans Kwoze

Josué 1:9

Aỹem 'am samaxalec da 'ana'añaxat, qataq 'aua'añaxachigui ye 'arhuel, nache saishet qome da leuapigui 'arhuel, qataq saishet da 'auqaulleetac, cha'aye Aỹem Nataxala' maye 'Anatamnaxala', Aỹem qome nache 'eetai' da 'am soota'aguet cam 'auataigue.»

Deuteronómio 7:18

¡Qalaxaye saishet qome da qañi'iitega yemayepi! Qantooñita'ac qome na ỹo'otpi co'ollaxa Ñim Nataxala' maye Qanatamnaxala'ai co'ollaq ỹauo'o da nhuaxanaguec so faraón, qataq 'enauac so netaña ye Egipto.

Deuteronómio 1:21

Ñim Nataxala' maye Lo'onatac 'Enauacna qami' ỹanema ne'ena 'alhua, qaq nagui nache qoñiỹalec namaye. Huaña, nache ipacchigui da la'aqtac co'ollaxa Ñim Nataxala' maye Natamnaxala' so hua'au qarta'ailpi, qataq saishet da qayi'iitac huo'otaq da leuapigui ye qarville.›

Josué 6:2

Qalaxaye Ñim Nataxala' 'enapego' so Josué, 'eeta': «Aỹem 'am sanem da 'oxonec ye Jericó, qataq ñim nta'a qataq caueegue' na nalleppi.

Deuteronómio 31:8

Qaq Ñim Nataxala', nacheñi Ñim hua'auta'ague qome da 'ata'ague, qataq 'am hueta'aguet, saishet da 'am ỹaxanec qataq da 'am ỹalat, qaq ỹoqo'oye saishet qome da 'añe'etac qataq da 'anlautapiguiñi.»

Isaías 43:2

Qaq da huo'otaq 'aua'axasoxoolec ca 'etaxat, qalaq Aỹem 'am soota'aguet qome, qataq da 'aua'axasoxoolec ca tala qalaq saishet da 'am 'ogaxaic, qataq da huo'otaq qoquetangui ca norec, qalaq saishet da 'am ỹavigaxat, qataq nam le'eraxa camaye saishet da 'am ỹavigaxat.

Mateo 8:26

Nache So Jesús 'enapeco': –¿Ta'ainco' ye qayi'i? ¡Qami' ỹataqta saq 'amaqtaq da qarpi'iỹaxaqui Ñim Lo'onatac 'Enauacna! Nache So Jesús ñesheguem, nache 'enapega so la'at qataq ana lapaxa so 'etaxat da vi'iiguet, nache 'enauac ỹe'eguelaxa da ntochiguiñi.

Daniel 4:35

Nam huetalec ana 'alhua qalaq qaica ca la'amaqchec da nachatto'ot Ñimaye, qataq Ñimaye da huo'o ye ỹo'ot qalaq maiche ca ỹataxaateuga, nam hueto'ot na piguem qataq nam huetalec ana 'alhua. Qataq qaica ca ishet da dataỹa'aguet da la'añaxac, qataq da ichemaxattac nam ỹo'otpi Ñimaye.

Daniel 4:25

Qaq 'am nta'a, 'am qanqateeguesop qome na shiỹaxauapi, nache 'aualectaigui qome na shiguiỹacpi, nache qollectac qome ana huoue qoneta'am ca nauegaxanaxala'pi huaca, nache na 'aỹa ỹapapiaxat na 'aro'oc. Qaq 'era da qome da 'eetec da 'anachaalataxac que'ecaua siete vi'iye 'am nta'a, nache ivitta'a da 'auauatton da Ñim Lo'onatac 'Enauacna maye Nataỹaña 'Enauacna, huo'o da la'añaxac da ilo'ogue da lo'onataxanaxac na shiỹaxauapi ana 'alhua, qataq nacheñi ñim ỹanem da nta'a cam taalec da ỹanem.

Daniel 2:21

Ñimaye naralaxa't naua na'axa'te qataq naua laloqo'ote, nqat ca nta'a qataq ỹauo'o ca nta'a, qataq ỹanem da laỹaanec nam ỹaanaxanaxaicpi, qataq ỹanem da laỹaanataxanaxac nam ỹaanataxanaxaicpi.

Jeremías 46:27

Qalaxaye 'am Jacob, maye 'am ỹamaxashec saishet qome da 'añi'i, 'am Israel, saishet qome da huo'o da 'arcolanaxa, cha'aye aỹem 'am ñeqateeguesop qome yem qaỹoqta 'alhua, qataq ñeca'alaxateeguesop qome nam 'am chegoxoguetpi ye 'alhua maye hueta'a nagui da ncoñeteguishecpi. Qaq 'am Jacob 'avi'eguelaq qome nache qouetaigui da 'al-lagaxayec qataq nquictasheguem qome da 'arsallaxa, huaña nache qaica ca 'am iquichoqchettac.

Isaías 12:2

Ñim Lo'onatac 'Enauacna, nacheñi ñim aỹem nca'alaxatec, aỹem ñaquita'a Ñimaye nache saishet da she'etac. Ñim Nataxala' nacheñi ñim ỹe'eguenaxala' qataq nacheñi ñi ỹa'añaxac, qataq nacheñi ñi ica'alaxaqui.»

Salmos 46:11

¡Ñim Nataxala' maye Qaica ca Ỹaqalanapec, qomi' hueta'agueta! ¡Ñim Natamnaxala' so Jacob nacheñi ñi qaye'eguenaxala'!

Salmos 44:3

Cha'aye saishet da nachera da lhuaqỹaxac, qataq so lainecpi so chegoqchigui da dauegaxan, somayepi saishet da maiche loxonec ne'ena 'alhua, maye nacherata da 'arhuaqỹaxac qataq da 'ara'añaxac, qataq da 'are'eraxa cha'aye 'auauotec somayepi.

Salmos 27:1

Ñim Nataxala', nacheñi ñi aỹem icoỹattalec qataq nacheñi ñi ica'alaxaqui, ỹoqo'oye ¿negue'tom ca she'etaique? ye Ñim Nataxala' nacheñi ñi mpaxattalec da ñachaalataxac, ỹoqo'oye ¿negue'tom ca aỹem icolanaqchet?

Josué 7:9

Cha'aye na Canaán le'ecpi qataq 'enauac nam netalec na 'alhuapi qom ỹaỹaten de'era maye huaña ne'ena, nache namayepi huaxaỹa't qome da qomi' iloquiaxa'n, huaña nache saishet da huo'o ca no'onañi da shenaqta. Huaña nache ¿ca 'eetec qome da la'amaqchec da 'are'enaxat?»

Josué 10:7

Huaña co'ollaxa nache so Josué jec, chegoqchiguiña ye Gilgal, lỹatec so nalleppi maye ỹataqta alaataxaicpi,

Josué 10:8

nache Ñim Nataxala' 'enapego' somaye, 'eeta': «Saishet qome da 'añe'etega yemayepi, cha'aye aỹem 'am sanem qome da 'oxonecpi, qaq yemayepi qaica ca ishet da 'am dataỹa'aguet.»

Jeremías 49:3

¡Ña 'Auaquico qome 'am Hesbón, cha'aye ye Ai qailaxachigui qome! ¡Qanỹeñi qami' 'alpi maye qarmaye na Rabá! ¡Qaỹa'añiiyiñi naua nogo maye nasouaxaqui', qataq qanhuaxañeeta'alo naua qartoguelli'! ¡Qauachegoqỹañi qome qoñeeta'am aca huo'o da aloic, qataq qauque'emaqchichi da qaro'ocỹaxaqui! Cha'aye ñim atamnaxala' Milcón noxonec qome nache qaỹauega ca ỹaqa'a 'alhua caueegue' qanqa'en na ltaxaỹaxanaxanecpi qataq na 'amaqtaqaicpi shiỹaxauapi.

Deuteronómio 7:21

Ỹoqo'oye saishet qome da qami' iviloxolaqche't da qarcolanaqai souaxat da qañi'iitega yemayepi, cha'aye Ñim Nataxala' maye Qanatamnaxala'ai, Ñim 'Amaqtaqaic qataq ncolanaxat qami' hueta'agueta.

Josué 2:24

Nache 'eeta': «Ñim Nataxala' mashe qomi' ỹanema da qoroxonec 'enauac yi'iye 'alhua. Cha'aye 'enauac yem netaña yemaye ỹataqta ilem da lcolanaxa souaxat da shenaqta.»