Josué 21:44 - La'aqtaqa Ñim Lo'onatac 'Enauacna 2013

⁴⁴ Nache Ñim Nataxala' ipacchigui so ỹan la'aqtac maye ỹachaxanapeguem co'ollaxa so hua'au lta'alpi somayepi. Huaña, nache huo'o da nlagaxayec 'enauac se'eso 'alhuapi maye qanayeetalec. Nache so mpa'aguenaxauapi na Israel le'ecpi, saishet da ỹañoxot da dataỹa'aguet somayepi, cha'aye Ñim Nataxala' ỹanem da loxonec co'ollaxa somayepi.

Josué 21:44 Referans Kwoze

Josué 11:23

Qaq 'era da 'eetec co'ollaxa so Josué da deuotaxanec 'enauac se'eso 'alhuapi, qaq nache ipacchigui 'enauac na la'aqtacpi Ñim Nataxala' maye ỹamaxalec co'ollaxa so Moisés. Huaña nache somaye ỹami' ñi 'oonolec na maiche nhuo' Israel le'ecpi, da yaqto' lalamaxat lma' se'eso 'alhua. Qaq co'ollaq ime nache huo'o da nlagaxayec yi'iye 'alhua.

Hebreos 4:9

Qalaxaye qomi' ñaq seuataqtaique que'eca na'a'q, qomi' maye qomi' lalamaqa'ate Ñim Lo'onatac 'Enauacna da saconaxaguet ca qanmataxac maye qomi' ỹachaxanapeguema Ñimaye.

Éxodo 23:31

Qaq naua loga'te yem qarmaye sogote da sa'a'n da na'anaguec, 'eeta': Chegoqchiguiña qome aso Auaxai Togaxarai, nache ivitta'a so loigue aso auaxai maye nalotaxaama ye lma' ye filisteopi, qataq chegoqchiguiña ye toolec 'alhua choche ivitta'a so tala Éufrates. Qaq Aỹem qami' sanema ye netalec yi'iye 'alhua da qauloỹiigue. Ime, qaq maiche qauo'oyiỹauec qome yemayepi.

Josué 22:9

Qaq 'era da 'eetec co'ollaxa so maiche nhuo' le'ecpi maye chegoxoguetpi so Rubén, Gad, qataq so laỹe so maiche nhuo' le'ecpi maye chegoxoguetpi so Manasés, da ca'ai so laỹepi Israel le'ecpi co'ollaq huaña ye Silo, maye huaigui ye 'alhua Canaán, da yaqto' ỹe'eguelaxa so maiche lalamaxat na'alhua maye huaigui ye Galaad, nache qaipacchigui da lamaxasoxonaxac Ñim Nataxala', maye chegoqchigui naqa'en co'ollaxa so Moisés.

Josué 22:4

Qaq nagui Ñimaye ipacchigui da ỹan la'aqtac co'ollaxa, qataq nam qarqaỹaipi mashe huo'o da l-lagaxayec, qaq ỹoqo'oye nagui qavi'iguelaqaiỹalo qome naua qaranataqa'achilli' qataq ye qana'alhuai maye pa'aỹa'ague da yo'oxoñi so tala Jordán, maye qami' ỹanema co'ollaxa so Moisés, maye lamaxashec Ñim Nataxala'.

Josué 1:15

ivitta'a da Ñim Nataxala' ỹanem nataqa'en namayepi ca nmataqa', 'eeta'ama qami' da mashe qami' ỹanema, qataq ivitta'a da ỹataqta lalamaxat namayepi yi'iye 'alhua maye Ñim Nataxala' ỹanem qome namayepi. Huaña qome nache ishet da qañi'iguelaqaita na qana'alhuai maye mpa'aỹa'ague na nala' lliguisheguem ye tala Jordán, da yaqto' nache qoñiỹalec ne'ena 'alhua maye qami' ỹanema co'ollaxa so Moisés, som lamaxashec Ñim Nataxala'.»

Josué 1:13

«Qantooñita'aco' qome na lamaxasoxonaxacpi so Moisés, som lamaxashec Ñim Nataxala' co'ollaq 'enapec: Ñim Nataxala' maye Qanatamnaxala'ai qami' ỹanema ne'ena 'alhua da yaqto' qanmachiiuec

Éxodo 33:14

Nache Ñim Lo'onatac 'Enauacna, 'enapeco': «Aỹem, 'am soota'aguet qome qataq 'am sami' ca 'anmataxac».

Deuteronómio 21:10

Qaq da ivita da qanalaache' ca qampa'aguenaxauaipi, nache Ñim Nataxala' maye Qanatamnaxala'ai da qami' ỹanema da qoroxoñiqui camayepi,

Josué 23:1

Qaq co'ollaq mashe qaỹoqtegue da Ñim Nataxala', ỹanem da lactapiguiñi so Israel le'ecpi, qataq so Josúe mashe ỹa'axaiquiolec co'ollaxa,

Isaías 63:14

qataq 'eeta'am ca nlopi da tangui ca ca'amegue?» Qaq so Saqcha'a la'añaxac Ñim Nataxala' ilotague' co'ollaxa somayepi. Qaq 'era da 'eetec da ỹauectac so nhuo' le'ecpi, nache ivira'a da huo'o da la'amaqchec qataq da llo'oxoyec.

Deuteronómio 2:36

Qaq nache chegoqchiguiña ye huaqta'a't nỹecpi ye Aroer maye hueto'ot na loigue ye tala Arnón, qataq so huaqta'a't nỹecpi maye naleguete aye lcomaraxalatepi ivitta'a ye Galaad, qaica ca ỹañoxot da qomi' dataỹa'agueta, cha'aye Ñim Nataxala' maye Qanatamnaxala' qomi' ỹanema somayepi da qoroxonec.

Josué 1:5

Qaq ỹataqta qaica qome ca ishet da 'am dataỹa'aguet qom ñaq 'anca'altauec, qataq Aỹem ỹataqta 'am soota'aguet qome, 'eeta'am ñaqa'en da sheetec da ỹataqta soota'aguet co'ollaxa so Moisés, saishet da 'am salat, ỹataqta 'am sa seỹotec.

Josué 2:24

Nache 'eeta': «Ñim Nataxala' mashe qomi' ỹanema da qoroxonec 'enauac yi'iye 'alhua. Cha'aye 'enauac yem netaña yemaye ỹataqta ilem da lcolanaxa souaxat da shenaqta.»

Josué 11:8

qaq Ñim Nataxala' ỹanem so Israel le'ecpi da nauec somayepi, nache iloquiaxaatac qataq icaatalec co'ollaxa somayepi, iviraxata'a ye 'amaqtaqaic huaqta'a't nỹecpi ye Sidón qataq ye Misrefot Mayin maye pa'aỹa'ague da sheu', nache iviraxatta'a ye nalochiguiñi 'alhua ye Mispá, yem pa'aỹa'ague da yo'oxoñi. Nache ỹataqta qaica ca no'onaxatañi da nca'alaxattauec.

Josué 11:12

Qaq so Josué, nache 'eetec nataqa'en so laỹepi huaqta'a't nỹecpi da iloquiaxan qataq ỹalauat so lta'alpi, qataq imauec da ilaxachigui, nache ipacchigui da lamaxasoxonaxac co'ollaxa so Moisés, maye lamaxashec Ñim Nataxala'.

2 Crónicas 13:16

Nache so Israel le'ecpi, dataueeguesop co'ollaxa so Judá le'ecpi, cha'aye Ñim Lo'onatac 'Enauacna ỹanem so Judá le'ecpi da loxonec somayepi.