Jeremías 9:18 - La'aqtaqa Ñim Lo'onatac 'Enauacna 2013

¹⁸ ¡Aja', sanaỹaloxon qome da anac, nache ỹauo'o ca laquicoxo souaxat qomi', qataq ỹo'ot da nlaxaguilo naqa'e'n naua qara'ai'te na qarache' qataq naua qara'ai lapo'ote ipaxaaleguete souaxat da qannoinaxac.

Jeremías 9:18 Referans Kwoze

Jeremías 14:17

'Aua'aqtaxanem qome na nhuo' le'ecpi de'era, 'eeta': ‹Naayiñi qome naua ỹache' chegaqaiguilo naua ỹa'ai'te, nache saishet da vi'iigueta ye na'a'q qataq ye pe, souaxat dam chaqaic qataq qauem maye huaigui na ihuo' le'ecpi, qataq dam lta'araic lque'emaxa.

Jeremías 9:1

¡Da iyaxa da naua ỹa'ai'te, 'eeta'ama ca mpaxaatasheguem 'etaxat, qataq 'eeta'am ca la'auaxac da yaqto' ñeỹeetac ye na'a'q qataq ye pe, souaxat so leuaxaicpi na ihuo' le'ecpi!

Isaías 22:4

Qaq ỹoqo'oye aỹem shenapec: Ñaq aỹem qauỹocheelec qome, cha'aye sauotaique da ñeỹen souaxat da lta'araic ñiqui'ic, qaq saishet qome da aỹem qaua'añaqchichi, cha'aye ỹataqta qailaxachigui na ỹalamaxat ihuo' le'ecpi.

Lamentaciones 2:18

¡'Am Sión, maye ỹataqta huo'o da 'aryac, 'auỹaxanot qome Ñim Nataxala' da 'am itauan! ¡Ña 'aua'aqta'a ye pe qataq ye na'a'q da huecoldec naua 'arache' da 'eeta'am ca la'auaxac! ¡Saishet qome da 'avia'axaneguet da 'annoinaxac, qataq saishet da nmatrec 'anqa'e'n naua 'ara'ai'te!

Lamentaciones 2:11

Da ñenoinaxac qalaq mashe na'axa't naua ỹa'ai'te, qataq ñanomteguet da ỹataqta seuet ana itogue, qataq mashe qaica ca ỹa'añaxac, souaxat da sauaachigui da qailaxachigui som huaqta'a't nỹecpi maye lma'pi som ihuo' le'ecpi, qataq da sauaachigui som ñaqpiolec maye ñaq lleptac da ileuangui na nqa'aicpi.

Lamentaciones 1:2

Ye pe qalaq daquicota da nỹeetac, naua lache' qalaq naguinguilo naua lamelque. Qataq 'enauac nam nauochaxauapi, qaica ca 'oonolec da anac da ỹa'añaqchet. Qataq 'enauac nam nauochaxauapi ỹatenachet, nache ỹe'eguelaxa da npa'aguenaxaua namayepi.

Jeremías 13:17

Qalaxaye da saqaualaqai, nache aỹem sepa'axaatauo qome da ñenoinaxac souaxat da qaño'oxonnaxaqui, naua ỹa'ai'te qalaq huecolde'c qome naua ỹache', cha'aye ana lalopi qaguetapi Ñim Nataxala', qaỹauec qome da qaicoñe'.

Jeremías 9:20

Qami' 'alpi, ñaq qana'axaỹaxañiỹa da la'aqtac Ñim Nataxala', ñaq qana'axaỹaxañiichigui da la'aqtaxanaxac Ñimaye. Ñaq qauapaxaguiñic da nnoinaxac ana qaỹa'alepi qataq ana nauochaxauapi ỹapaxaguenec da laquicoxo, 'eeta':

Jeremías 9:10

Qanỹeñi qataq qana'alaqaitapiguiñi souaxat ana qasoxonaxapi, qauo'oñi ca choxoraqta no'onec souaxat nam nquia'axanataxanaqa'pi, cha'aye mashe ỹavicta, qataq qaica ca quetalec namayepi, qataq mashe saishet da qaỹa'aqtega ca nnoinaxac na shiguiỹacpi, qataq ivira'a na maỹopi qataq na shiguiỹacpi da datauec.

Jeremías 6:26

¡Qami' ỹalamaxat nhuo' le'ecpi, qaỹa'añiiyiñi qome naua anogo maye sansattegueta, maye la'anaxat da qanqui'iqui, qataq qanviñingui qome na alo, qataq qaỹa'añiiyiñi naua anogo maye nasouaxaqui', qataq ỹataqta qanỹeñi souaxat da qaraquicoqoi, 'eeta'am da 'eetec da ileu ca 'oonolec ñalec, cha'aye cam qomi' ilaxachiguilo qome mashe sa qaỹaloq da anac da qomi' iloquiaxa'n!

Lucas 19:41

Qaq co'ollaq mashe nayeetaua'a ye Jerusalén, nache co'ollaq ilaua'a yemaye, nache So Jesús nỹeelec som shiỹaxauapi maye hueta'a yemaye.

Salmos 119:136

Cha'aye naua lache' naua ỹa'ai'te qalaq 'eeta'am ca tala da ipaxaalec, souaxat da sa qaỹalaxagueta naua 'arqataxaco.

Jeremías 7:29

¡'Am Jerusalén, 'auchec qome na 'araue nache 'auasaxauec! ¡Qataq 'auo'on ca no'onec maye choxoraqta, da hualec ana lcomaraxalatepi maye toolec! Cha'aye Ñim Nataxala' mashe dalemataỹa na 'am hueta'a shiỹaxauapi, mashe ca'ai qataq saỹaconeguet.

Lamentaciones 3:48

Naua ỹache' qalaq huecolde'c, naguinguilo naua ỹamelque, co'ollaq semeteetac da nlaguiñi som ỹauotaxat nỹecpi.

Amós 5:16

Qaq ỹoqo'oye da la'aqtac Ñim Nataxala', maye Lo'onatac 'Enauacna, maye Qaica ca Ỹaqalanapec, 'eeta': «Ỹataqta 'enauac qome na naponqa'pi da huo'o da noinaxac, qataq 'enauac na nqa'aicpi da qaỹa'aqtega da na'alaxac souaxat da qui'ic, qataq nam danaxaateguelec na 'alhuapi qaiỹaxanegue da yaqto' nỹen, qataq nam noinaxaicpi da yaqto' nỹen.

Jeremías 3:24

Chegoqta'a co'ollaq ñaq qomi' nsoxoppi, nache nam ỹo'ot da na'agaxa atamnaxala'pi, nachena nam iqataqchet som la'añaqtegueshec co'ollaxa som qarta'alpi: Aso lalopi qaguetapi qataq so laỹepi na'atetpi qataq so llalaqpi ỹalleppi qataq aso llalepi 'alpi.

Jeremías 3:25

Ñaq ñemanaq qome, cha'aye huo'o da qara'agaxa qataq qomi' nlaqchiguilo da qane'enaguec, cha'aye chegoqta'a co'ollaq ñaq qomi' nsoxoppi, nache ivitta'a nagui da qomi' qataq so qarta'alpi huo'o da qarasouaxashet hueto'ot Ñim Nataxala' maye Qanatamnaxala' cha'aye saishet da salaxasoxoguet.»

Jeremías 4:20

Qataq mashe nvi' da na'axaỹaxac da nacalec lỹa nam qailaxachiguipi, 'enauac ne'ena 'alhua qanlaxaañi. Qataq choche nque'elaxatta da qanlaxaañi na ỹanataqa'pi qataq ỹataqta nlachiguiñi qanqa'en so ipe'lpi.

Lamentaciones 2:13

'Am, Jerusalén maye ỹataqta 'am 'onaxaic ¿Negue'tom ca ishet da 'am ñaloqnaxaneguet? ¿Negue'tom ca ishet da saloqnaxana da yaqto' 'am sa'añaqchet, 'am Sión maye ỹataqta 'am qui'itta qataq huo'o da 'aryac? Da 'anque'eenaxac ỹataqta lta'araic, ¿qaq negue'tom cam ishet da 'am nataren qome?