Jeremías 7:13 - La'aqtaqa Ñim Lo'onatac 'Enauacna 2013

¹³ Qaq na'aictaxa da qalota naxa da qami' sachaxanalo da qano'onaxache da qarataxaqui, qalaxaye qami' saishet da aỹem qaualaqaiguet, qataq saishet da aỹem qauasacheeguet. Qaq 'era da ỹa'aqtac Aỹem Nataxala'.

Jeremías 7:13 Referans Kwoze

Isaías 65:12

qalaxaye Aỹem Nataxala', so'ot qome da qami' qairoleguete ca ỹeelonec da qami' qaỹalaua't. Cha'aye Aỹem qami' seỹaxaategalo co'ollaxa qalaxaye qami' saqauasache, qami' setaqtacoto co'ollaxa qalaxaye Aỹem saqana'axaỹaxañiỹa, nacherata da sauaachigui qanqa'eñi nam qauem maye qauo'ocheetac, qataq qalca'aiua'a da qauo'oche nam sasaỹamaxaren.»

Jeremías 7:25

Qaq chegoqchiguiña co'ollaq so qarta'ailpi ca'ai ye Egipto, nache choche ivitta'a nagui, da Aỹem qami' ñamaxalo naxa so ỹamaxashecpi maye ỹa'aqtaxanaxanecpi.

Proverbios 1:24

Aỹem qami' seỹaxaategalo naxa, qataq qami' sheetegalo da aỹem qauanaiua'a, qalaxaye qami' saishet da aỹem qaualaqaiguet.

Mateo 23:37

¡Qami' shiỹaxauapi maye qoñiitaña na Jerusalén! ¡Qami' shiỹaxauapi maye qoñiitaña na Jerusalén! Qami' qaualauache co'ollaxa so la'aqtaxanaxanecpi Ñim Lo'onatac 'Enauacna qataq so lamaxashecpi maye qami' namaxalo Ñimaye. Aỹem ỹataqta qalota naxa da sauotaique da qami' ñepaxattaleguete da sheeta'am aca 'olgaxa da ltelaxa ca llalaqpi da nqapaxaatalec, qalaxaye qami' saishet da Aỹem qauaqaita'a.

Zacarías 7:13

nache Ñimaye, 'enapeco': «Qaq cha'aye saishet da aỹem na'axaỹaxana somayepi co'ollaq seỹaxaatega, nache nataqa'en Aỹem saishet da sa'axaỹa da aỹem iỹaxaatacot.

Oseas 11:7

Ne'ena ỹalamaxat nhuo' le'ecpi ỹataqta lhuennataxa da Aỹem dataỹa'aguet, ỹoqo'oye na'aictaxa da iỹaxaatega da ỹe'enaxat, qalaxaye saishet da ỹoqta 'eesa da Aỹem ỹo'oxoreetac.

Oseas 11:2

Qalaxaye co'ollaq ỹapac da seỹaxaatega, nache lamaxa nquictauec da aỹem ca'ai. Nache namayepi ỹaatacot ana lachetaqtaxanaqte nam saq 'en atamnaxala'pi, qataq ỹavigaxattac na lchenaxanaxat da ỹanot nam ne'enaqtacpi.

Jeremías 44:4

Qaq ỹataqta she'eguelaqtalec da samaq naxa som ỹamaxashecpi maye ỹa'aqtaxanaxanecpi da yaqto' qami' 'enapegalo da saishet da qauo'oche de'era maye seqaiga.

Jeremías 35:17

Qaq ỹoqo'oye Aỹem Nataxala' maye Qaica ca Seqalanapec qataq Aỹem Natamnaxala' na Israel le'ecpi, sheeta': So'ot qome da na Judá qataq 'enauac nam hueta'a na Jerusalén da talec qome 'enauac nam qauem maye sa'axatta'aguet co'ollaxa. Cha'aye Aỹem qami' setaqtecoto co'ollaxa, qalaxaye qami' saishet da aỹem qauqochiitega, qataq qami' seỹaxaategalo co'ollaxa qalaq saishet da Aỹem qauasacheeguet.»

Jeremías 35:15

Qataq she'eguelaxattalec da qami' ñamaxalo so ỹamaxashecpi maye ỹa'aqtaxanaxanecpi, da yaqto' qami' 'enapegalo, 'eeta': Qaỹa'axañiiuec da qauem qarataxaqui qataq nam qauem maye qauo'ocheetacpi. Qataq saishet da qaca'acheetague' na ỹaqa'a atamnaxala'pi, qataq saishet da qavio'oxoyiñiitac, yaqto' nache queta da qoñeetalec na 'alhua maye qami' sanema co'ollaxa qataq so hua'au qarta'ailpi. Qalaxaye qami' saishet da Aỹem qauqocheetega, qataq saishet da Aỹem qaualaqaiguet.

Jeremías 25:3

«Chegoqta'a co'ollaq ivi' soua trece vi'iye da nta'a so Josías, som llalec so Amón maye ilotague' ye Judá, qaq choche ivitta'a nagui, qaq damaye, 'eeta': mashe ivi' naua veintitrés vi'iye da Ñim Nataxala' aỹem detaxaỹot co'ollaxa, nache aỹem qami' she'eguelaqtaleguete co'ollaxa da qami' setaqtacoto, qalaxaye qami' saishet da aỹem qaualaqaiguet.

Jeremías 11:7

Aỹem co'ollaq ñeqateeguesop ye Egipto, som hua'au qarta'ailpi, nache seqattelec da Aỹem ỹalaxaguet, qaq nache chegoqchiguiña nache ivitta'a nagui da ñaq shecto'ot da seqattega.

Isaías 66:4

Qaq Aỹem nataqa'en lleca'aua'a qome da so'ot ca nque'eenaxac namayepi, nache ñamaxa qome namayepi cam ỹataqta lcolanaxat. Cha'aye co'ollaq seỹaxan qalaq qaica ca Aỹem ỹasateguet qataq co'ollaq setaqa qalaq qaica ca Aỹem ỹalaxaguet, nacherata da sauaachigui naqa'en da ỹo'ot nam qauempi qataq lca'aua'a da ỹo'ot nam ỹataqta sasaỹamaxaren.»

Isaías 50:2

¿Ta'ainco' co'ollaq ñevi', nache qaica ca selalec? ¿Ta'ainco' co'ollaq seỹaxan, nache qaica ca ỹasat? ¿Qaupicheetega peta'a da aỹem sañaloua'a da qami' ñeca'alaxatrec? ¿Qaupicheetega peta'a da sa sañoxot da qami' sesore'c? Qamaq aỹem ishet da choche 'oonolec ỹa'aqtac ca san nache deqaqa aso auaxai, qataq ana talapi qalaq ỹe'eguelaxa da toolec 'alhua, yaqto' na nỹaqpi ilem na laquip nache nchega souaxat da qaica ca 'etaxat.

Jeremías 13:11

Qaq cha'aye dam 'eetec ca saataxaqui da ipataqta't na lasot ca shiỹaxaua, qaq nachera da sheetec co'ollaxa nam nhuo' Israel le'ecpi, qataq 'enauac na nhuo' le'ecpi ye Judá, da ỹataqta na'attaua'a Aỹem da yaqto' ỹalamaxatpi, qataq da ỹachaxan da ỹe'enaxat, qataq da chegoqchigui namayepi da huo'o naq 'enec qanqa'en Aỹem qataq da ỹo'oxoyec. Qalaxaye namayepi saishet da Aỹem ỹalaxaguet. Qaq 'era da ỹa'aqtac Aỹem Nataxala'.

Jeremías 26:5

qataq da saishet da qauqocheetega da lvitaqtaxanaxac so ỹamaxashecpi maye ỹa'aqtaxanaxanecpi, maye ỹe'eguelaqtalec da qami' ñamaxalo, som sa qaualaqaiguetpi,

Jeremías 32:33

Aỹem iro'oguet na l-laq, nache saishet da Aỹem datateguet. Qaq na'aictaxa da saishet da saxanec da sapaxagueetac, namayepi saishet da Aỹem ỹalaxaguet qataq saishet da ỹaconeguet da ihuogoqtaxanaxac.

Jeremías 35:14

Nam chegoxoguetpi so Jonadab som llalec so Recab, namayepi ỹalaxalec dam la'aqtac co'ollaxa som chegoxoguet, da saishet da nỹomgui na lataxa, qaq choche ivitta'a nagui da namayepi saishet da nỹomgui na lataxa, cha'aye ỹalaxaguet so la'aqtac som hua'au lta'a. Qaq Aỹem nataqa'en qami' sanema co'ollaxa da ỹa'aqtac, damaye shee'eguelaxattalec, qalaxaye qami' saishet da Aỹem qaualaqaiguet.

Jeremías 44:23

Qaq de'era qauem, maye qami' qoviitaigui nagui, damaye qami' taleguete souaxat da qaỹa'añiitacot na qarchenaxanaxache maye ama na laita nam laỹepi atamnaxala'pi, qaq nache huo'o da qarasouaxashechi hueto'ot Ñim Nataxala', cha'aye saishet da qaualaqaiguet nam lapaxaguenataxanaxacpi, qataq nam lqataxacpi Ñimaye, qataq saishet da qaupaquiiteleguete naua lamaxasoxonaxaco.

Jeremías 5:21

‹Ñaq qana'axaỹaxañiỹa de'era qami' nhuo' le'ecpi maye qaica ca qarauattonaxanaxaqui, qataq qaica ca qauaỹaañiỹapec, cha'aye huo'oi naua qara'ai'chilli' qalaxaye saishet da qanauañiiñi, qataq huo'oi naua qartelai lauacolli' qalaxaye saishet da qaua'aqai.

Jeremías 6:10

Qaq aỹem shenapec. «¿Negue't ca aỹem hua'axaỹa da sa'axatem qataq sanem de'era na'axaỹaxac? Ye namayepi ỹapotaguilo naua ltela lauaco, nache saishet da hua'aqa, namayepi ỹe'eeta'ape naua 'ara'aqtaqa qataq saishet da ỹamanegueta.

Jeremías 11:8

Qalaxaye saishet da Aỹem qocha'a qataq saishet da Aỹem ỹalaxaguet, nachaqrata da qaramchigui da lquiyaqteỹaxac nache queguelo na maiche lhuennataxaco. Nache saishet da ipaqueeleguete naua ỹa'aqtaqa maye samaxaleguete co'ollaxa, qaq huaña nache so'ot so iuaxanaxanaxac maye ỹa'axatta'a co'ollaxa de'era ñaỹamaxataxac.»

Jeremías 13:10

Ne'ena nhuo' le'ecpi qauemaicpi, maye saishet da ỹalaxaguet nam ỹamaxasoxonaxacpi, qataq quetagueto naua qauema lhuennataxaco da lquiyaqteỹaxac. Namayepi quegue na ỹaqa'a atamnaxala'pi da do'onataxanot, qataq ỹo'oxoreetac. Nache 'eeta'am som saataxaqui maye saishet da qaltaq ỹe'eguelaxa da qaiuen.

Jeremías 29:19

Cha'aye saishet da qaualaqaiguet dam ivitaqtaxanaxac maye qami' sanema co'ollaxa chegoqchigui ñaqa'en som ỹamaxashecpi maye ỹa'aqtaxanaxanecpi, maye qalota naxa da qami' ñamaxalo qalaxaye qami' saishet da qana'axaỹaxañiỹa. Qaq 'era da ỹa'aqtac Aỹem Nataxala'.

Oseas 9:17

Qaq ne'ena nhuo' le'ecpi saishet da ỹalaxaguet Ñim Ñatamnaxala', ỹoqo'oye Ñimaye ỹo'orauec qome namayepi, huaña nache namayepi nsomaxaatapigui' qom ỹalectaigui na ỹotta'a't shiỹaxauapi.