Jeremías 4:13 - La'aqtaqa Ñim Lo'onatac 'Enauacna 2013

¹³ Ña qauloỹa nam pa'aguenaxauapi mashe anacta, 'eeta'am na lo'oc na piguem, ana nnaigonapi maye nalaataxaquipi qalaq 'eeta'am ana daua'ache, qaq na lalopi caipi qalaq ỹataqta qayaqaicpi napacalec na vi'icpi. ¡Choxoraiqolqa qomi' mashe seqataq!

Jeremías 4:13 Referans Kwoze

Isaías 19:1

Qaỹa'axata'a dam talec qome ye Egipto. Ña qauloỹeeguet nam Nataxala', netalec na ỹataqta qayaqaic lo'oc na piguem da naỹa'a ye Egipto. Qaq nam atamnaxala'pi ye Egipto qalaq iviloxol qom nvi' namaye, qataq nlaxagui qome da lli'iỹaxa ye Egipto le'ecpi.

Isaías 66:15

Cha'aye Ñim Nataxala' qom anac qalaq nactaigui ca norec, aca nnaigonapi qalaq 'eeta'am qome ana daua'ache, huaña nache icorec na le'eraxa da layeloxo, qataq nalaqaasheguem na le'eraxa da lhuaxanaxanaxac.

Habacuc 1:8

Qaq ana naloxo na lalo caipi qalaq napacalec ana naloxo ca quiyoc, qataq napacalec da lchec na qa'alaqpi maye huetauga na toolec 'alhua, qataq nam nalleppi maye netalec na caipi ỹataqta nquictauec, nache da ñaq qaỹoqta qalaq ỹataqta ỹachegoxotañi na lalo caipi da nalat, 'eeta'am ca qoỹo lo'o' da decanaxan da yaqto' huo'o ca loxonec.

Lamentaciones 4:19

Nam qomi' icaata'ape qalaq ỹataqta qayaqaicpi napacalec na vi'ic piguem le'ec, ivira'a da sonaqtalec ana qasoxonaxapi da qomi' icaata'ape, qataq qomi' nqovi'n, ỹanalec na toolec 'alhuapi ana lqoinapi.

Isaías 5:28

Aca lchecnapi qalaq ỹataqta ỹaxaraipi, qaq ca lchecnecpi qalaq ỹataqta ichegaxattelec. Aca naro'opi ca lalopi caipi qalaq 'eeta'am na coma', qaq naua lasaxanna acam laigonapi qalaq 'eeta'am ana daua'ache,

Nahúm 1:3

Ñim Nataxala', ỹataqta qaỹoqchiguinguit da lalemataic, qalaxaye ỹataqta lta'araic da la'añaxac, nache saishet da sa ỹauo'o ca nhuaxanaguec cam huo'o ca lasouaxashet, Ñim Nataxala', Ñimaye quetaigui na la'at lta'araic, qaq nam lo'oc na piguem qalaq namoxoỹaxatsheguem naua lapia'ate, 'eeta'am na namoxoỹaxa.

Isaías 13:5

Chegaqa'a ye ỹataqta qaỹoqta 'alhua, maye pa'aỹa'ague da nala' lliguisheguem. Ñim Nataxala' anacta nachetac na lo'ogoxonaxat souaxat da lalemataic, da yaqto' ilaxachigui 'enauac ana 'alhua.

Deuteronómio 28:49

Ñim Nataxala', 'am namaxa qome ca shiỹaxauapi maye chegaqa'a ca ỹataqta qaỹoqta 'alhua, qaq camayepi ỹataqta sailaua'ague 'eeta'am da naloxoyaxac ca taga' da huaỹotac, cam shiỹaxauapi maye saq 'aua'axaigueta naua la'aqtaqa,

Jeremías 4:31

Aỹem sa'aqtega da na'alaxac souaxat da qui'ic, 'eeta'am aca 'alo da cheta'ague da deco'o, qalaxaye nacheye yem Sión da la'alaxac de'era, maye dachottac qataq ỹaatrauec naua lhua'q nache, 'eeta': ¡Choxoraxaso' aỹem! ¡Aỹem ỹalauat qome na laataxanaxaicpi!»

Apocalipsis 1:7

¡Ñaq qauloỹa! ¡Na Cristo mashe anacta, netalec na lo'oc na piguem! 'Enauac da qailota'aguet da anacta, ivira'a nam ỹalauat co'ollaxa; qataq nataqa'en 'enauac na huetalec ana 'alhua, nỹen souaxat namaye. 'Era dam 'eetec qome, ¡aja', nache 'eetec!

Mateo 24:30

Huaña, nache 'enauac da qaila'a na pa'asheguem ca la'anaxat da Aỹem Shiỹaxaua Llalec qaltaq ñe'eguelaq. Nache 'enauac qome na ỹotta'a't shiỹaxauapi ana 'alhua ỹataqta iviloxolaqchet da lcolanaxa qom Aỹem ila'aguet da ñanactaigui ca lo'oc na piguem, ỹataqta lta'araic da ỹa'añaxac qataq da ỹo'oxoyec.

Oseas 8:1

e'Auashiiyigui qome aca nasheere, cha'aye mashe anacta na vi'ic da naỹa na lma' Ñim Nataxala', souaxat da sa qaipaguelec da ñaỹamaxataxac, qataq qaỹataỹa'agueta naua ỹamaxasoxonaxaco.

Daniel 7:4

So hua'auchiguiñi da nnoxoosheguem qalaq 'eeta'am na llon, qalaxaye huo'oi naua laua't 'eeta'am na vi'ic. Qaq so ñaq semeteetac, nache qanapo'c soua laua't, nache qanachalataxaañi da 'eeta'am qanqa'en na shiỹaxaua da nachattañi, nache ye lapio'oxo ỹe'eguelaxa da 'eeta'am na lapio'oxo na shiỹaxaua.

Jeremías 10:19

¡Choxoraicolec aỹem ỹataqta lta'araic da ñequi'ic! ¡Na ique'emaxapi qalaq qaica ca lata'! ¡Qaq aỹem sepettega da ishet ñala'aguet de'era ñequi'ic!

2 Samuel 1:23

So Saúl qataq so Jonatán, soomaye ỹataqta auochaxau', co'ollaq ñaq nca'altrauec, qalaq sa nỹoteegache, qaq 'eeta'am co'ollaq ivita da ileu' nache sa nỹoteegache. ¡Soomaye ỹataqta qayaqaiqa, napacaleguete ca huole da naloxoyaxa'c! ¡Qataq napacalec ca quiyoc da la'añaxa'c!

Isaías 3:8

Cha'aye ỹoqta 'eesa da na Jerusalén hua'axañi qome, qataq ye Judá nlachiguiñi qome, cha'aye nache huaña yemaye nam ntaxaỹaxacpi qataq na qaỹo'otpi da qaỹataỹa'aguet Ñim Nataxala', da qaisheueetac da la'amaqchec Ñimaye.

Jeremías 4:12

qaq cam la'at maye ñanacot qome, camaye ỹataqta qapa'atteguet nache saq taiguet de'era, cha'aye nagui Aỹem sa'axat nam lasouaxashetpi da sataỹa'aguet namayepi.»

Jeremías 9:19

Cha'aye ye Sión chemaqtega da na'alaxac souaxat da qui'ic, ¡'Agai, seviraqta'aguet da qomi' qanlaxaayiñi! ¡Ỹataqta lta'araic da qane'enaguec maye souaqaigui! Nache qomi' iuen da qolaqa'ai na qana'alhua, cha'aye na qarma'pi ỹataqta nlachiguiñi.

Jeremías 49:22

Na pa'aguenaxauapi anac qome da iloquiaxan ye Bosra, 'eeta'am ca vi'ic da ipegueere'c naua laua't, qaq que'eca na'a'q nache na alaataxaicpi ye Edóm, ỹataqta iviloxol qome 'eeta'am aca 'alo da deco'otac.»

Ezequiel 26:10

Qaq ñi nta'a ye Babilonia qom inoxonoigui na 'anasompi, qalaq 'eeta'am da qainoxoneua'a ca huaqta'a't nỹecpi maye noxonec, qaq souaxat da qalota ca lalo caipi, nache 'am ỹapolec ca namoxoỹaxa maye naỹoxoosheguem naqa'en, qataq cholaxan naqa'en na 'arpaqtaxanaxatpi da l-llimiaxa aca nnaigonapi qataq ca lalo caipi,

Ezequiel 38:9

Qaq qom 'anvita yemaye, nache qoneta'am ca napo da ipegueelec 'enauac yi'iye 'alhua, qataq 'aunoxotaua'a qome yemaye qoneta'am ca la'at lta'araic, 'arỹateuo ca qalota 'analleppi, qataq ca qalota nhuo' le'ecpi.»

Daniel 11:40

Qaq qom ivita que'eca loga't, nache ca nta'a maye lma' da taguiñi, iloquiaxan ca nta'a maye lma' da sheu', qalaxaye que'eca nta'a maye lma' da sheu', ca'ata'aguet qome camaye, nache 'eeta'am ca la'at lta'araic da iloquiaxan ca nta'a maye lma' da taguiñi, nache aca nnaigonapi maye alaataxaquipi imattalec qome que'eca 'alhua, qataq ca qalota nalleppi maye netalec na caipi, qataq aca qalota notaxaquipi da quiguingui na 'etaxat.

Miqueas 2:4

Nache que'eca na'a'q choche qami' qaỹe'eeta'ape qome, nache qaỹo'on ca choxoraqta no'onec da qami' qaỹo'onaxaaleguete, maye 'eeta': Ỹataqta imauec da qomi' qanlaxatchiyiñi, na qarhuo' le'ecpi maye lalamaxat co'ollaxa Ñim Nataxala', qalaq dalaxaic nam lalamaxat namayepi, qaq na qana'alhuapi qalaq nalogui nam qomi' loxonecpi.

Jeremías 6:23

Mashe nasoqta'a na lchecnecpi qataq na lainecpi; yemayepi ỹataqta qauemaicpi qataq qaica ca ichoxoreetac, da la'alaxac qalaq 'eeta'am da l-lamaxa aso auaxai, qataq netalec na lalo caipi. Qaq mashe lhuotta da iloquiaxan na Sión.»

Jeremías 46:18

Qaq Aỹem maye Aỹem Nta'a, da ỹe'enaxat, 'eeta': Nataxala' maye Qaica ca Ỹaqalanapec, san da ỹa'aqtac maye, 'eeta': 'Eeta'am añi qasoxonaxa Tabor da saishet da 'ena'am ana laỹepi qasoxonaxapi qataq añi qasoxonaxa Carmelo maye netaua'a na laỹe aso auaxai, qaq nache 'eetec qome da anac na pa'aguenaxauapi.

Jeremías 48:40

Ñim Nataxala', 'eeta': Na mpa'aguenaxauapi ye Moab anac da iloquiaxan yemaye, 'eeta'am ca vi'ic da ipegueere'c naua laua't.

Zacarías 6:1

Aỹem, qaltaq huo'o so lỹa ỹauanaqchec, sela'alo soua cuatro naigona alaataxaqui', chegoqchiguinguilo soua dos qasoxonaxal maye ndota't na bronce.