Jeremías 20:11 - La'aqtaqa Ñim Lo'onatac 'Enauacna 2013

¹¹ Qalaxaye 'am Nataxala', aỹem qoueta'aguet qoneta'am ca alaataxaic maye saqanauec, nam aỹem icaatacpi qalaq huañi qome, nache saishet da aỹem loxonec, namayepi saipac qome cam 'eetapeguec, nache huo'o da la'aloxo, nache chochaq tatec qome da ne'enaguec qataq saishet da qaicoua'ai.

Jeremías 20:11 Referans Kwoze

Jeremías 1:19

Namayepi 'am delogui' qome, qalaxaye saishet qome da 'am loxonec, cha'aye aỹem 'am soota'aguet qome da yaqto' 'am ñepaxattalec. Qaq 'era da ỹa'aqtac Aỹem Nataxala'.»

Jeremías 1:8

Qaq saishet qome da huo'o ca 'aye'etega, cha'aye Aỹem 'am soota'aguet qome da yaqto' 'am ñepaxattalec. Qaq 'era da ỹa'aqtac Aỹem Nataxala'.»

Jeremías 15:20

Aỹem so'ot qome da qoneta'am ca mpaqtaxanaxat bronce maye huo'o da lqalaic da qanlaxaañi da 'aualectaigui ne'ena nhuo' le'ecpi. 'Am qailoquiaxan qome qalaq saishet da 'am noxonec, cha'aye Aỹem 'am soota'aguet qome da 'am ñepaxattalec qataq 'am ñeca'alaxatec. Qaq 'era da ỹa'aqtac, Aỹem Nataxala'.

Jeremías 17:18

'Auauo'o qome la'aloxo nam aỹem icaatacpi, qalaxaye saishet da aỹem da 'auauo'o da ỹa'aloxo. Namayepi 'auauo'o qome da lli'iỹaxa qalaxaye saishet da aỹem da 'auo'ot ca ỹi'iỹaxa. Ñaq 'auanacot qome ca naquicoxo da talec 'anqa'en namayepi, nache ỹataqta imauec qome da 'anlaxaañi namayepi.

Isaías 41:10

Saishet qome da 'añe'etac cha'aye Aỹem 'am soota'aguet, saishet da 'añe'etac cha'aye nache Aỹem 'Anatanmaxala'. Aỹem 'am sanem da 'ara'añaxac, Aỹem 'am setauan qome, Aỹem sauota'a qome na ihuaq maye huegaxanaxaic da 'am ñasoqtañi.

Salmos 6:10

Qaq 'enauac qome na ñepa'aguenaxauapi da huo'o da la'aloxo qataq lcolanaxa, nache sanaỹaloxon da datauec, souaxat da la'aloxo.

Salmos 40:14

Ỹataqta huo'o qome da la'aloxo qataq sa ỹaỹaten ca 'eetec, na ỹauotaique da aỹem ỹalauat. Qataq dataueeguesop qome da la'aloxo na huotaique da aỹem ỹo'otec ca qauem.

Salmos 35:26

Ñaq huo'o qome da la'aloxo qataq saỹaỹaten ca 'eetec, nam ntootalec de'era souaigui ỹachoxoyec, qataq huo'o nataqa'en da la'aloxo na ipi'itaxaatega da aỹem nataỹaña.

Romanos 8:31

Qaq ỹoqo'oye ¿negue't ca lỹa qara'aqtac? Ye 'oonolec dam ishet da qara'aqtac, 'eeta': Da Ñim Lo'onatac 'Enauacna da qomi' hueta'agueta, nache qaica ca ishet da qomi' dataỹa'agueta.

Jeremías 23:40

Qataq chochaq tatec qome ñaqa'en, da qaica ca 'eneque qanqa'en qami', qataq chochaq tatec da qara'agaqai, nache damaye saishet qome da qaucoviỹa'ai.»

2 Timoteo 4:17

Qalaxaye So Qarataxala' Jesús aỹem itauan, qataq aỹem ỹami' da ỹa'añaxac da ña sepactelec da sa'axat da na'aqtac maye chegaqaigui da nca'alaxa, yaqto' hua'axaỹa de'era 'enauac na saq judiopi. Qaq nache 'eetec de'era da aỹem nca'alaxateeguesop da loxonaxanaxac nam dequi'iỹapec 'eeta'am ca shiguiỹac.

Isaías 45:16

'Enauac nam ỹo'ottac na ne'enaqtacpi atamnaxala'pi, huo'o qome da la'aloxo qataq qaica ca la'amaqchec, qataq qane'eetapigui.

Salmos 66:5

Ñaq qauanaqui qome da qaumichiñi na lo'onatacpi Ñim Lo'onatac 'Enauacna, maye ỹo'ot da na'aalaxa maye ỹo'otec na shiỹaxauapi,

Daniel 12:2

Qalota qome cam do'ochetapi maye huetangui aca nhuachiqui, qalaq nlouec qome: qaq huo'o qome ca chochaq tatec da nca'altauec qataq huo'o qome ca nca'alec qalaxaye nque'etaxangui ca chochaq tatec la'agaxa qataq ca qauem.

Salmos 65:5

'Am Atamnaxala' qataq 'am qarca'alaxaqui 'am qomi' 'auasategueta ỹataqta qaica ca 'ena'am da la'amaqchec da ỹaỹamaqchiguiñi maye 'auo'ot. Qaq 'enauac na netalec ana 'alhua ỹataqta 'am pi'iỹa'a qataq na netaleguete naua qaỹoqtalo auaxai.

Salmos 47:2

Cha'aye Ñim Nataxala', Ñim Nataỹaña 'enauacna, Ñimaye ỹataqta huo'o da lchec, Ñimaye nacheñi ñi lta'araic nta'a 'enauac na huetalec ana 'alhua.

Isaías 41:14

Ñim Nataxala' da la'aqtac, 'eeta': 'Am Israel, maye 'auachegoxoguet so Jacob, na'aictaxa da qaica ca 'ara'amaqchec qataq ca 'ara'añaxac, qalaxaye saishet qome da 'añe'etac, Aỹem 'am setauan qome. Aỹem, maye Aỹem Qui'itta Natamnaxala' na Israel le'ecpi, Aỹem, 'am ñeca'alaxatec.

Salmos 129:2

Aỹem ỹataqta qalota na ñeque'eenaxacpi, chegoqta'a co'ollaq ñaq aỹem nsoqolec, qalaxaye saishet da aỹem noxonec.

Jeremías 15:15

'Am Nataxala', 'Am maye 'auaỹaten 'enauac de'era, ¡ñaq aỹem 'auennata'a qome nache 'auanac da aỹem 'autauan! ¡Ñaq 'auauo'o qome ca nhuaxanaguec nam aỹem icaatacpi! saishet qome da 'auchoxoreetac namayepi, yaqto' saishet da seleu, ña 'aulogui da souaxat 'am, nache ña'añaxatta'aguet na ñesheunaguecpi.

Jeremías 22:22

Qaq 'enauac qome na 'arataxala'pi da ỹaỹoxonaqchet ca la'at, nam 'ancachaxauapi qalaq qaỹauega qome ca ỹaqa'a 'alhua. Nache 'am huo'o qome da 'ara'agaxa qataq sa 'auaỹaten ca qonetec, souaxat na qauempi maye 'auo'ot.

Jeremías 32:18

'Am, 'auachaxana da 'arsoxoyec na ỹataqta qalota shiỹaxauapi, qalaxaye nataqa'en 'auauo'o da nhuaxanaguec na ỹalleppi souaxat na lasouaxashet so lta'alpi. ¡'Am Atamnaxala', maye 'Am 'amaqtaqaic qataq 'añaxaic, da 'are'enaxat 'eeta', Nataxala' maye Qaica ca Ỹaqalanapec!

Jeremías 1:18

Aỹem, 'am sanem nagui da qoneta'am ca huaqta'a't nỹecpi, maye qaỹapotaua'a qoneta'am aca nhuoqte maye lcat, qataq qoneta'am ca mpaqtaxanaxat maye lo'oxonaxat na bronce, da yaqto' 'auataỹa'aguet 'enauac na hueta'a ye 'alhua Judá. Nam nta'alpi, nataxala'pi, ntaxaỹaxanaxanecpi qataq 'enauac nam nhuo' le'ecpi maye hueta'a yemaye.