Jeremías 18:8 - La'aqtaqa Ñim Lo'onatac 'Enauacna 2013

⁸ Qalaxaye que'eca ỹotta'a't shiỹaxauapi da ca'ai na qauem, nache saishet da ñamaxa ca nhuaxanaguec maye mashe seqataxaatai'.

Jeremías 18:8 Referans Kwoze

Ezequiel 18:21

Qalaxaye ca qauemaic da ỹaxaañi 'enauac nam lasouaxashetpi maye ỹo'ottac co'ollaxa, nache ipaqueelec 'enauac nam iqataxacpi, qataq ỹo'ot nam ỹaỹamaqchiguiñi qataq no'on lataxac, nache camaye ỹoqta 'eesa da nca'alec, qaq saishet qome da ileu.

Jeremías 26:13

Qaq ỹoqo'oye qano'onaxache da qarataxaqui qataq da qaro'onataxanaxaqui, nache qaualaqaiguet Ñim Nataxala' maye Qanatamnaxala'ai, yaqto' Ñimaye saishet qome da qami' namaxalo cam qauem maye ỹa'axatta'a.

Oseas 11:8

'Am Efraín, ¿ca sheetectaxa da 'am sheca'ai? 'Am Israel, ¿ca sheetectaxa da 'am salat? ¿Isheto' peta'a da 'am selaxachigui da 'eeta'am so huaqta'a't nỹecpi ye Admá, huo'otaq da 'eeta'am da sheetec co'ollaxa so huaqta'a't nỹecpi ye Seboyin? ¡Da iquiyaqteỹaxac ỹataqta Aỹem iraxanapec, souaxat da ichoxonnataxanaxa da qoneta!

Jeremías 26:3

Shapegueto' da ishet da 'am ỹalaxaguet da ỹaxaañi da qauem lataxac, yaqto' Aỹem saishet da sepaguelec dam seuennatega co'ollaxa da sauo'o ca nhuaxanaguec, souaxat nam qauem maye ỹo'otpi.

Jueces 2:18

Qaq naxa Ñim Nataxala', da ỹauo'o na nauaxaỹaxaasheguem nataxala', nache ỹataqta itauaatac, qaq naxa da ña nca'altauec ñi nataxala', nache isoueeguesop na Israel le'ecpi da la'añaxac na mpa'aguenaxauapi, cha'aye Ñimaye ỹataqta huo'o da lchoxonnataxanaxa da hua'aqtega da la'alaxac ne'ena lalamaxat nhuo' le'ecpi, souaxat da sa nañaxaasheguem da lachetataic.

Salmos 106:45

nache tachigui naxa ye lauel da naỹamaxataxac co'ollaq naỹamaxate' somayepi, nache naralaxat da lhuennataxac souaxat da lta'araic lauotaxanaqtaic.

Salmos 135:14

Ñim Nataxala' ỹo'otec da ỹaỹamaqchiguiñi na lalamaxat nhuo' le'ecpi, qataq huo'o da lchoxonnataxanaxa na lamaxashecpi.

Salmos 90:13

'Am Nataxala', ñaq qomi' 'añe'eguelaxalo, ña 'auchoxoren qome ne'ena 'aralamaxat 'aramaxashecpi.

2 Crónicas 12:6

Huaña, nache so nataxala'pi ye Israel qataq so nta'a, ỹaỹateeteguet de'era nache nañan, nache 'enapeco': ¡Ỹataqta 'eesa da la'aqtac Ñim Nataxala'!

Deuteronómio 32:36

Ñim Nataxala' deloclec qome na lalamaxat nhuo' le'ecpi, da ila'a da mashe qaica ca la'añaxac, nache Ñim Nataxala' choche ichoxoren qome ne'ena lamaxashecpi, qom ila'a da mashe imeuo, cam huo'o da la'añaxac.

Éxodo 32:12

¿Ta'ainco' ctaxa da 'aua'aqta'a da huo'o ca la'aqtac ye Egipto le'ecpi da, 'eeta'?: ‹Ñim Lo'onatac 'Enauacna nqatec yemayepi, cha'aye huotaique da choche ỹalauat, hualec naqa'en añi qasoxonaxa, qataq nshetaique da choche ỹapalaxat, yaqto' saishet da huetalec ana 'alhua›. Qaq ỹoqo'oye 'am shenapega da 'aỹa'axaañi da 'annogonaxac, qataq 'aỹa'axaañi da 'anshetaique da 'ana'aqchet ye 'aralamaxat nhuo' le'ecpi.

Jonás 4:2

Ỹoqo'oye natamnot Ñim Nataxala', 'eeta': «¡Aicoue, 'Am Nataxala'! 'Era da sheetega co'ollaq soota'a ye ña'alhua, ỹoqo'oye huac da satauec da saỹa ye Tarsis, cha'aye saỹaten da 'Am maye 'Aro'onatac 'Enauacna, qaỹoqchiguinguit da 'aralemataic, cha'aye 'am soxoraic, choxonnataxanaxaic, huotaxanaqtaqaic, qataq ishet da 'anaralaxat ca 'arhuennataxac da sa 'aupaguelec cam qauem maye 'autaxaỹa da 'auo'ot.

Ezequiel 33:13

Qaq da sachaxanapecot ca lca'alaxa ca no'on da lataxac, nache camaye da pe'etalec da no'on lataxac nache ỹo'ot ca qauem, nache Aỹem saishet da selogui cam no'on maye ỹo'ottac co'ollaxa, nacherata da ileu qome souaxat cam qauem maye ỹo'ot co'ollaxa.

Ezequiel 33:11

Qalaxaye Aỹem Nataxala', maiche ñañan da san da ỹa'aqtac, da saishet da saỹamaxaren da ileu cam qauemaic, nacherata da naralaxat da lataxac yaqto' nca'alec. 'Am Israel, 'aỹa'axanec de'era qauem 'arataxac maye 'auachetac. Cha'aye ¿ta'ainco' taxa da 'aleu?

Jeremías 42:10

‹Da qami' qarhuennataqai da qoviỹa'a ne'ena 'alhua, nache Aỹem qami' sanema da qaica ca qaviñiitaique, qaq saishet qome da qami' selaxachiguilo nacherata da qami' saayiñi nache saishet da qami' ñapogoyeshegue'm, cha'aye huo'o da ñetogotaxac da qami' ñamaxalo co'ollaxa se'eso qauem.

Jeremías 36:3

Saiuena'a na Judá le'ecpi da huo'otaq ỹaỹaten 'enauac nam qauempi maye huotaique da ñamaxa namayepi, nache ishet da ỹaxanec dam qauem lataxac, nache Aỹem sechoxoren qome namayepi qataq sapalaxat nam lasouaxashetpi.»

Jeremías 26:19

¿Qaq peta'a so nta'a Ezequías qataq 'enauac so nhuo' le'ecpi ye Judá, ỹalauat co'ollaxa so Miqueas? 'A'i, maye nacherata da so nta'a huo'o co'ollaxa da lcolanaxa Ñim Nataxala', nache iỹaxanot da yaqto' ichoxoren somayepi. Huaña nache Ñim Nataxala' saishet co'ollaxa da namaxa somayepi cam qauem maye ỹa'axatta'a co'ollaxa. Qalaxaye qomi' sauoqtaique da maiche qomi' taleguete ca qauem.»

Jeremías 15:6

'Am mashe Aỹem qoca'ai qataq aỹem 'auro'oguet na 'al-laq. Qaq 'era da ỹa'aqtac Aỹem Nataxala'. Cha'aye Aỹem, mashe 'am ñasamiisop da 'am ñeualaxaueetague', nache ñauaxaỹaxaasheguem na ihuaq da 'am seuaxan qataq 'am selaxachigui.

Jeremías 12:16

Cha'aye 'eesa da namayepi ỹapaxaguenec co'ollaxa na ỹalamaxat nhuo' le'ecpi da ỹanot da la'aqtac so Baal, qalaxaye nagui ishet da ỹalegoigui na ỹalamaxat nhuo' le'ecpi, da ỹoqta 'eesa da ỹaconeguet da la'amqaanataxanaxac na ỹalamaxat nhuo' le'ecpi, qataq da ỹan ca la'aqtac da ỹachegoxotchigui da ỹe'enaxat da, 'eeta': ‹Nca'altauec Ñim Nataxala'.›

Ezequiel 33:14

Qaq da saneguet ca l-leuaxa cam qauemaic, qaq camaye da ỹaxaañi cam qauem, nache ỹo'ot cam ỹaỹamaqchiguiñi qataq cam nalochiguiñi lataxac,

Éxodo 32:14

Nache Ñim Nataxala' nmooñi da layeloxo, nache ỹaxaañi da ỹauotaique nmatchiguiñi so lalamaxat nhuo' le'ecpi.

Ezequiel 33:12

'Am shiỹaxaua, qonapega na 'arhuo' le'ecpi, qoneta': Ca shiỹaxaua maye no'on da lataxac da huo'o ca lasouaxashet, nache camaye saishet da nca'alaxatec cam no'on maye ỹo'ot co'ollaxa. Qaq cam qauemaic da ỹaxaañi da ỹo'ottac cam qauem, nache cam qauem maye hua'auñi da ỹo'ot co'ollaxa, saishet da nacheca ca ỹo'ot da l-leuaxa camaye. Qaq cam shiỹaxaua maye no'on da lataxac, da huo'o ca lasouaxashet, qaq ca no'on maye hua'auñi da ỹo'ot co'ollaxa, saishet da nca'alaxatec.

Amós 5:15

¡Sa qauoñiiguet qome da qauem, nacherata da qauauochec da no'on! Qataq nam huañapi naxa da qanmit na nasouaxashetpi, nache qauo'oche qome da ỹaỹamaqchiguiñi lataxac, cha'aye Ñim Nataxala' maye Qaica ca Ỹaqalanapec, sa iuena'a da choche ichoxoren na lca'alaxaicpi Israel le'ecpi.