Jeremías 18:15 - La'aqtaqa Ñim Lo'onatac 'Enauacna 2013

¹⁵ Qalaxaye na ỹalamaxat nhuo' le'ecpi Aỹem icoua'ai, nache ỹaatacot na saq'en atamnaxala'pi na lchenaxanaxat maye ama na laita, Namayepi iqataqchet so nqa'aic, som nqa'aic maye togoshaapec, nache quetegueto naua saq 'amaqtaq nqa'aico maye saqaỹauatto'n.

Jeremías 18:15 Referans Kwoze

Jeremías 6:16

Ñim Nataxala' 'enapega nam lalamaxat nhuo' le'ecpi, 'eeta': «Qanachaachingui na nqa'aicpi, nache qaumeenaxañi qataq qaunataxañic nam togoshaapec ñecpi, ca hueta'ague cam no'on nqa'aic nache qoquiigue camaye yaqto' qauanachiỹa ca qanmataxaqui.» Qalaxaye namayepi, 'eeta': «Saishet, saishet da saỹamaxarenaq da qolaxague.»

Oseas 11:2

Qalaxaye co'ollaq ỹapac da seỹaxaatega, nache lamaxa nquictauec da aỹem ca'ai. Nache namayepi ỹaatacot ana lachetaqtaxanaqte nam saq 'en atamnaxala'pi, qataq ỹavigaxattac na lchenaxanaxat da ỹanot nam ne'enaqtacpi.

Jeremías 2:32

¿Aca qa'añole ishet peta'a da icoua'ai aca no'otaqtepi? ¿Qataq aca nauootac peta'a ishet da icoua'ai aca lapoto maye nauoxonaxaqui? Qalaxaye nam ỹalamaxat nhuo' le'ecpi mashe qaỹoqteguelo soua vi'iye da aỹem icoua'ai.»

Isaías 57:14

Qaq huaña nache qaỹa'axaỹa qome ca na'aqtac maye, 'eeta': «Qauaỹamaxachiiñi qome ca nqa'aic maye nalochiguiñi qanqacheeua'a na huetangui na nqa'aic maye nanaxattac na ỹalamaxat nhuo' le'ecpi.»

Malaquías 2:8

Qalaxaye qami', ntaxaỹaxanaxanecpi, qoquiỹa'ai co'ollaxa so no'on nqa'aic; nache dam qarapaxaguenataxanaxaqui qalota so huañi naqa'en. Qaq 'era da 'eetec da qami', qaulaxachiigui da ñaỹamaxataxac maye sami' co'ollaxa so Leví.

Jeremías 2:13

Nam ỹalamaxat nhuo' le'ecpi dos naua lasouaxashe'ete: Namayepi Aỹem ca'ai co'ollaxa maye aỹem 'etaxat maye nca'altauec, nache ỹo'ot ana maiche laquipiaxaquipi, nsherepi maye saishet da nllañi na 'etaxat.

Jeremías 17:13

'Am Nataxala', nache 'am da 'am hueto'ot da naquitaxac na Israel le'ecpi. Qaq 'enauac qome nam 'am ca'ai huo'o da la'agaxa. 'Enauac qome nam 'am ca'ai, namayepi deqat qome 'eeta'am ca nerec maye qoỹettalec ca namoxoỹaxa, souaxat da 'am ỹalat, 'Am maye qoneta'am ca atom mpa'axaatasheguem 'etaxat.

Jeremías 10:15

namayepi qaica ca naigui, nda'a't da qane'eetapigui, qaq Ñim Nataxala' qom ivita ca lhuaxanaxanaxac, nache ilaxachigui namayepi.

Isaías 41:29

¡Namayepi 'enauac da qaica ca naigui! Qaica ca ishet da ỹo'ot namayepi, namayepi choche atamnaxala'pi qalaxaye qui'itchigui.

Oseas 2:13

Qataq sauo'o ca nhuaxanaguec souaxat soua na'axa'te da ỹaatacot na ỹaqa'a atamnaxala'pi na lchenaxanaxat, qataq ỹaañi na no'otaxatpi, nchiguishaqtepi qataq ana lqolapi, nache ca'attague' na nquisheshaxauapi, nache aỹem icoua'ai. 'Era da ỹa'aqtac, Aỹem Nataxala'.

Jeremías 16:19

'Am Nataxala', maye 'Am ỹa'añaxac qataq aỹem 'ampaxattalec, qataq ỹe'eguenaxaqui da huo'o ye sevireguet lchec, 'am naỹa qome na ỹotta'a't shiỹaxauapi maye chegaqa'alo naua loga'te ana 'alhua, nache 'am 'enapega, 'eeta': «Nachenata nam saq 'en atamnaxala'pi maye qaca ca naigui qataq qaica ca la'añaxac da ỹaconeguet co'ollaxa som hua'au qarta'alpi da lalamaxat.»

Jeremías 13:25

Qaq 'era da 'aỹa'aguet 'am Israel, 'era da iuen da 'am so'otec. Qaq 'era da ỹa'aqtac Aỹem Nataxala'. Cha'aye Aỹem 'aucoua'ai, qataq 'aỹa'anot da 'ara'amaqtenaxanaxac nam saq 'en atamnaxala'pi.

Jeremías 3:21

Huo'o da qaỹa'aqtega na'alaxac chemaqtapeguelec aye lcomaraxalatepi maye qaica ca ñaxaalec. ¡Qaq nachena nam Israel le'ecpi, maye nỹeetagui qataq iỹaxaataique da qaichoxoren! cha'aye ca'ai som ỹaỹamaqchiguiñi nqa'aic, qataq aỹem icoua'ai Aỹem Nataxala' qataq Natamnaxala'.

Romanos 14:21

Qaq ỹoqo'oye 'onaxaic da saishet da qanallec na lapat qataq saishet da qanỹomgui na lataxa qataq saishet da qaỹo'ot ca camachaqca lỹa cam ishet da huañi naqa'en ca na'amqaanataxanaxaua.

Jeremías 44:25

Ñim Nataxala' maye Qaica ca Ỹaqalanapec, Ñim Natamnaxala' na Israel le'ecpi, 'eeta': Qami' qataq ana qarhuaipi dam qanasaqaiuec naxa, qaq damaye nache ipacchigui da qauo'ocheetac naxa. Qami' qoñiỹapec da mashe qaỹa'añi da qara'aqtaqui da qaỹa'añiỹot na qarchenaxanaxachi maye ama na laita, qataq na qarachetaqtaxanaxachi lataxa añi Nate'e na Piguem, qataq qoñiỹapec da ỹataqta qapaquiitelec qome dam qara'aqtaqui. ¡Qaq damaye ỹaỹamaqchiguiñi, qaupaquiitelec qome da qaỹa'añi qara'aqtaqui!

Jeremías 19:5

Qataq nataqa'en no'oxoosheguem ana lca'atoxonaxalatepi da yaqto' ỹavigaxat na llalaqpi da ỹanot so Baal, dam saishet co'ollaxa da samaxasoxoolec qataq saishet da choche shenapec, qataq saishet da tatapigui iuel.

Isaías 62:10

Qannoxoñeeuec, qannoxoñeeuec qauanaichiviiguilo naua laso'omi nam huaqta'a't nỹecpi, qauaỹamaxachiiñi ca llec nam ỹalamaxat nhuo' le'ecpi. Nalochiguiñi qanqa'eñi qataq qauasaqaiuec na coma'pi, qataq qaỹa'añiỹasheguem aca la'anaqte da qauỹaxañiỹa nam ỹotta'a't shiỹaxauapi.

Isaías 9:16

Cha'aye nam lataxala'pi ne'ena nhuo' le'ecpi nachena na isomaxanaqchet, qaq nam ca'attague' namayepi nache deqat.

Isaías 3:12

Qaq choxoraxaso' nam ỹalamaxat nhuo' le'ecpi, souaxat da ñaq ñaqpiolec ca sa iyacnapec qataq da 'alpi ca ilotague' qome namayepi. Qami' ỹalamaxat nhuo' le'ecpi, nam qarataxala'aipi qami' ỹatenache't nache qami' ỹauecta'alo so qauem nqa'aic.

Jeremías 2:19

Dam qauem maye 'auo'ottac nachera qome da 'am iuaxan, qataq da sa 'aualaq nachera da ỹo'ot qome ca 'anhuaxanaguec. Ñaq 'auennataxan qome yaqto' 'aula'a da ỹataqta qauem qataq chem da Aỹem 'aualat, qataq da saishet da huo'o 'anqa'en ca ỹa'amaqchec, Aỹem Nataxala' maye Aỹem 'Anatamnaxala'. Qaq 'era da ỹa'aqtac, Aỹem Nataxala' maye Qaica ca Seqalanapec.

Isaías 65:7

dam lalaataxanaxac namayepi qataq nam lalaataxanaxacpi som lta'alpi. Somayepi ỹavigaxat naxa na lchenaxanaxat da huaña ana qasoxonaxapi qataq aỹem inogoqchettac da huaña ana lcomaraxalatepi. Qaq ỹoqo'oye Aỹem Nataxala' shenapec da seque'emaqchet qome namayepi da lasheue ñaqa'en nam ỹo'otpi co'ollaxa.

Jeremías 7:9

Nache qaucacheetac, qaualaataxañiitac, qataq qancacheetague' ana sa qarhuai, qataq qaỹa'añiitac nam saq'en qara'aqtaqui qataq qaỹa'añiitacot ñi Baal nam qarchenaxanaxache maye ama na laita, qataq qavio'oxoreñiitac nam atamnaxala'pi maye saishet da qauauattoñi,

Jeremías 18:14

¿Peta'a huo'o ca huaña co'ollaxa da quiguiñi ana aloñi maye huetalec ana qaỹoqotcheguemecpi coma'pi ye Líbano? ¿Ishet peta'a da deqaxaỹañi nam atom 'etaxat maye chegaqasheguema ana qasoxonaxapi?

Jeremías 51:18

namayepi qaica ca naigui, qataq 'enaxaqui, Ñim Nataxala' qom ivita da nmit, 'enauacna nache ilaxachigui namayepi.

Ezequiel 21:15

Qaq camaye ỹataqta nlaxatchigui naqa'en da lcolanaxa namayepi, qataq ỹataqta qalota qome ca lalaatacpi. 'Enauac na lma'pi namayepi, sanaña ca ỹeelonec maye laataxanaxaic. Cam ỹeelonec maye qaiqashelgaqchet da yaqto' chegaqaigui ca nqashelgaxa, qataq ỹaxaraic da yaqto' dalaataxan.

Ezequiel 36:15

Qataq saishet qome da qaltaq qaua'aqaitega ca lsheunaxanaxac na ỹotta'a't shiỹaxauapi maye chegaqauec, qataq saishet da qami' denotegalo ne'ena nhuo' le'ecpi, cha'aye qami' saishet da ỹe'eguelaxa da qaica qanqa'eñi ca llalaqpi na nhuo' maye qami' netaleguete. Qaq 'era da ỹa'aqtac Aỹem Nataxala'.»

Oseas 2:6

Qaq ỹoqo'oye sapogui qome nam llecpi sauota'a ana ỹaxat, qataq sauo'o ca npaqtaxanaxat da sapoua'a, yaqto' saishet da ỹanata nam llecpi.

Deuteronómio 32:21

Namayepi ichoxoteua'a da seca'alaxan souaxat na atamnaxala'pi maye saq'en, qataq aỹem ỹayeloqchet souaxat na natamnaxala'pi, ¡qalaxaye aỹem nataqa'en sanem qome namayepi da deca'alaxana ca ỹaqa'a shiỹaxauapi, qataq denoỹa ñaqa'en ca shiỹaxauapi maye qaica ca ỹaỹaanapec!

Nehemías 9:17

Nache saishet da 'am na'axaỹaxana, qataq saishet da ntoueeta'ac so qaica ca 'ena'am da llo'oxoyec, maye 'auo'otec somayepi. Nache ỹataqta 'am saỹalaxaguet, ivitta'a da ỹauo'o so ỹaneuo lataxala' da yaqto' ỹe'eguelaxata da nlataguec somayepi ye Egipto. Qalaxaye 'am saishet da 'aualat co'ollaxa somayepi, cha'aye 'am Atamnaxala', 'am choxonnataxanaxaic, qataq sa da'angui añi 'arquiyaqte, qataq qaỹoqchiguinguit da 'aralemataic, cha'aye ỹataqta lta'araic da 'arauotaxanaqtaic.

Jeremías 1:16

Qaq 'era da nhuaxanaguec maye saneguet qome nam 'etaxaloxoicpi maye aỹem ca'ai co'ollaxa, maye ỹavigaxat naxa na lchenaxanaxat da ỹo'oxoreetac na chegaqauec atamnaxala'pi maye namayepi maiche lo'onatacpi.

Jeremías 11:12

Qaq huaña, nache na shiỹaxauapi ye Judá, qataq na netaña ye Jerusalén, nqo'ona qome da iỹaxanot ca ntaunaguec nam natamnaxala'pi maye ỹaatacot naxa na lchenaxanaxat, qalaxaye ne'ena atamnaxala'pi saishet qome da nca'alaxatec namayepi, qom nvi' que'eca qauem.

Jeremías 11:13

Ye Judá, ỹataqta qalota na natamnaxala'pi, 'eeta'am nam huaqta'a't nỹecpi maye ỹotta'a't naua nañalo, qataq na netaña ye Jerusalén qalota ana nauaxaỹaxaasheguem lca'atoxonaxalatepi maye 'eeta'am ye lcata na nqa'aicpi, da yaqto' ỹanot na lchenaxanaxat so Baal.

Jeremías 11:17

Ñim Nataxala' maye Qaica ca Ỹaqalanapec ñim 'am ỹaañi co'ollaxa, 'am namaxa so qauem, da 'am talec souaxat nam qauem maye ỹo'ot na Israel qataq ye Judá, cha'aye inogoqche't souaxat da ỹaatracot na lchenaxanaxat so Baal.