Jeremías 17:4 - La'aqtaqa Ñim Lo'onatac 'Enauacna 2013

⁴ Qaq 'am qoca'ai qome nam 'alhua maye 'am sanem co'ollaxa da 'aralamaxat, nache so'ot da 'am l-lata na 'ampa'aguenaxauapi, da qoueta'a cam 'alhua maye saishet da 'auauana, cha'aye da ỹayeloxo 'eroigui, 'eeta'am ca norec da 'am ỹavigaxatta qome.»

Jeremías 17:4 Referans Kwoze

Jeremías 15:14

Aỹem so'ot qome da 'am l-latac na 'ampa'aguenaxauapi da huaña cam 'alhua maye saishet da 'auauana co'ollaxa, cha'aye da ỹayeloxo mashe 'eroigui 'eeta'am ca norec da 'am ỹavigaxatta qome.»

Lamentaciones 5:2

'Enauac nam qaralamaxat co'ollaxa nagui hueto'ot na chegaqauec shiỹaxauapi, qataq na qarma'pi co'ollaxa, nagui netaigui na chegaqauecpi.

Jeremías 7:20

Qaq ỹoqo'oye Aỹem Nataxala', ỹataqta 'eesa qome da secorelec da inogoxonaxac ne'ena nma' qataq nam shiỹaxauapi, qataq nataqa'en na shiguiỹacpi, qataq na qo'oipaqpi maye huetauga na no'onaxa, qataq ana ala na nañiguishec. Qaq 'eeta'am qome ca norec maye saishet da 'om.»

Isaías 5:25

Qaq ỹoqo'oye Ñim Nataxala' dalemataỹa na lalamaxat nhuo' le'ecpi souaxat de'era, nache nauaxaỹaxaasheguem qome na lhuaq da yaqto' iuaxan namayepi. Qaq ana qasoxonaxapi qalaq cholaxan qome qaq na leuaxaicpi qalaq 'eeta'am ca lasogoñi da huetaiya' huetangui na nqa'aicpi. Qalaxaye da layeloxo Ñim Nataxala' saishet qome da vi'iiguet, nache queto'ot da lasauaqtaxanaxac.

Jeremías 16:13

Qaq ỹoqo'oye qami' ñeqateeguesopa qome ne'ena 'alhua, nache qami' samaxalo cam 'alhua maye qami' qataq so hua'au qarta'ailpi saishet co'ollaxa da qauauañiỹa, qaq huaña nache ye na'a'q qataq ye pe qauo'onataxañiitacot cam laỹepi atamnaxala'pi, cha'aye aỹem saishet da qami' sechoxore'n qome.

Isaías 14:3

Qami' Israel le'ecpi, qom ivita ca na'a'q da Ñim Nataxala' qami' nmataxaneguesopa da qanque'eenaxaqui, dam qaraquicoqoi qataq da ỹataqta qauem qanlataguiiqui maye qami' qoỹanegueta co'ollaxa,

Ezequiel 21:31

Aỹem 'am sematalec qome da ỹayeloxo, 'eeta'am ca chaqaic norec, qataq 'am saneguet da lhuaqỹaxac na shiỹaxauapi maye qauemaicpi, qataq sanqalat da huo'o na ilaxachigui.

Lamentaciones 1:12

¡Qami' maye qoquiitague' na nqa'aic, ña qavia'axañeeguet da qarqueuoxoqui nache qauenntaxañeelec, da huo'otaq huo'o ca qui'ic da 'eeta'am dam ñequi'ic, maye ỹauo'o da ỹataqta lta'araic ñeque'eenaxac! ¡Ñim Nataxala' co'ollaq 'eroigui da nnogoxonaxac nache aỹem namaxa de'era ñeque'eenaxac!

Jeremías 12:7

«Aỹem sheca'ai co'ollaxa na ỹalamaxat nhuo' le'ecpi, qataq so'otan nam ỹalamaxat co'ollaxa. Nache saneguet da lhuaqỹaxac nam mpa'aguenaxauapi, nam nhuo' le'ecpi maye ỹauotaxat co'ollaxa.

Jeremías 5:29

¿Qaq saishet peta'a da sauo'o ca nhuaxanaguec souaxat de'era? Cam nhuo' le'ecpi da 'eetec de'era, ¿Peta'a saishet da sanem cam naigui nam ỹo'otpi? Qaq 'era da la'aqtac Ñim Nataxala'.

Isaías 66:24

Qaq qom anac namayepi nache ilalec na shiỹaxauapi leuaxaicpi, nam shiỹaxauapi maye Aỹem dataỹa'aguet co'ollaxa. Qaq saishet qome da ileu nam qoche'lpi maye chec qome namayepi, qataq saishet qome da 'om cam norec maye ỹavigaxat namayepi. ¡Nache 'enauac qome na shiỹaxauapi da deqaiga namayepi!»

Isaías 30:33

Qaq cha'aye mashe qaỹoqteguelo soua vi'iye da qaiqataxaatai' da taỹa'a qanqa'en ye Asiria qataq ñim nta'a yemaye, yem ỹataqta qaỹoqchiguingui qataq qalochiguiñi nma' maye huetangui ye 'ettangui norec maye qalota na lalonaxat qo'oipaqpi. Ñim Nataxala' qom iquetetec la la'at nache 'eeta'am ca la'auaxac na quiquiaxaraic da 'eroigui nache ỹavigaxat yemaye.

Nehemías 9:28

Qalaxaye naxa da huo'o da l-lagaxayec, nache qaltaq ỹe'eguelaxalec da ỹo'ot na qauem maye sa 'auaỹamaxaren, huaña qataq 'aỹa'aneguet so npa'aguenaxauapi da yaqto' loxonec somayepi. Qalaxaye da qaltaq 'am iỹaxanot naxa, nache 'am maye qoneto'ot na piguem, 'auchoxoren somayepi nache 'aua'axaỹa, nache qaltaq 'anca'alaxatec.

2 Reyes 25:21

Qaq nache huaña ye Ribla da so nta'a ye Babilonia, damaxasoxoolec da qaỹalauat somayepi. Qaq 'era da 'eetec co'ollaxa da so Judá le'ecpi qaỹauega ye ỹataqta qaỹoqta ye maiche na'alhua somayepi.

1 Reyes 9:7

nache Aỹem, ñeqateeguesop qome na Israel le'ecpi ne'ena 'alhua maye sanem co'ollaxa. Qaq ana'ana atamnaxaqui maye seỹotauga co'ollaxa da yaqto' hueta'a da ỹe'enaxat, qalaq sheca'ai qome, huaña nache na ỹotta'a't shiỹaxauapi ne'eetapigui qome na Israel le'ecpi.

Deuteronómio 28:25

Qataq 'am loxonec naqa'en qome ca 'ampa'aguenaxauapi, na'aictaxa da qanaloichiguiñi da qanqo'oñiỹa da qanalaache' camayepi, qalaxaye qanlagaxacheetac qome da qauataiueeguesop camayepi. Nache 'enauac na ỹotta'a't shiỹaxauapi 'am ỹe'enai' qome.

Jeremías 2:14

So Israel saishet da nlatac, somaye saishet da ñiguiñi co'ollaxa da yaqto' nlatac. Qaq ¿ta'ainco' qone' da qanhuotta?

Jeremías 18:23

Qalaxaye 'am Nataxala', 'auaỹaten 'enauac nam lapaxañipi namayepi da yaqto' aỹem ỹalauat. ¡Qaq saishet qome da 'auchoxoreetac souaxat nam qauem maye ỹo'ot, qataq saishet da 'aucoua'ai na lasouaxashetpi! ¡Qaq huañi qome 'anqa'en namayepi, qataq 'auauo'o ca nhuaxanaguec 'aurolec da 'arayeloxo!

Jeremías 21:12

Qataq 'auqata nam chegoxoguet so David da Ñim Nataxala' 'eeta' da la'aqtac: Qauo'oche qome 'enauaque naua na'axa'te ca nalochiguiñi lataxac, qataq qausoiuec nam qarcoñeteguishequi, cha'aye da saiuena'a da souaxat da qauem qaro'onataxanaxaqui, nache 'eroigui da ỹalemataic 'eeta'am ca norec, qataq nalaqaasheguem, nache qaica ca ishet da ỹalamat.

Jeremías 22:28

Ñim Jeconías, ¿peta'a 'eeta'am aca naco'oña poxoỹaxai maye qaica ca naigui, huo'otaq cam nogoxoshet maye qaica ca nqopittega? ¿Ta'ainco' da ñimaye qataq nam llalaqpi da qaỹo'ora'a ca 'alhua maye saqaỹauana?

Isaías 50:11

Qalaxaye qami' maye qaualoñi naxa na norec, qataq qauauo'oi ana qarcoỹaraxanaqche 'ettaigui, qataq qoquiitaigui na le'eraxa namaye qataq nam le'eraxa ana qarcoỹaraxanaqche. Qaq 'era qome da qami' taleguete ñaqa'en, nache qoviitangui qome da lta'araic qanque'eenaxaqui.

Jeremías 5:19

Qaq namayepi qom 'am inat, da 'eeta': ¿Ta'ainco' da qomi' ỹo'oteque 'enauac de'era Ñim Nataxala' maye Qanatamnaxala'?, qaq 'am qonapec qome: ‹Qaq cha'aye dam 'eetec da qoquiỹa'ai Ñim Nataxala' nache qauo'onataxañiitacot nam atamnaxala'pi maye chegaqauec da huaña na maiche qana'alhuai, qaq nache 'eetec nataqa'en da qauo'onataxañiỹot qome nam shiỹaxauapi maye chegaqauec da huaña ca ỹaqa'a 'alhua.›»

Ezequiel 7:24

Cha'aye Aỹem so'ot qome da anac ca shiỹaxauapi qauemaicpi, nache mpaxaalec da ỹacona na nma'pi ne'ena huaqta'a't nỹecpi. Qaq nache tachiguiña ñaqa'en qome da ño'oxonnaxac na 'añaxaicpi, qataq so'ot qome da qanshepaxanaqchet nam natamnaqa'pi namayepi.