Jeremías 13:22 - La'aqtaqa Ñim Lo'onatac 'Enauacna 2013

²² Qaq da 'aunataxan da ta'ainco' da 'am talec de'era, qaq iuen da 'auaỹateeta da souaxat dam ỹataqta lta'araic 'arasouaxashet, ¡ỹoqo'oye 'am qansogoñi, qataq 'am qaỹe'en!

Jeremías 13:22 Referans Kwoze

Nahúm 3:5

Qaq Ñim Nataxala' maye Qaica ca Ỹaqalanapec, 'eeta': Aỹem soota'a ne'ena da 'am sataỹa'aguet, nache aỹem ñauatsheguem qome ana 'arpoto, nache seviraxatasheguema na 'arashec, yaqto' na ỹotta'a't shiỹaxauapi ỹauaachigui qom qouetauec, qataq nam nta'alpi ỹauaachigui qome da 'ara'agaxa.

Jeremías 5:19

Qaq namayepi qom 'am inat, da 'eeta': ¿Ta'ainco' da qomi' ỹo'oteque 'enauac de'era Ñim Nataxala' maye Qanatamnaxala'?, qaq 'am qonapec qome: ‹Qaq cha'aye dam 'eetec da qoquiỹa'ai Ñim Nataxala' nache qauo'onataxañiitacot nam atamnaxala'pi maye chegaqauec da huaña na maiche qana'alhuai, qaq nache 'eetec nataqa'en da qauo'onataxañiỹot qome nam shiỹaxauapi maye chegaqauec da huaña ca ỹaqa'a 'alhua.›»

Oseas 2:10

Qataq na nquisheshaxauapi ỹauaachigui qome ñaqa'en da aloic asomaye. ¡Nache qaica ca nca'alaxateeguesop da ihuaqỹaxac!

Lamentaciones 1:8

Ye Jerusalén ỹataqta qalota na lasouaxashetpi, qaq nachera da huo'omshe ivira'a da qane'eetapigui. Nam ỹo'oxoreetac co'ollaxa yemaye qaq nagui qalaq ne'eetapigui, souaxat da ỹauaachigui yemaye da qailaxachigui. Qaq ỹoqo'oye nagui nỹeetac, qataq souaxat da la'agaxa nache saỹachaxan na lashec.

Jeremías 13:26

Qaq Aỹem nataqa'en ỹataqta 'am ñesochiguiñi qome yaqto' 'am talec da lta'araic 'ara'agaxa.

Deuteronómio 7:17

Cha'aye sa iuena'a da qoñiita' da qarhuennataqai: «Ne'ena shiỹaxauapi ỹataqta qomi' napacaleguete ye lcata, ¿Qaq chaq shenaqteco' da so'oraqauec namayepi?»

Isaías 3:17

Ñim Nataxala' ỹo'otec qome da qui'it na lqaic anamayepi, qataq ỹachaxan qome da huetauec anamayepi.»

Sofonías 1:12

Qaq que'eca na'a'q qalaq sacona qome aca ncoỹaraxanaxaqui nache ñemit ye Jerusalén. Huaña nache sauo'o ca nhuaxanaguec nam shiỹaxauapi maye ỹe'emaqtac 'eeta'am na lataxa da qaica ca ldaxac, qataq 'enapec naxa: Ñim Nataxala' saishet da ỹo'ot ca no'on qalaxaye nataqa'en, saishet da ỹo'ot ca qauem.

Oseas 12:8

Qaq na Efraín, qalaq 'eeta': ¡Aỹem ỹataqta aỹem sallaxanec, ỹataqta qalota ana llaỹoñiguishe aỹom! ¡Qalaxaye qaica ca ishet da anac da ỹauo'o ca ỹasouaxashet, da 'eetega sachegoxotaigui da icachaxac de'era isallaxa!

Oseas 2:3

Cha'aye da saishet da ỹaxaañi de'era, nache so'orauec qome, qataq saleeta'ague ñaqa'en 'eeta'am so na'a'q co'ollaq ñiguiñi. Huaña nache 'eeta'am ñaqa'en ca toolec 'alhua, qataq ca deqaqta 'alhua, huaña nache ilem ñaqa'en na laquip.

Isaías 47:8

Qaq ña 'ana'axaỹaxana nagui de'era, 'am 'alo maye 'arqopitaxat da nyacỹaxac qataq 'avi'imaqtac da 'anso'ootangui añi 'anso'onaxaqui, ye pa'auo 'arhuennataxac qalaq, 'eeta': «Aỹem nachaqaỹemta nache qaca aca lỹa sheeta'am, qaq saishet qome da sevira da aỹem pa'ai, qataq saishet da saqca ca ỹalec.»

Isaías 20:4

Qaq nache 'eetec qome ñi nta'a ye Asiria da loxonec ye Egipto le'ecpi qataq ye Etiopía le'ecpi nache ỹauec da icoñi', na ỹa'axaiquipi qataq na nsoxoppi, nache huetauec qome qataq qaicaua caua lapela'ate naqa'en, qataq chetaleguete naua nate' laỹel da yaqto' nlaxagui da lcoxo.

Deuteronómio 18:21

Qaq sa iuena'a da 'eeta' ca qarhuennataqai: ‹¿Ca 'eeteco' da ishet da saỹaanaq ca qaỹa'axattac da saishet da la'aqtac Ñim Nataxala'?›

Deuteronómio 8:17

Qataq saishet qome da qarhuennataqai, da 'eeta': «'Enauac de'era qarsallaxa damaye chegaqaigui da qaro'onataxanaxac, qataq da la'añaxac naua qarhuaxaye.»

Jeremías 14:16

Qaq na shiỹaxauapi maye ỹa'axattapeguem de'era, nataqa'en ileuaigui qome ca alaataxac qataq ca nqouaxa, l-llañe' ana lhuapi, qataq na llalaqpi ỹalleppi qataq ana llalepi. Nache da lo'ocỹaxac qaỹasaxauga qome na nqa'aicpi ye Jerusalén, nache qaica qome ca ilayiñi. Qaq 'era da 'eetec da isheeten ñaqa'en nam qauem maye ỹo'otpi.

Ezequiel 23:26

Qataq nqat ana 'arpoto, qataq ỹacona ana 'ano'otaqtepi.

Oseas 2:5

Cha'aye quisheguetaxai aso late'e, nache iqataqchet da llo'oxoyec, souaxat da 'enapec: Aỹem, seca'ategue qome na iquisheguetaxauapi maye ỹo'ot na anoq, ỹaquip, qataq aỹem ỹanem na no'oxonecpi, lino, qataq na coraxatpi, qataq nam ỹotta'a't qanỹomiguipi.