Génesis 8:20 - La'aqtaqa Ñim Lo'onatac 'Enauacna 2013

²⁰ Qaq ime co'ollaxa, nache so Noé ỹo'ot aso lca'atoxonaxalate, da yaqto' ỹo'oxoren Ñim Nataxala', nache ỹaconeua'a so shiguiỹacpi qataq so maỹopi maye qui'itta, ỹacootaua'a ñi 'oonolec se'eso ỹotta'a'tpi, nache ỹavigaxat ỹauo'o lachetaqtaxanaqte da ỹanot Ñim Nataxala'.

Génesis 8:20 Referans Kwoze

Romanos 12:1

Qaq ỹoqo'oye qami' ỹaqaỹarolqa, souaxat da lta'araic lqouagaxanaqtaic Ñim Lo'onatac 'Enauacna maye qami' ỹaaleguete, nache qami' ñachoxoreetoiguilo da ỹataqta imauec da qanachaalataxaqui da qaỹa'añiỹot da qauo'onataxañiỹot qataq qauo'oche cam ỹaỹamaxareeta Ñimaye. Qaq 'era qome da lataxac da qayo'oxonnataxanaxaqui.

Génesis 22:9

Qaq co'ollaq ivitra som 'alhua maye ỹecapiguiña Ñim Lo'onatac 'Enauacna, nache so Abraham, ỹo'ot aso lca'atoxonaxalate, qataq ỹachalec asomaye so qo'oipaqpi. Qaq ime, nache ỹauo'o so lquet da icoñera't naua lhuaxaye qataq naua lapia'ate so llalec Isaac, nache ỹasaxalec aso lca'atoxonaxalate, ỹachalec so qo'oipaqpi.

1 Pedro 2:9

Qalaxaye qami' qaualliquiitaigui na llalaqpi Ñim Lo'onatac 'Enauacna; qami' ltaxaỹaxanaxanaqa na shiỹaxauapi da qauo'onataxañiitacot Ñim Nta'a; qataq qami' lalamaqa'ate. Qaq de'era chegoqchigui Ñim Lo'onatac 'Enauacna co'ollaq qami' nqateeguesopa na napalaxa maye nachera da ñe'etaxaloxo, nache qami' inoxonaqcheteua'alo da yo'oqchiguiñi maye qaica ca 'ena'am da lyac. Qaq ỹoqo'oye qaua'axache da llo'oxoyec Ñim Lo'onatac 'Enauacna maye qami' ỹo'oteque.

Hebreos 13:10

Som ntaxaỹaxanaxanecpi da qaitaxaỹapegue' Ñim Lo'onatac 'Enauacna maye hueta'a co'ollaxa aso togoshe no'onaxanaxaqui da qaỹo'oxoren Ñimaye, somayepi saishet da qaỹashenem da chec nam huetalec añi qarca'atoxonaxalate.

Éxodo 10:25

Qalaxaye so Moisés 'enapeco': «'A'i, 'am qome qomi' 'aỹa'anema ca shiguiỹacpi, da yaqto' savigaxataq da sauoqo'o qarachetaqtaxanaqte da sanaqot Ñim Nataxala' maye Qanatamnaxala'.

Génesis 35:7

Qaq huaña yemaye, nache ỹo'ot aso lca'atoxonaxalate, nache yi'iye 'alhua ỹanagui da le'enaxat El Betel, cha'aye co'ollaq 'ettapeguem so lqaỹa, nache Ñim Lo'onatac 'Enauacna, nachaxana somaye co'ollaq huaña yi'iye 'alhua.

Génesis 35:1

Qaq Ñim Lo'onatac 'Enauacna 'enapega so Jacob, 'eeta': «'Anaỹamaxat qome, da yaqto' 'anqo'ona ye Betel nache qonaña yemaye. Qaq huaña qome yemaye, nache 'auo'ot aca 'arca'atoxonaxalate da lalamaqte Ñim Lo'onatac 'Enauacna, Ñim 'am nachaxana co'ollaq 'ettapeguem so 'arqaỹa Esaú.»

Génesis 33:20

Ime, qaq ỹo'ot aso lca'atoxonaxalate, nache ỹanagui da le'enaxat: Ñim Lo'onatac 'Enauacna, nacheñi Ñim Natamnaxala' na Israel.

Génesis 26:25

Qaq huaña, nache so Isaac, ỹo'ot aso lca'atoxonaxalate, nache iỹaxana da le'enaxat Ñim Nataxala'. Qaq somaye nache nalec se'eso 'alhua, nache som lamaxashecpi, nshe' aso ñi'illoxoqui.

Génesis 13:18

Qaq huaña nache so Abram nqat so lpe'l, nache jec da naña yem saqaỹapeque so huaqta'a't nỹecpi ye Hebrón, yem huaña aso qo'oipaqpi le'enaxat encina, maye lalamaxat som ỹale le'enaxat Mamre. Qaq huaña yemaye nache no'oxoosheguem aso lca'atoxonaxalate da yaqto' ỹo'oxoren Ñim Nataxala'.

Génesis 13:4

Qaq nacheye yem huaña co'ollaxa da no'oxoosheguem aso lca'atoxonaxalate, nache huaña da iỹaxanot Ñim Nataxala'.

Génesis 7:2

Qataq 'auaconeua'alo qome caua siete nauaxaỹaxau', ỹale qataq 'alo 'enauac na shiguiỹacpi maye qui'itta. Qalaxaye 'oonolec ca ỹale qataq 'oonole aca 'alo nam shiguiỹacpi maye saishet da qui'itta.

Génesis 4:4

Qaq nataqa'en so Abel ndoua'a Ñim Nataxala' so ỹataqta 'onaxaic la'auaxanec llalaqpi aso lalo qaguetapi. Qaq Ñim Nataxala' ỹataqta ỹamaateguet so Abel, qataq aso lachetaqtaxanaqte,

Génesis 22:2

Nache Ñim Lo'onatac 'Enauacna, 'enapego' somaye, 'eeta': «'Auacona qome ñi Isaac ñim 'oonolec 'aỹa'alec, ñim ỹataqta 'arauotaxat. Nache 'anqo'ona ye 'alhua Moriah. Qaq qom 'avita yemaye, nache 'auavigaxat aca 'arachetaqtaxanaqte da Aỹem 'aỹa'anot, huaña 'anqa'en aca qasoxonaxa maye 'am sachaxana qome.»

Génesis 8:19

Qaq nataqa'en huenotec 'enauac so shiguiỹacpi nlopi, qataq so huauecpi, qataq som hualectapigui'pi, qataq so huaỹotacpi.

Da na'aqtaguec so Job 1:5

Qaq naxa da ime' soua na'axa'te da nquia'axac, nache so Job iỹaxaneuga so llalaqpi, qataq no'ottasheguem ye nte'etom, nache ỹo'ot ana lachetaqtaxanaqte qaỹavigaxatta ñi 'oonolec somayepi, da yaqto' qaỹapalaxat na lasouaxashetpi. Qaq de'era nache 'eetai' naxa da 'eeta'ac so Job, souaxat da lhuennataxac da saiuena'a da huo'o ca 'oonolec somayepi da lquiyaqteỹaxac isheueetac Ñim Lo'onatac 'Enauacna.

Génesis 7:3

Qataq nataqa'en 'auaconeua'alo caua siete nauaxaỹaxau' nam ỹotta'a't maỹopi, yaqto' nache 'eetai' saishet da daqat da lataxac da netalec ana 'alhua.

Éxodo 29:18

Qaq 'enauac camaye 'auavigaxat, 'auachalec aca nca'atoxonaxalate da nachetaqtaxanaxat maye qaỹavigaxatta, yaqto' da ama laitaỹaxac ỹamaateguet Ñim Nataxala'.

Éxodo 29:25

Qaq da ime da ỹaayeshegue'm, nache 'auavigaxat, 'auachalec aca nca'atoxonaxalate, qataq lỹateuaq ca nachetaqtaxanaxat maye qaỹavigaxatta, yaqto' da ama laitaỹaxac ỹamaateguet Ñim Nataxala'.

Números 7:21

qataq so 'oonolec huaca llalec, 'oonolec peenaq, qataq so 'oonolec qagueta llalec, maye ivi' 'oonolec vi'i, da yaqto' nachetaqtaxanaxat qaỹavigaxatta,