Génesis 3:24 - La'aqtaqa Ñim Lo'onatac 'Enauacna 2013

²⁴ Qaq co'ollaq ime da ỹo'orauec so shiỹaxaua, nache da pa'aigui da nala' lliguisheguem yem nanaxanaqa' maye huaigui ye Edén, ỹanaleguete soua huo'o da lca'alaqa' maye huo'oi naua laua't, qataq som ỹeelonec 'ettaigui maye coleetagui, da yaqto' saishet da huo'o ca ivireua'a aso qo'oipaq, maye chegaqaigui da nca'alaxa.

Génesis 3:24 Referans Kwoze

Hebreos 1:7

Qaq naxa Ñim Lo'onatac 'Enauacna da detaxaỹa nam lamaxashecpi piguem le'ecpi, qalaq 'eeta': «Na ỹamaxashecpi piguem le'ecpi, nachena na la'at, qaq na ỹo'onataxanaxanecpi, nachena na nqashelgaxa.»

Salmos 104:4

Nam la'at nachena na 'ara'aqtaxanaxanecpi qataq na le'eraxa na norec nachena na 'aramaxashecpi.

Juan 14:6

Nache So Jesús 'enapega somaye, 'eeta': –Aỹem Nachaỹem nqa'aic, qataq Nachaỹem 'eesa lataxac, qataq Nachaỹem nca'alaxa. Qaica ca lỹa ñegueuo da qainoxoneua'a Ñim Ita'a, Nachaqaỹemta.

Salmos 99:1

Ñim Nataxala' nacheñi ñi Nta'a, añi nso'onaxaqui Ñimaye netanguilo soua ne'enaqtaqa le'enaxa't querubines, qaq na ỹotta'a't shiỹaxauapi ỹataqta iviloxol, qataq ana 'alhua ỹataqta cholaxan qome.

Salmos 80:1

'Am, maye 'aulotague' na Israel le'ecpi, maye 'auauecta'aguet co'ollaxa so José 'eeta'am 'anqa'en ana qagueta. 'Am maye ca 'aro'onataxanaqa' da 'am nta'a, nache hueta'alo soua ne'enaqtaqa querubines maye huo'oi naua laua't, ñaq qomi' 'aua'axaỹalo qataq qomi' 'auachaxanalo da 'ara'añaxac,

1 Samuel 4:4

Huaña nache so Israel le'ecpi huo'oi soua ỹamaxalo ye Silo da yaqto' ndoi' aso arca maye laỹe' da naỹamaxataxac Ñim Nataxala' maye Qaica ca Ỹaqalanapec, maye netanguilo soua dos ne'enaqtaqa maye huo'oi na laua't. Qaq so Jofní qataq so Finés som dos llalqa so Elí, nache pa'atra'agueta da ilotrague' asa'aso arca maye laỹe' da naỹamaxataxac Ñim Lo'onatac 'Enauacna.

Josué 5:13

Huo'o so na'a'q, nache so Josué hueta'a ye sa qaỹapeque ye Jericó, nache co'ollaq namatasheguem, nache ila'a so ỹale nachattañi, nasoqta'a so lainec, nache so Josué nquicot somaye nache inat, 'eeta': «¿Peta'a maiche 'am qarỹa, qalqo' 'am qampa'aguenaxaua?»

Números 22:23

Qaq aso 'ashena co'ollaq ila'a so lamaxashec piguem le'ec Ñim Nataxala', da netangui so nqa'aic, nasoqta'a so lainec, nache huaỹoxouec da yaqto' tauga so no'onaxa. Qalaxaye so Balaam ỹataqta iuaxaatalec aso lalo da yaqto' ỹe'eguelaxa naqa'en so nqa'aic.

Éxodo 25:2

«Qonapega qome na Israel le'ecpi da Aỹem ndoua'a aca lachetaqtaxanaqte. Qalaxaye saishet da 'auamaqalec nachaqrata da ñi 'oonolec maiche lhuennataxac, qataq lquiyaqteỹaxac da ndouo aca lachetaqtaxanaqte.

Génesis 3:23

Qaq ỹoqo'oye Ñim Lo'onatac 'Enauacna maye Nataxala', ỹo'orauec so shiỹaxaua, ca'ai naqa'en so nanaxanaqa' maye huaigui ye 'alhua Edén, nache ỹamaxalec da ỹo'ot na 'alhua, maye maiche chegaqaigui co'ollaxa.

Génesis 4:1

Qaq so ỹale hue'eguet co'ollaxa aso lhua Eva, nache asomaye hualaxai, nache huo'o so llalec le'enaxat Caín. Nache 'enapeco': «Mashe huo'o na ỹalec ỹale. Ñim Nataxala' aỹem ỹanem.»

Génesis 4:14

Nagui aỹem 'auo'orauec da sheca'ai ne'ena 'alhua, qaq chochaq tatec qome da secoleeteguelec ana 'alhua qaica ca ñemataxac, nache qaỹoqtaique da qoneta. Qaq da nache 'eetec de'era, nache camachaqca ca aỹem natenalec, nache aỹem ỹalauat.»

Ezequiel 10:1

Qaq ime nache sela'a na pa'asheguem som 'eco' 'eeta'am na lapoxot maye nalotcheguema naua lqaigo soua huo'oi naua laua't, da huo'o so netalec 'eeta'am aca so'onaxaqui maye chegaqaigui na coma' zafiro.

Ezequiel 31:11

Qaq ỹoqo'oye Aỹem sheca'ai, nache saneguet qome da la'añaxac cam chegaqauec nataxala', nache camaye ỹo'ot qome ca nhuaxanaguec ipacchigui naqa'en nam qauem maye ỹo'otpi co'ollaxa.