Génesis 22:12 - La'aqtaqa Ñim Lo'onatac 'Enauacna 2013

¹² Nache so namaxashec piguem le'ec, 'enapega somaye, 'eeta': «Saishet qome da huo'o ca qona'ac na nogotolec, cha'aye mashe saỹaten da 'am ỹataqta huo'o naq 'enec 'anqa'en Ñim Lo'onatac 'Enauacna, cha'aye qaica ca 'ectega da aỹem 'aỹa'anot na 'oonolec 'aỹa'alec.»

Génesis 22:12 Referans Kwoze

Santiago 2:18

Qaq nam 'eetega da ỹalaxaguet Ñim Lo'onatac 'Enauacna qalaxaye saishet da ỹo'ot ca ỹaỹamaqchiguiñi, aỹem ishet da shenapega namayepi, sheeta': «'Am, qonetega da 'aualaxaguet Ñim Lo'onatac 'Enauacna, aỹem qalaxaye so'ot ca ỹaỹamaqchiguiñi. Ñaq aỹem 'auachaxana cam ỹa'axat da 'aualaxaguet Ñim Lo'onatac 'Enauacna, qaq aỹem qalaq 'am sachaxana da salaxaguet Ñimaye chegoqchigui dam ỹaỹamaqchiguiñi maye so'ot.

1 Samuel 15:22

Huaña nache so Samuel, 'enapeco': «Ñim Nataxala' ỹataqta ỹactec da ỹaỹamaxareeta da qaỹalaxaguet, saq 'ena'am da qoỹanot aca nachetaqtaxanaqte qaỹavigaxatta qataq 'onaxaic naqa'en da qaỹalaxalec qataq da qailoolec ca 'enapec Ñimaye saq 'ena'am da qoỹanot aca nachetaqtaxanaqte huo'otaq da qaỹavigaxat na lcheta ca qagueta.

Romanos 8:32

Cha'aye Ñimaye qomi' ỹanema so lalamaxat Llalec co'ollaxa. Qaq da qomi' ỹanema So Llalec, nache nataqa'en qomi' ỹanema 'enauacna.

1 Corintios 10:13

Da qañe'eguenataguiiqui maye qami' nvittegalo, damaye nachera da 'eeta'am da ñe'eguenataguec na 'enauac shiỹaxauapi. Qalaxaye qami' ishet da qaupi'iỹa'ai Ñim Lo'onatac 'Enauacna, cha'aye Ñimaye saishet da qami' ỹasheetema ca qañe'eguenataguiiqui da huo'otaq sa qanaloỹeeguet. Nachaqrata da huo'otaq nvi' ca qañe'eguenataguiiqui, nache Ñim Lo'onatac 'Enauacna qami' ỹachaxanalo ca lataxac da yaqto' ishet da qanaloỹa'aguet camaye.

Mateo 19:29

Nache 'enauac nam no'onaxatchigui na lma'pi, huo'otaq ca lqaỹañecpi ỹalleppi qataq 'alpi, huo'otaq lta'a qataq aca late'e, huo'otaq lhua qataq ca llalaqpi huo'otaq na na'alhuapi, souaxat Aỹem, nache camaye ivi' qome ca cien nam qoỹami'pi. Nataqa'en qoỹami' dam nca'alaxa maye chochaq tatec.

Eclesiastés 12:13

Qaq dam loga't 'enauac de'era na'aqtaxanaxac maye 'aua'aqchigui damaye, 'eeta': Huo'o naq 'enec 'anqa'en Ñim Lo'onatac 'Enauacna, qataq 'aupacteleguete naua lamaxasoxonaxaco, cha'aye nacherata maye iuen da ỹo'ot cam shiỹaxaua.

Génesis 26:5

cha'aye so Abraham ỹataqta aỹem ỹalaxaguet co'ollaxa, qataq ipacchigui na ỹa'aqtacpi, ỹamaxasoxonaxacpi, na iqataxacpi, qataq na ỹapaxaguenataxanaxacpi.»

Génesis 22:2

Nache Ñim Lo'onatac 'Enauacna, 'enapego' somaye, 'eeta': «'Auacona qome ñi Isaac ñim 'oonolec 'aỹa'alec, ñim ỹataqta 'arauotaxat. Nache 'anqo'ona ye 'alhua Moriah. Qaq qom 'avita yemaye, nache 'auavigaxat aca 'arachetaqtaxanaqte da Aỹem 'aỹa'anot, huaña 'anqa'en aca qasoxonaxa maye 'am sachaxana qome.»

Juan 3:16

Cha'aye Ñim Lo'onatac 'Enauacna ỹataqta lta'araic da lauotaxanaqtaic na shiỹaxauapi ana 'alhua, nache ỹan na 'oonolec Llalec. Yaqto' 'enauac nam ỹa'amaqten namaye saishet da ileu, nachaqrata da huo'o da lca'alaxa maye chochaq tatec.

Salmos 147:11

Ñim Nataxala', ỹamaateguet cam huo'o naq 'enec naqa'en Ñimaye, qataq cam pi'iỹa'a da lta'araic lauotaxanaqtaic Ñimaye.

Salmos 25:12

Ca ỹale da huo'o naq 'enec naqa'en Ñim Nataxala', nache Ñimaye ỹachaxana ca ỹataqta no'on nqa'aic da yaqto' quegue camaye,

Romanos 5:8

Qalaxaye na'aictaxa da qomi' ñaq souaqtaigui co'ollaxa da qaye'etaxaloxo, qalaxaye Ñim Lo'onatac 'Enauacna ỹachaxan da lta'araic lsoxoyec, nache qomi' namaxalo So Jesucristo da yaqto' qomi' ileualeguete.

2 Corintios 8:12

Cha'aye ca shiỹaxaua da ỹoqta 'eesa da lhuennataxa da huo'o ca ỹan, qalaq Ñim Lo'onatac 'Enauacna ỹataqta ỹaỹamaxareeta cam nalotaua'a da ỹan camaye. Cha'aye Ñimaye saishet da iỹaxanaique cam saishet da qanaloua'a.

Hechos 9:31

Nache 'enauac nam ỹa'amaqten So Jesús maye netaña ye 'alhua Judea, qataq ye 'alhua Galilea, qataq ye 'alhua Samaria, namayepi ỹataqta saishet da ñe'etega da sa qaiyacnapec. Nache queto'ot da ỹo'oxoreetac So Qarataxala', nache ima'ape naua na'axa'te da nquictauec da lpi'iỹaxac So Jesús. Qaq So Saqcha'a Na'añaxac Qui'itta ỹataqta ỹa'añaqchettac namayepi da nquictauec naqa'en ye lcata na da'amqaanataxan.

Proverbios 1:7

Da naỹaanec, damaye chegoqchigui da huo'o naq 'enec qanqa'en Ñim Nataxala', cam qaica ca ỹaỹaana'a qalaq ỹo'otan da naỹaanec qataq da napaxaguenataxanaxac.

Salmos 25:14

Ñim Nataxala' ỹataqta nauochaxaua nam huo'o naq 'enec naqa'en Ñimaye, qataq ỹauattonaxanaxanec da naỹamaxataxac Ñimaye.

Éxodo 20:20

Nache so Moisés, 'enapeco': «Saishet qome da qayi'i. Cha'aye Ñim Lo'onatac 'Enauacna anac da choche qami' ỹe'egue'n, yaqto' nache 'eetai' da qayi'iỹai Ñimaye, qataq saishet da qauo'oche ca sa ỹaỹamaxañi.»

Mateo 16:24

Nache So Jesús 'enapegalo soua lapaxaguenataqa, 'eeta': «Da qami' qansheetaique da qami' ỹapaxaguenataqa, nache iuen da qaucoviỹa'ai da qauo'oche ca maiche qoñiitapeguec. Nachaqrata da iuen da qami' lhuotte', na'aictaxa da qami' qaỹalaua't. Qataq qaualaqaiguet ca ỹa'aqtac.

Jeremías 19:5

Qataq nataqa'en no'oxoosheguem ana lca'atoxonaxalatepi da yaqto' ỹavigaxat na llalaqpi da ỹanot so Baal, dam saishet co'ollaxa da samaxasoxoolec qataq saishet da choche shenapec, qataq saishet da tatapigui iuel.

Da na'aqtaguec so Job 28:28

Nache Ñimaye 'enapego' na shiỹaxauapi, 'eeta': ‹Da huo'o naq 'enec qanqa'en Ñim Nataxala', nachera da ỹoqta 'eesa naỹaanec›, qataq da qanayeca'ai na qauemsat, ‹nachera da ỹo'ot da qaica ca qanqalaate'.›»

Nehemías 5:15

Qaq so nta'alpi maye hua'aulec co'ollaxa da ilotague' somayepi, ỹataqta qalota nataqa'en aso isheeten se'eso nalamaxat nhuo' le'ecpi, cha'aye ye 'oonolec na'a'q, nache ỹataqta iỹaxaataua'a na nallec, lataxa nache añi lasheue ivi' aso cuarenta lcatpiole plata. Nataqa'en so ltauapi somayepi ỹataqta ỹoqolavin so shiỹaxauapi. Aỹem, qalaxaye saishet da sheetec de'era, cha'aye souaxat da sauotec qataq huo'o naq 'enec ñaqa'en Ñim Lo'onatac 'Enauacna.

Génesis 20:11

Nache so Abraham ỹasateguet somaye, 'eeta': «Aỹem sepettega da ne'ena nma' da qaica ca 'enec qanqa'en Ñim Lo'onatac 'Enauacna, qataq da aỹem qaỹalauat souaxat añi ihua.

Hebreos 12:28

Sanqot da qana'achec Ñim Lo'onatac 'Enauacna, cha'aye da lo'onataxanaxac Ñimaye maye qomi' ỹanema saishet da ishet da qanqochenaxat. Qaq ỹoqo'oye iuen da sho'oxorenaq Ñimaye chegoqchigui da lta'araic lsoxoyec qataq da ño'oxonnataguec maye ỹaỹamaxareeta da qoỹami'.

Mateo 5:16

Qaq nache 'eetec qome nataqa'en da qoñiita, da qarataxaqui iuen da 'eeta'am aca ncoỹaraxanaxaqui da 'eroigui qataq ỹachaxan da 'eetec da qaỹalaxaguet Ñim Lo'onatac 'Enauacna. Qauo'oche ca ỹaỹamaqchiguiñi, yaqto' ila'a na laỹepi shiỹaxauapi. Ime, nache namayepi ỹo'oxoren Ñim Lo'onatac 'Enauacna, Ñim Qarta'ai maye neto'ot na piguem.

Malaquías 4:2

Qalaxaye qami', maye huo'o naq 'enec qanqa'eñi da ỹe'enaxat, dam no'on ỹataxac qalaq 'eroigui qome, 'eeta'am na le'eraxa añi nala', qaq na le'eraxa qalaq nachetac qome da nca'alaxa. Nache qami' qaparenaxañeetac qome, souaxat da qantonaxaqui, qoñeeta'am ca huaca llalaqpi da parenaxaatague' da chegaqaigui aca laỹe'.

Jeremías 32:40

Qataq so'ot ca chochaq tatec ñaỹamaxataxac da ñaỹamaxate' namayepi, qataq sanem da ỹa'aqtac da saishet qome da sha'axaneguet da so'otec ca ỹaỹamaqchiguiñi namayepi, qataq ñelaxatchigui da lhuennataxac da yaqto' Aỹem ỹo'oxoreetac, qataq saishet da Aỹem ca'ai.

Salmos 111:10

Da naỹaanec chegoqchigui da huo'o naq 'enec qanqa'en Ñim Nataxala', qaq ca ỹo'o't damaye qalaq no'oñi naua laỹaanataxanaxaco. Qaq nache 'eetai' qome da qaỹo'oxoreetac Ñim Lo'onatac 'Enauacna.

Salmos 2:11

Qataq da qauo'onataxañiỹot Ñim Nataxala', qalaq ỹataqta huo'o naq 'enec qanqa'eñi, qataq ỹataqta qauamaichiguiñi da qavio'oxoyiñi Ñimaye.

Salmos 1:6

Cha'aye Ñim Nataxala', ỹataqta ntela'a da llecỹaxac nam no'on da lataxac, qaq da llecỹaxac na qauemaicpi qalaq taỹa'a da nlaguiñi.

Da na'aqtaguec so Job 5:19

Qaq ỹataqta ỹe'eguelaqtalec da 'am nca'alaxateeguesop da lchecỹaxac, qaq que'eca pa'atec nache ỹoqta 'am sa ỹasheneguet na qauemsat.

Hebreos 11:19

So Abraham ỹaỹateeta da Ñim Lo'onatac 'Enauacna da huo'o da la'añaxac da qaltaq nca'alec naqa'en ca mashe ileu. Qaq de'era naquitaxac so Abraham, nachera dam ỹo'ot da saishet da ỹalauat so llalec. Qaq de'era naigui da 'eeta'am da so Isaac qaltaq ỹe'eguelaxalec da nca'alec.

Génesis 42:18

Qaq so na'a'q tres, nache 'enapegalo' soomaye, 'eeta': «Aỹem huo'o da icolanaxa Ñim Lo'onatac 'Enauacna. Qaq ỹoqo'oye no'on da qauo'oche da ỹa'aqtac yaqto' qarca'alleeuec:

Apocalipsis 19:5

Nache sa'axaỹa so nvilỹaxac chemaqtelec som hueta'a aso so'onaxaqui, 'eeta': «¡'Enauac qome da qaỹo'oxoren Ñim Qarta'a maye Lo'onatac 'Enauacna! ¡'Enauac nam huetalec ana 'alhua ỹo'oxoren qome Ñimaye, nam 'añaxaicpi qataq nam qaica ca la'amaqchec, qataq nam do'onataxaatacot Ñimaye qataq nam huo'o naq 'enec naqa'en!»

Génesis 22:13

Nache so Abraham, namatasheguem nache ila'a so qagueta lhuaraic, ỹemaqtaiguilo soua lcoue so nshe'ela. Qaq huaña nache nqo'ona da ỹaconeua'a somaye, nache ỹavigaxat da ỹauo'o lachetaqtaxanaqte, nmeneguet naqa'en so llalec.

Génesis 22:16

nache 'enapega, 'eeta': «Ñim Nataxala' 'enapec: Qaq cha'aye 'auo'ot de'era, qataq saishet da aỹem 'aullapeguem ñi 'oonolec 'aỹa'alec, qaq nagui san da ỹa'aqtac,

Da na'aqtaguec so Job 1:1

Qaq ye 'alhua maye le'enaxat Uz, nache naña so ỹale le'enaxat Job, somaye no'on da lataxac, qataq qaica ca ỹasouaxat, qataq ỹataqta ỹalaxaguet Ñim Lo'onatac 'Enauacna, qataq ỹataqta saishet da huo'otaq huo'o ca ỹo'otec ca sa ỹaỹamaxañi.