Gálatas 6:10 - La'aqtaqa Ñim Lo'onatac 'Enauacna 2013

¹⁰ Qaq ỹoqo'oye da ivita da huo'o ca so'otaq, qalaq 'enauac so'otaxac ca ỹaỹamaqchiguiñi na shiỹaxauapi, qalaxaye hua'auchiguiñi ñaqa'enaq na maiche qara'amqaanataxanaxauapi.

Nuevo Testamento Toba Sur

¹⁰ Qaq ÿoqo'oyi da ivita da huo'o ca qaddaqa', nachi 'enauac so'otaxac ca ÿaÿamaqchiguiñi na shiÿaxauapi, lamaaxa da nachina na qad'amqajnataxanaxauapi.

Nuevo Testamento Toba Sombrero Negro

¹⁰ Qo'che', qom nach'e eta't jaqanatetaq, je'etaĝama da'me 'noota jogaa'me qadaqaya', qalaĝaja yataqachiñe p'ajaye yecochaĝalo jogaa'me jo'ne quetegue ñe'me Cristo.

Gálatas 6:10 Referans Kwoze

Hebreos 13:16

Qataq saishet qome da qaucoviỹa'ai da qauo'oche ca ỹaỹamaqchiguiñi, qataq da qautauañi ca qarỹai maye huo'o da lhuenaxanaxa. Qaq 'ena nam nachetaqtaxanaxat maye ỹaỹamaxareeta Ñim Lo'onatac 'Enauacna.

Proverbios 3:27

Saishet qome da sa 'anqouaguec ca 'am iỹaxanot da 'autauan, lamaaxa da 'am hueto'ot cam iueetaique camaye.

1 Ts 5:15

Ỹataqta qanchelliỹa'a't, saqca ca isheetena'aguet ca sa ỹaỹamaxañi da ỹo'otec ca lỹa. Chaqrato' da qami' qanpogoxoiñiỹapegue' da qauo'ochec ca ỹaỹamaqchiguiñi ñi 'oonolec da qoñiita qataq 'enauac na laỹepi shiỹaxauapi.

Tito 3:8

Qaq de'era sheetega ỹataqta 'eesa. Ỹoqo'oye ñeshetaique da ỹataqta 'auapaxaguenataxanec, yaqto' 'enauac na ỹa'amaqten Ñim Lo'onatac 'Enauacna ỹataqta npogoxoinapegue' da ỹo'ot ca ỹaỹamaqchiguiñi. De'era sheetega ỹataqta 'onaxaic, qataq huo'o naq naigui.

Mateo 25:40

Qaq Aỹem maye Aỹem Nta'a, sheeta': «Dam qauo'ochec na shiỹaxauapi maye qaica ca la'amaqchec ana 'alhua, qataq nam samata'ac da ỹataqta ỹaqaỹañicpi, nache damaye 'eeta'am da nache Aỹem da Aỹem qauo'ochec.»

Hebreos 6:10

Ñim Lo'onatac 'Enauacna ỹataqta no'on da lataxac, ỹoqo'oye saishet da huo'otaq icoua'ai nam qauo'oche qataq nam qoquiito'ot da qauo'ocheetac da yaqto' qautauañi nam lalamaxatpi qataq lca'aguishecpi. Qataq da nache qoñiitec de'era, nache qami' nataqa'en qauachaxañi da qauauochec Ñim Lo'onatac 'Enauacna.

Efesios 2:19

Qaq ỹoqo'oye qami' saishet da 'eco' ỹaqa'a ca qauachegoqỹa'ague naqa'en Ñim Lo'onatac 'Enauacna. Nachaqrata da nagui qami' qaualliquiitaigui nam lalamaxat lauo' Ñimaye qataq nataqa'en qanhuañiỹaua'a nam lalamaxatpi namayepi, cha'aye nagui mashe qaualliquiitaigui nam llalaqpi Ñim Lo'onatac 'Enauacna.

Juan 12:35

Nache So Jesús 'enapega somayepi, 'eeta': –Ñaq cara'acolec da qami' hueta'agueta nam lcoỹaraqte ana 'alhua, qalaxaye sa qaỹaraue'c caua na'axa'te da qami' hueta'agueta. Qaq ỹoqo'oye qauqueuoitapigui' nagui da ñaq huo'o na yo'oqchiguiñi, yaqto' saishet da qami' ique'elaxa't ca napalaxa. Cha'aye cam queuotapigui na napalaxa, camaye saishet da ỹaỹaten cam tata'ague.

Lucas 6:35

Qalaxaye qami' ỹataqta qauauochec ca qami' ipa'agueeta'ape, qataq qauaỹamaxacheeta qataq da huo'o ca qaua'aalaxanaxañic qalaq saishet da qauacheeta'a da qami' isheete'n. Cha'aye da nache qoñiitec de'era, nache Ñim Lo'onatac 'Enauacna maye 'amaqtaqaic qami' ỹanema ca qansheetenaguiiqui qataq ỹataqta qami' llalqa. Ñimaye ỹataqta choxonnataxanaxaic, ichoxoren na shiỹaxauapi maye qauem da lataxac qataq sa nmanapec.

Salmos 37:3

Ỹataqta 'aupi'iỹa'a Ñim Nataxala' qataq 'auo'ot ca ỹaỹamaqchiguiñi, yaqto' nache qonetai' da qonetalec ana 'alhua qataq qoquetegue Ñimaye.

Juan 9:4

Cha'aye nagui da ñaq qami' soota'agueta, nache iuen da so'otaq da lo'onataxanaxac maye Aỹem ỹamaxalec Ñim Lo'onatac 'Enauacna maye Ita'a; qalaxaye anata ca na'a'q maye qaica ca ishet da do'onataxan.

Tito 2:14

Somaye nañan co'ollaxa da qomi' ileualeguete, cha'aye nshetaique da qomi' nca'alaxateeguesopa na qauemsat, qataq qomi' iqui'itaxa't da ỹauo'oi qomi' lalamaqa'ate, qataq da yaqto' so'otaq ca ỹaỹamaqchiguiñi.

Filipenses 4:10

Qaq aỹem ỹataqta huo'o da ñetonaxac So Qarataxala', souaxat da chegoqchigui Somaye da qaltaq aỹem qauennachiỹa'a. Qaq saishet da huo'otaq sheetega da aỹem qaucoviỹa'ai, cha'aye saỹaten da choche qaica ca qardaqa'ai da aỹem qautauañi.

Mateo 12:50

'Ena nam 'eeta'am aca ỹate'e qataq ca ỹaqaỹañicpi. Cha'aye camachaqca ca ỹalaxaguet na lamaxasoxonaxacpi ñi Ita'a maye neta'ague da piguem, qaq nacheca cam ỹaqaỹañicpi qataq ỹate'e.

3 Juan 1:11

'Am ñauochaxaua ỹaqaỹa Gayo, saishet da qoquegue da lataxac nam ỹo'ottac da qauem, chaqrata da qoquegue da no'on nataxac. Cha'aye cam ỹo'ot ca ỹaỹamaqchiguiñi, nache laỹepi nam llalaqpi Ñim Lo'onatac 'Enauacna. Qalaxaye nam ỹo'ottac da qauem, namayepi saishet da ỹauatton Ñimaye.

Colosenses 4:5

Qataq ỹataqta qanaỹaanaxanaqchiñi da qautaqaitague' nam saxanaxa da da'amqaanataxan. Ỹataqta qauqopitaxañiỹa'ape naua na'axa'te, da huo'o ca qardaqa'ai.

Efesios 5:16

Qataq ỹataqta qauqopitaxañiỹa'ape naua na'axa'te da qauo'oche ca ỹaỹamaqchiguiñi, cha'aye naua na'axa'te maye souaqtaiguilo ỹataqta qauema.

1 Juan 5:1

Da sa'amaqtenaq So Jesús da nacheso So Lca'aguishec Ñim Lo'onatac 'Enauacna, nache 'eesa da qomi' llalaqpi Ñimaye. Cha'aye da sauotaxac Ñim Nta'a, nache iuen nataqa'en da sauotaxac na llalaqpi Ñimaye.

Salmos 37:27

Qoca'ai qome na qauemsat, qataq 'auo'ot ca ỹaỹamaqchiguiñi, yaqto' nache 'eetai' da huo'o ca 'arma' maye ishet da qonetaña.

Hebreos 3:6

Qalaxaye So Cristo, som Llalec Ñim Lo'onatac 'Enauacna, Somaye ỹataqta laxaraic qataq itauan nam lalamaxatpi Ñimaye. Qaq qomi' nache qaraỹepi ne'ena lalamaxatpi Ñimaye da qolaqtot da ña'añaxataxac da qarpi'iỹaxac qataq da ñetonaqtapeguec cam nca'alaxa maye saconaxaguet qome.

Marcos 3:4

Ime, nache inat som hueta'a yi'iye, 'eeta': «¿Chaq negue't ca ỹaỹamaqchiguiñi da qaỹo'ot ye na'a'q mataxaqui maye saishetapec na judiopi: Ca qauem, huo'otaq ca no'on? ¿Qanca'alaxatec ca shiỹaxaua, qalqo' qaỹalauat?» Qalaxaye qaica ca ỹasateguet Somaye.

Efesios 3:15

maye lo'onatac 'enauac nam hueto'ot na piguem qataq na huetalec ana 'alhua.

Mateo 5:43

'Era nataqa'en da lỹa damaxasoxoolec so Moisés soua qaỹoqteguelo vi'iye, 'eeta': «'Auauotec ca 'arqaỹa, qalaxaye ỹataqta 'anquiỹa ca 'am ipa'agueetac.»

Eclesiastés 9:10

Qataq 'enauac nam ishet da 'auo'ot, qalaq ỹataqta 'anasapattelec qome da 'auo'ot, cha'aye añi huachiqui maye 'aỹa'a, qaica ca no'onataxanaxac, qataq qaica ca qaiuennatega da qaỹo'ot, qataq qaica ca nauattonaxanaxac qataq ca naỹaanec.

Mateo 10:25

Ỹoqo'oye ca napaxaguenatac ishet qome da machiguiñi da ivi' da 'eeta'am ca napaxaguenaxala', qataq cam choche namaxashec da ivi' da 'eeta'am ca na'aco'. Cha'aye na shiỹaxauapi da huo'otaq Aỹem iỹaxana, qaq 'eetega da Aỹem pa'aguenataxanaxaic, nache, ¿chaq 'eetec ca lỹaxanataxanaxac da qoñiita maye qami' ỹapaxaguenataqa?

Eclesiastés 3:12

Qaq huaña nache aỹem saỹaten da qaica ca lỹa no'on maye ishet da ỹo'ot ca shiỹaxaua, nacherata da matapiguiñi, qataq ỹo'ot cam no'on da ñaq huo'o da nachaalataxac,

Hechos 6:7

Nache da la'aqtac Ñim Lo'onatac 'Enauacna ỹataqta nquictasheguem. Qataq ye lcata na da'amqaanataxan ye Jerusalén ỹataqta nquictauec, ivira'a da qalota na ỹa'amaqten So Jesús nam ntaxaỹaxanaxanecpi da qaitaxaỹapegue' Ñim Lo'onatac 'Enauacna maye judiopi.

Gálatas 1:23

Nachaqrata da choche hua'aqtapeguelec naxa da na'aqtaxanaxac da qoỹeeta': «Se'eso ỹale maye ỹo'ottac da qanque'eenaxac caillaye, somaye nagui ỹa'axattac da no'on na'axaỹaxac dam huotaique nlaxaañi co'ollaxa.»

Efesios 4:28

Qaq cam decachetapec co'ollaxa, qalaq no'on da ỹaxaañi nagui da lcachaxac. Chaqrato' da do'onataxan, ỹo'ottac ca maiche lalamaxat lo'onatac, yaqto' ishet da itauan cam huo'o da lhuenaxanaxa.

1 Ts 5:21

Qalaxaye qavi'iguiñi 'enauac, qaq cam ỹaỹamaqchiguiñi, nacheca qauaỹamaxache.

1 Pedro 4:17

Mashe ivita ye laloqo' da Ñim Lo'onatac 'Enauacna nmit 'enauac na shiỹaxauapi, nache ỹa'auaxaachiguiñi da nmit na maiche lalamaxatpi. Qaq da ỹa'auaxaachiyiñi da qomi' nmi't qataq ỹauo'o da qanque'eenaxac, nache ¡chaq 'eetec ca taỹa'aguet nque'eenaxac nam saishet da ỹalaxaguet Ñim Lo'onatac 'Enauacna!

3 Juan 1:3

Ỹataqta lta'araic da ñetonaxac co'ollaq huo'o na nvira aỹem nam 'amqaanataxanaxaicpi, nache aỹem da'aqtaxaatapeguem, da 'am qoqueto'ot da 'arpi'iỹaxac, dam 'eesa lataxac maye qomi' ỹapaxagueneque So Jesucristo.

3 Juan 1:10

Qaq ỹoqo'oye qom qami' ñamaqtegalo, nache ỹataqta shenapega camaye, cha'aye qauema naua ltaxaỹaxaco da qomi' detaqtegalo. Qataq saishet da nachaqrata damaye nataqa'en saishet da ỹaconeguet na quetague' So Cristo maye ỹaqa'a ca chegaqa'ague. Qaq da huo'o ñim huotaique da ỹaconeguet namayepi ca lma' qalaq saishet da ỹashenem, qataq ỹamaqauec da ca'ai naqa'en na 'amqaanataxanaxaicpi.

2 Corintios 2:8

Qaq ỹoqo'oye qaltaq qami' ñachoxonnoiguilo da qauachaxañiỹa da qarauotaxanaqtaiqui camaye.