Gálatas 5:10 - La'aqtaqa Ñim Lo'onatac 'Enauacna 2013

¹⁰ Aỹem ỹataqta saỹateeta da qami' nataqa'en qauaỹamaxayiñiita da shenapec, cha'aye nache shenaqta'a't da qomi' 'amqaanataxanaxaicpi. Qataq saishet da choche qapio'olec da seqoleguet da Ñim Lo'onatac 'Enauacna ỹauo'o da nhuaxanaguec cam sa qami' ỹalemaxa't.

Nuevo Testamento Toba Sur

¹⁰ Qaq nachiso som qadataxala' so chigoqo'ot da ñaquitaxac da qoñiita da sa ishit da ÿaqa'a ca qadhuennataxaqui. Qalaxayi ñi Dios ÿauo'o qome ca nhuaxanaguec ca camachaqca shiÿaxaua mayi sa ishit da qami' ÿalemaxa't.

Nuevo Testamento Toba Sombrero Negro

¹⁰ Qalaĝaja ja joqoleguet da'me a'uamaqachiñe ga'me yelnataĝac, qa'a qademe'teguet ñe'me Cristo. Qom 'uo ga'me ja ami 'te yalemaĝa't, qama'le ja joqoleguet da'me Dios ya'uo ne'uaĝanaguec joga'me.

Gálatas 5:10 Referans Kwoze

Gálatas 5:12

¡'Onaxaictoxo' da nam sa qami' ỹalemaxa't saishet da ndotec da ỹauo'o ca na'anaxat na lo'oc nataqa'en 'onaxaictoxo' da imauec icheguec ñi logoxoshet!

Filipenses 3:15

Qaq ỹoqo'oye 'enauac da shenaqta maye mashe nalochiguiñi da qarpi'iỹaxac, no'on da nache 'eeta'a't da qarhuennataxa. Qalaxaye da huo'otaq huo'o ca lỹa qarhuennataxaqui, qalaq Ñim Lo'onatac 'Enauacna ishet nataqa'en da qami' itauneque da qauaỹaañi camaye.

Gálatas 1:7

Ỹoqta 'eesa da ỹataqta qaica ca lỹa na'aqtaxanaxac. Qalaxaye shenapec de'era, cha'aye huo'o na huotaique da naralaxat da no'on na'axaỹaxac maye na'aqtaguec So Jesucristo, ime, nache qami' isomaxanaqche't.

2 Corintios 2:3

Qaq ỹoqo'oye qami' samaxalo co'ollaxa aso ỹere, cha'aye saishet da saỹamaxaren da qami' ñeqo'onalo da yaqto' aỹem qauaquicoqchichi, qamaq nachaqcatactaxa ca ỹamaicỹaxac da qauo'oche. Qaq ỹoqo'oye aỹem saỹateeta da huo'otaq aỹem samachiguiñi, qaq 'enauac da qoñiita qauamaichiguiñi.

1 Timoteo 1:20

Qaq nache 'eetec da huaiguilo soua Himeneo nataqa'en so Alejandro. Ỹoqo'oye soomaye sanegueta so pa'aguenataxanaxaic, yaqto' saishet da nache 'eetra'ac da quetralec da sa iyacna'ape Ñim Lo'onatac 'Enauacna.

Gálatas 6:17

Qaq ỹoqo'oye, nache tachiguiña nagui da saishet qome da huo'o ca aỹem naxattac, cha'aye da ỹo'ocỹaxac no'onañi na lliguiñi na ñeuaxanaguecpi, qaq damaye ỹachaxan da shectague' So Cristo.

Gálatas 4:17

Nam huotaique da qami' ỹamaqaleguete da qaualaqaiguet na namaxasoxonaxacpi maye quetague' na judiopi, namayepi nagui ỹachaxaata da iueelec da qoñiita, qalaxaye dam ỹataqta 'eetapeguec huotaique da qami' na'aqche't, cha'aye namayepi huotaique da aỹem qaucoviỹa'ai, ime, nache qami' qauatailec namayepi.

Gálatas 3:1

¡Aicoue, qami' maye qarmaye na 'alhua Galacia, ỹataqta qaico' ca qauaỹaañiỹapec! ¡Ivira'a da 'eeta'am da huo'o ca qami' ira'n! Aỹem ỹataqta ỹataqtegue da ỹa'aqtaxanaxac da qami' sa'aqtaxaateguema da 'eetec da l-leuaxa So Jesucristo co'ollaq qaiuaxaneguet so npe'enaxaqui.

Gálatas 2:6

Qaq se'esoua maye na 'amqaanataxanaxaicpi ỹataqta ỹauattoote' da nataxala'ate, soomaye saishet da huo'o ca dalaxaic da iqotteereuo de'era na'aqtaxanaxac maye sa'axattac. Qataq saq shectega da ỹoqta 'eesa da nataxala'pi huo'otaq saishet, cha'aye Ñim Lo'onatac 'Enauacna saishet da ilotagui ca yo'oqchigui lataxac ca shiỹaxaua.

Gálatas 2:4

Qaq so'otaq se'eso qartaxaỹaxac, cha'aye huo'o na nqañoxottañi da ỹalectaigui na 'amqaanataxanaxaicpi da choche qomi' nauaata'ape. Qaq ne'ena tenataxanaxaicpi maye 'eetega da quetague' So Qarataxala', namayepi nachaqrata da huotaique da deuotaxanec da huesochiguiñi qarataxac maye chegoqo'ot So Cristo, nache qomi' ỹamaqaleguete da so'otaq nam namaxasoxonaxacpi maye lalamaxat nam judiopi.

2 Corintios 10:6

Qataq ỹataqta qaica ca shegaqtega da sauoqo'o ca nhuaxanaguec 'enauac nam saishet da ỹalaxaguet So Cristo, sa'auaxanaqchiyiñi qami' choche ivitta'a que'eca na'a'q da 'enauac na shiỹaxauapi da ỹataqta ỹalaq.

1 Corintios 5:5

qaq iuen da ñi'iñi ỹale qoỹaneguet so pa'aguenataxanaxaic. Da yaqto' na'aictaxa da so pa'aguenataxanaxaic nlaxaañi da lo'ocỹaxac ñimaye, qalaxaye dam saqcha'a lca'alaxa qanca'alaxatec qom ñe'eguelaq So Qarataxala' Jesús.

Hechos 15:24

Cha'aye qomi' qara'axaỹaxac da huo'o na shiỹaxauapi chegoqchiguiña ne'ena, da saishet da qaramaxashecpi da qami' nqo'onalo da qami' sa ỹalemaxa't. Qaq naua la'aqtaxanaxaco namayepi ỹo'ot da sa qauaỹaañi ca qoñiitec.

Filemón 1:21

Qaq aỹem 'am samaxa ana'ana ỹere, cha'aye saỹateeta da ỹataqta huo'o da 'aralaxayec, qataq ishet da aỹem 'aỹa'anem cam seỹaxanaique qataq ishet da 'agaqteetec.

2 Ts 3:4

Qaq sanaqtacot da qana'achecỹaxac So Qarataxala' Jesucristo, cha'aye saỹatenaqta da qami' qoquiito'ot da qauo'ocheetac nam qami' samaxasoxoleguete.

Gálatas 4:20

¡Da iyaxa da qami' sootaiguilo nagui, da yaqto' ñaralaxat ca itaxaỹaxac da qami' setaxaiguilo, cha'aye aỹem ỹataqta sa saỹaten ca sheetec da qoñiita, qataq sa saỹaten ca qami' so'oteque!

Gálatas 4:11

Qaq ỹoqo'oye aỹem huo'o da icolanaxa da tachigui ye iuel da qaica ca naigui da ỹo'onataxanaxac maye qami' so'oteque.

2 Corintios 13:10

Qaq qami' samaxalo ana ỹere nagui da saxanaxa da qami' ñeqo'onalo, yaqto' huo'o ca qardaqa'ai da qanaralaxache da qarataxaqui, yaqto' saishet da huo'otaq qami' sa sechera'ape qom qami' sevitalo. Cha'aye dam na'añaxac maye aỹem ỹami' Ñim Lo'onatac 'Enauacna, damaye setaunaxanot da yaqto' nquiguisheguem da qanaquitaxaqui Ñimaye, qaq saishet da yaqto' qami' selaxachiguilo.

2 Corintios 8:22

Qaq soomaye saishet da nachaqsouate'. Nataqa'en samaxasoq so lỹa qarqaỹa maye nataqa'en qomi' saỹaanaqta da 'eetec da ltaunaxanaxac. Qaq nquictec nagui da ltaunaxanaxac souaxat da naquitaxac da qoñiita.

2 Corintios 7:16

Qaq huo'o da ñetonaxac, souaxat da ỹataqta huo'o da ñaquitaxac da qoñiita.

2 Corintios 5:16

Qaq ỹoqo'oye qomi' nagui saishet da choche seloqtapigui da lataxac ca shiỹaxaua da shenaqta'am nam huetalec ana 'alhua. Qaq na'aictaxa da sogote co'ollaxa da seloqtapigui da lataxac So Cristo da shenaqta'am nam huetalecna, qalaxaye nagui saishet da nache 'eetec da qarhuennataxac.

2 Corintios 2:6

Qalaxaye 'eeso'oya' dam mashe qauo'ochec nhuaxanaguec que'eca shiỹaxaua.

2 Corintios 1:15

Da hua'auchiguiñi sheetapeguec, sauotaique da sa'auaxaañi da qami' ñeqo'onalo, yaqto' qauamaichiguiñi da dos da she'eguelaxalec da qami' ñamaqtegalo.

Gálatas 5:7

Qami' ỹataqta ỹaỹamaqchiguiñi da qoyecỹaxaqui. Qalaq ¿negue't cam qami' na'axa't da huo'omshe qaỹa'axañiiñi da qaualaqailec dam 'eesa na'aqtaxanaxac?