Gálatas 3:10 - La'aqtaqa Ñim Lo'onatac 'Enauacna 2013

¹⁰ Qaq ỹoqo'oye huetalec da lta'araic lchec nam huotaique da ỹachegoxotchigui da ỹalaxalec na namaxasoxonaxacpi da huotaique da ỹaỹamaxareeta Ñim Lo'onatac 'Enauacna, cha'aye naua ñiyigui'she maye nanettaleguete ana nere maye huetalec na la'aqtacpi Ñim Lo'onatac 'Enauacna, 'eeta': «Ỹataqta qauem qome ca talec nam saishet da ỹalaxalec na namaxasoxonaxacpi.»

Nuevo Testamento Toba Sur

¹⁰ Qaq ÿoqo'oyi nam ÿachito'ot da lpi'iÿaxac nam nqataxacpi mayi chigoqo'ot so Moisés, namayipi huetalec da lta'adaic nhuaxanaguec. Cha'ayi naua ñiyigui'shi n'aqtaqa 'eeta': “'Enauac nam sa ishit da ipaguelec nam 'enapecpi nam 'enauac nanettalec anam nanedaxalate na nqataxacpi, nachi namayipi huetalec da lta'adaic nhuaxanaguec.”

Nuevo Testamento Toba Sombrero Negro

¹⁰ Qalaĝaja gaa'me jo'ne que'teguelo daa'me namaĝajoĝonaĝaco da'me jetaque t'onataĝadeuo'o ñe'me Dios, jogaa'me ena'am ta'le dajoteda'ague ga'me 'uo da'me lichic, qa'a gaa'me nedii's enaac: “Dios ye'uaĝa'n qomle ena'uaque gaa'me jo'ne ja que'teguelo yema daa'me namaĝajoĝonaĝaco.”

Gálatas 3:10 Referans Kwoze

Deuteronómio 27:26

Ỹataqta qauem qome ca talec nhuaxanaguec ca shiỹaxaua da qaica ca 'enec naqa'en ne'ena nqataxacpi, qataq saishet da ỹo'ot. Nache 'enauac qome na nhuo' le'ecpi, 'eeta': Aja', nache 'eetec.

Romanos 8:7

Nam saishet da nllañi nam qauem lqopitaxanaqtaicpi nda'a't da iuennatega da ỹo'ot ca qauem, nache namayepi ỹataqta ipa'agueetac Ñim Lo'onatac 'Enauacna. Cha'aye sa ỹaỹamaxaren qataq saishet da ỹalaxaguet na lamaxasoxonaxacpi Ñimaye.

Jeremías 11:3

nache 'aua'aqtaxanem da Aỹem Nataxala' maye Natamnaxala' na Israel le'ecpi, sa'axatta da talec qome ca qauem cam shiỹaxaua maye sa ỹalaxagueta naua na'aqtaqa maye chegaqaiguilo de'era aỹamaxataxac.

Romanos 6:23

Cha'aye cam nachaqrata da ỹo'ottac da ñe'etaxaloxo, nache camaye ỹaconeguet ca nhuaxanaguec, qaq damaye nachera da nleuaxa. Qalaxaye Ñim Lo'onatac 'Enauacna qomi' ỹanema da qanme da nca'alaxa maye chochaq tatec chegoqchigui So Cristo Jesús maye Qarataxala'.

Romanos 4:15

Ñim Lo'onatac 'Enauacna ỹauo'o ca nhuaxanaguec nam sa ỹalaxalec na namaxasoxonaxacpi. Qalaxaye da qaica ca namaxasoxonaxac, nache qaica ca ishet da huasoilec da sa ỹalaq.

Gálatas 2:16

Qalaxaye qomi' ỹataqta saỹaanaqta da Ñim Lo'onatac 'Enauacna ỹaconeguet cam ỹataqta huo'o da lpi'iỹaxac So Jesucristo, qaq qaica ca nca'alec da chegoqchigui da ỹalaxaguet na namaxasoxonaxacpi. Qaq ỹoqo'oye qomi' sa'amaqtenaq So Jesucristo, da yaqto' ishet da qomi' ỹaỹamaxareete' Ñim Lo'onatac 'Enauacna souaxat de'era qarpi'iỹaxac Ñimaye. Cha'aye saishet da huo'o ca ỹaỹamaxareeta Ñim Lo'onatac 'Enauacna souaxat da ỹo'ottac na namaxasoxonaxacpi.

Ezequiel 18:4

Cha'aye Aỹem ỹalamaxat 'enauac na shiỹaxauapi, na nta'alpi qataq na ñalaqpi. Qaq cam huo'o ca lasouaxashet qalaq ileu qome.

Deuteronómio 29:20

Qaq Ñim Nataxala' saishet qome da ỹapalaxat cam lasouaxashet que'eca shiỹaxaua, cha'aye Ñim Nataxala' ca'alaxanaxaic, nache 'eroigui qome da layeloxo nache talec naqa'en que'eca shiỹaxaua 'enauac ne'ena nhuaxanaguecpi cam shiỹaxaua maye nanettalec ana'ana nere, nache Ñim Nataxala' pal naqa'en ca le'enaxat camaye da huetalec ana 'alhua.

Mateo 25:41

Ime, nache shenapega na qauem da lataxac, sheeta': «¡Aỹem qoquiỹa'ai! Cha'aye Ñim Lo'onatac 'Enauacna 'oonolec da iqataxaatapigui' qauem maye qami' taleguete. Qanqo'oñiuga yem chochaq tatec norec maye iqataxaatai' Ñim Lo'onatac 'Enauacna, da yaqto' ỹasaxangui so pa'aguenataxanaxaic qataq nam lamaxashecpi.

Isaías 43:28

som nta'alpi maye 'am ilotague' co'ollaxa ishepaxanaqchet añi ỹalamaqte atamnaxaqui, qaq ỹoqo'oye sa'aqta'a co'ollaxa so Israel, maye chegoxoguet so Jacob da qailaxachigui qataq qaisheueetac.

Génesis 4:11

Qaq ỹoqo'oye qauem qome ca 'am talec, qataq 'am qanqateeguesop nam 'alhua maye huecoreleguete soua ltago'q so 'arqaỹa maye 'aualauat.

2 Corintios 3:7

Ñim Lo'onatac 'Enauacna ỹettaleguete co'ollaxa soua coma' ne'ena namaxasoxonaxacpi, nache ỹami' co'ollaxa so Moisés. Qaq se'eso na'a'q ỹataqta lta'araic da llo'oxoyec ivira'a na lashec so Moisés da ỹataqta qashelectapiguiñi. Qaq ỹoqo'oye na Israel le'ecpi saishet da ỹamataigui na lashec so Moisés. Qalaxaye se'eso ne'eraxa nquictañi co'ollaxa, ivitta'a da 'om. Qaq da huo'otaq huo'o da llo'oxoyec se'eso namaxasoxonaxacpi co'ollaq qoỹan, ¡qaq taloxocheyectoxo' da saq ỹactec da llo'oxoyec da qaỹa'axat da no'on na'axaỹaxac maye chegaqaigui da nca'alaxa! Cha'aye se'eso namaxasoxonaxacpi ỹa'axat da saỹaqa'a da seleuaq souaxat naua qarasouaxashe'ete. Qalaxaye huo'o da qana'achec souaxat da qomi' ỹo'oteque So Saqcha'a Na'añaxac Qui'itta da Ñim Lo'onatac 'Enauacna ỹa'axat da qaica ca qarasouaxashet.

Jeremías 32:23

Qalaxaye namayepi co'ollaq nnoxoneua'a ne'ena 'alhua, qataq nalec namaye, nache saishet da 'am ỹalaxaguet, qataq saishet da quegue dam 'arapaxaguenataxanaxac maye 'aỹa'anem co'ollaxa, qataq saishet da ỹo'ot nam 'auamaxalecpi. Qaq ỹoqo'oye 'Am 'anamaxa namayepi 'enauac ne'ena qauempi.