Gálatas 1:10 - La'aqtaqa Ñim Lo'onatac 'Enauacna 2013

¹⁰ Saishet da shectaigui da choche ñimitta'a da na shiỹaxauapi ỹaỹamaxareeta ca shenapec. Qataq saishet da ñimitta'a da aỹem qaỹamateguet. Cha'aye da nache sheetec de'era, nache saishet da aỹem lamaxashec So Cristo. ¡Cha'aye da ỹoqta ỹaỹamaqchiguiñi ñaqa'en da Ñim Lo'onatac 'Enauacna aỹem ỹaỹamaxareeta!

Nuevo Testamento Toba Sur

¹⁰ Qaq da aÿim shinapec de'eda, qaq ¿peta'a chochi ñishitaique da aÿim ÿaÿamaxadeeta na shiÿaxauapi, huo'otaq ñi Dios? Loqo' chaq ¿chochi ñishitaique da saqca ca da ñaq'en na shiÿaxauapi? Cha'ayi da huo'otaq ña ñishitaique da chochi aÿim ÿaÿamaxadeeta na shiÿaxauapi, qaq sa ishit da aÿim l-latac so Cristo.

Nuevo Testamento Toba Sombrero Negro

¹⁰ Ja jelotaque ta'le jiyaĝadipi 'yamaqate'n ga'me ñenaĝategue, uotaĝa ta'le jelotaque da'me qaedi gamachaqaega jayem yiyamaĝaden. Ta'le naq'aeta da'me ja'uo qama'le ena'am ta'le ja jayem 'te Cristo lalemaĝajet. Qalaĝaja da'me mach'e jayem, ¡ga'me jo'ne jen p'ajaye ta'le nach'eñe ñe'me Dios jayem yiyamaĝaden!

Gálatas 1:10 Referans Kwoze

1 Ts 2:4

Nachaqrata da Ñim Lo'onatac 'Enauacna qomi' ỹaỹamaxareete', nache qomi' ipataxaleguete da sa'axataq da no'on na'axaỹaxac, qaq nachera dam so'otaqtac. Saishet da sauoqtaique da qomi' ỹaỹamaxareete' ca choche shiỹaxaua, nachaqñita Ñim Lo'onatac 'Enauacna, cha'aye nacheñi Ñi imeteetac 'enauac da qarvilỹaxac qataq da qarhuennataxac.

Hechos 5:29

Nache so Pedro qataq soua lỹa't namaxa'she 'ena'apo': –Qomi' iuen da hua'auñi da salaxasoxoguet Ñim Lo'onatac 'Enauacna, ime, nache nataqa'en ca choche shiỹaxaua.

Efesios 6:6

Qaq de'era iuen da nache 'eetai' da qauo'ocheetac, qaq saishet da nda'a't da qami' ilotaguilo ca qana'aco'oi. Da qoñiita qami' l-lataqa So Cristo, qaq ỹoqo'oye da qauo'onataxañiitac qalaq qantoñiitapigui' qataq qanasapacheetelec cam 'eetapeguec Ñim Lo'onatac 'Enauacna, 'eeta'am da nacheso So Qarataxala' da qauo'onataxañiitacot, qaq saishet da nacheca ca qana'aco'oi.

Santiago 4:4

Qami' saishet da qauauochec Ñim Lo'onatac 'Enauacna qataq saishet da qaualaqaiguet. Cha'aye ca ỹauotec na huetalec ana 'alhua, nache camaye ỹe'eguelaxa da ipa'agueetac Ñim Lo'onatac 'Enauacna. ¡Qaq damaye nache 'eetec! Da qami' qauauochec na qauem maye huetalec ana 'alhua, nache qavi'eguelaqaỹa da qapa'agueñiitac Ñim Lo'onatac 'Enauacna.

Mateo 22:16

Huaña, nache huo'oi soua qaỹama'q nam lapaxaguenatacpi somayepi, nnaictague' qanqa'en nam ỹalectaigui na quetague' so nta'a Herodes, da yaqto' 'enapega So Jesús, 'eeta': –'Am Napaxaguenataxanaq, qomi' saỹaanaq da 'am ỹataqta 'eesora naua 'ara'aqtaqa, qataq 'auapaxagueeteguec na shiỹaxauapi da 'enauac ỹalaxaguet Ñim Lo'onatac 'Enauacna. Qataq saishet da 'auqochetega nam quetapeguelec da 'arapaxaguenataxanaxac, cha'aye 'am saishet da 'autaqtac da 'auauotaique da 'am ỹaỹamaxareeta namayepi.

Colosenses 3:22

Qataq qami' nlatacpi, ỹataqta qaualaqaiguet ca yo'oqchigui qana'aco'oi ana'ana 'alhua. Saishet da nachaqrata da qami' ilotaguilo da yaqto' qami' ỹaỹamaxareete', nachaqrata da qauo'oche damaye souaxat da huesota qarquiyaqteỹaxaqui, qataq da 'enec qanqa'eñi So Qarataxala'.

Romanos 2:29

Cha'aye ca ỹoqta 'eesa da judío le'ec, camaye ỹataqta ỹalaxaguet Ñim Lo'onatac 'Enauacna, qaq saishet da ỹalaxaguet na nqataxacpi maye lo'onatac ca choche shiỹaxaua. Qaq Ñim Lo'onatac 'Enauacna ỹataqta ỹaỹamaxareeta camaye, na'aictaxa na shiỹaxauapi da saishet da ỹaconeguet.

1 Juan 3:9

Qaica ca llalec Ñim Lo'onatac 'Enauacna da queto'ot da ỹo'ottac na lasouaxashetpi, cha'aye dam achaalataxac maye hueto'ot, chegoqo'ot Ñimaye. Qaq ỹoqo'oye que'eca shiỹaxaua saishet da queto'ot da ỹo'ottac da lle'etaxaloxo, cha'aye ỹataqta llalec Ñim Lo'onatac 'Enauacna.

2 Corintios 12:19

Qalqo' ¿qami' qaupi'itaxañiỹa peta'a da qomi' shenaqapec de'era, da choche qami' ñimanaqtacoto? 'A'i, saishet. Nachaqrata da qomi' ỹaỹateete' Ñim Lo'onatac 'Enauacna nagui da qomi' lalamaqa'ate So Cristo. Qaq 'enauac de'era so'otaq, qami' ỹaqaỹarolqa, damaye naigui da yaqto' ishet da qanquiquiitasheguem da ỹataqta qaupi'iỹa'ai So Cristo.

Romanos 2:8

Qalaxaye na na'amqaanaxaicpi qataq na qauemaicpi maye saishet da huotaique da ỹo'ot ca no'on, namayepi qome ỹauo'o ca nhuaxanaguec.

Romanos 1:1

Qami' ñauochaxau' ỹaqaỹa't, maye qoñiitaña na Roma: Aỹem lo'onataxanaxanec So Jesucristo qataq aỹem lamaxashec, cha'aye Ñim Lo'onatac 'Enauacna aỹem lca'aguishec da yaqto' sa'axatec da no'on na'axaỹaxac maye iqataxaatai' da qaralamaxat.

1 Corintios 10:33

Qaq aỹem ỹataqta ñepogoxoueetague' da 'enauac qaỹaỹamaxareeta ca so'ot. Qaq saishet da maiche ñimittaique ca ỹaỹamaxa. Nachaqrata da sauotaique da ñeqouaguec ca iỹa yaqto' ishet da qanca'alaxatec.

Mateo 28:14

Qaq ñi nta'a da huo'otaq iviro'ot da ỹaỹaten de'era, nache qomi' setaxaỹaqapegue' ñimaye da yaqto' qami' saishet da huo'o ca qarasouaxashechi.»

1 Samuel 21:7

Qaq se'eso na'a'q hueta'a se'eso atamnaqa' maye lalamaxat Ñim Nataxala' som edomiita le'enaxat Doeg, qaq somaye nacheso so lataxala' som qagueta lo'opi maye lamaxashecpi so Saúl.

Hechos 12:20

So Herodes ỹataqta dalemataỹa nam shiỹaxauapi maye netaña ye ñegaxasom le'enaxat Tiro qataq ye Sidón. Qaq ỹoqo'oye huaxaỹapega't so shiỹaxauapi maye lma' se'esoua ñegaxasom da qaitaxaỹapegue' so Blasto, som lmala' ana alom som nta'a da yaqto' qanmitaique ca lataxac da qaica camachaqca, cha'aye yi'iye 'alhua deuaqto'ot so Herodes da ỹachegoxottacot nam lhuenec.

Mateo 6:24

Qaica ca namaxashec da ishet da dos naqa'e'n caua na'aco'ye. Cha'aye ishet da ỹalaxaguet qataq ỹauotec ca 'oonolec, qaq ca lỹa qalaq saishet. Nache 'eetec nataqa'en da qoñiita da sa qauañoxoche da qauo'onataxañiỹot Ñim Lo'onatac 'Enauacna, nache nataqa'en qoquiito'ot da qauo'onataxañiitacot da nsallaxa.

Filipenses 1:1

Aỹem Pablo qataq ñi Timoteo, qomi' l-lataqa So Cristo Jesús. Qomi' samaxasaxa ana qorere 'enauac na 'amqaanataxanaxaicpi maye netaña ye nỹecpi ye Filipos, nam lalamaxatpi Ñim Lo'onatac 'Enauacna souaxat da na'attaua'a So Cristo Jesús. Ana qorere nataqa'en taỹa'a na lataxala'pi namayepi qataq na ltauapi.