Éxodo 34:7 - La'aqtaqa Ñim Lo'onatac 'Enauacna 2013

⁷ Nam ỹataqta qaica ca loga't da lauotaxanaqtaic, qataq ishet da ichoxoren ca huo'o ca npe'enaxac qataq ca sa ỹalaq, qataq ca huo'o ca lasouaxashet. Qalaxaye nataqa'en ishet da ỹauo'o ca nhuaxanaguec ca shiỹaxaua maye qauema naua ỹo'otta'ape, qataq ca llalaqpi, laualpi qataq ca llalaqpi ca laualpi camaye.»

Éxodo 34:7 Referans Kwoze

Salmos 103:3

Cha'aye Ñimaye nacheñi ñi ỹapalaxat 'enauac na ỹasouaxashetpi, qataq nataren 'enauac na ỹalolaxasat.

Efesios 1:7

Chegoqchigui da l-leuaxa So Cristo co'ollaq qaiuaxaneguet so npe'enaxaqui, da Ñim Lo'onatac 'Enauacna ỹapalaxat 'enauac nam qarasouaxashetpi qataq qomi' isoueeguesopa namayepi. Qaq de'era ỹo'ot souaxat da chochaq huañi lsoxoyec Ñimaye. Ỹachegoxotchigui dam lta'araic laỹaanec qataq lauattonaxanaxac,

Jeremías 32:18

'Am, 'auachaxana da 'arsoxoyec na ỹataqta qalota shiỹaxauapi, qalaxaye nataqa'en 'auauo'o da nhuaxanaguec na ỹalleppi souaxat na lasouaxashet so lta'alpi. ¡'Am Atamnaxala', maye 'Am 'amaqtaqaic qataq 'añaxaic, da 'are'enaxat 'eeta', Nataxala' maye Qaica ca Ỹaqalanapec!

1 Juan 1:9

Qalaxaye da sa'aqtaxanaxam naua qarasouaxashe'ete Ñim Lo'onatac 'Enauacna, qalaq nataqa'en qolaqto'ot da qarpi'iỹaxac da Ñimaye maye no'on da lataxac, ishet da qomi' ichoxore'n qataq iỹouec 'enauac na sa ỹaỹamaxañisat maye so'otaqtac.

Daniel 9:9

Qalaxaye 'Am Nataxala', qataq Qanatamnaxala', 'am choxonnataxanaxaic, qataq ishet da 'auapalaxat ca nasouaxashet. Qomi' 'Am sataỹaqa'aguet co'ollaxa

Salmos 130:4

Qalaxaye 'am hueto'ot da nchoxonnataxanaxa, ỹoqo'oye ishet da huo'o naq 'enec qanqa'en 'am.

Da na'aqtaguec so Job 10:14

'Am, aỹem 'anauaatac da huo'o ca ỹasouaxashet, huaña nache 'auo'ot ca ñeuaxanaguec souaxat cam ỹasouaxashet.

Éxodo 23:7

Saishet qome da 'aualecaua'a ca na'aqtaxanaxac maye saq 'en, qataq saishet da 'aỹa'aneguet da nalaataguec ca saqca ca ne'enaxac, qataq qaica ca lasouaxashet, cha'aye aỹem saishet da shenapec da qaica ca lasouaxashet cam huo'o ca lasouaxashet.

Nahúm 1:6

Qaq ¿negue'tom cam ishet da nachaateguet da layeloxo Ñimaye? Qataq ¿negue'tom cam ishet da nalota'aguet da layeloxo? Qaq de'era layeloxo Ñimaye 'eeta'am ca norec, qataq da choche nlectelec aca coma' late'erai nache acamaye dolagui.

Daniel 9:4

Nache ñatamnot, qataq sa'aqtaxanem Ñim Nataxala' maye Ñatamnaxala', sheeta': 'Am Nataxala', maye 'Aro'onatac 'Enauacna 'Am lta'araic qataq 'Am 'añaxaic, maye nache 'eetai' naxa da 'aupacchigui nam 'auachaxanapecpi, qataq 'auachaxana da 'arauotaxanaqtaic nam 'Am ỹauotecpi, qataq ipaqueelec nam 'aramaxasoxonaxacpi:

Hebreos 12:29

Cha'aye Ñim Lo'onatac 'Enauacna, Ñimaye 'eeta'am ca norec maye ỹataqta cochepchiguiñi naqa'en ca ỹavigaxat.

Efesios 4:32

Chaqrato' da qami' soxoraiqa, qataq qami' choxonnataxanaxaiqa, ñi 'oonolec ỹataqta ichoxoren ca lỹa da huo'o ca ỹasouaxat, 'eeta'am Ñim Lo'onatac 'Enauacna da qami' ichoxore'n chegoqchigui naqa'en So Cristo.

Salmos 86:15

Qalaxaye 'Am Nataxala', 'Am Atamnaxala', 'am nhualaxaunaxaic qataq 'am choxonnataxanaxaic.

Miqueas 7:18

Qaq ¿negue't ca Atamnaxala' da 'eeta'am 'am, da 'auapalaxat na lasouaxashetpi qataq sa 'aulogui da saỹalaq nam saq 'amaqtaq maye no'onañi co'ollaxa 'aralamaxat nhuo' le'ecpi? Qataq saishet da nache 'eetai' da 'arayeloxo, cha'aye nache 'eetai' da lta'araic 'arauotaxanaqtaic da shenaqta.

Nehemías 9:32

Qaq ỹoqo'oye 'am Qanatamnaxala', Atamnaxala' maye 'amaqtaqaic, 'añaxaic, qataq ncolanaxat, maye 'aupacchigui da 'anaỹamataxac qataq da nache 'eetai' da 'arauotaxanaqtaic ne'ena 'aralamaxat nhuo' le'ecpi, saishet qome da saq 'amaqtaq 'anqa'en da 'aulotagui da nque'eenaxac so qarta'alpi, qarataxala'pi, ntaxaỹaxanaxanecpi, na'aqtaxanaxanecpi, qataq so hua'au qarta'alpi qataq 'enauac na nalamaxat nhuo' le'ecpi, chegoqchiguiña se'eso na'a'q da lo'onataxanaxac so nta'alpi ye Asiria, nache ivitta'a nagui.

Nehemías 1:5

Nache sheeta': «'Am Nataxala', maye 'Aro'onatac 'Enauacna maye qoneto'ot na piguem, 'am 'amaqtaqaic qataq chaqaic, maye 'aupacchiguilo naua 'anaỹamaxataxaco, qataq sa 'anapacalec ca 'am ỹauotec, qataq ỹalaxagueta naua 'aramaxasoxonaxaco.

Hechos 13:38

Qaq ỹoqo'oye, qami' ỹaqaỹa't, 'era da na'aqtaxanaxac maye qami' sa'aqtaxanaqteguema, da So Jesús ishet da ỹapalaxat 'enauac na nasouaxashet. Na namaxasoxonaxacpi maye chegoqo'ot so Moisés qalaq saishet da huesoueeguesop naqa'en qami' na qarasouaxashechi.

Hechos 5:31

Ñim Lo'onatac 'Enauacna ỹo'otec da So Jesús nso'oota'ague da aloic qataq ỹanagui da Nataxala', qataq Nca'alaxaqui, da yaqto' na Israel le'ecpi ỹaxaañi da ỹo'ottac na qauem, nache Ñim Lo'onatac 'Enauacna ỹapalaxa't naua lasouaxashe'ete.

Josué 24:19

Huaña, nache so Josué 'enapego' se'eso nhuo' le'ecpi, 'eeta': «Qami' yo'oqta da saishet qome da qauañoxoche da qauo'onataxañiỹot Ñim Nataxala', cha'aye Ñimaye Atamnaxala' maye ỹataqta qui'itta, qataq ca'alaxanaxaic, qataq sa ishetaxateguet na sa ỹaỹamaxañisat qataq na qarasouaxashichi.

Deuteronómio 32:35

Yaqto' lleuotta'a ca na'a'q da sepalaique ivi', nache sauo'o ca nhuaxanaguec, da ivita ca laloqo' da huañi namayepi. Qaq mashe yaqta'a da nlachiguiñi, ¡mashe sa qaỹapeque ye laloqo' namayepi!

Éxodo 23:21

Qalaxaye saishet qome da qauỹochiiuec somaye, qataq qaualaqaiguet, cha'aye somaye ỹo'ot ca samaxalec, qataq saishet da ichoxonnai' ca qarasouaxashichi.

Apocalipsis 21:8

Qalaxaye nam colanqaicpi, qataq nam saq pi'iỹa'a Aỹem, qataq nam ỹo'ot nam qauem maye sa saỹamaxaren qataq nam ỹalauat ca lỹa qataq nam huetapeeguet aca sa lhua maye saq qaỹashen da qaỹo'ot, qataq nam napaxagueetega da naconaxanaxac qataq nam ỹo'oxoreetac nam qanatameetacotpi maye saq 'en, qataq nam tenataxanaxaicpi, 'enauac qome namayepi qaỹasaxangui ca lta'araic norec maye huaña da ỹavictaigui na quiquiaxaraic. Huaña, nache chochaq tatec da saishet da nauane' Ñim Lo'onatac 'Enauacna.»

Apocalipsis 20:15

Qaq nacheye nataqa'en ye qaỹasaxangui 'enauac nam saishet da nanettalec ca le'enaxat aso naneraxalate nam chochaq tatec da nachaalataxac.

Lucas 7:48

Ime, nache So Jesús 'enapega aso 'alo, 'eeta': «Na 'arasouaxashetpi nagui 'enauac mashe qaỹapalaxat.»

Lucas 7:42

Qaq soomaye saishet da ỹañoxo't da isheete'n asa'aso lavigaxaiste', nache se'eso navigaqtaxanaxala' ichoxore'n soomaye da ỹapalaxat asa'aso lavigaxaiste'. Qaq nagui Aỹem 'aua'aqtaxanem, ¿chaq negue't soomaye ca ỹoqta qaỹauotec?

Mateo 12:31

Qaq ỹoqta 'eesa da Ñim Lo'onatac 'Enauacna ỹapalaxat ca camachaqca nasouaxashet qataq 'enauac nam qauem maye qanasaqteguec. Na'aictaxa da huo'o ca qauema naua ltaxaỹaxaco da Aỹem detaqtega qalaq Ñim Lo'onatac 'Enauacna nache 'ena'am ichoxoren camaye. Qalaxaye ca sa iyacnapec So Saqcha'a Na'añaxac Qui'itta camaye qaica ca nchoxonnataguec. ¡Camaye ỹataqta qaica ca nchoxonnataguec!

Miqueas 6:11

¿Peta'a qaico' ca lasouaxashet ñaqa'en cam do'onataxaatega aca saq 'en naloqnaxanaxaqui, qataq aca naloqnaxanaqte maye qaỹatenataxaatapigui?

Isaías 45:21

Ña qaua'aqtaxañi qataq qauachaxañi cam ỹo'ot da 'eesa de'era, qana'aqtaxañiỹa't ñi 'oonolec na'aqtaxane' ca lỹa. ¿Negue't ca ỹa'axatta'a co'ollaxa de'era? qataq ¿Negue't cam ỹa'axatta'aguet co'ollaxa de'era soua hua'au' vi'iye? ¿Saisheto' da nachaỹem, Aỹem Nataxala'? Qaq qaica ca lỹa Atamnaxala', maye huegaxanaxaic qataq ca'alaqtaxanaxaic.

Salmos 136:15

Qataq huangui aso Auaxai Togaxarai, da imoolec naqa'en so 'etaxat so faraón qataq so nalleppi, cha'aye da lauotaxanaqtaic chochaq tatec.

Salmos 136:10

Ñim ique'emaqchet co'ollaxa so la'auaxanec llalaqpi so Egipto le'ecpi, cha'aye da lauotaxanaqtaic chochaq tatec.

Mateo 6:12

'Auapalaxat qome na qauem maye so'otaq, 'eeta'ama qomi' da mashe sapalaxataq 'enauac nam qomi' qaỹo'oteque qauem.

Génesis 19:16

Qalaxaye souaxat da so Lot ỹataqta saqaỹaloqtelec da jec, nache soua namaxa'she piguem lashe' ỹacoora na lhuaq somaye, cha'aye Ñim Nataxala' ỹataqta huo'o da lchoxonnataxanaxa somaye. Qaq nataqa'en qaỹaconeua'a aso lhua, qataq soua llalel, nache qanqateeguesopa se'eso huaqta'a't nỹecpi da yaqto' qanca'alaxatrec soomaye.

Éxodo 33:19

Qalaxaye Ñim Nataxala' 'enapeco': «Aỹem, 'am sachaxana qome 'enauac da ỹoqouagaxanaqtaic, qataq 'am sa'aqtaxanem qome da ỹe'enaxat. Qataq Aỹem sechoxoren ca taalec da sechoxoren, qataq ñeqouaguec cam taalec da ñeqouaguec.

Éxodo 34:9

'Eeta': «¡'Am Nataxala'! Qom ỹataqta 'eesa da aỹem 'auchoxoren, qaq no'on da nache qomi' qoueta'agueta qome. Aỹem saỹaten da ne'ena shiỹaxauapi ỹataqta 'eesa da sa ỹalaq, qalaxaye 'onaxaico' da 'auapalaxat qome na qarasouaxashet qataq na qaye'etaxaloxosat, qataq 'auacona da ỹataqta qomi' 'aralamqa'ate.»

Deuteronómio 7:9

Ỹoqo'oye qauauattoñiita qome da Ñim Nataxala' maye Qanatamnaxala'ai, Ñimaye ỹataqta 'eesa, qataq ipactelec da naỹamaxataxac, qataq da lchoxonnataxanaxa maye ỹanem cam ỹauotec, qataq ỹo'ot na lamaxasoxonaxacpi Ñimaye, nache ivitta'a ca ỹataqta qalota maye chegoxoguetpi camaye,

Deuteronómio 7:10

qalaxaye sa ỹaỹaloxon da ilaxachigui, qataq da ỹauo'o ca nhuaxanaguec cam nquiỹatega Ñimaye.

1 Reyes 8:30

Qataq 'aua'axaỹa qome da lỹaxanaxac ne'ena 'aramaxashec, qataq na 'aralamaxat nhuo' Israel le'ecpi qom ivita da nqouagaxauen da hueta'a ne'ena. Qataq 'aua'axaỹa da qoueta'a na piguem maye 'aranataqa', ñaq 'aua'axaỹa qome qataq 'auapalaxat na lasouaxashetpi.

2 Crónicas 30:9

Cha'aye da qavi'iguelaqaiỹot Ñim Nataxala', nache yem qampa'aguenaxauaipi maye icoñettai' yem qarqaỹaipi qataq ye qaỹa'alquipi, ishet qome da ichoxoren yemayepi, nache ỹasheetec da ñe'eguelaxa ne'ena 'alhua, cha'aye Ñim Nataxala' maye Qanatamnaxala'ai ỹataqta soxoraic, qataq choxonnataxanaxaic, nache saishet da qami' imaqa'agueta da qavi'iguilaqaiỹot Ñimaye.»

Jeremías 9:24

Qaq da huo'o ca huotaique da na'amaqten qalaq iuen da na'amaqten souaxat da Aỹem ỹauatton, qataq ỹaỹaten da nachaỹem maye Aỹem Nataxala', maye sauota'a da isoxoyec da so'onataxaatac ana 'alhua, qataq so'ot da nalochiguiñi lataxac qataq da no'on lataxac, cha'aye nachera dam saỹamaxareeta. Qaq 'era da ỹa'aqtac, Aỹem Nataxala'.»

1 Reyes 8:32

qaq 'am maye qoneta'a na piguem 'aua'axaỹa qome camaye nache 'anmit, qataq 'auo'otec ca ỹaỹamaqchiguiñi na 'aramaxashecpi. Qalaxaye 'auo'ot ca nhuaxanaguec cam huo'o ca lasouaxashet, nache talec 'anqa'en ca nhuaxanaguec souaxat ca qauem maye ỹo'ottac, qaq ca qaica ca ỹasouaxat qalaq 'auo'otec ca ỹaỹamaqchiguiñi.

Salmos 25:11

'Am Nataxala', souaxat da huo'o naq 'enec 'anqa'en da 'are'enaxat, nache 'auapalaxat qome da lta'araic ỹasouaxashet.

Salmos 99:8

'Am Nataxala' maye Qanatamnaxala', 'am, 'auasateguet co'ollaxa da lỹaxanaxac somayepi. Qaq somayepi nache 'Am Natamnaxala' maye 'auchoxoren somayepi, na'aictaxa co'ollaxa da 'auo'ot da nhuaxanaguec souaxat na lasouaxashetpi.

Salmos 109:14

Qataq Ñim Nataxala' saishet qome da icoua'ai na lasouaxashetpi so lta'a, qataq saishet da icoua'ai na lasouaxashetpi aso late'e.

Jeremías 30:11

Aỹem Nataxala', san da ỹa'aqtac da 'am soota'aguet da yaqto' 'am ñeca'alaxatec. Aỹem selaxachigui qome 'enauac nam ỹotta'a't shiỹaxauapi, maye qami' selagaxaaleguete co'ollaxa. Qalaxaye 'am saishet da 'am selagaxachigui qome, nacherata da sauo'o ca 'anhuaxanaguec maye naigui nam 'auo'otpi: qaq saishet da saq sauo'o ca 'anhuaxanaguec.