Éxodo 29:9 - La'aqtaqa Ñim Lo'onatac 'Enauacna 2013

⁹ Ime, nache nsaachiguilo 'anqa'en caua lasot alaxa, ñi Aarón qataq ñeua llalqa, nataqa'en 'anaxanaxanguilo caua lqaic alaxa. Qaq 'era da qonetec da yaqto' huo'o da 'eneque da 'aỹa'anaguilo da lo'onataxanaxa'c, qaq damaye nache 'eetai' qome da llecỹaxac ca ntaxaỹaxanaxanecpi.

Éxodo 29:9 Referans Kwoze

Números 18:7

Qaq 'am qataq na 'aỹa'alaqpi maiche qoviỹapegue' qome da qaro'onataxanaxaqui da qami' ntaxaỹaxanaxanaqa, qataq na no'onatacpi añi nca'atoxonaxalate, qataq na pa'auo ñi napoxonaxat. Nache de'era no'onataxanaxac qauo'oche, cha'aye qami' sanaguilo da qami' ntaxaỹaxanaxanaqa. Qaq da huo'o ca ỹacoolec de'era no'onataxanaxac da saishet da qoỹanagui co'ollaxa da ntaxaỹaxanaxanec, nache camaye qaỹalauat.»

Deuteronómio 18:5

Cha'aye Ñim Nataxala' maye Qanatamnaxala'ai, Ñimaye lca'aguishec na leviitapi ỹachegoxottoigui na maiche nalamaxat nhuo' le'ecpi, yaqto' namayepi qataq ca chegoxoguetpi, nache 'eetai' da ilotague' da lataxac da qanatamnot Ñim Nataxala'.

Números 25:13

qaq ỹoqo'oye nagui damaye qataq ca chegoxoguetpi qome, ñaỹamaxate' da sanem da chochaq tatec da lo'onataxanaxac da ntaxaỹaxanaxanecpi, cha'aye Aỹem deca'alaxaalec, qataq ỹo'ot da qaỹapalaxat na lasouaxashetpi na Israel le'ecpi.»

Números 16:40

yaqto' so Israel le'ecpi saishet da icoua'ai de'era, da ca chegaqauec shiỹaxaua da saishet da chegoxoguet so ntaxaỹaxanaxanec Aarón, nache saishet da ỹo'ot ca nchenaxanaxat da ỹanot Ñim Nataxala', cha'aye ishet da 'eeta'am da huaigui so Coré qataq so laỹepi. Cha'aye nache la'aqtac Ñim Nataxala' co'ollaq hueqattega so Moisés.

Números 16:35

Qalaxaye so lanataqa' Ñim Nataxala' nataqa'en chegoqteua'a so norec, nache ỹavigaxat, nache nmichiguiñi naqa'en 'enauac se'eso doscientos cincuenta shiỹaxauapi, maye ỹavigaxattac co'ollaxa so lchenaxanaxat.

Números 16:10

Qataq Ñim Nataxala', ỹo'ot da sa qaỹapeque naqa'en 'am, qataq na 'arqaỹañecpi leviitapi, ¿Qaq nagui qalaq nataqa'en qansheetaique da qami' ntaxaỹaxanaxanaqa?

Números 3:10

Qaq so Aarón qataq na llalaqpi, nache 'anagui da lo'onataxanaxac na ntaxaỹaxanaxanec. Qaq da huo'o ca chegaqauec da ỹacoolec de'era no'onataxanaxac, da saishet da ntaxaỹaxanaxanec, nache camaye qaỹalauat.»

Levítico 8:33

Qataq saishet qome da qoquiỹa'ai ye ñegueuo ñi npe'l caua siete na'axa'te, cha'aye nache laloxoqui' da ỹataqta qami' qaiỹotaugalo da qami' qoỹanaguilo de'era qaro'onataxanaxaqui.

Éxodo 40:15

Nache 'aucoreleguete nataqa'en ca ncoraxanaxat, nache qoneteguema 'anqa'en ñi Aarón, da yaqto' itaxaỹaxanaxanqa. Qaq de'era 'eetec da qaicoreleguete ñiimaye, nachera da chochaq tatec llecỹaxac qome cam chegoxoguetpi.»

Hebreos 5:10

Ỹoqo'oye Ñim Lo'onatac 'Enauacna ỹanagui So Jesús da Lataxala' nam Ntaxaỹaxanaxanecpi da qaitaxaỹapegue' Ñimaye, 'eeta'am da lataxac co'ollaxa so Melquisedec.

Éxodo 32:29

Nache so Moisés 'enapeco': «Nagui qauacoñiiguet da huo'o naq 'enec da qoñiita, cha'aye Ñim Nataxala' qami' ỹanaguilo da qami' ntaxaỹaxanaxanaqa da qaitaxaỹapegue' Ñimaye. Cha'aye ñi 'oonolec da qoñiita dataỹa'aguet da nqanaxat na maiche llalec, qataq lqaỹa, souaxat da qaualaqaiguet Ñimaye.»

Éxodo 28:1

«Qaq 'am, qonapega qome ñi Aarón qataq soua llalqa Nadab, Abiú, Eleazar qataq so Itamar da yaqto' nachesoua qome soua itaxaỹaxanaxanqa da sachegoxotaigui na Israel le'ecpi.

Éxodo 27:21

Qaq so Aarón qataq soua llalqa nache huapegueto da yaqto' nache 'eetai' da 'ettaigui ye na'a'q qataq ye pe aca ncoỹaraxanaxaquipi maye netaña ca pa'aueegue da laỹe ca netaña aca laỹe' caua aỹamaxataxaco. Qaq 'era qome, da nache 'eetai' lataxac da ipacchigui da ỹo'ot na Israel le'ecpi, qataq cam chegoxoguetpi qome».

Levítico 8:1

Nache Ñim Nataxala' 'enapega so Moisés, 'eeta':

Levítico 8:13

Ime, nache 'enapegalo soua llalqa so Aarón da nquiguereuo, nache ỹaañiguilo ñi 'oonolec soomaye soua alogo, qataq nsaachiguilo naqa'en soua lasot alaxa, qataq ỹanaxanaxaanguilo soua lqaic alaxa, nache ỹataqta ipacchigui da lamaxasoxonaxac Ñim Nataxala'.

1 Samuel 2:30

Qaq souaxat de'era, nache Ñim Nataxala' maye Natamnaxala' na Israel le'ecpi, 'am 'enapega 'eeta': Aỹem san co'ollaxa so ỹa'aqtac da 'am qataq na 'aỹa'alaqpi, qataq nam chegoxoguetpi so 'arta'a da nache 'eetai' da Aỹem do'onataxaatacot, qalaxaye nagui 'am shenapega da nache tachiguiña de'era, cha'aye Aỹem sho'oxoren ca Aỹem ỹo'oxoreetac, qataq qaica ca la'amaqchec ñaqa'en cam Aỹem ỹo'otan.

Jueces 17:5

Nache so Micaía huo'o co'ollaxa so natamnaxaqui naña so lma'. Nataqa'en ỹo'ot so lapo' so ntaxaỹaxanaxanec qataq so nqolacpiolec, qataq ỹanagui da ntaxaỹaxanaxanec so 'oonolec so llalaqpi.