Éxodo 24:6 - La'aqtaqa Ñim Lo'onatac 'Enauacna 2013

⁶ Ime, nache so Moisés ỹacona so laỹe se'eso ntago'q ỹauo'o aso laỹe'pi. Qaq so laỹe se'eso ntago'q, qalaxaye ichegoxolec aso nca'atoxonaxalate.

Éxodo 24:6 Referans Kwoze

1 Pedro 1:19

nachaqrata da desheetenaxanalo soua ltago'q So Cristo maye ỹataqta qaica ca 'ena'ama da lya'c. So Cristo co'ollaq qaỹalauat da qaiuaxaneguet so npe'enaxaqui, nache Somaye 'eeta'am ca qoỹaneuo nachetaqtaxanaxat qagueta llalec maye ỹataqta qaica ca lque'emaxa.

Éxodo 24:8

Ime, nache so Moisés ỹacona se'eso ntago'q, nache ichegoxolec 'enauac so shiỹaxauapi. Nache 'enapeco': ‹Ne'ena ntago'q, nachena na ỹoqta 'itchiguiñi naqa'en da Ñim Nataxala' qami' naỹamaxateto, chegoqchiguilo ne'enaua la'aqtaqa Ñimaye›.

Hebreos 9:18

Qaq ỹoqo'oye Ñim Lo'onatac 'Enauacna co'ollaq ỹo'ot so hua'auchiguiñi naỹamaxataxac, nache ỹataqta qalota so qaỹalauat shiguiỹac.

Levítico 4:6

nache ỹa'ayingui ana llaxaata ca ntago'q qataq siete da ỹe'eguelaxalec da ichegoxogue da pa'aỹa'ague ñi napoxonaxat, ỹauaachigui naqa'en Ñim Nataxala'.

Hebreos 12:24

Qami' mashe qanquiquiiua'a So Jesús, qataq qantooñita'ac da chegoqchigui Somaye da Ñim Lo'onatac 'Enauacna naralaxat da naỹamaxataxac da naỹamaxatto qami'. Qana'achec da chegoqchiguilo soua ltago'q So Jesús maye huecolde'c co'ollaq qaỹalauat da qaỹapalaxa't naua qarasouaxashe'ete maye chegaqaiguilo da qaye'etaxaloxo. Qaq ỹoqo'oye So Jesús napacalec da la'amaqchec so Abel, cha'aye soua ltago'q so Abel saishet da ỹa'n ca nchoxonnataxanaxa, nachaqrata da iỹaxaatraique ca lvi'.

Colosenses 1:20

Qataq nataqa'en ỹachegoxotchigui So Cristo da 'enauac nam huetalec ana 'alhua huo'o da l-lagaxayec. Qaq ỹo'ot de'era nlagaxayec, ỹachegoxotchigui naqa'en da l-leuaxa Somaye co'ollaq qaiuaxaneguet so npe'enaxaqui.

Levítico 3:8

nache ỹashel-lec na lqaic. Ime, nache ipelecot na lqosot huaña naqa'en ye ñegueuo ñi npe'l maye huaña naxa da qanauane' Ñim Nataxala'. Ime, nache ñeua llalqa so Aarón icoroto naua laỹel añi nca'atoxonaxalate ca ltago'q.

Levítico 3:2

Nache que'eca ỹaneuo aca lachetaqtaxanaqte, camaye nacheca ca ỹashel-lec na lqaic que'eca shiguiỹac, ime nache ipelecot na lqosot huaña naqa'en ye ñegueuo ñi npe'l maye huaña naxa da qanauane' Ñim Nataxala'. Qaq ñeua llalqa so Aarón maye ntaxaỹaxanaxanaqa, icoroto naua laỹel añi nca'atoxonaxalate ca ltago'q que'eca shiguiỹac.

Levítico 1:11

qataq da ipelecot na lqosot, nache ỹachaña da pa'aỹa'ague da sheu' añi nca'atoxonaxalate, huaña naqa'en ye lanataqa' Ñim Nataxala'. Nache ñeua ntaxaỹaxanaxanaqa maye chegoxogueta so Aarón, icoroto naua laỹel añi nca'atoxonaxalate ca ltago'q que'eca shiguiỹac.

Levítico 1:5

Ime, nache ỹalauat, ipelecot na lqosot que'eca huaca llalec, huaña naqa'en ye lanataqa' Ñim Nataxala', qaq ñeua llalqa so Aarón maye ntaxaỹaxanaxanaqa da qaitaxaỹapegue' Ñimaye, nache ỹacoora ca ltago'q que'eca shiguiỹac nache icoroto naua laỹel añi nca'atoxonaxalate maye netaña ye ñegueuo ñi npe'l.

Éxodo 29:20

Qaq da ime, nache 'aualauat, qataq 'auacona ca laỹe ltago'q nache 'aua'amen ana aloiguishe ltela da'am ñi Aarón, qataq ñeua llalqa, qataq naua aloiguishe llaxaata late'erail, qataq naua aloiguishe lqona late'erail.

Éxodo 29:16

Qaq da ime, nache 'aualauat, nache ca ltago'q 'achegoqoto caua laỹel aca nca'atoxonaxalate,

Éxodo 12:22

Qaq ca ltago'q huo'o ca qauachiỹangui laỹe'. Ime, qaq qauacoñiỹa aca naqtole hisopo, nache qa'ailchiingui ca ntago'q, nache qaua'amiñi' 'enauaque caua laso'omi ca nỹec. Qaq saishet qome da huo'o ca pa'auec da qoñiita qom saxanaxa da yo'oxoñi.

Éxodo 12:7

Qaq qom ime, nache qauacoñiỹa ca ltago'q que'eca qagueta llalec, nache qaua'amiñi' 'enauaque naua laso'omi que'eca nỹec maye huaña da qanallec que'eca qagueta llalec.

1 Corintios 11:25

Qaq co'ollaq mashe ime da lquia'axac, nache ỹacona aso ỹomaxaqui. Nache 'enapeco': «Ana'ana ỹomaxaqui, anamaye naigui da dalaxaic naỹamaxataxac Ñim Lo'onatac 'Enauacna da qami' naỹamaxatto, chegoqchiguilo naua itago'q. Qaq da ivita da qanỹomiigui, nache qaltaq qauennache Aỹem.»

Hebreos 8:9

So hua'au ñaỹamaxataxac, nache sacoota'a na lhuaq som hua'au qarta'ailpi qataq ñeqateeguesop ye 'alhua Egipto. Ime, nache sauo'o so ñaỹamaxataxac da ñaỹamaxate' somayepi. Qalaxaye somayepi saishet da ipaguelec, ỹoqo'oye saxaañi da seqochetega somayepi.

Hebreos 9:19

Da hua'auchiguiñi 'eeta': so Moisés da'aqtaxanem 'enauac so lauo' le'ecpi da lamaxasoxonaxac qataq na lqataxacpi. Ime, nache ỹacona so qagueta laue togaxaraic qataq aso lcoue ana huoue le'enaxat hisopo, nache ỹelchiingui so 'etaxat maye ỹaleegueta naua ltago'q so huaca llalec qataq so quetaq. Ime, nache ichegoxolec aso nere maye nanettaleguete naua la'aqtaqa Ñim Lo'onatac 'Enauacna, nataqa'en ichegoxolec 'enauac so Israel le'ecpi.

Hebreos 9:21

So Moisés nataqa'en ichegoxoleguete co'ollaxa soua ntago'q se'eso npe'l qataq nam no'onataxanaxatpi maye qaiueetac naxa da qaỹo'ot da ño'oxonnataxanaxac.

2 Reyes 17:15

Nache saishet da ỹaconeguet nam lqataxacpi, qataq da naỹamaxataxac Ñimaye co'ollaq naỹamaxate' so hua'au lta'alpi, qataq na lamaxasoxonaxacpi maye ỹanem somayepi. Nache somayepi natamnot so saq 'en atamnaxala'pi maye qaica ca naigui, nache somayepi ivira'a da nataqa'en qaica ca naigui, souaxat da ỹe'enaxat da lataxac so ỹotta'a't shiỹaxauapi maye lauoreuapi, maye Ñim Nataxala' saỹashenem co'ollaxa somayepi da ỹe'enaxat.

Salmos 99:6

So Moisés qataq Aarón nache ỹalectaiguilo co'ollaxa so ntaxaỹaxanaxanecpi, qataq so Samuel ỹalectaigui co'ollaxa som ỹo'oxoreetac da le'enaxat Ñimaye. Qaq naxa somayepi da iỹaxanot Ñim Nataxala', nache Ñimaye ỹasateguet da lỹaxanaxac.

Jeremías 31:32

Que'eca ñaỹamaxataxac saishet qome da 'eeta'am, dam ñaỹamaxataxac maye so'ot co'ollaq ñaỹamaxate' som hua'au lta'alpi namayepi, co'ollaq sacona na lhuaq da ñeqateeguesop ye Egipto, cha'aye somayepi saỹalaxalec co'ollaxa da ñaỹamaxataxac, na'aictaxa da Aỹem ỹataqta ỹalamaxat somayepi. Qaq 'era da ỹa'aqtac Aỹem, Nataxala'.