Éxodo 23:25 - La'aqtaqa Ñim Lo'onatac 'Enauacna 2013

²⁵ Nacherata da Aỹem qanatamñiitacot, Aỹem Nataxala' maye Qanatamnaxala'ai, yaqto' qami' sechoxonneque ca ỹotta'a't nallec qataq ca qaraquipi. Qataq aỹem seỹotauga qome nam nalolaxapi,

Éxodo 23:25 Referans Kwoze

Deuteronómio 7:15

Qataq Ñim Nataxala' ỹataqta qami' ntela'alo qome, saishet da qami' hueque naqa'en na nalolaxasat, qataq na ỹotta'a't napiina maye iuaxanec co'ollaxa so Egipto le'ecpi, nachecata na qami' ipa'agueeta'ape maye huec naqa'en.

Éxodo 15:26

Nache 'enapeco' da la'aqtac: «Aỹem Nachaỹem Nataxala' maye Qanatamnaxala'ai, qami' qom ỹataqta qauloitelec da ỹa'aqtac, qataq qom qauo'oche cam saỹamaxareeta, qataq qaualaqailec da ỹamaxasoxonaxac, qataq da qaupaquiiteleguete naua iqataxaco, nache aỹem saishet qome da ñamaq na nalolaxapi maye ñamaxa co'ollaxa ye Egipto le'ecpi, cha'aye aỹem Nachaỹem Nataxala' maye ishet da qami' ñatare'n».

Josué 22:5

Qalaxaye nacherata da qami' seqaaleguete da ỹataqta qaupaquiichiguilo qome 'enauaque naua 'ena'ape naua namaxasoxonaxaco qataq naua nqataxaco, maye qami' ỹanema so Moisés, maye lamaxashec Ñim Nataxala' maye 'eeta': Ỹataqta qauauochec Ñim Nataxala' maye Qanatamnaxala'ai, qataq nache 'eetai' qome da qoquiiteguelo naua lleco Ñimaye, qataq da qaualaqaigueta naua lamaxasoxonaxaco, qaq nacheñita qome da qoquiitegue, qataq ỹataqta qaumachiỹo'ot da qarquiyaqteỹaxaqui, qataq da qanachaalataxaqui da qauo'onataxañiitacot Ñimaye.»

Isaías 33:24

Nache nam hueta'a yemaye qaica qome ca, 'eeta': «Aỹem sano'on.» Cha'aye Ñim Nataxala' ỹapalaxat qome na lasouaxashetpi nam hueta'a ye Sión.

Salmos 103:3

Cha'aye Ñimaye nacheñi ñi ỹapalaxat 'enauac na ỹasouaxashetpi, qataq nataren 'enauac na ỹalolaxasat.

Deuteronómio 7:13

Nache Ñimaye ỹataqta qami' ỹauoteque, qami' ichoxore'n, qataq nquictauec naqa'en na qaỹa'alquipi. Qataq ỹanem da lchoxonnataxanaxa ca qaỹa'alquipi qataq ca qana'alhuai no'on naqa'en da 'alaỹaxac ca qorañiguishequi, qataq ca 'atetpi, huaca qataq aca qagueta da huaña yi'iye 'alhua maye ỹachaxanapeguem co'ollaxa da ỹanem so hua'au qarta'ailpi.

Deuteronómio 10:12

Qaq nagui qami' Israel le'ecpi, Ñim Nataxala' maye Qanatamnaxala'ai, ¿Negue't ca iỹaxanaique da qauo'oche? Qomye huo'o naq 'enec qanqa'eñi Ñimaye, qataq qaualaqaiguet, qataq qauauochec, qataq qaumachiỹo'ot da qarquiyaqteỹaxaqui, qataq da qanachaalataxaqui,

Deuteronómio 6:13

Ỹoqo'oye huo'o naq 'enec qanqa'eñi Ñim Nataxala' maye Lo'onatac 'Enauacna, qataq nacheñita qaualaqaiguet. Qataq da qaỹa'añi ca qara'aqtaqui qalaq qauacoñiỹa da le'enaxat Ñimaye.

Mateo 4:10

Nache So Jesús 'enapego' somaye, 'eeta': –'Am pa'aguenataxanaxaic, aỹem qoca'ai, cha'aye ye nanettalec ana nere maye huetalec na la'aqtacpi Ñim Lo'onatac 'Enauacna 'eeta': «'Avio'oxoren Ñim Lo'onatac 'Enauacna, qataq nachaqñita da 'aualaxaguet.»

1 Samuel 12:20

Nache so Samuel, 'enapeco': Saishet qome da qayi'i. Cha'aye 'eesa da ỹataqta qauem da qauo'oche, qalaxaye nagui nache saishet qome da qoquiỹa'ai Ñim Nataxala', nacherato' da ỹataqta qaumachiỹo'ot da qarquiyaqteỹaxaqui da qavio'oxoyiñi.

Deuteronómio 10:20

Huo'o naq 'enec qanqa'eñi Ñim Nataxala' maye Qanatamnaxala'ai, qataq nacheñita da qavio'oxoyiñi, saishet da qavio'oxoyiñi ca ỹaqa'a atamnaxala'pi. Qaq da huo'o ca qaỹa'añi qara'aqtaqui, nache chegoqchigui qanqa'eñi da le'enaxat Ñimaye.

Josué 24:21

Nache so nhuo' le'ecpi qaỹasategueto' so Josué, 'eeta': «Saishet da shenaqtec qome de'era, cha'aye qomi' so'onataxanaqot qome Ñim Nataxala'.»

Deuteronómio 13:4

Qaq nacheñita Ñim Nataxala' maye Qanatamnaxala'ai da qoquiigue qome, qataq qavio'oxoyiñi qaupaquiichiguilo naua lamaxasoxonaxaco qataq qaualaqaigueta, ỹataqta qauo'oche' naua 'ena'ape, qataq saishet da qoquiỹa'ai Ñimaye.

1 Samuel 7:3

Ỹoqo'oye so Samuel 'enapego' 'enauac so Israel le'ecpi, 'eeta': «Da ỹoqta qaumachiỹo'ot da qarquiyaqteỹaxaqui Ñim Nataxala', nache qauasaqaiuec 'enauac nam atamnaxala'pi maye chegaqauec, qataq na lqui'ipi aso Astarté, nache qaumachiỹo'ot da qanachaalataxaqui Ñim Nataxala', qataq nachaqñita qome Ñimaye da qavio'oxoyiñiitac. Nache Ñimaye qami' nqateeguesopa qome da la'añaxac na filisteopi.»

Josué 24:24

Nache so nhuo' le'ecpi, 'enapeco': «Qomi' so'onataxanaqot qome Ñim Nataxala' maye Qanatamnaxala', qataq so'otaq 'enauac na qomi' ỹamaxaleguete.»

Malaquías 3:10

Qandoiua'a qome ana qandiezmoi añim laỹe' anamaye, maye netaigui añi atamnaxaqui, qaq yaqto' huo'o qome na nallec ñi ima'. Ñaq Aỹem qavi'eguiñic qome de'era, yaqto' qauaỹachiñi da Aỹem seshet da sauatoigui nam lasompi na piguem, da yaqto' qami' secoreleguete da ichoxonnataxanaxa, nache ivita'a da chochaq huañi da qana'achecỹaxaqui.

Isaías 33:16

qaq nacheca qome ca qaica ca ndaqtaique, qataq lle'eguenaqa' qome cam lo'oxonaxat na coma', qataq nache 'eetai' qome da huo'o ca aloq qataq saqoue ca laquip 'etaxat.

1 Samuel 12:24

yaqto' nacherata da huo'o naq 'enec qanqa'eñi Ñim Nataxala', qataq ỹataqta 'eesa da qaumachiỹo'ot da qarquiyaqteỹaxaqui da qavio'oxoreñiitac, qataq qauennachiỹa'a qome som qalota maye qami' ỹo'oteque co'ollaxa Ñimaye.

Jeremías 8:2

nache huetaiya' qanqa'en hueta'aguet na le'eraxa añi nala', qataq ñi ca'agoxoic, qataq 'enauac ana huaqaañipi, maye lauotaqte qataq do'onataxaatacot qataq ca'attague', qataq inatto'ot naxa, qataq ỹo'oxoreetac. Qaq qaica qome ca laỹona't da ilayiñi, nache laguelec na 'alhua 'eeta'am na shiguiỹac la'atec.

Levítico 11:44

Cha'aye Aỹem, Nachaỹem Nataxala' maye Qanatamnaxala'ai. Aỹem, ỹataqta qui'itta da ỹataxac, qaq ỹoqo'oye qami', iuen da ỹataqta qui'itta da qarataxaqui. Nache saishet qome da qami' na'aqche't ne'ena shiguiỹacpi maye hualectapigui'.

Levítico 26:3

Qaq da qaualaqaigueta naua iqataxaco, qataq ỹataqta qauo'oche' naua ỹamaxasoxonaxaco,

Eclesiastés 5:20

Qaq cha'aye Ñim Lo'onatac 'Enauacna nlaxatchigui añi lquiyaqte da ntonaxac, nache saishet da deuennataxaateguelec dam taỹa'ague da nachaalataxac.

Daniel 1:15

Qaq co'ollaq inoxoorec soua diez na'axa'te, nache da lashiguiỹaxa'c soomaye ỹataqta 'onaxaiqa qataq sansatte', qaq saishet da 'ena'am som laỹepi nsoxoppiolec maye deque'etegueua'a na aloq so nta'a.