Éxodo 19:5 - La'aqtaqa Ñim Lo'onatac 'Enauacna 2013

⁵ Qaq ỹoqo'oye nagui, da qami' ỹataqta aỹem qaualaqaiguet qataq qaupaquiitelec da ñaỹamaxataxac co'ollaq qami' ñaỹamaxateto, nache ỹataqta qami' ỹauotaqa'ate, qataq saishet da qoñeeta'am qome na laỹepi shiỹaxauapi, cha'aye 'enauac ana 'alhua maiche ỹalamaqte.

Éxodo 19:5 Referans Kwoze

Deuteronómio 14:2

Cha'aye Ñim Nataxala' maye Qanatamnaxala'ai ỹataqta qami' iỹotaugalo, Ñimaye qami' lca'agui'she co'ollaq lca'agui na shiỹaxauapi ana 'alhua da yaqto' ỹataqta qami' lalamaqa'ate.

Deuteronómio 7:6

Cha'aye qami', ỹataqta qami' qaiỹotaugalo da qami' lalamaqa'ate Ñim Nataxala' maye Qanatamnaxala'ai. Qataq Ñimaye qami' lca'agui'she co'ollaq lca'agui 'enauac na shiỹaxauapi ana 'alhua da yaqto' qami' lalamaxatpi.

Deuteronómio 26:18

Qaq nataqa'en nagui, Ñim Nataxala', 'am da'aqtaxanem da 'am Israel, ỹataqta 'am lalamaxat, nache ipacchigui da ỹan la'aqtac co'ollaxa, ỹoqo'oye ỹataqta 'aualaxaguet qome 'enauac na lamaxasoxonaxacpi.

Malaquías 3:17

Ñim Nataxala' maye Qaica ca Ỹaqalanapec 'enapec: «Aỹem seqataxaatai' ca 'oonolec na'a'q, maye huaigui da namayepi ỹe'eguelaxa da qaltaq ỹalamaxat. 'Eeta'am ca nta'a da ichoxoren ca llalec, qaq nache sheetec qome da qaltaq sechoxoren namayepi.

Éxodo 15:26

Nache 'enapeco' da la'aqtac: «Aỹem Nachaỹem Nataxala' maye Qanatamnaxala'ai, qami' qom ỹataqta qauloitelec da ỹa'aqtac, qataq qom qauo'oche cam saỹamaxareeta, qataq qaualaqailec da ỹamaxasoxonaxac, qataq da qaupaquiiteleguete naua iqataxaco, nache aỹem saishet qome da ñamaq na nalolaxapi maye ñamaxa co'ollaxa ye Egipto le'ecpi, cha'aye aỹem Nachaỹem Nataxala' maye ishet da qami' ñatare'n».

Salmos 135:4

Cha'aye Ñim Nataxala', lca'aguishec co'ollaxa so Jacob, som Israel da yaqto' lalamaxat.

Deuteronómio 4:20

Cha'aye Ñim Nataxala' qami' ỹacoosopa co'ollaxa da qami' nqateeguesopa ye Egipto maye 'eeta'am aca nqatelaxanaxaqui, maye lqatelaxaqui ca lcat, da yaqto' ỹauo'oi qami' lalamaqa'ate Ñimaye.

Éxodo 23:22

Qaq qom ỹataqta qaualaqaiguet, qataq qauo'oche 'enauac nam qami' samaxaleguete, nache aỹem ỹataqta ñepa'aguene' qome cam qami' ipa'agueeta'ape, qataq ñeqanaxat cam qami' nqanaxatta'ape.

Tito 2:14

Somaye nañan co'ollaxa da qomi' ileualeguete, cha'aye nshetaique da qomi' nca'alaxateeguesopa na qauemsat, qataq qomi' iqui'itaxa't da ỹauo'oi qomi' lalamaqa'ate, qataq da yaqto' so'otaq ca ỹaỹamaqchiguiñi.

Deuteronómio 10:14

Cha'aye Ñim Nataxala' maye Qanatamnaxala'ai, lalamaxat na npa'aguiñi, qataq na ỹoqta pa'asheguem na piguem, qataq ana 'alhua qataq 'enauac na huetalec anamaye.

Éxodo 9:29

Nache so Moisés, 'enapeco': «Qom choche senoxoneueegue da laỹe ne'ena nỹecpi, nache sachaxaayishigue'm naua ihua'q da ñeqouagaxaunot Ñim Nataxala', yaqto' vi'iiguet ana lache qataq na nalataxa, yaqto' 'am 'auaỹateeta da ana 'alhua lalamaqte Ñim Nataxala'.

Salmos 24:1

Ñim Nataxala' lalamaqte 'enauac ana 'alhua, qataq 'enauac nam huetalec anamaye, qataq nam netalecpi anamaye.

1 Corintios 10:26

Cha'aye ana 'alhua qataq 'enauac nam huetalec, namayepi lalamaxat Ñim Nataxala'.

Da na'aqtaguec so Job 41:11

¿Negue'tom ca ishet da delogui' somaye, nache ishet da no'oita qataq nca'altauec?

Deuteronómio 5:2

Ñim Nataxala' maye Qanatamnaxala', qomi' naỹamaxateto co'ollaq huaña añi qasoxonaxa Horeb.

Hebreos 11:8

So Abraham huo'o da lpi'iỹaxac Ñim Lo'onatac 'Enauacna, ỹoqo'oye ỹalaxaguet Ñimaye co'ollaq 'enapega da ca'ai ye na'alhua da taỹa ca lỹa 'alhua maye ỹami' Ñimaye, nache so Abraham ỹalaq na'aictaxa da saishet da ỹoqta ỹaỹateeta cam taỹa'ague.

Isaías 43:1

Qalaxaye 'am Israel, maye 'auachegoxoguet so Jacob, Ñim Nataxala' maye 'am lo'onatac, 'eeta': Saishet qome da 'añe'etac, cha'aye Aỹem 'am ñeca'alaxatec, Aỹem sauo'o co'ollaxa da 'are'enaxat, cha'aye 'am ỹalamaxat.

Isaías 41:8

«Qalaxaye 'am Israel, maye 'am ỹamaxashec, 'am Jacob maye 'am ica'aguishec, maye 'auachegoxoguet so ñauochaxaua Abraham.

Salmos 25:10

Qaq 'enauac de'era llecỹaxac Ñim Nataxala' huetaigui da lsoxoyec qataq da 'eesa lataxac, da yaqto' talec nam ipacchigui da naỹamaxataxac qataq na lamaxasoxonaxacpi Ñimaye.

1 Samuel 15:22

Huaña nache so Samuel, 'enapeco': «Ñim Nataxala' ỹataqta ỹactec da ỹaỹamaxareeta da qaỹalaxaguet, saq 'ena'am da qoỹanot aca nachetaqtaxanaqte qaỹavigaxatta qataq 'onaxaic naqa'en da qaỹalaxalec qataq da qailoolec ca 'enapec Ñimaye saq 'ena'am da qoỹanot aca nachetaqtaxanaqte huo'otaq da qaỹavigaxat na lcheta ca qagueta.

Josué 24:24

Nache so nhuo' le'ecpi, 'enapeco': «Qomi' so'onataxanaqot qome Ñim Nataxala' maye Qanatamnaxala', qataq so'otaq 'enauac na qomi' ỹamaxaleguete.»

Isaías 1:19

Da qauasacheeguet da qami' laxaraiqa, qaq huaña nache qolliquiitac qome na ỹataqta no'on maye chegaqaigui ana 'alhua,

1 Reyes 8:53

Cha'aye 'Am Nataxala', 'auỹotauga co'ollaxa namayepi da yaqto' 'aralamaxatpi, co'ollaq ỹalecta'aguet na ỹotta'a't shiỹaxauapi ana 'alhua, cha'aye nachera da 'ara'aqtac co'ollaq qonapega som 'aramaxashec Moisés, co'ollaq 'anqateeguesop ye Egipto so qarta'alpi.»

Deuteronómio 28:1

Da ỹataqta 'aualaxaguet Ñim Nataxala' maye 'Anatamnaxala', qataq 'aupacchigui da 'auo'ot 'enauac na lamaxasoxonaxacpi maye 'am samaxalec da 'auo'ot nagui, nache Ñim Nataxala' ỹo'ot qome da 'anataỹaña 'enauac na ỹotta'a't shiỹaxauapi ana 'alhua.

Isaías 56:4

Cha'aye Ñim Nataxala', 'eeta': Nam qaicaua naua lola da huo'o naq 'enec naqa'en ye na'a'q mataxaqui, qataq da ipacchigui da ỹo'ot ca sheetapeguec, qataq saishet da ca'ai da ñaỹamaxataxac,

Éxodo 24:7

Qaq co'ollaq ime, nache ỹacona aso nere maye huetalec da aỹamaxataxac, nache itaxaỹaxan, na'axaỹaxana naqa'en so shiỹaxauapi. Nache somayepi 'enapeco': ‹Qomi' so'otaq qome 'enauac nam qomi' ỹamaxaleguete Ñim Nataxala'›.

Jeremías 7:23

Qaq nacherata da samaxalec, da Aỹem ỹalaxaguet, qaq da 'eetec de'era, qaq nachaỹem da Aỹem Natamnaxala', qataq nache ỹalamaxat se'eso nhuo' le'ecpi. Qaq shenapega somayepi da ỹalaxalec dam samaxalec yaqto' no'on da llecỹaxac.

Deuteronómio 11:27

Da nchoxonnataxanaxa qauacoñiiguet qome da qaualaqaigueta naua lamaxasoxonaxaco Ñim Nataxala' maye Qanatamnaxala'ai, nam qami' samaxaleguete nagui da qaualaqaigueta.

1 Corintios 10:28

Qalaxaye da huo'o ca qami' da'aqtaxanema, 'eeta': «Ne'ena lapat, mashe qoỹanot na qanatameetacotpi maye saq 'en qataq choche ne'enaqtacpi,» nache saishet da qolliqui, yaqto' saishet da qauque'emaqchichi da lhuennataxac cam qami' da'aqtaxanema, cha'aye qami' qaica ca 'eetec da qolliqui qalaxaye cam qami' da'aqtaxanema maye ishet da ique'emaqchet da lhuennataxac.

Deuteronómio 14:21

Qalaxaye saishet qome da qollequi ca shiguiỹac leuaxaic, nacherata da qaỹa'añim da chec ca chegaqauec maye qami' netaiguilo, huo'otaq qaumiñiỹot ca lỹa chegaqauec maye chochaq queuoxoic, cha'aye Ñim Nataxala' maye Qanatamnaxala'ai, qami' iỹotaugalo da ỹataqta qami' lalamaqa'ate, ỹoqo'oye saishet da qauallicñiiguet na lche' aca late'e, ca quetaq llalec da qaỹa'añiiuaq.

Jeremías 10:16

¡Ñim Natamnaxala' so Jacob ỹataqta huaỹoqtec da lataxac, cha'aye Ñimaye ỹo'ot co'ollaxa 'enauac nam huo'o! Ñimaye lca'aguishec na Israel le'ecpi da yaqto' lalamaxat. Dam le'enaxat Ñimaye, 'eeta': Nataxala' maye Qaica ca Ỹaqalanapec.

Cantares 8:12

Ana'ana mil anom plata 'am qoỹami' Salomón, qaq ana doscientos qalaq qoỹami' na ilotague' na nañiguishe lma', qalaxaye aỹem maiche selotague' ana maiche ỹañiguishe lma'.

Hebreos 8:9

So hua'au ñaỹamaxataxac, nache sacoota'a na lhuaq som hua'au qarta'ailpi qataq ñeqateeguesop ye 'alhua Egipto. Ime, nache sauo'o so ñaỹamaxataxac da ñaỹamaxate' somayepi. Qalaxaye somayepi saishet da ipaguelec, ỹoqo'oye saxaañi da seqochetega somayepi.

1 Pedro 2:9

Qalaxaye qami' qaualliquiitaigui na llalaqpi Ñim Lo'onatac 'Enauacna; qami' ltaxaỹaxanaxanaqa na shiỹaxauapi da qauo'onataxañiitacot Ñim Nta'a; qataq qami' lalamaqa'ate. Qaq de'era chegoqchigui Ñim Lo'onatac 'Enauacna co'ollaq qami' nqateeguesopa na napalaxa maye nachera da ñe'etaxaloxo, nache qami' inoxonaqcheteua'alo da yo'oqchiguiñi maye qaica ca 'ena'am da lyac. Qaq ỹoqo'oye qaua'axache da llo'oxoyec Ñim Lo'onatac 'Enauacna maye qami' ỹo'oteque.

Génesis 17:9

Qaq nataqa'en Ñim Lo'onatac 'Enauacna 'enapega so Abraham, 'eeta': «Qaq ỹataqta 'aupaqueelec qome da ñaỹamaxataxac, 'am qataq 'enauac ca 'am chegoxoguetpi.

Éxodo 6:7

Qataq saconeua'a da qoñiita da yaqto' sauo'oi qami' ỹalamaqa'ate, qaq Aỹem Nachaỹem Qanatamnaxala'ai. Yaqto' qami' qauaỹaañita da Nachaỹem Nataxala', qataq Nachaỹem Qanatamnaxala'ai maye qami' ñeca'alaxateeguesopa da qapa'atta qaro'onataxanaxaqui maye qami' ỹacheleguete na Egipto le'ecpi.

Éxodo 8:22

Qalaxaye qom ivita da ipacchigui de'era, qaq aỹem qome seỹotauga ye 'alhua Gosén, yem netalec ye ỹalamaxatpi. Yemaye qome saishet da huo'o aca 'oonole ncoga, yaqto' 'am 'auaỹateeta da Aỹem, maye Nataxala', soota'a ne'ena 'alhua.

Deuteronómio 28:9

Qaq qom ỹataqta 'aualaxaguet na lamaxasoxonaxacpi, qataq qoquetelec da lataxac da llecỹaxac Ñim Nataxala' maye 'Anatamnaxala', nache ỹataqta 'itchiguiñi naqa'en da 'am iỹotauga da ỹataqta 'am lalamaxat, qataq ipacchigui da 'am ỹachaxanapeguem co'ollaxa.

1 Crónicas 17:22

Cha'aye 'am, 'auacona co'ollaxa da 'aralamaxat na Israel le'ecpi, yaqto' chochaq tatec da 'aralamaxat namayepi, qaq 'Am Nataxala', nache 'am da 'Am Natamnaxala' namayepi.

Ezequiel 16:8

Qaq ime, nache qaltaq 'am ñelectot, nache sela'a da mashe ishet da 'auauonaxan. Qaq huaña nache 'am sepegueelec so ipo', nache sapolec da 'aro'ocỹaxac nache 'am ñauone', qataq 'am ñaỹamaxate', qaq huaña nache ỹataqta 'am ỹalamaqte. Qaq 'era da ỹa'aqtac Aỹem Nataxala'.

Amós 3:2

«Nache qamiite' da qami' lleca'aua'alo, co'ollaq lleca'agui nam nhuo' le'ecpi ana 'alhua. Qaq ỹoqo'oye sauo'o qome ca qanhuaxanaguiiqui, souaxat nam qauemsat maye qauo'oche».

Amós 6:1

¡Choxoraxaso' qome nam ỹataqta ỹe'emaqtac da hueta'a ye Sión! ¡Qataq nam pe'etega añi qasoxonaxa ye Samaria! ¡Qataq choxoraxaso' nam 'amaqtaqaicpi lataxala'pi nam ỹotta'a't shiỹaxauapi, maye nam Israel le'ecpi pe'etecot naxa!

Éxodo 34:9

'Eeta': «¡'Am Nataxala'! Qom ỹataqta 'eesa da aỹem 'auchoxoren, qaq no'on da nache qomi' qoueta'agueta qome. Aỹem saỹaten da ne'ena shiỹaxauapi ỹataqta 'eesa da sa ỹalaq, qalaxaye 'onaxaico' da 'auapalaxat qome na qarasouaxashet qataq na qaye'etaxaloxosat, qataq 'auacona da ỹataqta qomi' 'aralamqa'ate.»

Levítico 20:24

Qaq ỹoqo'oye qami' sanema da ỹa'aqtac, 'eeta': ‹Yi'iye 'alhua maye lalamaxat yemayepi, qami' sanema qome da yaqto' qaralamaxache, ye 'alhua maye huaña da qaica ca qoue na qanallec›. Qaq 'era da ỹa'aqtac, Aỹem Nataxala' maye Qanatamnaxala'ai maye qami' seỹotaugalo da yaqto' qami' ỹataxaraiqa da qoviitangui na ỹotta'a't shiỹaxauapi.

Deuteronómio 9:29

Qalaxaye namayepi ye maiche 'aralamaxatpi, qataq 'anqateeguesop co'ollaxa ye Egipto 'aurolec da ỹataqta lta'araic 'ara'añaxac.›»

Deuteronómio 26:19

Qataq Ñimaye 'am ỹo'otec qome da 'anapacalec 'enauac na ỹotta'a't shiỹaxauapi maye lo'onatacpi, yaqto' 'am qaỹo'oxoren. Qataq no'on da 'ana'aqtaguec cha'aye 'am iỹotauga da 'am lalamaxat Ñim Nataxala', maye 'Anatamnaxala'.

Da na'aqtaguec so Job 41:3

¿Qataq ishet peta'a somaye da 'am nachoxonnot da yaqto' 'auchoxoren, qataq da 'am nachoxoreetot da 'am iỹaxanot?

Jeremías 13:11

Qaq cha'aye dam 'eetec ca saataxaqui da ipataqta't na lasot ca shiỹaxaua, qaq nachera da sheetec co'ollaxa nam nhuo' Israel le'ecpi, qataq 'enauac na nhuo' le'ecpi ye Judá, da ỹataqta na'attaua'a Aỹem da yaqto' ỹalamaxatpi, qataq da ỹachaxan da ỹe'enaxat, qataq da chegoqchigui namayepi da huo'o naq 'enec qanqa'en Aỹem qataq da ỹo'oxoyec. Qalaxaye namayepi saishet da Aỹem ỹalaxaguet. Qaq 'era da ỹa'aqtac Aỹem Nataxala'.