Ester 4:14 - La'aqtaqa Ñim Lo'onatac 'Enauacna 2013

¹⁴ Qaq nagui da 'añe'emaxat, qataq da qaica ca 'ara'aqtac, nache ca lca'alaxa na judiopi huo'o qome ca lỹa chegaqa'ague, qalaxaye 'am qataq na llalaqpi so 'arta'a, qaullivi qome. ¡Qaq souaxai' nachera da huo'omshe 'aviraua'a da 'am nate'e, da yaqto' qomi' 'autauan de'era souaqaigui!»

Toba del Oeste

¹⁴ Qom ja auojapegue' ñe'me Asuero nayi qaedi qo'mi yichoĝode'n, qama'le 'uo jo' qomle ga'me qat'emaĝac ga'me na'ya, qalaĝaja da'me am nataq'aen joga'me adayi yema yele'u qomle. Yelnataĝac da'me auaqauaye nayi da'me am jaliaĝana qaedi auaqanatet ta'le qo'mi alecochiyalo, da'me qo'mi judiopi.»

Ester 4:14 Referans Kwoze

1 Samuel 12:22

Qaq Ñim Nataxala' souaxat da llo'oxoyec da le'enaxat, nache saishet da qami' ca'aisalo, cha'aye Ñimaye ỹauotaique da qami' lalamaxatpi nhuo' le'ecpi.

Isaías 54:17

qalaxaye qaica co'ollaxa ca ỹo'ot ca no'ogoxonaxat maye ishet da 'am ilaxachigui. Qaq 'am 'auo'otec qome da chochaq ñe'emaxat nam 'eetega huo'o ca 'arasouaxashet. Qaq 'era da sanem, nam Aỹem ỹo'oxoreetac, dam lca'alaxa namayepi aỹem chegoqo'ot qome.» Qaq 'era da la'aqtac Ñim Nataxala'.

Deuteronómio 32:36

Ñim Nataxala' deloclec qome na lalamaxat nhuo' le'ecpi, da ila'a da mashe qaica ca la'añaxac, nache Ñim Nataxala' choche ichoxoren qome ne'ena lamaxashecpi, qom ila'a da mashe imeuo, cam huo'o da la'añaxac.

Mateo 16:18

Ỹoqo'oye Aỹem 'am sanagui da Pedro, damaye naigui da «coma'.» Qaq ne'ena coma' so'oxootelec cam 'amqaanataxanaxaicpi maye Aỹem ỹa'amaqteetac, qaq ivira'a da la'añaxac da nleuaxa saishet da ilaxachigui.

Jeremías 30:11

Aỹem Nataxala', san da ỹa'aqtac da 'am soota'aguet da yaqto' 'am ñeca'alaxatec. Aỹem selaxachigui qome 'enauac nam ỹotta'a't shiỹaxauapi, maye qami' selagaxaaleguete co'ollaxa. Qalaxaye 'am saishet da 'am selagaxachigui qome, nacherata da sauo'o ca 'anhuaxanaguec maye naigui nam 'auo'otpi: qaq saishet da saq sauo'o ca 'anhuaxanaguec.

Jeremías 46:28

'Am Jacob, maye 'am ỹamaxashec saishet qome da 'añi'i, cha'aye Aỹem 'am soota'aguet. Qaq 'era da ỹa'aqtac Aỹem Nataxala'. Qaq na'aictaxa da ñematchiguiñi qome nam ỹotta'a't shiỹaxauapi maye 'aỹa ñaqa'en co'ollaxa. Qalaxaye 'am saishet da 'am selaxachigui, nacherata da 'am serolec da nalochiguiñi lataxac da 'am ñimit. Qalaxaye saishet da sa sauo'o ca 'anhuaxanaguec.»

Esdras 9:9

Qaq na'aictaxa da qomi' nlataqa, qalaxaye saishet da qomi' 'auala't, qaq de'era 'arauotaxanaqtaic da shenaqta ỹataqta lta'araic ỹoqo'oye 'auo'otec da ye nta'alpi ye Persia, qomi' ỹanema da ñe'eguelaxasoq da ño'oxonaxasheguem añi atamnaxaqui maye 'aralamaqte, maye nlachiguiñi co'ollaxa. ¡Qaq nagui da souaqta'a ne'ena Judá, qataq na Jerusalén nache qomi' 'anpaxattaleguete qome!

Ester 2:15

Qaq aso Ester, asom llale so Abijaíl, maye ntesoqo' so Mardoqueo, co'ollaq ivita da nachaateua'a so nta'a, nache asomaye nda'a't da ỹache som ỹamaxalec so Jegay, som ỹale maye lpe'et so nta'a, qataq nauaatalec aso 'alpi, qaq aso Ester mashe 'enauac som hueta'a so lma' lta'araic so nta'a, da ỹauotec asomaye.

Mateo 24:22

Ñim Lo'onatac 'Enauacna ỹataqta ỹauotec nam maiche lca'aguishecpi, ỹoqo'oye caua na'axa'te que'eca que'eenaxac saishet da qaỹoqtre'c naqa'en Ñimaye. Cha'aye da saishet da nache 'eetec de'era Ñimaye, nache 'enauac ileu na shiỹaxauapi.

Isaías 49:23

Na nta'alpi qalaq ỹauo'o qome da 'am llalec, qaq ana lhuapi qalaq 'arsoquiaxanaxanapi. Qataq 'am ỹa'atto'oto qome naua l-llecte, qataq ichegoxouec na 'alhua naua 'arapia'ate. Qaq huaña qome nache aỹem 'auauattoota da nachaỹem Nataxala', qaq nam aỹem ỹa'amaqteetac saishet qome da hueto'ot ca lcoxo.

Ester 2:7

Qaq so Mardoqueo huo'o co'ollaxa aso lasoshe saploxo, qaq somaye ỹacona co'ollaxa asomaye da ỹaqchet da 'eco' llale, co'ollaq ileu' soua lta'al asomaye. Qaq asomaye le'enaxat Jadasá, qaq da lỹa le'enaxat Ester, qaq asomaye ỹataqta 'onaxai qataq nalochiguiñi da lataxac.

Génesis 22:14

Nache so Abraham ỹauo'o da le'enaxat se'eso 'alhua, 'eeta': «Ñim Nataxala' ỹan cam qaiuen.» Qaq ỹoqo'oye ñaq 'eetalec nagui de'era na'aqtac naxa maye, 'eeta': «Aca qaỹoqotcheguemec 'alhua, huaña da Ñim Nataxala' ỹan cam qaiuen.»

Nehemías 6:11

Qalaxaye aỹem sheeta': «Cam ỹale maye 'eeta'am aỹem, saishet da datauec, qataq saishet da nqo'ona da nqañoxotoigui aca atamnaxaqui da yaqto' nca'alec. ¡Aỹem saishet da ñeqañoxottapiguiñi!»

2 Reyes 19:3

da yaqto' da'aqtaxanem da la'aqtac so nta'a Ezequías, maye 'eeta': «Ne'ena na'a'q ỹataqta lta'araic da souaqaigui qanqui'ic, qanhuaxanaguec, qataq da ỹataqta qaica ca qomi' 'eneque qanqa'en, nache shenaqta'am aca 'alo da mashe yaqta'a da deco'o, qataq mashe qaica ca la'añaxac.

1 Samuel 17:29

¿Nache so David, 'enapeco': Negue'to' cam saỹaỹamaxañi so'ottac nagui, ye choche sechemaqtaxaatac?

Jueces 15:6

Nache so filisteopi ichemaxattac, chaq negue't cam ỹo'ot de'era, nache ivitta'a da ỹaỹaten da nacheso so Sansón som ỹo'ot de'era, souaxat so lacho' maye Timná le'ec ỹanec co'ollaxa aso llale da lhua naqa'en so lỹa ỹale, qaq huaña, nache so filisteopi nqo'ona da ỹavigaxat aso 'alo qataq so lta'a.

Da na'aqtaguec so Job 9:18

nache ỹo'ot da qaica naqa'en ca ldaqa' naua ỹa'a'che, qataq aỹem nlaxatchigui da ñequi'icỹaxac.

Levítico 26:42

Huaña, nache tachigui iuel qome da ñaỹamaxate' co'ollaxa so Jacob, Isaac qataq so Abraham, qataq seuennate yi'iye 'alhua maye sachaxanapeguema co'ollaxa soomaye,

2 Reyes 13:5

Nache Ñim Nataxala', ỹanem so lca'alaxaqui, huaña nache so Israel le'ecpi, huesoueeguesop da la'añaxac so siiriopi, nache ỹe'eguelaxa da qaltaq ỹe'emaqtac.

Ester 4:13

nache somaye ỹamaxaua'a nataqa'en de'era la'aqtac maye, 'eeta': «'Am saishet qome da 'aupettega da souaxat da qonetaigui na lma' lta'araic ñi nta'a, qaq nache 'amta maye 'am judío lashe da ishet da 'anca'alec.

Ester 4:15

Qaq huaña, nache aso Ester ỹamaxauga so Mardoqueo da lasataxac maye, 'eeta':

Ester 2:17

Nache so Asuero ỹataqta nqopita co'ollaxa aso Ester, qaq saỹauano' da 'eetec de'era somaye da huo'o aca ỹataqta nqopita asom laỹepi 'alpi, qaq 'era da 'eetec so Asuero da ỹataqta nqopita asomaye, nache somaye ỹataqta itauan asomaye, saq 'ena'am aso laỹepi 'alpi maye mashe hueta'aguet co'ollaxa somaye, qaq ỹoqo'oye ỹanaxanaxangui asomaye aso aro'o, nache ỹanagui da nate'e da nmeneguet aso Vasti.

Eclesiastés 3:7

Huo'o ye laloqo' da huo'o na qaicolaxattac, qataq huo'o ye laloqo' da qantet namaye, huo'o ye laloqo' da ñe'emaxat ca shiỹaxaua, qataq huo'o ye laloqo' da detaqa ca shiỹaxaua.