Efesios 5:3 - La'aqtaqa Ñim Lo'onatac 'Enauacna 2013

³ Qaq cha'aye qami' lalamaqa'ate Ñim Lo'onatac 'Enauacna, ỹoqo'oye no'on da saishet da qami' chemaxanguilo da huo'o ca quisheguetaxac qataq 'enauac nam laỹepi maye ishet da deshepaxanaqtaxan, huo'otaq da qaiqopita'a ca ỹaqa'a.

Nuevo Testamento Toba Sur

³ Qaq cha'ayi qami' lalamqa'te ñi Dios, qaq no'on da sa ishit qome da qami' chimaxanguilo da huo'o ca quishishaxac qataq 'enauac nam laÿipi mayi ishit da deshipaxanaqtaxan, huo'otaq da qaÿoqopita'a ca ÿaqa'a.

Nuevo Testamento Toba Sombrero Negro

³ Da'me ami, joote ami Dios lec'oqo'tepi, chane'eja 'noota ta'le ja ami 'te chimaqapegouelo ta'le 'uo ga'me nequejeguetaĝa, uotaĝa ta'le ami paĝachiguilo q'ae'n, uotaĝa ta'le yaguegue ga'me auepichítapega.

Efesios 5:3 Referans Kwoze

Colosenses 3:5

Qaq ỹoqo'oye qami' iuen da ileu qanqa'eñi da qarqopitaxanaqtaiqui maye qauem. Qaica qome ca huetapeeguet aca sa lhua, qataq saishet qome da sa qanaỹamaxachiỹapec, qataq qanlliỹañi qome da qauem qarqopitaxanaqtaiqui, qataq saishet qome da choche qanmichiita'a da choche qalaỹoñiitasheguem ana qo'omi, cha'aye damaye 'eeta'am da qanatameetacot na ne'enaqtacpi maye saq 'en.

Efesios 5:5

Cha'aye qami' qauaỹaañita da ca ncachetague' aca sa lhua, huo'otaq ca ỹo'ottac ca deshepaxanaqtaxan, huo'otaq ca saishet da machiguiñi na'aictaxa da qalota na hueto'otpi, camaye saishet da inoxoneua'a da lo'onataxanaxac So Cristo qataq Ñim Lo'onatac 'Enauacna. Cha'aye nam ỹo'ottacpi ỹataqta qauem 'eeta'am da qanatameetacot ca choche ne'enaqtac qataq saq 'en.

1 Ts 4:3

Qaq da 'eetapeguec Ñim Lo'onatac 'Enauacna, nshetaique da ỹataqta qami' qui'itte'. Qaq ỹoqo'oye saishet qome da huo'o ca lauatapiguiñi' aca sa lhua da qoñiita.

1 Corintios 6:18

Ỹoqo'oye saishet da qoquiitaigui da qarquisheguetaxaqui. Na laỹepi sa ỹaỹamaxañi maye ishet da ỹo'ot ca shiỹaxaua, namayepi saishet da na'aqchet da lo'ocỹaxac. Qalaxaye cam quetaigui da lquisheguetaxac, camaye maiche na'aqchet da lalamaxat lo'ocỹaxac.

1 Ts 4:7

Cha'aye Ñim Lo'onatac 'Enauacna saishet da qomi' iỹaxanalo da qolaqto'ot da qaye'etaxaloxo, nachaqrata da qomi' iỹaxanalo da qolaqtaigui da qui'itta achaalataxac.

1 Corintios 6:13

Nataqa'en huo'o naxa da na'aqtac, 'eeta': «Ca nallec qaỹo'ot da tangui ana qara'am, qataq ana qara'am qaỹo'ot da yaqto' ỹaconeguet ca nallec.» ¡Qaq damaye ỹoqta 'eesa! Qaq Ñim Lo'onatac 'Enauacna taỹa'a da nlaxaayiñi ne'enaua. Qalaxaye da qaro'ocỹaxac saishet da taiguet da sanaxaguet da quisheguetaxac maye sa qaishetapec. Chaqrata da so'onataxanaxa damaye, da so'onataxanaqot Ñim Nataxala', cha'aye Ñimaye maye lalamaxat da qaro'ocỹaxac.

Efesios 5:12

Cha'aye ỹataqta 'eesa da ỹo'ot da na'agaxa da qaỹa'axat nam ỹo'ottac namayepi maye ỹoxottañi.

Apocalipsis 2:21

Qaq Aỹem mashe sami' da ldaqa' añimaye, da yaqto' ỹe'eguelaxa da ỹalaxaguet Ñim Lo'onatac 'Enauacna. Qalaxaye añimaye saishet da ỹalaq da ỹo'ot damaye, qataq saishet da ỹaxaañi da ỹa'amaqteetac na ne'enaqtac nqui'ipi maye saq 'en.

1 Corintios 10:8

Nataqa'en saishet da saxaigui da quisheguetaxac, 'eeta'am da 'eetec somayepi. Qaq ỹoqo'oye ileu so veintitrés mil shiỹaxauapi so 'oonolec na'a'q.

Apocalipsis 22:15

Qalaxaye pa'atauec qome na ỹo'otta'ape naua qauema, qataq na ỹo'ottac da ldanaxanaxac, qataq nam huetapeeguet ana saishet da lhua, qataq na laataxanaxaicpi, qataq nam natameetacot nam saq 'en, qataq 'enauac nam nqopita da ỹo'ot da latenataxanaxac qataq napaxagueetega na qauem. Nache So Jesús 'enapeco':

Apocalipsis 21:8

Qalaxaye nam colanqaicpi, qataq nam saq pi'iỹa'a Aỹem, qataq nam ỹo'ot nam qauem maye sa saỹamaxaren qataq nam ỹalauat ca lỹa qataq nam huetapeeguet aca sa lhua maye saq qaỹashen da qaỹo'ot, qataq nam napaxagueetega da naconaxanaxac qataq nam ỹo'oxoreetac nam qanatameetacotpi maye saq 'en, qataq nam tenataxanaxaicpi, 'enauac qome namayepi qaỹasaxangui ca lta'araic norec maye huaña da ỹavictaigui na quiquiaxaraic. Huaña, nache chochaq tatec da saishet da nauane' Ñim Lo'onatac 'Enauacna.»

Apocalipsis 2:14

Qalaxaye Aỹem nache 'ena'am huo'o da sa saỹamaxaren da qoneta, cha'aye 'auaconeguet nam quetague' da qauem lataxac so Balaam. Cha'aye somaye ỹapaxaguenec co'ollaxa so Balac dam 'eetec naqa'en na Israel le'ecpi da yaqto' somayepi nache queto'ot da ỹo'ottac na qauem, qataq ỹayen da yaqto' somayepi chec nam mashe qoỹanot na ne'enaqtac nqui'ipi maye qanatameetacotpi qataq saq 'en, qataq da yaqto' sa ỹalaxaguet Ñim Lo'onatac 'Enauacna.

1 Corintios 5:1

Mashe sogote da qaỹaỹaana'a't da huo'o ñi 'oonolec da qoñiita huetapeeguet añi la'aale late'e da 'eeta'am naqa'en aca lhua. ¡Qaq de'era ỹataqta qauem! ¡Ivira'a nam saxanaxa da da'amqaanataxan saishet da ishet da ỹo'ot de'era!

Ezequiel 33:31

Qaq 'era da 'eetec naxa na ỹalamaxat nhuo' le'ecpi, da anac nache nso'ooñi 'am datato'ot da na'axaỹaxanalo naua 'ara'aqtaqa, qalaxaye saishet da ỹo'o't. Nacherata da ỹe'eguelaxattaleguete 'eeta'am naqa'en ca no'onec maye huetaigui da nauotaxanaqtaic, qalaxaye da lquiyaqteỹaxac quetague' da lauotaxanaqtaic ana anom plata.

Éxodo 20:17

Saishet da 'auqopitta'a ca lma' ca 'arỹa, qataq saishet da 'auqopitta'a aca lhua ca 'arỹa, huo'otaq ca l-latac, huo'otaq aca l-lata, huo'otaq ca lauegaxanaxala' huaca, nataqa'en ca lalo 'ashena, huo'otaq camachaqca nam logoxoshetpi».

Apocalipsis 9:21

Nataqa'en ne'ena shiỹaxauapi saishet da ỹaxaañi da lalaataxanaxac, qataq saishet da ỹaxaañi da ldanaxanaxac; nataqa'en saishet da ỹaxaañi da lcachaxac, qataq da ncachetague' aca sa lhua.

2 Pedro 2:3

Ne'ena napaxaguenataxanaqpi maye tenataxanaxaicpi, namayepi choche quetague' da lqopitaxanaqtaic da ỹaconeguet aca anom, qataq nauec acamaye souaxat da latenataxanaxac. Qalaxaye Ñim Lo'onatac 'Enauacna mashe qaỹoqtegue da lhuennataxac da ỹauo'o ca nhuaxanaguec namayepi, qaq namayepi saishet da ỹet que'eca nhuaxanaguec.

Hebreos 12:16

Qataq saishet da huo'o ca 'oonolec da qoñiita da nquishestac, huo'otaq da ỹo'otan Ñim Lo'onatac 'Enauacna. De'era 'eeta'am da ỹo'ot co'ollaxa so Esaú da imen da qaiqataxaatapigui' da talec, cha'aye na'auaxanec ñalec nmeneguet naqa'en so nhuoshec maye qaỹachetagui so nquia'axaqui.

2 Corintios 12:21

Qataq da seuennataxaatac, nache ỹataqta huo'o da icolanaxa da qom ivita da qami' ñamaqtegalo, nache Ñim Lo'onatac 'Enauacna ishet da ỹo'ot ca ỹa'aloxo cam ishet da aỹem nnoinaqchet, cha'aye qalota da qoñiita na saishet da ỹaxanec da lle'etaxaloxo qataq da ỹo'ottac da qauem, nachaqrata da ỹo'ottac dam sa qaishetapec, cha'aye huo'o na ñaq quetalec da ỹo'ottac da sa qaỹashen lataxac da qanayeetapeeguet aca sa nhua.

Tito 2:3

Nache 'ena'am qonapega na ỹa'axaina'pi da ỹataqta quetelec da lataxac aca quetague' Ñim Lo'onatac 'Enauacna, qataq saishet da na'aqtaqa lo'o', qataq saishet da taxai. Nachaqrata da ỹachaxana ca no'on lataxac anam saxanaxa da ỹe,

2 Timoteo 3:2

Huo'o qome na shiỹaxauapi na maiche nauoola't, qataq quetague' da lqopitaxanaqtaic ana anom. Nataqa'en huo'o qome na shiỹaxauapi ño'oxonnaxaic, 'eetega da ỹactec da la'amaqchec, saq 'ena'am na laỹepi. Saishet da huo'o ca 'enec naqa'en Ñim Lo'onatac 'Enauacna qataq saishet da ỹalaxaleguete caua yo'oqchiguilo lta'al, nachaqrata da qaica ca nmaatega qataq camachaqca ca isheuen.

Hechos 15:20

Nachaqrata da qomi' sauoqo'o aca qorere da taỹa'a namayepi da shenaqapega da ỹaxaañi da chec na nallec maye mashe qoỹanot na ne'enaqtacpi maye qanatameetacotpi, qataq saishet da huo'o ca ncachetague' aca saishet da lhua, qataq saishet da chec na lapat ca choche ichegueuo na lqosot, huo'otaq ca 'ogaxaic maye sa qaicolde'c naua ltago'q qataq saishet da chec na ntago'q.

Éxodo 18:21

Qaq 'am, 'alca'agui qome ne'ena nhuo' le'ecpi, 'alca'aua'a cam ỹalleppi maye ỹataqta nalauo, qataq ỹataqta huo'o naq 'enec naqa'en Ñim Lo'onatac 'Enauacna, qataq saq shepecaic, qataq saishet da choche nmitta'ai ca lashiichiỹaxac, qaq ca 'oonolec camayepi huo'o ca 'aupataxalec da ilo'ogue ca mil shiỹaxauapi, qataq huo'o ca 'aupataxalec da ilo'ogue ca cien, qataq huo'o ca 'aupataxalec da ilo'ogue ca cincuenta, qataq huo'o ca 'aupataxalec da ilo'oguelo caua diez.

2 Pedro 2:14

Ne'ena ỹalleppi saishet da choche ilota'a aca 'alo da huo'otaq sa iyaqa'a da hue'eguet, qataq saishet da nasamiisop da ỹo'ottac na qauem. Qataq ỹatenachettac nam saxanaxa da da'añi da lpi'iỹaxac So Cristo, qataq ỹataqta saishet da nqalat da datenataxan da yaqto' nqat aca anom. Ne'ena shiỹaxauapi namayepi Ñim Lo'onatac 'Enauacna ỹauo'o ca nhuaxanaguec qome; ¡qaq damaye ỹataqta saishet da qaiqoleguet!

2 Pedro 2:10

Que'eca nhuaxanaxanaxac ỹataqta lalamaxat nam saishet da ỹalaxalec nam lamaxasoxonaxacpi Ñimaye qataq huetaigui da ỹo'ottac 'enauac na qauem maye maiche 'eetapeguecpi. Ne'ena dapaxaguenataxaatac maye tenataxanaxaicpi ỹataqta qaramchiguilo naua lquiyaqtel qataq ño'oxonnaxaicpi, qataq saishet da ñi'iỹa da isheueetac na lamaxashecpi Ñim Lo'onatac 'Enauacna maye no'on da lataxac.

1 Pedro 5:2

Qanchilỹa'a na shiỹaxauapi maye qami' ipataxagueta Ñim Lo'onatac 'Enauacna da qauloỹeegue, cha'aye namayepi lalamaxat Ñimaye. Qanchilỹa'a namayepi 'eeta'am da ltelaqtaxanaxac ca qagueta lo'o da ntela'a aca ilotague' lalopi. Qaq damaye ỹataqta qanasapacheetelec da qauo'ocheetac, cha'aye nachera da 'eetapeguec Ñim Lo'onatac 'Enauacna qaq saishet da choche qami' qaỹamaqtaleguete. Saishet da qauo'ocheetac damaye da choche qanaquicheeta'a da qanaviqui aca anom, nachaqrata da ỹataqta qanasapacheetelec da qaro'onataxanaxaqui.

Tito 1:11

Namayepi iuen da qaỹapoguilo naua ala'api, cha'aye ỹataqta sa nhuoona't naqa'en na nhuo' le'ecpi, souaxat da dapaxaguenataxaatapeguec na sa lataxac, cha'aye choche nshetaique da nauec ana anom da ỹachegoxotaigui da latenataxanaxac.

Tito 1:7

Cha'aye ca qaipataxalec da ilo'ogue na 'amqaanataxanaxaicpi, camaye ilo'ogue 'enauac na lo'onataxanaxacpi Ñim Lo'onatac 'Enauacna. Ỹoqo'oye, iuen da qui'itta naqa'en da nachaalataxac. Saishet da na'amqaanaxaic, qataq saishet da qauemaic, saishet da taxaic, saishet da sa ncherapec, qataq saishet da quetaigui da latenataxanaxac da nmitta'a ana anom.

1 Timoteo 3:3

Qataq saishet da taxaic, qataq saishet da sa ncherapec qataq saishet da nmitta'a da cotaxac. Nachaqrata da iuen da soxoraic qataq saishet da sa lhuanguit qataq saishet da quetaigui da latenataxanaxac da nmitta'a ana anom.

1 Timoteo 2:10

Nachaqrata da na shiỹaxauapi ỹa'aalac souaxat nam no'on maye ỹo'ottac acamaye, dam lataxac aca 'alo maye ỹauotec qataq huo'o naq 'enec naqa'en Ñim Lo'onatac 'Enauacna.

Filipenses 1:27

Qaq nachaqrato' da qanpogoxoiñiỹapegue' da yaqto' da qarataxaqui nateeteguet da lapaxaguenataxanaxac So Cristo. Qaq yaqto' qom qami' sevitalo, huo'otaq da saishet, qalaxaye ñaqaiyeta ñeshetaique da aỹem nvira'a qome ca ỹa'axaỹaxac da qoñiita da saishet da qanañaxañiiñi, qataq da qanhuooñeta't, qataq da qanaỹaañeta't da qauloquiitapeguelec da qaua'axacheetac da no'on na'axaỹaxac.

Romanos 16:2

Acamaye ỹataqta ỹan da nachaalataxac da do'onataxanot So Qarataxala' Jesucristo. Ỹataqta qauloỹeeguet qome acamaye, 'eeta'am qanqa'eñi da qauacoñiiguet 'enauac nam lalamaxat llalaqpi Ñim Lo'onatac 'Enauacna, qataq qatauñic 'enauac cam iuen, cha'aye acamaye qalota na itauan, ivira'a nataqa'en aỹem.

Romanos 6:13

Qami' mashe qarellivi co'ollaxa qarỹaichiguiñi' da ñe'etaxaloxo, qalaxaye nagui qaltaq qarca'alliiuec. Qaq ỹoqo'oye saishet da qanashiñiiguet da ñe'etaxaloxo da qami' ỹo'onataxanaxaneque na qauem. Nachaqrata da qanañañiỹot Ñim Lo'onatac 'Enauacna qataq qauo'oche cam ỹo'ot da ntonaxac Ñimaye.

Romanos 1:29

Qaq namayepi ỹataqta saishet da ỹaỹamaxañi da lataxac, 'etaxaloxoicpi qataq qopitaxanaqtaqaicpi. Namayepi nataqa'en quiỹaxanaqtaqaicpi, laataxanaxaicpi, loquiaxaicpi, tenataxanaxaicpi qataq na'aqtaqa lo'opi.

Hechos 20:33

Aỹem saishet da choche ñaquitta'a co'ollaxa aca anom huo'otaq ca nogoxot.

Lucas 16:14

Nache hua'aqtega 'enauac de'era nam fariseopi maye ỹataqta lqopitaxat da nsallaxa, nache ỹe'eetac So Jesús.

Miqueas 2:2

Qaq da huo'o ye nqopita 'alhua nache ỹacona da ỹauo'o lalamaxat, qataq da nqopita ca nỹec nache ỹacona da ỹauo'o lalamaxat, qataq sa iyacnapec cam ỹale qataq cam llalaqpi maye lalamaxat que'eca nỹec.

Jeremías 22:17

Qalaxaye 'am nacherata da 'anmitta'a da nauegaxanaxac maye chegaqaigui da ncachaxac, qataq 'aualauat nam qaica ca ỹasouaxat, qataq qaica ca ldaqa' 'anqa'en, qataq 'anhuo' na 'aralamaxat 'arhuo' le'ecpi.»

Jeremías 8:10

Qaq ỹoqo'oye Aỹem sanem qome ca lỹa ỹale ana lhuapi namayepi, qataq na na'alhua taỹot ca lỹa shiỹaxaua da ỹauo'o lalamaxat. Cha'aye 'enauac na shiỹaxauapi, na 'amaqtaqaic qataq nam qaica ca la'amaqchec, nacherata da iuennatega da lauegaxanaxac maye chegaqaigui da ncachaxac, na na'aqtaxanaxanecpi qataq na ntaxaỹaxanaxanecpi 'enauac da decachetac.

Jeremías 6:13

Qaq 'enauac na ỹepi qataq nam ñaqpiolec, nacherata da iuennatega da lcachaxac da chegaqaigui da lauegaxanaxac, na na'aqtaxanaxanecpi qataq na ntaxaỹaxanaxanecpi qalaq 'enauac da decachetac.

Proverbios 28:16

Ca nta'a qaica ca ỹaỹaanapec camaye nquigaxattauec da huetaiya' naqa'en na shiỹaxauapi, qaq ca saishet da mataxalaic qalaq logoraic da nachaalataxac.

Salmos 119:36

Qaq da iquiyaqteỹaxac quetegue qome 'anqa'en na 'aramaxasoxonaxacpi, qaq saishet da quetague' aca naueque maye chegaqaigui da ncachaxac.

Salmos 10:3

Na qauemaic qalaq ño'oxoreetapigui na maiche 'eetapeguecpi, qaq na qopitaxanaqtaqaic qalaq ilattapiguiñi qataq ỹo'otan Ñim Nataxala'.

1 Samuel 8:3

Qalaxaye se'esoua llalqa, saishet da 'eeta'ama da lataxa'c so lta'a, nachaqrata da ỹataqta qopitaxanaqtaqaiqa, qataq nasheete' naxa da qaisheete'n, nache saishet da ỹo'o't ca ỹaỹamaqchiguiñi.

Josué 7:21

Can sela'a so ỹataqta 'onaxaic npo' maye qaỹachegoxota'ague da Babilonia, qataq aso doscientos aso lcatpiole plata qataq so 'oonolec laỹe' so oro maye ivi' medio kilos, ỹalectaigui som qaiuotaxanec nogoxoshetpi. Nache soqopita'alo yi'iyiua nogoxoshe'ete, ỹoqo'oye aỹem saconalo yeemaye qataq soxottrañi, selaroigui na 'alhua nam pa'auo ñi ipe'l, qaq aye lcatpi plata, nache sepa'axaachiguiñi.»

Números 25:1

Qaq so Israel le'ecpi co'ollaq netaña ye Sitín, nache so ỹalleppi ca'ata naxa da nquishestague' aso Moab lashepi,

Éxodo 23:13

Qaupaquiichigui qome 'enauac ne'ena lataxacpi da qauo'oche, qataq saishet qome da huo'o ca iỹaxaatacot ca ỹaqa'a atamnaxala', da iỹaxaataique ca ntaunaguec, qataq saishet da choche nasaqtapeguec da le'enaxat camaye.»

1 Timoteo 6:10

Cha'aye da nqopitaxanaqtaic aca yo'oqchigui anom, nachera da lpa'a' na 'enauac ỹotta'a't sa ỹaỹamaxañisat. Cha'aye mashe huo'o na ime'eguet da lqopitaxanaqtaic anamaye, nache ỹalat da lpi'iỹaxac Ñim Lo'onatac 'Enauacna, qaq nache huaña da ivireguet na qalota lqalaiguesat qataq nque'eenaxacpi.

Lucas 12:15

Ime, nache ỹamataigui som hueta'a yi'iye, nache 'enapeco': «Maxatchaxa, qarvichiỹa'aguet da nqopitaxanaqtaic da nsallaxa, cha'aye da nachaalataxac ca shiỹaxaua saishet da ỹachegoxotaigui nam saqalota lsallaxa maye hueto'ot.»

Levítico 15:18

Qataq ca ỹale da hue'eguet aca 'alo, nache caamaye iue'n da nache'l, iỹoi' na lo'o'c ỹauota'a ca 'etaxat, qalaxaye caamaye saishet da qui'itte' iviraiguilo da pe.