Efesios 1:7 - La'aqtaqa Ñim Lo'onatac 'Enauacna 2013

^7-8 Chegoqchigui da l-leuaxa So Cristo co'ollaq qaiuaxaneguet so npe'enaxaqui, da Ñim Lo'onatac 'Enauacna ỹapalaxat 'enauac nam qarasouaxashetpi qataq qomi' isoueeguesopa namayepi. Qaq de'era ỹo'ot souaxat da chochaq huañi lsoxoyec Ñimaye. Ỹachegoxotchigui dam lta'araic laỹaanec qataq lauattonaxanaxac,

Nuevo Testamento Toba Sur

⁷ Cha'ayi ÿataqta lta'adaic da lauotaxanaqtaic ñi Dios, ÿoqo'oyi qomi' nca'alaxatreec, ÿachigoxotchigui da l-leuaxa so llalec da ÿapalaxat 'enauac nam qadasouaxashitpi.

Nuevo Testamento Toba Sombrero Negro

⁷ Da'me leleuaĝa joñe'me Jesucristo ca'li uetalegue jaga'me sodoso, male Dios en qo'mi uojotedañi, da'me yapalaĝa't yemeda jogaa'me qadoeco. Nach'ena jena'me jenjo' ya'uo ca'li qa'a jouaĝat da'me yataqata eja qo'mi noqopitalo.

Efesios 1:7 Referans Kwoze

1 Pedro 2:24

So Cristo ỹache 'enauac na qarasouaxashetpi, cha'aye ileualec so npe'enaxaqui. Qaq ỹo'ot damaye yaqto' qomi' saxanaxañi 'enauac nam so'otaqtac qauem, nache ndotec da so'otaqtac cam 'onaxaic. So Cristo co'ollaxa ỹataqta qaique'emaqchet, yaqto' ishet da qami' no'oite'.

Romanos 3:24

Qalaxaye Ñimaye ỹataqta lta'araic da lauotaxanaqtaic da shenaqta. Qaq ỹoqo'oye ỹapalaxat na qarasouaxashet qataq qaca naqa'en aca lasheue. Nachaqrata da chegoqchigui So Jesús da qomi' isoueeguesopa da qanhuaxanaguec maye qomi' taleguetectaxa souaxat da qaye'etaxaloxo.

Colosenses 1:14

ỹachegoxotchigui da l-leuaxa Somaye da qomi' nca'alaxatre'c, qataq da ỹapalaxat 'enauac na qarasouaxashetpi.

Hebreos 9:22

Qaq na namaxasoxonaxacpi ỹa'axat da naua ntago'q hua'c da ishet da ỹapalaxat na nasouaxashetpi maye chegaqaigui nam ỹotta'a't qaỹo'otpi. Qataq iuen da sanaqoto Ñim Lo'onatac 'Enauacna caua ntago'q da yaqto' ỹapalaxat na qarasouaxashetpi.

Mateo 26:28

Cha'aye nachenaua naua maiche itago'q qataq chegoqchiguilo naamaye da Ñim Lo'onatac 'Enauacna naỹamaxate' 'enauac da qoñiita. Ne'enaua itago'q chegoqchiguilo da qaỹapalaxat na qalota lasouaxashet na shiỹaxauapi.

Apocalipsis 5:9

Qaq 'enauac somayepi ỹo'ootac de'era dalaxaic no'onec maye 'eeta': «'Am 'oonolec da 'aiguet da 'auacona ara nere qataq 'anqa't naua na'anaxanaqtel maye qaiuaxaataleguete aramaye. Cha'aye 'am qaỹalauat co'ollaxa, qaq soua 'artago'q, nache chegoqchiguilo da 'anca'alaxatec da lalamaxat 'anqa'en Ñim Lo'onatac 'Enauacna 'enauac na ỹotta'a't shiỹaxauapi, maye ỹotta'a't naua la'aqtaqa.

1 Juan 2:12

Qami' ỹalqolqa, qami' samaxalo ana ỹere, cha'aye Ñim Lo'onatac 'Enauacna mashe sogote da ỹapalaxat na qarasouaxashechi, chegoqchigui dam ỹo'ot co'ollaxa So Jesucristo.

Filipenses 4:19

Qaq Ñim Ita'a maye Lo'onatac 'Enauacna, qami' ỹanema qome 'enauac cam qaviñiitaique ỹachegoxotchigui dam qaica ca 'ena'am lsallaxa, qataq da llo'oxoyec maye hueto'ot So Cristo Jesús.

Efesios 2:7

Qaq ỹo'ot de'era Ñimaye, cha'aye nshetaique da ỹachaxan da 'eetec cam ñaq natrauo na'axa'te da lta'araic lauotaxanaqtaic da shenaqta qataq dam lqouagaxanaqtaic maye ỹachegoxotchigui So Cristo Jesús.

1 Corintios 1:30

Qaq Ñimaye nallegoxottela't da qana'ayeetaua'a naqa'en So Cristo Jesús, qataq chegoqchigui naqa'en Somaye da qaraỹaanec. Qataq chegoqchigui naqa'en Somaye da qomi' ỹaỹamaxareete' Ñimaye, qataq da qomi' lalamaqa'ate, qataq da saconaxaguet ca nca'alaxa chochaq tatec.

Salmos 130:7

qami' Israel le'ecpi, qauachiỹa'aguet qome Ñim Nataxala', cha'aye Ñimaye hueto'ot da nauotaxanaqtaic qataq da nca'alaxa.

Efesios 3:16

Souaxat dam lta'araic lsallaxa qataq da llo'oxoyec, nache seỹaxaatacot Ñim Lo'onatac 'Enauacna da ỹachegoxotchigui So Saqcha'a La'añaxac da qami' ỹanema ca la'añaxac da qarvilỹaxaqui.

2 Corintios 8:9

Cha'aye qami' qauaỹachiñi da So Qarataxala' Jesucristo ỹataqta sallaxanec, qalaxaye ye ỹataqta ỹaguec da qami' ỹauoteque, nache naỹa ana 'alhua, nache ỹacona da choxoraq yaqto' ỹachegoxotchigui da lachoxoyec da qami' qaviyiỹa'a da qami' sallaxanaqa.

Romanos 2:4

Ñim Lo'onatac 'Enauacna ỹataqta soxoraic qataq ỹataqta lta'araic da lhualaxavic qataq ishet da lhueneguet 'enauac nam qauempi maye qauo'ocheetac. Qalaxaye saishet qome da qaupicheetega da nam qauo'ocheetacpi qaica ca naigui. Ñim Lo'onatac 'Enauacna ỹataqta huotaxanaqtaqaic, qaq ỹoqo'oye huotaique da ntouen ñi 'oonolec da qoñiita, nache qaỹa'axañiiñi na qauem.

Miqueas 7:18

Qaq ¿negue't ca Atamnaxala' da 'eeta'am 'am, da 'auapalaxat na lasouaxashetpi qataq sa 'aulogui da saỹalaq nam saq 'amaqtaq maye no'onañi co'ollaxa 'aralamaxat nhuo' le'ecpi? Qataq saishet da nache 'eetai' da 'arayeloxo, cha'aye nache 'eetai' da lta'araic 'arauotaxanaqtaic da shenaqta.

1 Juan 2:2

Ñim Lo'onatac 'Enauacna ỹapalaxat na qarasouaxashetpi qataq 'enauac na lasouaxashetpi na shiỹaxauapi maye huetalec ana 'alhua, cha'aye So Cristo maiche chegoqtot da nañan da yaqto' qomi' ileualeguete.

Tito 2:14

Somaye nañan co'ollaxa da qomi' ileualeguete, cha'aye nshetaique da qomi' nca'alaxateeguesopa na qauemsat, qataq qomi' iqui'itaxa't da ỹauo'oi qomi' lalamaqa'ate, qataq da yaqto' so'otaq ca ỹaỹamaqchiguiñi.

Hechos 2:38

Nache so Pedro 'enapego' somayepi, 'eeta': –Qomye qauỹaxañiỹot Ñim Lo'onatac 'Enauacna da qami' ichoxore'n qataq qavi'eguelaqaỹot da qaualaqaiguet Ñimaye qataq qauaqaita'a da qami' ñachelaxanaxaguilo da le'enaxat So Jesucristo. Yaqto' Ñim Lo'onatac 'Enauacna ỹapalaxa't naua qarasouaxashe'echilli' qataq qami' ỹanema So Saqcha'a Na'añaxac Qui'itta.

Mateo 20:28

Aỹem Shiỹaxaua Llalec, nache ỹataxac de'era, sa ñanaỹa ana 'alhua da yaqto' Aỹem qanhualaxaueetapegue', nachaqrata da Aỹem ñeualaxaueetac qataq ñanac da sesoueeguesop na lasouaxashetpi na shiỹaxauapi qataq san da ñachaalataxac da lasheue damaye.»

Daniel 9:9

Qalaxaye 'Am Nataxala', qataq Qanatamnaxala', 'am choxonnataxanaxaic, qataq ishet da 'auapalaxat ca nasouaxashet. Qomi' 'Am sataỹaqa'aguet co'ollaxa

Da na'aqtaguec so Job 33:24

souaxat da ichoxoreetac camaye, nache nqouagaxaunot Ñim Lo'onatac 'Enauacna, 'eeta': «Ñaq 'anca'alaxateeguesop da l-leuaxa, cha'aye mashe huo'o ana lasheue da yaqto' nca'alec»,

1 Juan 4:10

Da ỹoqta 'eesa nauotaxanaqtaic saishet da chegoqchiguilo qomi' da sauotaxac Ñim Lo'onatac 'Enauacna, nachaqrata da Ñimaye qomi' ỹauoteque. Ỹoqo'oye namaxa ana 'alhua So Llalec, da yaqto' ỹapalaxat na qarasouaxashetpi chegoqchigui da l-leuaxa.

Hechos 20:28

Qaq ỹoqo'oye ñi 'oonolec da qoñiita ỹataqta ntel-la't, qataq nataqa'en qarchilliỹa'a 'enauac na 'amqaanataxanaxaicpi maye qami' ipataxagueta So Saqcha'a Na'añaxac Qui'itta da yaqto' qauloỹeegue. Namayepi maiche lalamaxatpi Ñim Lo'onatac 'Enauacna, lsheenaxanaxatpi, lasheue co'ollaxa soua ltago'q so maiche Llalec.

Daniel 9:19

¡'Am Nataxala', 'Am Nataxala'! ¡Ñaq qomi' 'aua'axaỹalo, qataq qomi' 'auchoxore'n! ¡Ña qomi' 'auqocha'alo 'Am Nataxala', nache 'auanac da qomi' 'autaua'n! ¡Qaq souaxat da 'arauotaxanaqtaic da qoneta 'Am Ñatamnaxala', qataq souaxat nam huaqta'a't nỹecpi, qataq souaxat na 'aralamaxat nhuo' le'ecpi, maye iỹaxaatega da 'are'enaxat, nache sa 'anaỹaloxon qome da 'auanac!

Jeremías 31:34

Qaq huaña nache saiuen da huo'oi caua nỹa't qataq caua auochaxau' qataq caua nhuo' lashe' da napaxagueetega't da yaqto' Aỹem ỹauatton, cha'aye 'enauac qome namayepi chegoqchiguiña natai' ñaqpiolec nache ivira'a na ỹepi da Aỹem ỹauatton qome. Qaq Aỹem sapalaxat qome na qauem maye ỹo'otpi qataq saishet da qaltaq seuennatega na lasouaxashetpi. Qaq 'era da ỹa'aqtac, Aỹem Nataxala'.»

Salmos 86:5

Cha'aye 'Am Nataxala', 'am soxoraic qataq choxonnataxanaxaic, qataq lta'araic da 'arauotaxanaqtaic 'enauac na 'am iỹaxaatacot.

1 Pedro 3:18

Cha'aye So Cristo 'oonolec co'ollaxa da ileu, nache sa lỹa da ỹe'eguelaxalec da ileu, da yaqto' ỹapalaxat na qarasouaxashetpi. Somaye ỹataqta soxoraic qataq qaica ca lasouaxashet qataq huo'o da nque'eenaxac, souaxat na 'etaxaloxoicpi da yaqto' qami' qaviyeeta'a da qanauochaxauai Ñim Lo'onatac 'Enauacna. Som ỹalauatpi So Cristo, somayepi ilaxachigui da lo'ocỹaxac, qalaxaye Somaye nca'alec yaqto' taigui da lca'alaxa saqcha'a.

Efesios 3:8

Cha'aye na'aictaxa da aỹem ỹataqta qaica ca ỹa'amaqchec da salectaigui na lalamaxatpi Ñim Lo'onatac 'Enauacna, qalaxaye Ñimaye aỹem ỹami' de'era ña'achecỹaxac da sa'axatem na saishet da judiopi da no'on na'axaỹaxac maye ỹa'axat nam chegoqo'ot lqouagaxanaqtaicpi So Cristo maye qaica ca ishet da naloqten.

Hechos 10:43

Nataqa'en soua hua'au' vi'iye 'enauac co'ollaxa som la'aqtaxanaxanecpi Ñim Lo'onatac 'Enauacna ỹa'axatta'aguet So Jesús, da ca ỹa'amaqten Somaye, nache qaỹapalaxat na lasouaxashetpi, chegoqchigui da la'añaxac Somaye. Qaq 'oonolec Somaye chegoqchigui da ishet da seviraqa'a da saconaxaguet da lchoxonnataxanaxa Ñim Lo'onatac 'Enauacna.

Juan 20:23

Qaq cam qami' qauapalaxache na lasouaxashetpi, nache Ñim Lo'onatac 'Enauacna ỹapalaxat na lasouaxashetpi. Qaq cam saishet da qauapalaxache na lasouaxashetpi, nache Ñimaye saishet da ỹapalaxat na lasouaxashetpi.

Marcos 14:24

Nache 'enapegalo', 'eeta': «Ne'enaua nachenaua na itago'q. Naamaye nachenaua naua chegoqchiguilo da Ñim Lo'onatac 'Enauacna ỹo'ot da naỹamaxataxac da qami' naỹamaxatto 'enauac da qoñiita. Ne'enaua itago'q naigui da qalota na qanca'alaxatec.

Zacarías 13:7

Ñim Nataxala' maye Qaica ca Ỹaqalanapec da la'aqtac 'eeta': ¡'Anachaañi 'am ỹeelonec, nache 'auataỹa'aguet ñi ỹamaxashec maye ilotague' ana qagueta, qataq ñim ỹale maye itaua! ¡'Aualauat qome ñim ilotague' ana qaguetapi, yaqto' anam lhuateguishe qaguetapi laga't qome, qaq Aỹem sataỹa'aguet qome da salauat na qagueta llalaqpi!

Zacarías 13:1

Qaq que'eca na'a'q, qalaq huo'o qome, ca npaxaatasheguem 'etaxat, da yaqto' nỹoxoqui da iỹouec na lasouaxashet qataq na lshepaxanaxa nam chegoxoguetpi so David qataq nam netaña na Jerusalén.

Tito 3:6

Qaq Ñimaye ỹachegoxotchigui So Qarca'alaxaqui Jesucristo da qomi' ỹanema So Saqcha'a Na'añaxac Qui'itta.

1 Timoteo 2:6

So Jesús ỹan co'ollaxa da lalamaxat nachaalataxac da yaqto' nca'alaxatec 'enauac na shiỹaxauapi ana 'alhua. Qaq nache chegoqchiguiña, da Ñim Lo'onatac 'Enauacna qomi' ỹachaxanalo da huotaique da nca'alaxatec 'enauac na shiỹaxauapi.

Colosenses 2:13

Cha'aye qami' co'ollaxa soua ỹoxoguelo vi'iye, qalaq 'eeta'am da qami' leuaxaiqa, souaxat na qarasouaxashechi, nache saishet da qaualliquiitaigui na lalamaxatpi Ñim Lo'onatac 'Enauacna. Qalaxaye nagui Ñimaye qarca'alaxauai naqa'en So Cristo, qataq ỹapalaxat 'enauac na qarasouaxashechi.

Colosenses 2:2

Qaq de'era ñeloquiaxac sauotaique da sa'añaqchet 'enauac namayepi qataq yaqto', nache 'eetai' da na'atta'a't souaxat da lauotaxanaqtaic So Cristo, huaña nache ivireguet namayepi da ỹataqta 'eesa da ỹaỹaten 'enauac dam saq cha'api 'eetapeguecpi Ñim Lo'onatac 'Enauacna qataq So Cristo.

Colosenses 1:27

Qaq Ñimaye maiche lhuennataxac da ỹaỹaanaxanaxanec de'era 'eetapeguec maye lta'araic qataq huo'o da llo'oxoyec 'enauac na ỹotta'a't shiỹaxauapi ana 'alhua. Qaq damaye 'eeta': Ñim Lo'onatac 'Enauacna naỹa naqa'en ana 'alhua So Cristo da yaqto' qami' hueta'agueta, qataq Somaye ỹataqta 'eesa naqa'en da qanhuañiỹaua'a da la'añaxac qataq da llo'oxoyec Ñim Lo'onatac 'Enauacna.

Efesios 2:4

Qalaxaye Ñim Lo'onatac 'Enauacna ỹataqta lta'araic da lchoxonnataxanaxa qataq da lauoche da shenaqta.

Romanos 9:23

Qataq nataqa'en ỹachaxan da lta'araic lsoxoyec qataq la'añaxac da qomi' nca'alaxatre'c. Cha'aye nache 'eetai' co'ollaxa da lchoxonnataxanaxa da shenaqta qataq qomi' lca'agui'she da yaqto' souaqta'aguet Ñimaye.

Hechos 3:19

Qaq ỹoqo'oye qaualache' nagui naua qano'onataxacolli', nache qaualaqaiguet Ñim Lo'onatac 'Enauacna, yaqto' Ñimaye ỹapalaxa't naua qarasouaxashe'echilli'. Nache Ñimaye icoua'ai 'enauac nam sa ỹaỹamaxañi maye qauo'ocheetac, nache qami' ỹanema da qara'añaxaqui.

Lucas 24:47

Nataqa'en iuen da qaỹa'aqtaxanem na ỹotta'a't shiỹaxauapi Aỹem, yaqto' 'enauac namayepi ỹe'egueloqot Ñim Lo'onatac 'Enauacna, qaq Ñimaye ỹapalaxat na lasouaxashetpi. Qaq chegoqchiguiña na Jerusalén,

Lucas 1:77

Qataq 'aua'aqtaxanem nam shiỹaxauapi da mashe huo'o da lca'alaxa, cha'aye Ñim Lo'onatac 'Enauacna ỹapalaxa't naua lasouaxashe'ete.

Zacarías 9:11

'Era da la'aqtac Ñim Nataxala': «'Am Jerusalén, souaxat so ntago'q maye chegoqchigui da 'am ñaỹamaxate', nache Aỹem ñeqateeguesop qome añi nshere maye qaica ca le'ec, na 'arcoñetegueshecpi maye netangui añimaye.

Isaías 43:25

Qalaxaye Aỹem, souaxat da Aỹem 'Anatamnaxala', nache sapalaxat na 'aralaataxanaxacpi, qataq saishet da she'eguelaqtega da seuennatega na 'arasouaxashetpi.

Éxodo 34:7

Nam ỹataqta qaica ca loga't da lauotaxanaqtaic, qataq ishet da ichoxoren ca huo'o ca npe'enaxac qataq ca sa ỹalaq, qataq ca huo'o ca lasouaxashet. Qalaxaye nataqa'en ishet da ỹauo'o ca nhuaxanaguec ca shiỹaxaua maye qauema naua ỹo'otta'ape, qataq ca llalaqpi, laualpi qataq ca llalaqpi ca laualpi camaye.»

Apocalipsis 14:4

Qaq somayepi nacheso som saishet da ỹo'oxoreetac nam qanatameetacotpi maye choche ne'enaqtacpi qataq saq 'en qataq saishet da sa ỹalaxaguet Ñim Lo'onatac 'Enauacna; 'enauac somayepi ca'attague' ñi Qagueta Llalec cam dataigue, qataq qanca'alaxatec somayepi da yaqto' la'auaxanec nachetaqtaxanaxat da qoỹanot Ñim Lo'onatac 'Enauacna qataq ñi Qagueta Llalec,

Efesios 1:6

Ñim Lo'onatac 'Enauacna ỹo'ot 'enauac de'era da yaqto' sho'oxorenaq dam lta'araic qataq ỹo'oxoraq lsoxoyec. Qaq ỹoqo'oye huo'o da qana'achecỹaxac souaxat da lta'araic lsoxoyec qataq qomi' ỹanema da qarca'alaxa, ỹachegoxotchigui so lauotaxat Llalec.

Jonás 4:2

Ỹoqo'oye natamnot Ñim Nataxala', 'eeta': «¡Aicoue, 'Am Nataxala'! 'Era da sheetega co'ollaq soota'a ye ña'alhua, ỹoqo'oye huac da satauec da saỹa ye Tarsis, cha'aye saỹaten da 'Am maye 'Aro'onatac 'Enauacna, qaỹoqchiguinguit da 'aralemataic, cha'aye 'am soxoraic, choxonnataxanaxaic, huotaxanaqtaqaic, qataq ishet da 'anaralaxat ca 'arhuennataxac da sa 'aupaguelec cam qauem maye 'autaxaỹa da 'auo'ot.

Salmos 130:4

Qalaxaye 'am hueto'ot da nchoxonnataxanaxa, ỹoqo'oye ishet da huo'o naq 'enec qanqa'en 'am.

Mateo 6:12

'Auapalaxat qome na qauem maye so'otaq, 'eeta'ama qomi' da mashe sapalaxataq 'enauac nam qomi' qaỹo'oteque qauem.

Romanos 3:25

Ñim Lo'onatac 'Enauacna namaxa ana 'alhua So Jesucristo da yaqto' qomi' ileualeguete. Da sepi'iỹaqa'a da So Jesús qomi' ileualeguete, nache Ñim Lo'onatac 'Enauacna ỹapalaxat na qarasouaxashetpi. 'Era da 'eetec da ỹachaxan Ñim Lo'onatac 'Enauacna da ỹataqta 'eesa. Qana'achec souaxat da lhualaxavic Ñimaye. Cha'aye nagui ỹapalaxat 'enauac nam qauem maye so'otaqtac co'ollaxa. Ñimaye ỹataqta no'on da lataxac qataq ỹaconeguet nam huo'o da lpi'iỹaxac So Jesús.

Efesios 1:14

Qaq nacheso so ỹoqta 'eesa naqa'en da qomi' saconaxaguet ca ỹachaxanapec Ñim Lo'onatac 'Enauacna maye qomi' ỹanema qom ivita ca laloqo' da huesochiguiñi naqa'en na lalamaxatpi, da yaqto' Ñimaye qaỹo'oxoren souaxat da la'amaqchec.

Efesios 1:18

Qataq seỹaxaatacot Ñim Lo'onatac 'Enauacna, da yaqto' qami' ỹaỹaanaxanaxaateque de'era lta'araic naigui da nca'alaxa maye ỹami' nam lalamaxatpi. Yaqto' nataqa'en ỹataqta qauaỹaañita cam qanaquitaxaqui maye huo'omshe qami' iỹaxanalo Ñimaye.