Daniel 9:16 - La'aqtaqa Ñim Lo'onatac 'Enauacna 2013

¹⁶ 'Am Nataxala', qomi' saỹatenaq da 'am choxonnataxanaxaic. Ñaq qomi' 'anqouagueque taxa da ca'ai 'anqa'en ye Jerusalén da 'arayeloxo, cha'aye yi'iye huaqta'a't nỹecpi qataq añi qui'itta qasoxonaxa maiche 'aralamaqte. 'Enauac na ỹotta'a't shiỹaxauapi maye lauoreuapi ye Jerusalén, ỹataqta ỹe'eetac yemaye, qataq na 'aralamaxat nhuo' le'ecpi, souaxat nam qarasouaxashetpi, qataq nam lasouaxashetpi som hua'au qarta'alpi.

Daniel 9:16 Referans Kwoze

Zacarías 8:3

Qaq Aỹem ñe'eguelaxa qome ye Jerusalén da qaltaq sonaña. Qaq huaña nache ye Jerusalén, qaỹamata'ac qome da Huaqta'a't Nỹecpi maye hueta'a da Nalaxayec, qaq añi qasoxonaxa maye lalamaqte Ñim Nataxala', qalaq qaỹamata'ac qome da Qasoxonaxa maye Qui'itta.

Joel 3:17

Huaña qome, nache qauaỹachiñi da aỹem Nataxala' maye Qanatamnaxala'ai, soota'a na Sión, anam ỹataqta qui'itta ñeqasoxonaxa, nache na Jerusalén ỹataqta qui'itta qome, qataq saishet da ỹe'eguelaxa da loxonec nam chegaqauecpi.

Daniel 9:20

Qaq aỹem nache shecto'ot da ñatameetac, qataq da sa'axattac nam ỹasouaxashetpi, qataq na lasouaxashetpi na ihuo' Israel le'ecpi, qataq saatacot da ñachoxonnaxac Ñim Nataxala' maye Ñatamnaxala', seỹaxaateguelec añim qui'itta nqasoxonaxa.

Salmos 31:1

'Am Nataxala', 'am she'eguenot da aỹem 'ampaxattalec, saishet qome da 'auauota'a da ỹa'aloxo, cha'aye no'on da 'arataxac, ỹoqo'oye aỹem 'anca'alaxatec qome.

Salmos 79:4

Nache ỹataqta qomi' ỹe'enai'salo na qarhuoreuapi, qataq qomi' ne'eetapiguilo na qomi' coleesopa.

Salmos 71:2

Cha'aye ỹataqta no'on da 'arataxac, nache aỹem 'anca'alaxatec qataq aỹem 'ampaxattalec, aỹem 'aua'axaỹa qome qataq aỹem 'anca'alaxatec.

Éxodo 20:5

Qataq saishet da 'aua'atto'oto naua 'arllecte qataq saishet da 'avio'oxoreetac, cha'aye aỹem Nataxala' Nachaỹem 'Anatamnaxala', Aỹem ca'alaxanaxaic ỹoqo'oye sauo'o da nhuaxanaguec ca shiỹaxaua maye aỹem nquiỹatega, qataq ca llalaqpi qataq ca laualpi qataq na llalaqpi ca laualpi.

1 Juan 1:9

Qalaxaye da sa'aqtaxanaxam naua qarasouaxashe'ete Ñim Lo'onatac 'Enauacna, qalaq nataqa'en qolaqto'ot da qarpi'iỹaxac da Ñimaye maye no'on da lataxac, ishet da qomi' ichoxore'n qataq iỹouec 'enauac na sa ỹaỹamaxañisat maye so'otaqtac.

2 Ts 1:6

Cha'aye nache lataxac da Ñim Lo'onatac 'Enauacna ỹauo'o qome ca nque'eenaxac na ỹo'ottac da qanque'eenaxaqui.

Ezequiel 5:14

'Am Jerusalén, Aỹem 'am so'otec qome da 'am lapoosheguem, nache 'am so'otec da qaica ca 'ara'amaqchec da qonetangui na nhuo' le'ecpi maye 'am coleesop, yaqto' ca 'am nlectot qome qalaq 'am imeteetac.

Jeremías 32:32

souaxat 'enauac nam qauem ỹo'otpi na nhuo' Israel qataq na Judá maye Aỹem inogoqchet, nataqa'en nam lta'alpi, qataq na lataxala'pi qataq na ltaxaỹaxanaxanecpi qataq na la'aqtaxanaxanecpi qataq 'enauac nam netaña na Judá qataq na Jerusalén.

Jeremías 29:18

Aỹem qami' secana'ape qome qami' seroleguete ca alaataxac, nqouaxa qataq ca napiina. Nache qami' so'oteque da 'enauac na ỹotta'a't shiỹaxauapi da qami' deqaigalo da qami' ilota'alo, qataq qami' so'oteque da qami' naloqnaxanaqa'ate da qauem qataq da na'agaxa qataq cam qaiqaiga qataq ca ỹo'ot da ne'elaxa maye huetalec 'enauac nam ỹotta'a't shiỹaxauapi maye qami' selagaxaaleguete co'ollaxa.

Jeremías 24:9

Qataq so'otec qome namayepi, cam ỹataqta ỹo'ot da lli'iỹaxa 'enauac nam ỹotta'a't shiỹaxauapi ana 'alhua, qataq namayepi qaica qome ca 'enec qanqa'en, qataq saqaỹaconeguet, qataq qauem qome ca talec 'enauac nam 'alhuapi maye selagaxaalec namayepi.

Salmos 143:1

'Am Nataxala', ñaq 'aua'axaỹa da ñatamnaxac, ñaq 'aulo'oguet da ñachoxonnaxac, ñaq aỹem 'auasateguet, cha'aye no'on da 'arataxac qataq 'aupacchiguilo naua qona'ape.

Salmos 41:13

¡Ỹataqta qaỹo'oxoren qome Ñim Nataxala', maye Natamnaxala' na Israel le'ecpi, nagui qataq nache 'eetai' qome! ¡Aja', nache 'eetec!

Nehemías 9:8

Cha'aye 'auaỹateeta da ỹataqta 'am pi'iỹa'a, nache 'auo'ot so 'anaỹamaxataxac da 'anaỹamaxate' somaye, nache 'auachaxanapeguem ca chegoxoguetpi somaye da 'aỹa'anem ye na'alhua ye cananeopi, hitiitapi, amorreopi, fereseopi, jebuseopi, gergeseopi. Nache ỹataqta 'aupacchigui da 'ara'aqtac, cha'aye 'am nache 'eetai' da 'aupacchigui naxa na 'ara'aqtacpi.

1 Samuel 2:7

Ñim Nataxala' ishet da qomi' choxora'q naqa'en, qataq da qomi' sallaxanqa, qataq ishet da souaqañi naqa'en qataq da qomi' ỹanaxanaxaayishegue'm.

Salmos 85:4

'Am Atamnaxala' maye qarca'alaxaqui, ñaq qomi' 'anca'alaxatrec, ñaq 'avia'axaneguet da 'aralemataic da shenaqta.

Isaías 5:25

Qaq ỹoqo'oye Ñim Nataxala' dalemataỹa na lalamaxat nhuo' le'ecpi souaxat de'era, nache nauaxaỹaxaasheguem qome na lhuaq da yaqto' iuaxan namayepi. Qaq ana qasoxonaxapi qalaq cholaxan qome qaq na leuaxaicpi qalaq 'eeta'am ca lasogoñi da huetaiya' huetangui na nqa'aicpi. Qalaxaye da layeloxo Ñim Nataxala' saishet qome da vi'iiguet, nache queto'ot da lasauaqtaxanaxac.

Jeremías 32:31

Qaq ne'ena huaqta'a't nỹecpi, chegoqchiguiña co'ollaq cheta'ague da qano'oxoosheguem nache ivitta'a nagui, da nacherata da ỹo'ottac da ỹayeloxo qataq inogoxonaxac. Qaq ỹoqo'oye Aỹem sapalaxat qome namayepi,

Daniel 11:45

nache ỹa'ayiñi qome ca lanataqa', ñichiguinguilo naqa'en na laiñi aso auaxai, qataq añi qui'itta qasoxonaxa maye ỹataqta 'onaxai. Qalaxaye nache huaña qome yemaye da ivita ca laloqo' da ileu, nache qaica qome ca ishet da anac da itauan.

Salmos 89:51

'Am Nataxala', na 'ampa'aguenaxauapi ỹataqta qomi' ỹe'enai'salo, cha'aye da lqauaxac ne'ena 'arca'aguishec nache 'eetai' naxa da qaỹe'eetac.

Ezequiel 22:4

Qaq souaxat dam 'auo'ot 'aralaataxanaxac nache 'auo'ot da 'arasouaxashet, qataq souaxat na nqolacpi maye 'auo'ot co'ollaxa nache 'anshepaxanaqchet da 'arataxac, nache 'auo'ot da saqaỹaloq da 'am nvita ca 'araloqo', qataq da 'am nvita ca 'oga't. Qaq 'era da 'eetec da 'am so'otec qome da na nhuo' le'ecpi 'am isheuen, qataq da 'enauac na ỹotta'a't shiỹaxauapi 'am ỹe'eetac.