Daniel 7:25 - La'aqtaqa Ñim Lo'onatac 'Enauacna 2013

²⁵ Qataq isheueetac qome Ñim Nataxala' maye Nataỹaña 'Enauacna, qataq nquigaxattañi qome nam nhuo' le'ecpi maye lalamaxat Ñimaye, qataq nmitaique qome ca lataxac da naralaxat na lqataxacpi Ñim Lo'onatac 'Enauacna, qataq nam lataxacpi da na'amqaanataxanaxac, nache na nhuo' le'ecpi maye lalamaxat Ñim Lo'onatac 'Enauacna, huetalec qome da la'añaxac camaye, choche ivittre'c caua tres vi'iye qataq ca laiñi ca lỹa vi'i.

Daniel 7:25 Referans Kwoze

Apocalipsis 12:14

Qalaxaye Ñim Lo'onatac 'Enauacna ỹanema asomaye soua dos laua't na vi'ic, da yaqto' huaỹo da datauec, nache qaỹoqta naqa'en so shiguiỹac leguemaxaic, taỹa so toolec 'alhua da yaqto' Ñim Lo'onatac 'Enauacna ilotague' asomaye iviraxattre'c caua tres vi'iye, qataq ca laiñi ca lỹa vi'i.

2 Ts 2:4

Que'eca ỹale ỹataqta npa'aguene' Ñim Lo'onatac 'Enauacna qataq ivira'a 'enauac nam qoỹanot Ñimaye. Ivira'a da naña naqa'en ca nso'onqa' añi no'onaxanaxaqui late'erai da qaỹo'oxoren Ñim Lo'onatac 'Enauacna, qataq camaye huotaique da qanatameetacot da 'ena'am Ñim Lo'onatac 'Enauacna.

Daniel 12:7

Qaq so shiỹaxaua maye ỹaatrañi soua alogo maye chegaqaiguilo na lino, ỹaayeshigue'm naua lhuaxaye ỹachaxanoto na piguem, nache ỹan so la'aqtac ỹachegoxotchigui da le'enaxat Ñim Lo'onatac 'Enauacna maye Nca'altauec, nache, 'eeta': Qom inoxoore'c caua tres y medio vi'iye, qom mashe vi'iiguet da nlaqtaguec da la'añaxac nam nhuo' le'ecpi, huaña qome nache ime de'era.

Apocalipsis 12:6

Qaq asa'aso 'alo qalaq datauec, taỹa cam toolec 'alhua, qaq huaña da Ñim Lo'onatac 'Enauacna ỹami' ca lma' qataq ilo'ogue, iviraxattre'c caua tres vi'iye qataq ca laiñi ca lỹa vi'i.

Daniel 2:21

Ñimaye naralaxa't naua na'axa'te qataq naua laloqo'ote, nqat ca nta'a qataq ỹauo'o ca nta'a, qataq ỹanem da laỹaanec nam ỹaanaxanaxaicpi, qataq ỹanem da laỹaanataxanaxac nam ỹaanataxanaxaicpi.

Apocalipsis 18:24

Ñim Lo'onatac 'Enauacna ỹauo'o da nhuaxanaguec yi'iye lta'araic nỹecpi, cha'aye yemaye lasouaxashet da ỹalauat so la'aqtaxanaxanecpi Ñimaye qataq so lalamaxatpi. Qataq 'enauac nam ỹalauatpi maye huetalec ana 'alhua.

Daniel 7:20

Qaq aỹem nataqa'en sauotaique da ỹoqta saỹateeta ca naigui asa'aso diez lcouepi, qataq aso lcoue maye saq 'amaqtaq, qataq som alap maye huo'o da napagaqaanaxac da detaqtac, qaq asa'aso saq 'amaqtaq lcoue ivitta'a da napacaleguete soua lỹa't lcoue, nache soua tres lỹa't lcoue naayiñi da yaqto' huo'o ca ldaqa' asomaye.

Isaías 37:23

¿Negue't cam 'aunotega qataq 'ausheueetac? ¿Negue't cam 'auqaqaatalec qataq 'auachaxana dam ño'oxonnaxaic 'armeenaxanaxac? ¡Qomye nacheñi ñim Qui'itta Natamnaxala' na Israel le'ecpi!

Daniel 7:8

Qaq so ñaq selota'a aso lcouepi somaye, nache sauaachigui da chegoqchiguingui asomayepi, da nnoxoosheguem aso lcoue lỹa maye saq 'amaqtaq, qaq huaña nache qanapo'c soua tres lcoue, da yaqto' huo'o ca ldaqa' asom pa'atec lcoue maye nnoxoosheguem, qaq asomaye huo'oi naua la'ai'te, 'eeta'am na shiỹaxaua, qataq huo'o so alap maye qalota da napagaqaanaxac da detaqtac.

Apocalipsis 17:6

Qaq can ime, nache aỹem ñanoma da asa'aso 'alo nỹomgui se'eso lataxa, nache asomaye taxai. Qaq se'eso lataxa naigui na ltago'q som lalamaxatpi Ñim Lo'onatac 'Enauacna qataq som qaỹalauatpi, souaxat da saishet da ỹaxanec da lpi'iỹaxac So Jesús. Qaq se'eso ỹauanaqchec ỹataqta ỹo'ot da ỹa'aalaxa.

Apocalipsis 14:12

Qaq ỹoqo'oye na lalamaxatpi Ñim Lo'onatac 'Enauacna, iuen da ỹaỹaten da lhueneguet qataq na'añaxateguet na lqalaiguesat qataq na nque'eenaxacpi. Nataqa'en iuen da ỹalaxaguet nam lamaxasoxonaxacpi Ñim Lo'onatac 'Enauacna qataq queto'ot da ỹa'amaqteetac So Jesús.

Daniel 11:28

Qaq cam nta'a maye lma' da sheu' ỹe'eguelaxa qome ca maiche na'alhua, nache ỹache qome 'enauac cam nsallaxa maye ỹachegoxotaigui ca alaataxac, qaq huaña qome nache dataỹa'aguet cam qui'itta aỹamaxataxac, qaq ỹacoolec qome cam 'eetapeguec, ime nache ỹe'eguelaxa ca na'alhua.

Apocalipsis 16:6

Nam 'am ipa'agueetacpi qalota so ỹalauat nam 'aralamaxatpi maye ỹataqta qui'itta, qataq nataqa'en so 'ara'aqtaxanaxanecpi. Qaq ỹoqo'oye, 'am nagui 'aỹa'anem da nỹomgui na ntago'q namayepi, ¡cha'aye ỹataqta 'itchiguiñi da talec namayepi de'era!»

Daniel 4:25

Qaq 'am nta'a, 'am qanqateeguesop qome na shiỹaxauapi, nache 'aualectaigui qome na shiguiỹacpi, nache qollectac qome ana huoue qoneta'am ca nauegaxanaxala'pi huaca, nache na 'aỹa ỹapapiaxat na 'aro'oc. Qaq 'era da qome da 'eetec da 'anachaalataxac que'ecaua siete vi'iye 'am nta'a, nache ivitta'a da 'auauatton da Ñim Lo'onatac 'Enauacna maye Nataỹaña 'Enauacna, huo'o da la'añaxac da ilo'ogue da lo'onataxanaxac na shiỹaxauapi ana 'alhua, qataq nacheñi ñim ỹanem da nta'a cam taalec da ỹanem.

Daniel 4:32

cha'aye 'am qanqateeguesop qome na shiỹaxauapi, nache 'aualectaigui na shiguiỹacpi, qataq qollectac qome ana huoue qoneta'am ca nauegaxanaxala'pi huacapi, ivittrec caua siete vi'iye, nache ivitta'a da 'auauatton da Ñim Lo'onatac 'Enauacna maye Nataỹaña 'Enauacna, da huo'o da la'añaxac da ilo'ogue da lo'onataxanaxac na shiỹaxauapi ana 'alhua, qataq nacheñi ñim ỹanem da nta'a cam taalec da ỹanem.»

2 Ts 2:3

Saishet da qanashiñiiuo da huo'o ca qami' ỹatenache't. Cha'aye que'eca na'a'q saishet da ivita da saxanaxa da nachaxan na ipa'agueetacpi Ñim Lo'onatac 'Enauacna qataq da nchoxot da dataỹa'aguet Ñimaye qataq da huetoigui da nachaañi que'eca ỹale qauemaic cam taỹa'a da qailaxachigui.

2 Ts 2:8

Huaña qome, nache nachaxan que'eca ỹale qauemaic, nache So Qarataxala' Jesús ilaxachigui camaye, irolec na la'at qom ncosaueegue da iquetetot camaye qom nvi' da nactaigui da llo'oxoyec.

Daniel 3:26

Qaq co'ollaq ime da nasaxauec de'era so Nabucodonosor, nache nquigueua'a so lasom aso nqatelaxanaxaqui, nache na'axannec da lỹaxanaxac, 'eeta': ¡Sadrac, Mesac, Abednego, maye qami' lamaxa'she Ñim Lo'onatac 'Enauacna maye Nataỹaña 'Enauacna, ña qampa'aiuec qome nache qananaiuecna'a! Nache se'esoua tres, nnoxoorec chegoqtroigui so le'eraxa so norec,

Daniel 4:2

Sauotaique da qauaỹachiñi dam lataxac maye saqaỹauanapega, maye aỹem ỹo'otec Ñim Lo'onatac 'Enauacna maye Nataỹaña 'Enauacna.

Daniel 4:17

Qaq 'era da lapaxañi la'aqtac som qui'itta namaxashecpi maye nauanaxanaxanecpi, yaqto' 'enauac na shiỹaxauapi ỹaỹaten da Ñim Lo'onatac 'Enauacna maye Nataỹaña 'Enauacna, huo'o da la'añaxac da ilo'ogue 'enauac da lo'onataxanaxac na shiỹaxauapi, Ñimaye ỹanem da no'onataxanaxac cam taalec da ỹanem, qataq ỹo'ot da lataxala' na ỹotta'a't shiỹaxauapi cam qaica ca la'amaqchec da ỹalectaigui na shiỹaxauapi.

Daniel 7:18

Qalaxaye ime qome nache da no'onataxanaxac qoỹanem na nhuo' le'ecpi maye lalamaxat Ñim Nataxala' maye Nataỹaña 'Enauacna, nache chochaq tatec qome da lalamaxat.

Daniel 8:14

Nache so lỹa namaxashec piguem le'ec ỹasat, 'eeta': «Qomye qom ivittrec caua dos mil trescientos avit, qataq nte'eta, nache qaiqui'itaxat qome añi atamnaxaqui.»

Oseas 7:16

Namayepi ỹe'eguelaxa na saq 'en atamnaxala'pi, nache 'eeta'am ca checnec da namaxagui. Qaq nam lataxala'pi qairolec ca ỹeelonec da qaỹalauat, souaxat da na'amaqte'n naua la'aqtaqa, nache huaña ye Egipto da qane'eetapigui qome namayepi.

Daniel 8:9

Qaq aso 'oonole soomaye, nache chegoqtoigui da ñaxatec aso lỹa lcoue maye saq 'amaqtaq maye nquictauec da lañaxataxac, nache ivira'ague da sheu', qataq da nala' lliguisheguem, qataq dam pa'aigue ye ỹataqta 'onaxaic 'alhua.

Daniel 8:11

qaq nataqa'en ivira'a da npa'aguene' so lataxala' se'eso alleppi, qataq ỹa'axaneguet da nachetaqtaxanaxac maye qaỹo'ottac naxa ye na'a'q, qataq ishepaxanaqchet so lma' naxa da ño'oxonnataxanaxac.

Daniel 9:27

Qaq huaigui qome ca lỹa la semana nache que'eca nta'a naỹamaxate' qome ca qalota shiỹaxauapi, qalaxaye ca laiñi que'eca la semana, nache ỹa'axaneguet qome na nachetaqtaxanaxatpi maye qaỹavigaxatta, qataq ana laỹe nachetaqtaxanaqtepi. Qaq huo'o qome ca ỹataqta qauem qaỹo'ot da hualec qanqa'en añi nca'atoxonaxalate maye lmalate na nachetaqtaxanaxat qaỹavigaxatta, nache ivitta'a da cam nlaqtaxanaxac maye qalapaxañi co'ollaxa talec cam ỹo'ot de'era qauem.»