Daniel 7:1 - La'aqtaqa Ñim Lo'onatac 'Enauacna 2013

¹ Qaq so la'auaxanec vi'i da lo'onataxanaxac so Belsasar ye Babilonia, nache so Daniel huo'o so lchoxonaxac, qataq so lauanaqchecpi. Qaq co'ollaq nlouec, nache ỹiyiñi nam lataxacpi maye ỹataqta huo'o naq 'enec naqa'en. Qaq 'era dam ỹiyiñi somaye:

Daniel 7:1 Referans Kwoze

Amós 3:7

Cha'aye Ñim Nataxala', saishet da huo'o ca ỹacoolec da ỹo'ot, da saxanaxa da'aqtaxanem nam na'aqtaxanaxanecpi maye lamaxashecpi Ñimaye.

Joel 2:28

Qaq qom ime de'era, nache talec ñaqa'en 'enauac na shiỹaxauapi ca lta'araic ỹa'añaxac, huaña, nache nam qaỹa'alquipi qataq ana qaỹa'allipi, huo'o qome nam ỹa'axata'api, qataq nam ỹa'axaiquipi huo'oi qome naua lchoxonaxaco, qataq na nsoxoppi huo'oi qome naua l-loxoco.

Daniel 5:1

So Belsasar maye nta'a ye Babilonia, ỹo'ot so lta'araic lquia'axac, nache icoyeguen so mil som 'amaqtaqaicpi yi'iye 'alhua, qaq co'ollaq mashe deque'etacpi, nache so nta'a qataq som icoyeguenpi co'ollaxa ỹataqta ỹaguec so nỹomigui lataxa.

Daniel 4:5

Qalaxaye huo'o so pe co'ollaq ñenaatai', nache huo'o so ichoxonaxac maye aỹem ỹe'elaqchet, nache na iuennataxacpi qataq na ỹauanaqchecpi ỹataqta aỹem nlaxatchigui da icolanaxa.

Daniel 1:17

Qaq Ñim Lo'onatac 'Enauacna ỹanema se'esoua cuatro nsoxoye da laỹaane'c, qataq da laỹaanataxanaxa'c da ỹaỹateetegueta 'enauac ana nerepi, qataq 'enauac na laỹepi naỹaanecpi. Qaq so Daniel qalaq nataqa'en ỹaỹaten da ỹa'axategue da naigui na nauanaqchecpi, qataq na nchoxonaxacpi.

Jeremías 23:28

¡Ca na'aqtaxanaxanec da huo'o ca lchoxonaxac, qalaq iuen da ỹa'axatta da choche lchoxonaxac, qalaxaye da ỹaconegueta naua ỹa'aqtaqa qalaq iuen da ipagaqchiichiguilo da ỹa'axa't! Cha'aye, ca 'auaqpi saishet da qanaloqnet ca trigo.

Apocalipsis 1:19

'Iyiñi 'enauac nam 'auauaachigui: nam mashe yo'oq qataq cam ñaq taỹa'a da yo'oq.

Habacuc 2:2

Nache Ñim Nataxala' aỹem ỹasateguet, 'eeta': «'Erelec qome ca 'alhua laỹe dapaqaic nam 'am sachaxanapi, yaqto' ỹataqta sailaua'ague qome da qaitaxaỹaxan.

Daniel 7:15

Qaq aỹem Daniel, ñanomteguet da icolanaxa da aỹem loxonec, qataq lta'araic da iuogoxo souaxat se'eso sauaachigui,

Daniel 7:13

Qaq aỹem nache shecto'ot da semeteetac som ỹauanaqchec se'eso pe. Nache nque'elaxatta da: Sela'a so 'eeta'am na shiỹaxaua llalec nactaigui so lo'oc na piguem, nache somaye taỹa so hueta'a som ỹa'axaiquiolec, nache qanquigaxateua'a so hueta'a somaye.

Daniel 2:1

Qaq co'ollaq mashe dos vi'iye soua lo'onataxanaxaqui' da nta'a so Nabucodonosor, nache somaye huo'o so lchoxonaxacpi, qaq souaxat somayepi, nache se'eso nta'a ỹataqta huo'o da lachetataic, nache saishet da do'oche.

Números 12:6

nache Ñim Nataxala', 'eeta': «Ña qana'axaỹaxañiỹa da ỹa'aqtac: Da huo'o naxa na ỹa'aqtaxanaxanec da qoñiita, nache Aỹem setaxaỹapegue', huaigui ñaqa'en da lauanaqchec, qataq lchoxonaxac,

Génesis 46:2

Qaq se'eso pe, nache Ñim Lo'onatac 'Enauacna detaxaỹapegue' so Israel, huaigui naqa'en so lo'ochaxa, da iỹaxana da le'enaxat, 'eeta' ¡Jacob! Nache somaye ỹasat, 'eeta': «Aja', aỹem soota'a ne'ena.»

Apocalipsis 10:4

Qaq aỹem mashe sauotaique da shiyiñi da la'aqta'c soua siete nvilỹaxaco co'ollaq sa'axaỹa so na'aqtac chemqot na piguem da aỹem 'enapega 'eeta': «Saishet qome da 'iyiñi da la'aqta'c soua siete nvilỹaxaco maye 'eeta'ama na nalataxa, nachaqrata da qaica ca ỹaỹate'n 'anqa'en.»

2 Corintios 12:1

Ỹataqta qaica ca naigui ca shiỹaxaua da maiche ño'oxoreetapeguela't. Qalaxaye nache 'ena'am so'ot damaye. Qaq nagui nache qami' sa'aqtaxanema nam ỹauanaqchecpi qataq dam aỹem ỹaỹaanaxanaxanec so Qarataxala' Jesucristo.

Romanos 15:4

Cha'aye 'enauac nam nanettalec ana nere maye huetalec na la'aqtacpi Ñim Lo'onatac 'Enauacna qoỹiyiñi co'ollaxa da yaqto' qomi' ỹapaxague'n. Da la'aqtaxanaxac anamaye qomi' itaua'n da yaqto' huo'o da qara'añaxac qataq qanhualaxaunaxac, qataq ỹataqta 'itchiguiñi da 'eesa dam qara'amqaanataxanaxac.

Daniel 8:1

Qaq co'ollaq mashe ivi' soua tres vi'iye da lo'onataxanaxac da nta'a so Belsasar, nache aỹem Daniel huo'o so lỹa ỹauanaqchec, qaq nache lỹa so hua'auñi co'ollaxa ỹauanaqchec.

Daniel 7:7

Qaq som pa'atec shiguiỹac maye sela'a co'ollaq huaigui so ỹauanaqchec, somaye ỹataqta chaqaic, qataq ỹo'ot da ñi'iỹaxa, qataq qaica ca 'ena'am da la'añaxac. Somaye huo'oi soua ỹataqta late'el lhue lcat, nache chec 'enauac nam huo'o, qataq icolaxattac, qataq petapigui nam lli'iỹoxot. Qaq se'eso shiguiỹac ỹataqta huaỹoqtec da lataxac, saishet da 'ena'ama soua lỹa't maye sela'alo co'ollaq sechoxootac, cha'aye na lqaic somaye diez aso lcouepi.

Daniel 5:30

Qaq nacheso se'eso pe da qaỹalauat so Belsasar maye lta'a so caldeopi,

Daniel 5:22

Qaq nagui 'am nta'a Belsasar, maye 'am llalec so Nabucodonosor, qataq 'auaỹaten dam huaigui co'ollaxa somaye, qalaq ñaqaiyeta saishet da 'auauo'o ca 'anmanaxac.

Ezequiel 1:1

So na'a'q cinco so ca'agoxoic cuatro, so vi'i treinta, nache aỹem Ezequiel sooto'ot na loigue ye tala Quebar, salectaigui so ncoñeteguishecpi. Nache nque'elaxatta da nauatoigui na piguem, nache huo'o so ỹauanaqchec chegoqo'ot Ñim Lo'onatac 'Enauacna.

Jeremías 36:4

Nache so Jeremías iỹaxana so Baruc, som llalec so Nerías, nache ỹa'axatem 'enauac nam la'aqtacpi Ñim Nataxala', nache so Baruc ỹerelec aso nere.

Jeremías 27:7

Qaq 'enauac qome na ỹotta'a't shiỹaxauapi da do'onataxanot ñimaye, qataq ca llalec qataq ca laual, choche ivitta'a qome da ivita ca laloqo' da na 'amaqtaqaic ỹotta'a't shiỹaxauapi qataq na 'añaxaicpi nta'alpi da ilo'ogue na na'alhua ñimaye.

Isaías 30:8

Qaq nagui qojec, nache 'erelec qome ca dapaqaic de'era 'arauanaqchec, ỹauaachigui 'anqa'en namayepi, qataq 'erelec qome de'era aca nere da yaqto' nache huetalec acamaye choche ivitta'alo caua pa'atrec na'axa'te, qataq yaqto' chochaq tatec da saishet da qaicoua'ai.

Isaías 8:1

Ñim Nataxala' aỹem 'enapega 'eeta': «'Auacona qome ca dapaqaic qalotelec, nache ỹataqtegue 'anqa'en da 'erelec camaye da ne'enaxat maye 'eeta': ‹Maher Salal Jasbaz.›

Da na'aqtaguec so Job 4:13

Qaq so pe co'ollaq mashe 'enauac da do'oche so shiỹaxauapi, nache ỹataqta qauem so ỹo'ochaxa.

Génesis 15:1

Qaq co'ollaq ime de'era, nache Ñim Nataxala' detaxaỹot so Abram, huaigui naqa'en so lauanaqchec, 'eeta': «Abram, saishet da 'añi'i, cha'aye aỹem 'arpaqtaxanaxat. Ca 'ansheetenaguec ỹataqta lta'araic qome.»

Jeremías 36:32

Qaq huaña nache so Jeremías, ỹacona aso lỹa nere, nache ỹanem so Baruc maye leraxanaxanec, nache somaye ỹiyiñi co'ollaxa 'enauac nam la'aqtaxanaxacpi so Jeremías, qaq damaye, 'eeta': 'Enauac nam huetalec aso nere maye ỹavigaxat co'ollaxa so nta'a Joaquim, qaq so Jeremías qaltaq nquigaxattec na qalota laỹepi maye 'eeta'am na huetalec aso hua'auchiguiñi nere.

Ezequiel 40:2

Nache Ñim Lo'onatac 'Enauacna ỹachaigui so ỹauanaqchec da aỹem ỹauega ye 'alhua ye Israel, nache aỹem ỹanalec aso ỹataqta qaỹoqotcheguemec qasoxonaxa. Qaq dam pa'aỹa'ague da taguiñi asa'aso qasoxonaxa huo'o so lta'araic nỹec, 'eeta'am da lataxac ca huaqta'a't nỹecpi.

Daniel 2:26

Qaq huaña, nache so nta'a 'enapega so Daniel, maye nataqa'en le'enaxat Beltsasar, 'eeta': ¿Ishet peta'a da aỹem 'aua'aqtaxanem som sechoxootega qataq cam naigui som ichoxonaxac?

Daniel 4:13

Qaq co'ollaq ñaq sootaigui so ỹauanaqchec, nache sela'aguet so namaxashec maye nauanaxanaxanec, chegoqo'ot na piguem,