Daniel 2:44 - La'aqtaqa Ñim Lo'onatac 'Enauacna 2013

⁴⁴ Qaq qom ñaq huetaigui da lo'onataxanaxac que'eca nta'alpi, nache Ñim Lo'onatac 'Enauacna maye neto'ot na piguem, nauaxaỹaxaasheguem qome ca no'onataxanaxac maye saishet qome da nlaguiñi, qataq saishet qome da anac ca laỹepi ỹotta'a't shiỹaxauapi da ilo'ogue, nacherata da camaye nlaxaañi da lo'onataxanaxac na laỹepi nta'alpi, qaq camaye chochaq tatec qome.

Daniel 2:44 Referans Kwoze

Mateo 28:18

Nache So Jesús nquiga somayepi nache 'enapega, 'eeta': «Ñim Lo'onatac 'Enauacna Aỹem ỹami' da na'añaxac da yaqto' selo'ogue 'enauacna.

Salmos 145:13

Cha'aye de'era 'aro'onataxanaxac chochaq tatec, qataq imattrec naua vi'iye de'era 'aramaxasoxonaxac.

Daniel 6:26

qataq samaxasoxoolec da 'enauac ne'ena selotague' 'alhua, da huo'o naq 'enec qanqa'en, qataq qaỹalaxaguet Ñim Natamnaxala' ñi Daniel. Cha'aye Ñimaye, nacheñi Ñim Lo'onatac 'Enauacna maye nca'altauec, qataq nache 'eetai' da sa imeuo. Da lo'onataxanaxac saishet qome da nlaguiñi, qataq da la'añaxac qaica ca loga't.

Miqueas 4:7

Qaq anamayepi nache sauaxaỹaxaneguet anam no'onañi co'ollaxa, qaq nache sachegoxotchigui qome ca shiỹaxauapi maye ỹataqta 'añaxaicpi. Qaq aỹem Nataxala' selo'ogue qome namayepi, qom huaña añi qasoxonaxa Sión, nagui qataq nache 'eetai' qome.

Apocalipsis 11:15

Nache so pa'atec soua siete namaxa'she piguem lashe', ỹashiiyigui aso lasheere, nache na piguem chemqot so ỹataqta lamaxaraic nvilỹaxac, 'eeta': «Ñim Qarta'a maye Lo'onatac 'Enauacna qataq Ñi Lca'aguishec, mashe ilo'ogue 'enauac ana 'alhua. Qaq da lo'onataxanaxac, damaye chochaq tatec.»

Daniel 7:27

Qaq da lo'onataxanaxac, la'añaxac qataq da llo'oxoyec 'enauac nam nta'alpi maye netalec ana 'alhua, qoỹanem qome nam nhuo' le'ecpi maye lalamaxat Ñim Nataxala' maye Nataỹaña 'Enauacna. Qaq dam lo'onataxanaxac qalaq chochaq tatec qome, nache 'enauac qome na nhuo' le'ecpi ana 'alhua do'onataxanot qataq ỹalaxaguet.

Daniel 4:34

Qaq co'ollaq ipacchigui som qalapaxañi da ñeuaxanaguec, nache aỹem Nabucodonosor samato'ot na piguem, nache ñanomteguet da aỹem qanataren nache qaica so aỹoic, qaq huaña nache sanot da ña'achecỹaxac Ñim Lo'onatac 'Enauacna maye Nataỹaña 'Enauacna nache sho'oxoren Ñim nache 'eetai' da nca'altauec, sheeta': «Da 'ara'añaxac qalaq chochaq tatec qome, da 'aro'onataxanaxac qalaq qaica ca loga't.

Isaías 60:12

Qaq cam shiỹaxauapi maye saishet da 'am do'onataxanot qalaq qaỹapalaxat qome, qataq ca ỹotta'a't shiỹaxauapi imauec qome da qailaxachigui.

Daniel 4:3

¡Qaq ỹataqta lta'araicpi nam saqaỹauanapegapi qataq nam huo'o da llo'oxoyecpi maye ỹo'ot Ñimaye! Qaq da lo'onataxanaxac Ñimaye chochaq tatec qome, qataq da la'añaxac qaica qome ca loga't.

Daniel 2:37

'Am nta'a, 'am ỹataqta 'am 'amaqtaqaic, 'anapacalec 'enauac na laỹepi nta'alpi, cha'aye Ñim Lo'onatac 'Enauacna maye neto'ot na piguem, 'am ỹanem co'ollaxa da 'aro'onataxanaxac, qonec, 'ara'añaxac qataq da 'ayo'oxoyec

Génesis 49:10

Qaica qome ca ishet da deuotaxanec da lamaxasoxonaxac da Judá qataq da lamaxasoxonaxat npon maye nasoqta'a, choche ivitta'a da nvi' cam lalamaxat de'era pon, cam ỹataqta ỹalaxaguet qome na nhuo' le'ecpi.

Daniel 2:28

Qalaxaye huo'o Ñim Lo'onatac 'Enauacna maye neto'ot na piguem, maye ishet da ỹachaxan cam saqcha'a, qaq Ñimaye nacheñi ñi 'am ỹaỹaanaxanaxanec cam ñaq taỹa'a da yo'oq. 'Am nta'a, aỹem 'am sa'aqtaxanen som 'archoxonaxac qataq so 'arauanaqchec co'ollaq 'auo'ocheta:

Ezequiel 37:25

Qataq nalec yem 'alhua maye sanem co'ollaxa so ỹamaxashec Jacob, yem nataqa'en netalec co'ollaxa so hua'au lta'alpi. Qaq namayepi nache 'eetai' qome da netalec yemaye, qataq ca llalaqpi, qataq 'enauac cam chegoxoguetpi qome namayepi, qaq ñim ỹamaxashec David, nacheñi qome ñim chochaq tatec da ilotague' namayepi.

Juan 12:34

Nache na shiỹaxauapi 'enapega Somaye, 'eeta': –Qomi' saỹatenaq chegoqchigui ana nere maye huetalec na la'aqtacpi Ñim Lo'onatac 'Enauacna da que'eca Lca'aguishec Ñimaye maye qaiuattaique, nache 'eetai' da nca'altauec. Qalaq ¿ta'ainco' ye 'am qonetega da que'eca Shiỹaxaua Llalec, qaiuaxaneguet qome ca npe'enaxaqui? Qaq ¿chaq negue'to' que'eca Shiỹaxaua Llalec?

Daniel 8:25

Qaq souaxat da sanqalat, nache da latenataxanaxac dauegaxaatai'. Qataq nlaxagui qome da ño'oxonnaxac, nache ique'elaxat qome da ỹalauat ca qalota shiỹaxauapi maye pe'etega camaye. Qataq dataỹa'aguet qome ca lta'a na nta'alpi, qalaxaye camaye qailaxachigui qome.

Daniel 2:34

Qaq 'am nta'a, co'ollaq ña 'aulota'a, nache huo'o so coma' depoxoỹauec chegoqotcheguema aso qasoxonaxa, qaq na'aictaxa da qaica ca ỹamaxauec somaye, qalaq naañi nache tachiguilo naua lapia'ate se'eso ne'enaqtac, nache ilaxachigui.

Hebreos 12:28

Sanqot da qana'achec Ñim Lo'onatac 'Enauacna, cha'aye da lo'onataxanaxac Ñimaye maye qomi' ỹanema saishet da ishet da qanqochenaxat. Qaq ỹoqo'oye iuen da sho'oxorenaq Ñimaye chegoqchigui da lta'araic lsoxoyec qataq da ño'oxonnataguec maye ỹaỹamaxareeta da qoỹami'.

Daniel 2:35

Qaq huaña nache so lcat, nqatelliguishec 'alhua, bronce, plata qataq so oro, 'enauac somayepi da dolachigui nache nda'a't lsoche, 'eeta'am da ivita ye napaxaỹaxa da qaichegoq na trigo, nache na la'at ỹaỹoxonaqchet na lvi, nache qaica ca no'onaxatañi. Qalaxaye som coma' maye ilaxachigui co'ollaxa se'eso ne'enaqtac, somaye nañigui da late'erai qasoxonaxa, nache ỹataqta imattalec ana 'alhua.

Daniel 2:43

Qaq 'am nta'a, dam 'eetec da 'aula'a co'ollaxa so lcat da ỹalecta'aguet so nqatelliguishec 'alhua, qaq 'era da 'eetec qome da lo'onataxanaxac que'eca nta'alpi da huaxaỹa't, chegoqchigui da naronaxac da naỹamaxara't, qalaxaye saishet qome da ỹañoxot da ỹoqta huaxaỹa't, 'eeta'am da 'eetec ca lcat da saishet da ỹalecta'aguet ca nqatelliguishec 'alhua.

Hageo 2:7

Qataq cholaxan ñaqa'en 'enauac na ỹotta'a't shiỹaxauapi, huaña qome nache namayepi ndouo 'enauac da lsallaxa, nache añi atamnaxaqui maye ỹalamaqte ỹataqta nlaqchigui qome da llo'oxoyec.» Qaq Ñim Nataxala' maye Qaica ca Ỹaqalanapec 'enapec:

2 Samuel 7:13

Nache camaye nacheca qome ca no'oxoosheguem que'eca nỹec da yaqto' huaña da Aỹem qanatamnot, qaq camaye sanagui da nache 'eetai' qome da nta'a.

2 Samuel 7:16

Na 'aỹa'alaqpi, qataq da 'aro'onataxanaxac da 'am nta'a, damaye nache 'eetai' qome. Qataq aca 'anso'onaxaqui da 'am nta'a, qaica ca iraxanapigui'.›»

Daniel 6:27

Ñimaye nacheñi ñi nca'alaxaqui qataq huesochiguiñi naqa'en ca shiỹaxaua, Ñim ỹo'ot na na'anecpi maye huo'o da llo'oxoyec, da huo'ot naqa'en na piguem qataq ana 'alhua. Ñimaye, nacheñi ñi nca'alaxateeguesop ñi Daniel, naua nna'ache na llonpi.»

Hageo 2:22

ñelaxaañi da la'añaxac na nta'alpi maye netalec ana 'alhua, qataq hua'axañi ñaqa'en ana nso'onaxaquipi namayepi; qataq seqalagoxooñe ana naigonapi maye alaataxaquipi, qataq nam lo'opi anamayepi; huaña nache ileu na caipi qataq nam netalec namayepi; ñi 'oonolec namayepi ilem qome ca lainec ca maiche lqaỹa.