Daniel 11:2 - La'aqtaqa Ñim Lo'onatac 'Enauacna 2013

² Qaq nagui 'am sa'aqtaxanem dam ỹataqta 'eesa lataxac. Ye Persia huo'oi qome caua tres nta'al, qaq qom ime nache huo'o qome ca lỹa nta'a, qaq camaye sallaxanec qome napacaleguete caua lỹa't tres nta'al, qaq qom huo'o da la'añaxac souaxat da lsallaxa, nache naỹamaxat qome da dataỹa'aguet da lo'onataxanaxac na lta'alpi ye Grecia.

Daniel 11:2 Referans Kwoze

Apocalipsis 21:5

Nache Ñim Lo'onatac 'Enauacna maye nso'ootangui aso nso'onaxaqui da nta'a 'eeta' da la'aqtac: «¡Aỹem ñaralaxat 'enauacna!» Nataqa'en 'eeta': «'Iyiñi qome ne'enapi, cha'aye ne'ena na'aqtacpi ỹataqta 'eesa qataq ishet da qaipi'iỹa'a.»

Daniel 8:26

Qaq som 'arauanaqchec co'ollaq 'am qaỹachaxana so avit qataq nte'eta, somaye ỹataqta 'eesa, qalaxaye 'am saishet qome da 'aua'axattac, cha'aye somaye ipacchigui qome da yo'oq qom qaỹoqteguelo naua vi'iye.

Juan 10:35

Qaq qomi' saỹaanaq da naua nanettrañi la'aqtaqa Ñim Lo'onatac 'Enauacna, naamaye saishet da qaiqolegue't. Ỹoqo'oye 'eesa da Ñim Lo'onatac 'Enauacna ỹamata'ac da piguem le'ecpi som shiỹaxauapi maye ỹaconeguet da la'aqtac.

Amós 3:7

Cha'aye Ñim Nataxala', saishet da huo'o ca ỹacoolec da ỹo'ot, da saxanaxa da'aqtaxanem nam na'aqtaxanaxanecpi maye lamaxashecpi Ñimaye.

Daniel 11:25

Qaq camaye souaxat da nomteguet da la'añaxac, nache nnaictague' ca qalota alleppi da iloquiaxan ca nta'a maye lma' da taguiñi. Qaq que'eca nta'a maye lma' da taguiñi, dataỹa'aguet qome camaye, nache lỹatac ca qalota qataq 'añaxaicpi nalleppi, qalaxaye que'eca nta'a maye lma' da taguiñi qaỹatenachet qome, nache saishet da nalo'oguet da dataỹa'aguet que'eca mpa'aguenaxauapi.

Daniel 8:4

Nache sela'a so qaỹoqta qagueta lhuaraic iquetogoqtapeegue da nala' lliguisheguem, qataq da sheu', qataq da taguiñi, nache qaica ca lỹa shiguiỹac da ishet da dataỹa'aguet, huo'otaq da naneltaxaneguet da lquetogoqtaxanaxac somaye. Qaq maiche ỹoiqueetac cam ỹataxaateuga ca ỹo'ot, qaq nache nquictauec da la'añaxac.

Daniel 7:5

Qaq so lỹa shiguiỹac maye ca'atalec somaye, qalaq 'eeta'am na oso, qalaxaye somaye ỹacasheguem na 'oonolec laỹe, qataq netaguilo naua lhue soua tres ncheshe'ete, nache sa'aqchigui da qoỹenapega, qoỹeeta': ‹¡'Asoma qojec, nache qollec na lapat maicheye da 'auaỹemec!›

Proverbios 22:21

da yaqto' 'am sapaxaguenec da 'auauatto'n naua 'eesora na'aqtaqa, yaqto' ishet da ỹataqtegue ca 'arasataxac da huo'o ca 'am inat.

Daniel 10:1

Qaq co'ollaq mashe ivi' soua tres vi'iye da lo'onataxanaxac so Ciro da nta'a ye Persia, nache so Daniel maye nataqa'en le'enaxat Beltsasar, huo'o co'ollaxa so lauanaqchec, qalaxaye ỹataqta qalaqaic da qaỹaỹaten cam naigui somaye. Qalaxaye so Daniel ỹataqta deuennataxaalec co'ollaxa somaye, nache ishet da ỹaỹaten dam naigui se'eso lauanaqchec.

Daniel 8:21

Qaq so quetaq lhuaraic, qalaq naigui ñi nta'a ye Grecia, qaq aso late'erai lcoue somaye, maye ñichiguinguilo soua la'ai'te, qalaq nacheca qome ca la'auaxanec nta'a.

Esdras 4:7

Nataqa'en co'ollaq huaigui da lo'onataxanaxac so Artajerjes, maye nta'a ye Persia, nache so Bislán, Mitrídates, Tabel qataq so laỹepi ltauapi, ỹamaxa aso lere so nta'a Artajerjes, qaq asa'aso nere nanettaleguete naua na'aqtaqa arameo, ime, nache taiguilo qanqoỹen naua la'aqtaqa so lma' ye Persia da qaỹa'axategue 'enauac na huetalec asomaye.

Esdras 4:24

Qaq 'era da 'eetec da qaỹa'axaneguet da qano'oxootapiguisheguem aso atamnaxaqui maye lalamaqte Ñim Nataxala', maye naña ye Jerusalén, ivira'a da inoxoorec soua dos vi'iye da lo'onataxanaxac so Darío maye nta'a ye Persia.

Ester 1:1

De'era na'aqtaxanaxac, damaye huetoigui so na'a'q co'ollaq so nta'a Asuero, ilotague' so ciento veintisiete 'alhuapi, chegoqchiguiña ye la India nache ivira'a ye Etiopía,