Daniel 1:4 - La'aqtaqa Ñim Lo'onatac 'Enauacna 2013

⁴ Qaq camayepi, iuen da nsoxoppiolec maye ỹataqta nalochiyiñi da lataxa'c, qataq qaica ca lque'emaxa na lo'oc, qataq ỹataqta nalaua'a da nauattonaxanaxac, qataq da naỹaanataxanaxac, qataq ỹaanataxanaxaicpi, qataq sanqalat da huo'o ca qaỹapaxaguenec, qataq nalaua'a da do'onataxaneua'a ñi lma' lta'araic ñi nta'a. Qaq camayepi qaỹapaxaguenec qome da neraxanaxac, qataq na la'aqtacpi na caldeopi.

Daniel 1:4 Referans Kwoze

Daniel 5:11

cha'aye de'era 'aro'onataxanaxac, huo'o ñim ỹale maye hueta'aguet so saqcha'a la'añaxac nam atamnaxala'pi maye qui'itta. Cha'aye som 'arta'a co'ollaq nta'a, nache ñi'iñi ỹale ỹachaxan co'ollaxa da hueto'ot da ỹataqtegue da ntoonaxac, qataq naỹaanataxanaxac, qataq ỹaanaxanaxaic 'eeta'am na atamnaxala'pi. Qaq ỹoqo'oye so nta'a Nabucodonosor maye 'arta'a, ỹanem co'ollaxa ñi'iñi ỹale da lataxala' 'enauac na 'oiquiaxaipi, na ilaviigui ca lỹa, na ỹaanaxanaxaicpi, qataq nam napaxagueetega ana huaqaañipi maye hueta'a ne'ena 'alhua,

Hechos 7:22

Qaq ỹoqo'oye so Moisés qaỹapaxaguenec 'enauac nam no'on laỹaanec nam netaña ye Egipto. Nache somaye ivira'a da ỹataqta 'amaqtaqaic ỹale qataq 'añaxaic cam 'enapec qataq cam ỹo'ot.

Proverbios 22:29

Ca shiỹaxaua ỹaỹamaxatchiguiñi ca lo'onataxanaxac, nache camaye ivitta'a da do'onataxanot na nta'alpi, qataq saishet da na'aco' ca qaica la'amaqchec.

2 Samuel 14:25

Qaq 'enauac so netaña ye Israel da qaica ca 'eeta'am da lyacỹaxac so Absalón, cha'aye qaica ca 'eeta'am somaye da ỹataqta 'onaxaic, qataq nalochiguiñi.

Daniel 2:10

Nache 'enauac som ỹaanaxanaxaicpi ỹasateguet so nta'a, 'eeta': Ana 'alhua qaica ca ishet da 'am ỹa'axatem som 'auchoxootega. Qataq da lỹa 'eeta': Saỹauano' da huo'o ca nta'a, na'aictoxo' da 'amaqtaqaic qataq 'añaxaic, da iỹaxanot cam huo'o da no'onataguec, qataq ca ilaviigui ca lỹa, qataq ca ỹaanaxanaxaic da iỹaxaneua'a ca 'eeta'am de'era maye 'auỹaxaataique.

Hechos 7:20

Qaq se'eso na'a'q, nache huetoigui da ñiguiñi so Moisés. Qaq se'eso nogotolec, somaye ỹataqta lauotaxat Ñim Lo'onatac 'Enauacna, nache soua lta'al ivi't naua tres ca'agoxoiqa da ilotrague' ỹaatraña ca lma't.

Daniel 5:7

Qaq ime nache ỹataqta nlamaxaren da iỹaxaneuga som ilaviigui ca lỹa, ỹaanaxanaxaicpi, qataq som napaxagueetega anam huaqaañipi ye Babilonia, nache 'enapega somayepi, 'eeta': Ca ishet da itaxaỹaxan yi'iye nanettañi qataq aỹem da'aqtaxanem cam naigui yemaye, nache camaye qoỹanaxanaxanguilo qome caua anogo maye tocaleguete da lo'oxoỹaxa'c, qataq nqolaaña qanqa'en ca nqolac oro, qataq sanem da itaua da ỹo'onataxanaxac.

Daniel 4:7

Nache anac co'ollaxa 'enauac so 'oiquiaxaipi, qataq so ilaviigui ca lỹa, qataq so ỹaanaxanaxaicpi, qataq som napaxagueetegapi ana huaqaañipi na Babilonia, nache aỹem sa'axatem so ichoxonaxac, qalaxaye somayepi saishet da ỹañoxot da aỹem da'aqtaxanem cam naigui somaye.

Eclesiastés 7:19

Dam naỹaanec ỹa'añaqchet cam ỹaanaxanaxaic, napacalec cam diez 'añaxaicpi nta'alpi maye hueta'a cam huaqta'a't nỹecpi.

Jueces 8:18

Ime, nache inat so Zebaj qataq so Salmuná, 'eeta': ¿Chaq 'eetec ca lasheguiỹaxac som ỹalleppi maye qaualauache co'ollaq huaña añi qasoxonaxa Tabor? Nache soomaye 'eetra': «Qomye 'eeta'ama da 'arashiguiỹaxac. Qataq ñi 'oonolec somayepi qalaq 'eeta'am cam llalec ca nta'a.»

Efesios 5:27

Yaqto' qom ivita da nachaalataxaneuo Somaye na 'amqaanataxanaxaicpi, qalaq ỹataqta huo'o da lyacỹaxac, qataq qaica ca lshepaxanaxa, huo'otaq ca 'eco' lvigaxataxa, huo'otaq ca lỹa 'eeta'am de'era. Nachaqrata da ỹataqta qui'itta qataq nalochiguiñi.

Daniel 3:8

Qalaxaye huo'oi co'ollaxa soua Caldea lashe' da iqopitaxanapec da ỹauo'o da lasouaxashet so judiopi, da ỹa'axateua'a so Nabucodonosor,

Daniel 2:2

Qaq huaña nache damaxasoxoneuga 'enauac som 'oiquiaxaipi, qataq som ilaviigui ca lỹa, qataq so 'iyaxaic lo'opi, qataq so ỹaanaxanaxaicpi, da yaqto' somayepi da'aqtaxanem somaye ca naigui se'eso lchoxonaxacpi. Nache somayepi jec da nachaateua'a so nta'a,

Isaías 36:11

Nache so Eliaquín, Sebna qataq so Joah, ỹasatreguet so 'amaqtaqaic lataxala' na alleppi Asiria le'ecpi, 'eetra': –Ña qomi' 'anqouagueque da 'auota'aisalo naua na'aqtaqa arameo da qomi' 'autaxaỹoto, cha'aye qomi' saỹatena'q naamaye. Qaq saishet da 'auota'aisalo naua hebreo la'aqtaqa, cha'aye 'enauac nam shiỹaxauapi maye netalec na npaqtaxanaxat na'axaỹaxaatac.

Jeremías 5:15

«'Am Israel, 'am ñauega qome da yaqto' 'am dataỹa'aguet cam nhuo' le'ecpi maye qaỹoqtegue ca chegaqa'ague, cam nhuo' le'ecpi maye ỹataqta 'añaxaicpi qataq togoshaapecpi, qataq sa 'auaỹate'n naua la'aqtaqa, nache saishet qome da 'auaỹaten cam nasaxauec. Qaq 'era da la'aqtac Ñim Nataxala'.

Daniel 9:1

So Darío maye llalec so Asuero, som chegoxoguet na medos, somaye ilotague' co'ollaxa na caldeopi.

Zacarías 2:4

nache 'enapega som namaxashec maye aỹem nallegoqtot, 'eeta': «'Auachegaqañi da 'aucaalec se'eso nsoqolec, maye ỹachetac so naloqnaxanaxat da huo'o na qanaloqten, nache 'aua'aqtaxanem, qoneta': ‹Na Jerusalén qaltaq ỹe'eguelaxa qome da qanayenaña, qaq ỹataqta qalota qome na hueta'a shiỹaxauapi qataq na na'atetpi, nache ivitta'a qome da qaica ca lpaqtaxat.

Génesis 41:46

Qaq so José mashe ivi' co'ollaxa soua treinta vi'iye da nachaalataxac, co'ollaq qaỹauegueua'a so faraón, som nta'a ye Egipto. Qaq so José co'ollaq ca'ai yem hueta'a so faraón, nache jec da nqo'onalo naua 'aleu' 'enauac ye Egipto.