Apocalipsis 9:20 - La'aqtaqa Ñim Lo'onatac 'Enauacna 2013

²⁰ Qaq nam no'onañi shiỹaxauapi maye saishet da ilem so norec qataq so lmala'q qataq so 'eeta'am na quiquiaxaraic namayepi ñaq 'eetalec, saishet da ỹaxaañi da ỹo'ottac na qauem, qataq saishet da ỹaxaañi da ỹo'oxoreetac nam saq cha'api qauemaicpi, qataq nam lqui'ipi nam qanatameetacotpi maye saq 'en. Nachaqrata da nache queto'ot da ỹo'oxoreetac nam nqui'ipi maye saq 'en maye chegaqaigui na coma', qataq huo'o na 'epaq qataq huo'o na chegaqaigui na lcat le'enaxat oro qataq na lcat plata qataq na bronce. Ne'ena ne'enaqtacpi sanauaañi, qataq saishet da hua'aqa, qataq saishet da queuoỹapigui'.

Nuevo Testamento Toba Sur

²⁰ Qalaxayi nam n'onañi shiÿaxauapi mayi sa ishit da ileema se'esoua napaxaco ñaqaiyita sa ishit da ÿaxaayiñi naua qauema mayi i'otta'pe. Qataq sa ishit da ÿaxaañi da natameetacot nam saq cha'api qauemaicpi, qataq nam nqolacpi mayi chigaqaigui qanqoÿin na oro, plata, bronce, coma', qataq na qo'ipaq mayi sa ishit da demejnaxan, qataq sa ishit da hua'aqa, qataq sa ishit da queuoÿapigui'.

Nuevo Testamento Toba Sombrero Negro

²⁰ Qalaĝaja gaa'me lael jena'me jiyaĝadipi jo'ne maliaĝa uo'oe, da'me ja yala't jaa'me nalataĝanaqate, maliaĝa ja yaĝadiñi da'me 'yetetedac da'me ja no'en jo'ne jalchi'ena 'lonata'j, qama'le ja yaĝadiñi da'me netamenoto jogaa'me nepaqa'li choqogaa'me nouaq 'lonataqa jo'ne nequi'il 'me oro, uotaĝa plata, uotaĝa bronce, uotaĝa qa' uotaĝa ga'me epaq, naa'me naajo' ch'e nequi'il jo'ne ja yauana'ape, nataq'aen da'me ja domachiya'ape, choqoda'me ja yaqanate't ta'le yeuo'tape.

Apocalipsis 9:20 Referans Kwoze

Daniel 5:23

Nacherata da 'aue'en Ñim Nataxala' maye neto'ot na piguem, cha'aye 'auamaxasoxoneua'a co'ollaxa da qandouga so nquia'axala' aso ỹomaxaquipi, qataq aso nemaxanaqtepi maye lalamaqtepi añi atamnaxaqui, nache 'aualecta'aguet 'enauac som 'anamaxasoxoicpi da qanỹomiitapigui asomayepi, qataq 'avio'oxoreetac na atamnaxala'pi maye chegaqaigui na oro, plata, bronce, qataq na lcat, qataq na 'epaq qataq na coma', nam atamnaxala'pi maye saishet da nauaañi, qataq saishet da hua'aqa, qataq qaica ca ỹaỹaten. Qaq saishet da 'avio'oxoren Ñim Lo'onatac 'Enauacna maye huetaigui na lhuaq lauel da 'anachaalataxac, qataq nacheñi ñim chegoqchigui 'enauac nam 'auo'otpi.

Deuteronómio 31:29

Cha'aye aỹem saỹaten da qom seleu, nache qami' qauo'oche qome na qauempi, qataq qoquiỹa'ai da ñecỹaxac maye qami' samaxaleguete da qoquiigue, qataq da qami' taleguete qome ca qauem qanhuaxanaguiiqui, souaxat da qauo'oche ca qauem da qami' ỹauaachiguilo Ñim Nataxala', qataq da qauayeloqchichi Ñimaye.»

Apocalipsis 9:21

Nataqa'en ne'ena shiỹaxauapi saishet da ỹaxaañi da lalaataxanaxac, qataq saishet da ỹaxaañi da ldanaxanaxac; nataqa'en saishet da ỹaxaañi da lcachaxac, qataq da ncachetague' aca sa lhua.

1 Timoteo 4:1

So Saqcha'a Na'añaxac Qui'itta ỹataqta ỹataqtegue da la'aqtaxanaxac da ỹa'axattra'agueta caua pa'atre'c na'axa'te da huo'o qome na ỹaxaañi da lpi'iỹaxac Ñim Lo'onatac 'Enauacna. Cha'aye ỹatenachet na saqcha'a tenataxanaxaicpi, qataq ỹalaxaguet na lapaxaguenataxanaxacpi nam lamaxashecpi so pa'aguenataxanaxaic.

Hechos 19:26

Qalaxaye qami' mashe qauauañiichigui, qataq qaua'aqaichigui da se'eso Pablo, somaye 'eetega da na ne'enaqtacpi maye qanatameetacotpi maye maiche qaro'onatac, namayepi saishet da ỹoqta 'en da deca'alaqtaxan. Qaq somaye ỹataqta qalota na ỹañoxot da ỹa'amaqten dam 'eetega, qaq saishet da chaqnata na Éfeso, nataqa'en 'enauaque naua 'aleu' na 'alhua Asia.

Hechos 7:41

Nache som shiỹaxauapi ỹo'ot so le'enaqtac, 'eeta'am naqa'en na huaca llalec. Huaña, nache ỹalauat na shiguiỹacpi da ỹauo'o lachetaqtaxanaqte ỹavigaxatta da ỹanot, nache ỹataqta qaño'oxoreetapigui som maiche no'onatac.

Jeremías 1:16

Qaq 'era da nhuaxanaguec maye saneguet qome nam 'etaxaloxoicpi maye aỹem ca'ai co'ollaxa, maye ỹavigaxat naxa na lchenaxanaxat da ỹo'oxoreetac na chegaqauec atamnaxala'pi maye namayepi maiche lo'onatacpi.

2 Corintios 12:21

Qataq da seuennataxaatac, nache ỹataqta huo'o da icolanaxa da qom ivita da qami' ñamaqtegalo, nache Ñim Lo'onatac 'Enauacna ishet da ỹo'ot ca ỹa'aloxo cam ishet da aỹem nnoinaqchet, cha'aye qalota da qoñiita na saishet da ỹaxanec da lle'etaxaloxo qataq da ỹo'ottac da qauem, nachaqrata da ỹo'ottac dam sa qaishetapec, cha'aye huo'o na ñaq quetalec da ỹo'ottac da sa qaỹashen lataxac da qanayeetapeeguet aca sa nhua.

Jeremías 51:17

Qaq 'enauac na shiỹaxauapi qaica ca ỹaỹaanapec. Na nqolacpi qalaq ỹo'ot da lcoxo nam ỹo'ot namayepi, cha'aye choche ne'enaqtac maye natenataxanaxaqui qataq qaica ca lca'alaxa,

Hechos 17:29

Ỹoqo'oye nagui da ỹoqta 'en da qomi' llalaqpi Ñim Lo'onatac 'Enauacna, nache saishet da 'eeta'am ñaqa'enaq Ñimaye ca choche ne'enaqtac nqui'i maye chegaqaigui na oro, huo'otaq na plata qataq na coma' maye maiche lo'onatac ca shiỹaxaua ỹachegoxotchigui ca maiche lhuennataxac.

Mateo 21:32

Cha'aye anac so Juan maye nachelaxanataxanaq da yaqto' qami' ỹapaxagueneque ca lataxac da yaqto' no'on da qarataxaqui qataq qaualaqaiguet Ñim Lo'onatac 'Enauacna, qalaq qami' saishet da qaua'amaqchiñi somaye. Qalaxaye nam ỹacootapeeguet ana nsheetenaqte ca nta'a qataq anam quisheguetaxaipi ỹa'amaqten somaye co'ollaxa. Qalaxaye qami' na'aictaxa da qauauañiichigui 'enauac de'era, qalaxaye ñaqaiyeta saishet da qanaralaxache' naua qarhuennataxacolli', nachaqrata da nache qoquiito'ot da saishet da qaua'amaqchiñi somaye.

Jeremías 44:8

¿Ta'ainco' da Aỹem qanogoqcheche souaxat nam qauo'ocheetacpi, qataq qaỹa'añiỹot na qarchenaxanaxache maye ama na laita nam ỹaqa'a atamnaxala'pi ne'ena Egipto, maye qauanaiỹa co'ollaxa da qoñiỹalec? Qaq nam qauo'ocheetacpi nachena qome na maiche qami' ilaxachiguilo, qaq huaña nache qami' naloqnaxanaqa'ate nam qauem, qataq da qaica ca qara'amaqchiqui da qaualliquiitaigui 'enauac nam ỹotta'a't shiỹaxauapi ana 'alhua.

Jeremías 25:6

Qaq saishet qome da qoquiigue nam laỹepi atamnaxala'pi, saishet da qavio'oxoreñiitac qataq da qanatamñiitacot. Saishet qome da qanogoqcheche Ñim Nataxala' souaxat da qavio'oxoreñiitac nam atamnaxala'pi maye maiche qaro'onataqui, nache Ñimaye saishet qome da qami' namaxalo ca qauem.›

Jeremías 5:3

'Am Nataxala', 'Am 'anmittaique cam shiỹaxaua maye huesota da lataxac. 'Auauo'o co'ollaxa da nhuaxanaguec namayepi, qalaxaye saishet da iuet, qataq 'auachoxoren co'ollaxa, qalaxaye saỹaỹamaxaren da qaỹapaxaguen. Namayepi ỹataqta qaramchigui, napacalec ca coma', nache saishet da 'Am ỹe'eguelaxa.

Salmos 106:37

souaxat da ỹaneuo na llalecpi qataq ana llalepi, da yaqto' lachetaqtaxanaxat da ỹanot se'eso leguemaxaicpi atamnaxala'pi.

2 Crónicas 34:25

Cha'aye aỹem ca'ai namayepi, qataq ỹavigaxat so lchenaxanaxat da ỹaatacot so ỹaqa'a atamnaxala'pi, nache ỹo'ot da ỹataqta salemata, souaxat 'enauac nam ỹo'otpi, qaq ỹoqo'oye ỹataqta 'eroigui da ỹayeloxo, maye talec qome ne'ena 'alhua, nache saishet qome da 'om.

2 Reyes 22:17

Souaxat da aỹem ca'ai namayepi, qataq da ỹavigaxattac na lchenaxanaxat da ỹaatacot na ỹaqa'a atamnaxala'pi, nache ỹo'ot da ỹataqta aỹem ỹayeloqchet ne'ena ỹo'otpi. Ỹoqo'oye ỹataqta 'eroigui da ỹayeloxo, maye talec ne'ena 'alhua, nache saishet qome da 'om.

Deuteronómio 32:17

qataq da ỹanot na lachetaqtaxanaxat na saqcha'a qauemaicpi lma'na, nam atamnaxala'pi maye saq'en, qataq sa ỹauanapega co'ollaxa, nam dalaxaic atamnaxala'pi, qataq ñaq cheta'ague da yo'oq, maye so lta'alpi namayepi, saishet co'ollaxa da ỹo'oxoreetac.

Apocalipsis 16:8

Qataq jec so lỹa namaxashec piguem le'ec da icorelec so huetagui aso ỹomaxaqui añi nala', nache qoỹami' añi nala' da la'añaxac da yaqto' na le'eraxa ishet da ỹavigaxat na shiỹaxauapi.

Isaías 41:7

Na lo'o na ne'enaqtac qalaq ỹa'añaqchet ca lo'o na lcat plata, qaq ca nhuaxanaxanaqte lo'o qalaq ỹa'añaqchet ca do'onataxaatega ca nhuaxanaxanaxala', nache 'eeta': «¡Ỹaỹamaqchiguiñi na 'anapareetega't!» Qaq ime nache ỹauo'o ana ltoqnaqtepi clavos da yaqto' saishet da hua'axañi.

Isaías 2:8

Qataq na na'alhuapi nlaqaalec nam saq 'en atamnaxala'pi, nache na shiỹaxauapi natameetacot nam atamnaxala'pi, maye ỹauota'aisalo naua lhuaxaye qataq naua llaxaata co'ollaq ỹo'ottacpi.

2 Crónicas 28:22

Qaq na'aictaxa co'ollaxa de'era huaigui ncogaxanataguec so nta'a Ajaz, da nache queto'ot da sa ỹalaxaguet Ñim Nataxala'.

Levítico 17:7

Huaña, nache saishet da ỹe'eguelaxalec na Israel le'ecpi da ỹanot ca lachetaqtaxanaxat ca ỹaqa'a atamnaxala' maye ne'enaqtac, 'eeta'am na quetaq da lataxac, souaxat da ỹo'ottac da nquisheshaxac. Qaq 'era qome da nache 'eetai' lataxac da qoyecỹaxaqui, qataq ca qami' chegoxogueta.

Deuteronómio 4:28

Qaq huaña yemaye nache qami' ishet da qanatamñiỹot qome ca ne'enaqtacpi 'epaq, coma' maye sa nauaañi, saishet da hua'aqa, qataq saishet da deque'e, huo'otaq da huo'oi naua la'a'che, cha'aye maiche lo'onatac ca shiỹaxauapi.

Daniel 5:4

Qaq 'enauac somayepi da nỹomtapigui so lataxa qataq ỹo'oxoreetac nam natamnaxala'pi, maye chegaqaigui na oro, plata, bronce, lcat, qo'oipaq qataq na coma'.

Miqueas 5:13

Qataq selaxachigui nam 'anatamnaxala'pi qataq nam ne'enaqtacpi coma', yaqto' saishet da 'avi'eguelaxa da qaltaq 'anatameetacot nam ne'enaqtacpi maye maiche 'aro'onatacpi.

Apocalipsis 9:19

Qaq na la'araxashetpi se'eso caipi 'eeta'am na na'araxanaq, ỹoqo'oye ishet da ique'emaqchet na shiỹaxauapi. Qaq damaye 'eeta', so caipi huo'o da la'añaxac huetaigui na alap qataq na la'araxashet.

Apocalipsis 15:1

Qaq aỹem sela'a so hueto'ot na piguem ỹataqta sa qaỹauanapega: soua siete namaxa'she piguem lashe', ỹacheta'ape soua pa'atre'c napaxaco maye talec naqa'en qome ana 'alhua. Qaq qom ime de'era, nache da layeloxo Ñim Lo'onatac 'Enauacna vi'iiguet.