Apocalipsis 6:9 - La'aqtaqa Ñim Lo'onatac 'Enauacna 2013

⁹ Qaq se'eso Qagueta Llalec can qaltaq ivita da nqat aso cinco soua na'anaxanaqtel, nache sela'a da som qaỹalauatpi co'ollaxa, souaxat da ỹa'axattac da la'aqtac Ñim Lo'onatac 'Enauacna, hueto'ot aso nca'atoxonaxalate.

Nuevo Testamento Toba Sur

⁹ Qaq se'eso qagueta llalec can qaltaq nqat aso lÿa n'anaxanaqte, nachi sela'a na lqui'ipi nam qaÿalauat co'ollaxa, souaxat da ipacchigui da i'axattac da l'aqtac ñi Dios. Qaq namayipi hueto'ot na pa'aguiñi aso nca'atoxonaxalate.

Nuevo Testamento Toba Sombrero Negro

⁹ Mane'e ca'li ñe'me 'Naĝanaĝate Lec'oĝot naqat jajo'me quinto 'nanaĝanaqate, qama'le jauanalo dia'me uetedo'ot ga'me p'añe ga'me nec'atoĝonaĝala', jodia'me jo'ne joote qoyala't ca'li, yajouaĝat da'me ja yaĝadiñi da'me 'yaĝatetedac joñe'me Dios.

Apocalipsis 6:9 Referans Kwoze

Apocalipsis 20:4

Qaq can ime, nache sela'a aso so'onaxaquipi. Qaq asomayepi nso'ootangui som qaỹalauatpi co'ollaxa, souaxat da saishet da ỹaxanec da lpi'iỹaxac So Jesús, qataq da la'aqtaxanaxac Ñim Lo'onatac 'Enauacna. Somayepi nacheso so saishet da ỹo'oxoren so shiguiỹac leguemaxaic qataq som ne'enaqtac maye lqui'i somaye, qataq saishet da nasheneguet aso la'anaxanaqte da yaqto' qaỹa'an na latap, qataq na lhuaq. Qataq sela'a somayepi da qaltaq nca'alec, nache Ñim Lo'onatac 'Enauacna ỹami' da lo'onataxanaxaua Ñim Lca'aguishec Ñimaye, choche iviraxattraue'c caua mil vi'iye.

Juan 16:2

Qami' qaỹamaqraue'c qome da huaigui ana napaxaguenaxaquipi na judiopi, qataq ivira'a qome ca na'a'q da huo'o ca qami' ỹalaua't, nache camaye ipi'itaxaatega da ỹo'ottac dam 'eetapeguec Ñim Lo'onatac 'Enauacna.

Apocalipsis 1:9

Aỹem Juan, maye maiche aỹem qarỹai da sa'amaqtenaqtac So Cristo, cha'aye qami' qataq aỹem huo'o da qarpi'iỹaxac Somaye. Qaq souaxat da ỹataqta huo'o da ipi'iỹaxac Somaye, nache ñeuanaua'a da lo'onataxanaxac Ñim Lo'onatac 'Enauacna 'eeta'am 'enauac da qoñiita: Qataq nataqa'en huo'o da ñeqalanaxac da satata'aguet na lqalaic, sheeta'ama qami'. Qalaxaye nataqa'en huo'o da ỹa'añaxac maye aỹem ỹami' Ñim Lo'onatac 'Enauacna da yaqto' ñala'aguet ne'ena que'eenaxacpi. Qataq souaxat da sa'axattac da la'aqtac Ñimaye qataq da sa'axattac So Jesucristo, nache aỹem qaỹamaxauga ana ỹaqa'ata 'alhua maye le'enaxat Patmos.

Apocalipsis 2:13

Aỹem saỹaten da qoueta'a nam nỹecpi maye netaña añi nso'onaxaqui so pa'aguenataxanaxaic. Qalaxaye na'aictaxa da nache 'eetec de'era qalaq nache 'ena'am qoqueto'ot da huo'o da qarpi'iỹaxac Aỹem. Qataq saishet da 'axaañi da Aỹem 'aua'amaqteetac, na'aictaxa co'ollaq da huaña ne'ena nỹecpi maye qoueta'a da qaỹalauat so Antipas, som nache 'eetai' naxa da ỹachaxaata da lpi'iỹaxac Aỹem.

2 Timoteo 1:8

Ỹoqo'oye saisheto' da 'ancoxolec da 'aua'axatec So Qarataxala' Jesús. Nataqa'en saisheto' da huo'o da 'arcoxo, souaxat da aỹem qaicoñettai', sasoilec Somaye. Nachaqrato' da 'anhuanaua'a de'era que'eenaxac souaxat da no'on na'axaỹaxac maye chegaqaigui da nca'alaxa, qaq Ñim Lo'onatac 'Enauacna 'am itaunec qome da 'ara'añaxac da yaqto' 'anala'aguet 'enauac ne'ena 'anque'eenaxacpi.

Apocalipsis 16:7

Nataqa'en sa'axaỹa so nvilỹaxac chemaqteua'a aso nca'atoxonaxalate, 'eeta': «Aja', 'am Ỹataxala' maye 'Aro'onatac 'Enauacna, qataq qaica ca 'auqalanapec, ne'ena 'arhuaxanaxanaxacpi ỹataqta ỹaỹamaqchiguiñi qataq 'eesa.»

Apocalipsis 14:18

Qaq aso nca'atoxonaxalate, nache chegoqtelec so lỹa namaxashec piguem le'ec maye hueto'ot da la'añaxac na norec, nache 'enapega so namaxashec lỹa piguem le'ec maye ỹachetac so lpetegaxanaxat maye ỹataqta ỹaxaraic 'eeta': «¡Ña 'aquesoxoñi na 'arpetegaxanaxat maye ỹataqta ỹaxaraic! Ime, qaq 'alapona't ana ltaxale ana uva maye huetalec ana 'alhua, cha'aye anamaye mashe ỹataqta ỹeta.»

Filipenses 1:23

Ỹataqta huo'o da lqalaic ñaqa'en cam ỹoqta lleca'ateua'alo ne'enaua dos. Cha'aye huo'o da lỹa iuennataxa maye 'eeta': Aỹem ñeshetaique da seleu yaqto' ñeqo'ona So Cristo. Cha'aye damaye ỹataqta ỹactec da 'onaxaic ñaqa'en.

2 Corintios 5:8

Qataq saishet da saquicoqtac, na'aictaxa da huo'o da qaryaxa da qolaqa'ai de'era qaro'ocỹaxac da qolaq da souaqta'aguet So Qarataxala'.

Levítico 4:7

Qataq ỹa'ame'n naua lsheeneqa ñeua lcoue añi lca'atoxolate na nchenaxanaxat maye ama na laita maye netaigui ñi npe'l. Qaq ca no'onañi ltago'q ca huaca llalec, nache icorot na pa'aguiñi añi nca'atoxonaxalate da huo'o na qaỹavigaxat maye netaña ye ñegueuo ñi npe'l.

Apocalipsis 19:10

Nache aỹem sa'aroto naua illecte so namaxashec piguem le'ec da yaqto' sho'oxoren, qalaxaye somaye aỹem 'enapega, 'eeta': «¡Saishet da nache qonetec de'era! No'on da 'avio'oxoren qome Ñim Lo'onatac 'Enauacna, cha'aye aỹem nataqa'en so'onataxaatacot sheeta'am 'am, qataq 'enauac nam queto'ot da ỹa'amaqteetac da na'aqtaxanaxac maye chegoqo'ot So Jesús.» Cha'aye de'era la'aqtaxanaxac So Jesús, maye ỹapaxaguenec namayepi nachera da ỹa'añaqchet na shiỹaxauapi, yaqto' nache queto'ot da ỹa'axattac damaye.

Apocalipsis 8:3

Ime, qataq anac so lỹa namaxashec piguem le'ec, nasoqta'a aso 'eeta'am ana ỹomaxaqui late'erai maye chegaqaigui na oro, qaq asomaye huetagui so qalota nchenaxanaxat maye ama na laita, da yaqto' ỹavigaxat da datato'ot aso nca'atoxonaxalate, lỹateuo naqa'en da nqouagaxaunaxac 'enauac na lalamaxatpi Ñim Lo'onatac 'Enauacna.

2 Timoteo 4:6

Da ñachaalataxac mashe qoỹanot Ñim Lo'onatac 'Enauacna, 'eeta'ama caua ntago'q da qaicoreleguete aca nca'atoxonaxalate. Cha'aye mashe saqaỹapeque ye laloqo' da ñachaalataxac.

Apocalipsis 9:13

Qaq co'ollaq ivita so seis soua siete namaxa'she piguem lashe' da ỹashiiyigui aso lasheere. Nache sa'axaỹa so na'aqtac chemaqchiguingui na laiñi soua cuatro lcoue aso nca'atoxonaxalate maye chegaqaigui na oro maye netaña ye naloteuga Ñim Lo'onatac 'Enauacna.

Filipenses 2:17

Qami' ỹataqta qaua'amaqchiñi Ñim Lo'onatac 'Enauacna qataq qauo'onataxañiitacot, qaq damaye 'eeta'am aca qarachetaqtaxanaqche. Qaq saiuena'a da aỹem qaỹalauat, nache que'eca ileuaxa ỹalectaigui aca qarachetaqtaxanaqche maye qaỹa'añiỹot Ñim Lo'onatac 'Enauacna. Qaq da sevira'aguet de'era, nache ỹataqta samachiguiñi qataq sauotaique da qami' ñetonaxau'.

Génesis 4:10

Nache Ñim Nataxala', 'enapego' somaye, 'eeta': «¿Ta'ainco' da 'auo'ot de'era? Cha'aye naua ltago'q so 'arqaỹa, maye 'aucoreleguete ana 'alhua, aỹem ỹa'alaqto'oto da so'oteque ca nalochiguiñi lataxac.

Éxodo 29:12

Ime, nache 'auacona aca laỹe' ca ltago'q ca huaca llalec, nache 'aua'ayingui ana 'aya'axaata, nache 'aua'ame'n naua lcoue aca nca'atoxonaxalate, qaq ca no'onañi que'eca ntago'q nache 'aucorot na pa'aguiñi acamaye.

Hebreos 12:23

qaq nache hueta'a nataqa'en 'enauac nam ỹamata'ac da lalamaxat llalaqpi qataq nam ỹami' da ishet da hueta'a yemaye. Qami' mashe qanquiquiiua'a Ñim Lo'onatac 'Enauacna ñim nmit qome 'enauacna. Nataqa'en mashe qanquiquiiua'a da saqcha'a lca'alaxa so no'on shiỹaxauapi maye Ñim Lo'onatac 'Enauacna naloqchiichiguiñi naqa'en da lataxac.