Apocalipsis 22:3 - La'aqtaqa Ñim Lo'onatac 'Enauacna 2013

³ Qaq yi'iye nỹecpi qaica da hueta'a ca sa ỹaỹamaxaren Ñim Lo'onatac 'Enauacna. Yemaye, nache hueta'a añi nso'onaxaqui Ñim Lo'onatac 'Enauacna qataq Ñim Qagueta Llalec, qaq nam lo'onataxanaxanecpi Ñimaye, nache ỹo'oxoreetac.

Nuevo Testamento Toba Sur

³ Huaña yimayi, nachi sa ishit da huo'o ca qaÿauo'o ca nhuaxanaguec. Qaq aca nso'onaxaqui ñi Dios qataq so qagueta llalec nachi netaña yimayi. Nachi nam lamaxashicpi ñimayi nachi ÿi'oxodeetac.

Nuevo Testamento Toba Sombrero Negro

³ Chane'eja male qaya'te ta'le 'uo ga'me jo'ne qoya'uo ga'me ne'uaĝanaguec. Da'me lejaliaqa' joñe'me Dios, choqoñe'me 'Naĝanaĝate Lec'oĝot nach'e ena'am neta'ña jodi'me noic, qama'le jogaa'me mach'e lalemaĝaje'te male 'nonaĝachidegue joñe'me.

Apocalipsis 22:3 Referans Kwoze

Mateo 25:21

Nache so ỹale 'enapeco': «¡Ỹataqta 'am ỹo'oxoraq! Cha'aye 'am no'on namaxashec, qataq ishet da 'am qaipi'iỹa'a. Cha'aye 'am ỹataqta 'antela'a som saq 'amaqtaq maye 'am sami', qaq nagui aỹem 'am sepataxalec cam ỹactec da llo'oxoyec. Qaq nagui, nache no'on da sauoqo'o ca qayo'oxonnataxanaxac.»

Juan 12:26

Qaq da huo'o ca nshetaique da Aỹem do'onataxanot, qaq no'on da Aỹem quegue, qaq ca Aỹem soota'ague, nache camaye nataqa'en hueta'a. Da huo'o ca Aỹem do'onataxanot, nache Ñim Ita'a ỹauo'o qome da llo'oxoyec camaye.

Juan 14:3

Qaq qom mashe ime da ashec da seqataxanai' ca qarmaye, nache qaltaq ñe'eguelaq da qami' saue'c, yaqto' qami' nache 'eetai' da Aỹem qoviita'aguet que'eca soota'a.

Zacarías 14:11

Aja', ye Jerusalén qaltaq ỹe'eguelaxa qome da qanayenalec, nache saishet da qaltaq qailaxachigui. Nache nam hueta'a qome yemaye ỹataqta qaica ca ndaqtaique.

Ezequiel 37:27

Qaq Aỹem sootangui qome namayepi, qaq nachaỹem qome da Aỹem Natamnaxala', qaq namayepi ỹalamaxatpi qome.

Salmos 17:15

Qalaxaye aỹem, qom saỹaten da qaica ca sasouaxat nache samachiguiñi da selogui da 'arashiguiỹaxac, na'aictaxa da choche 'am samato'ot da ñelouec.

Salmos 16:11

Qataq aỹem 'auachaxana da llec da achaalataxac, qataq aỹem nlaqchigui 'anqa'en da ñetonaxac da 'am soota'aguet qataq nache 'eetai' da ỹamaicỹaxac da soota'ague na 'oic.

Isaías 12:6

Qauo'onaxañi qataq qantoñiỹapigui' qami' maye qarma'ai na Sión, cha'aye Ñim Qui'itta Natamnaxala' so Israel maye qami' netanguilo ỹataqta lta'araic da la'amaqchec.»

Mateo 25:41

Ime, nache shenapega na qauem da lataxac, sheeta': «¡Aỹem qoquiỹa'ai! Cha'aye Ñim Lo'onatac 'Enauacna 'oonolec da iqataxaatapigui' qauem maye qami' taleguete. Qanqo'oñiuga yem chochaq tatec norec maye iqataxaatai' Ñim Lo'onatac 'Enauacna, da yaqto' ỹasaxangui so pa'aguenataxanaxaic qataq nam lamaxashecpi.

Juan 17:24

'Am Ita'a, naua Aỹem ca'attegueto naamaye Aỹem 'aỹa'anema, qaq ỹoqo'oye ñeshetaique da naamaye Aỹem hueta'agueta cam soota'a, yaqto' ỹauaachigui cam na'añaxac maye Aỹem 'aỹa'anem. Cha'aye nale'ena co'ollaxa da ỹataqta Aỹem 'auauotec co'ollaq saxanaqaca ana 'alhua.

Deuteronómio 27:26

Ỹataqta qauem qome ca talec nhuaxanaguec ca shiỹaxaua da qaica ca 'enec naqa'en ne'ena nqataxacpi, qataq saishet da ỹo'ot. Nache 'enauac qome na nhuo' le'ecpi, 'eeta': Aja', nache 'eetec.

Ezequiel 48:35

Qaq cam mpaqtaxanaxat da ima'a't qome nache ivi' nueve mil metros ye lalogaxa, qaq dam le'enaxat qome que'eca huaqta'a't nỹecpi qalaq, 'eeta': «Ñim Nataxala' hueta'a ne'ena.»

Isaías 51:11

Qaq 'era da 'eetec nataqa'en qome nam lca'alaqtacpi Ñim Nataxala', ỹa'alaqtagui da ntonaxac qom inoxoneua'a ye Sión, da lasheguiỹaxac qalaq nache 'eetai' qome da machiguiñi, cha'aye ỹanata da lamaicỹaxac qataq da na'achecỹaxac, qaq imeuo qome da nqui'ic qataq nnoinaxac.

Apocalipsis 7:9

Qaq can ime de'era, nache aỹem sela'a so qalota shiỹaxauapi maye ỹotta'a't na chegaqa'a 'alhuapi, qataq ỹotta'a't da lo'oxoỹaxac, qataq ỹotta'a't naua la'aqtaqa. ¡Somayepi ỹataqta qalota, qaica ca ishet da naloqten! Qaq somayepi nachattaua'a ye hueta'a aso so'onaxaqui qataq So Qagueta Llalec, ỹaatrañi naua alogo lapagaxaiqa, qataq lasoqta'a ana chaic laue.

Apocalipsis 7:10

Qaq somayepi ỹa'alaqtagui, 'eeta': «Qomi' nca'alaxatre'c Ñim Qarta'a maye Lo'onatac 'Enauacna, maye nso'ootangui añi so'onaxaqui, qataq Ñim Qagueta Llalec.»

Juan 13:32

Qaq da ne'ena Shiỹaxaua Llalec da ỹachaxan da llo'oxoyec Ñim Lo'onatac 'Enauacna, nache Ñimaye nataqa'en ỹachaxan qome da llo'oxoyec namaye, qaq mashe saqaỹaloq da ỹachaxan damaye.