27 Qalaxaye saishet da inoxoneua'a yemaye ca nshepaxan maye sa ỹaỹamaxaren Ñim Lo'onatac 'Enauacna; qataq saishet da inoxoneuo nam ỹo'oxoreetac nam qanatameetacotpi maye saq 'en, nachaqnata na nanettaua'a aso lere Ñim Qagueta Llalec. Asa'aso nere nanettaua'a na le'enaxatpi nam ỹaconeguet cam nca'alaxa maye chochaq tatec.
27 Qalaxayi sa ishit da inoxoneu'a yimayi ca nshipaxan, huo'otaq ca ncocatapiguilo naua n'onataxaco, huo'otaq ca datenataxan, chaqcata ca qoÿittau'a ca l'enaxat aso lede so qagueta llalec asom nanedaxalate nam chochaq tateec da lca'alaxa.
Ñaq 'anlouec 'am Sión, ñaq 'anlouec, ñaq 'auauo'o da 'ara'añaxac, 'am Jerusalén, huaqta'a't nỹecpi maye qui'itta, 'aỹa'aayiñi naua 'ogo maye ỹataqta 'onaxaiqa, cha'aye na shiỹaxauapi maye ỹaqa'a da la'amqaanataxanaxac qataq nshepaxan da lataxac, namayepi saishet qome da ỹe'eguelaxalec da 'am huenoxoneua'a.
Qaq nam saishet da iqallem na lqalaiguesat qataq saishet da ỹaxanec da lpi'iỹaxac Aỹem, nache sanaxanaxanguilo caua alogo lapagaxaiqa, qataq saishet da sapalaxat ca le'enaxat maye nanettalec aca nere maye naneraxalate na qanca'alaxatec. Qataq sa'axatem Ñim Ita'a qataq na lamaxashecpi maye do'onataxaatacot Ñimaye.
Qaq yemaye nache ỹa'axasosoolec qome ca nqa'aic maye le'enaxat «Nqa'aic Qui'itta». Qaq nam shiỹaxauapi maye saishet da qui'itta, qalaq saishet qome da ỹañoxot da quegue camaye, qataq nataqa'en nam qaica ca ỹaỹaana'a saishet qome da quetague' camaye.
Aỹem Shiỹaxaua Llalec samaq qome na ỹamaxashecpi da yaqto' nqateeguesop da ỹo'onataxanaxac 'enauac nam shiỹaxauapi maye qauem na ỹo'ottac qataq ỹayen na laỹepi da nataqa'en ỹo'ot ca qauem.
Huaña qome, nache qauaỹachiñi da aỹem Nataxala' maye Qanatamnaxala'ai, soota'a na Sión, anam ỹataqta qui'itta ñeqasoxonaxa, nache na Jerusalén ỹataqta qui'itta qome, qataq saishet da ỹe'eguelaxa da loxonec nam chegaqauecpi.
Qaq ỹoqo'oye Aỹem Nataxala', shenapec: Saishet qome da huenoxonoigui añi ỹalamaqte atamnaxaqui cam chegaqauec maye saishet da huetaigui da ntoonaxac, qataq da lo'ocỹaxac dam la'anaxat da ñaỹamaxataxac, qataq ivira'a cam chegaqauec maye ỹalectaigui na Israel le'ecpi.
Cha'aye qami' qauaỹaañita da ca ncachetague' aca sa lhua, huo'otaq ca ỹo'ottac ca deshepaxanaqtaxan, huo'otaq ca saishet da machiguiñi na'aictaxa da qalota na hueto'otpi, camaye saishet da inoxoneua'a da lo'onataxanaxac So Cristo qataq Ñim Lo'onatac 'Enauacna. Cha'aye nam ỹo'ottacpi ỹataqta qauem 'eeta'am da qanatameetacot ca choche ne'enaqtac qataq saq 'en.
Qaq 'enauaque naua na'axa'te da huaiguilo da ñequigaxatta'a't, 'enauac na qauemaicpi maye netalec ana 'alhua, nache ivitta'a da nmichiguiñi ñaqa'en na qauemaicpi, maye netaigui na huaqta'a't nỹecpi maye lalamaxat Ñim Nataxala'.
Qalaxaye nam colanqaicpi, qataq nam saq pi'iỹa'a Aỹem, qataq nam ỹo'ot nam qauem maye sa saỹamaxaren qataq nam ỹalauat ca lỹa qataq nam huetapeeguet aca sa lhua maye saq qaỹashen da qaỹo'ot, qataq nam napaxagueetega da naconaxanaxac qataq nam ỹo'oxoreetac nam qanatameetacotpi maye saq 'en, qataq nam tenataxanaxaicpi, 'enauac qome namayepi qaỹasaxangui ca lta'araic norec maye huaña da ỹavictaigui na quiquiaxaraic. Huaña, nache chochaq tatec da saishet da nauane' Ñim Lo'onatac 'Enauacna.»
Qaq se'eso shiguiỹac leguemaxaic, na shiỹaxauapi maye huetalec ana 'alhua ỹataqta ỹo'oxoreetac somaye, nam saishet da nanettalec ca le'enaxat aso lere Ñi Qagueta Llalec maye qaỹalauat co'ollaxa. Asa'aso nere asomaye qaỹo'ot co'ollaq saxanaxa da ỹo'ot ana 'alhua Ñim Lo'onatac 'Enauacna, qaq asomaye nanettalec 'enauac na le'enaxatpi nam chochaq tatec da lca'alaxa.
No'on da ỹataqta qanpogoxoiñiỹapegue' da qaulaquiitapiguiñi, qataq qaualaqaiguet Ñim Lo'onatac 'Enauacna, cha'aye da saishet da nache qoñiitec de'era, nache saishet da ivira da ỹataqta qauloito'ot Ñimaye.
Nache sela'a 'enauac nam ileu co'ollaxa nam qaica ca la'amaqchec qataq na 'añaxaicpi, nachattaua'a aso so'onaxaqui. Huaña, nache qaỹauachigui aso nerepi maye nanettalec nam ỹo'ot ñim 'oonolec shiỹaxaua. Nataqa'en qaỹauachigui aso lỹa nere maye naneraxalate nam qanca'alaxatec qataq chochaq tatec da hueta'aguet Ñim Lo'onatac 'Enauacna. Qaq nam leuaxaicpi qanmit ñi 'oonolec qaipagaqchiichigui nam ỹo'otpi maye nanettalec asa'aso nerepi.
Qaq huaña qome nache 'enauac nam 'arhuo' le'ecpi no'on da lataxac, qataq nache 'eetai' qome da lalamaxat ne'ena 'alhua, nache namayepi 'eeta'am qome da llaxataxa aca nañiguishe maye maiche saañi, maye sauota'aisalo naua ihua'q da so'ot, da yaqto' ỹachaxan da ỹo'oxoyec.
Nache 'enauac qome ana taxaquipi maye hueta'a ye Jerusalén, qataq ye Judá, da qaiỹotauga da lalamaqte Ñim Nataxala' maye Qaica ca Ỹaqalanapec. Qaq cam ỹo'ot aca lachetaqtaxanaqte, qalaq do'onataxana da ỹaneuaq nam lapat nam shiguiỹacpi maye ỹaneuo da lachetaqtaxanaxat. Qaq que'eca na'a'q, qaica qome na nmenaxaicpi maye hueta'a naxa añi atamnaxaqui, maye lalamaqte Ñim Nataxala' maye Qaica ca Ỹaqalanapec.
Qaq 'enauaque caua na'axa'te da hueta'ac da nhuetaxanaxa maye nchega naqa'en na lo'oc ca shiỹaxaua, nache saishet da qui'itta. Ỹoqo'oye qaiỹotauga da tauga ca pa'auec ca nanataqa' maye qanayiutaña, qataq nache 'oonolec camaye.»
Ỹoqo'oye nagui 'am ñachoxonnot da choche 'auchoxoren da 'auapalaxat de'era lasouaxashet yemayepi. ¡Qaq qom saishet da 'auchoxoren yemayepi, nache no'ono' da 'auapalaxat qome da ỹe'enaxat maye 'ettalec aca 'ere!»
Qalaxaye saishet da qantoñiitapeguec da mashe qami' ỹalaxagueta na saqcha'a na'añaxac leguemaxaicpi, nachaqrata qome da qantoñiitapeguec da mashe qoỹettauo da qare'enaxache da piguem.
Qataq ca ỹale da ncachetague' aca sa lhua, huo'otaq ca maiche lỹa 'eeta'am ỹale, nataqa'en ca decachiỹa ca lỹa da imen, nataqa'en ca tenataxanaxaic, qataq ca ỹa'axat ca 'eetega lataxac, qalaxaye choche datenataxan. Qaq da ỹoqta 'eetapeguec ne'ena namaxasoxonaxacpi nshetaique da ỹaỹamaxaañi nam dataỹa'aguet dam ỹataqta ỹaỹamaqchiguiñi napaxaguenataxanaxac